1-2. (a) Thenge la Salamo 37:3, 4, pine nemene matre nyipiewekë tro la itre ka xötrei faipoipo a catre lapaune koi Iehova? (b) Nemene la hne së hna troa ce wang?

 HAPEU, epuni kö la ketre ka xötrei faipoipo, maine epuni a troa ikötresae pena? Maine eje hi, epuni a trengeneune la ijine troa ce mele madrin memine la föi epun. Ngo eje hi laka, tha ka hmaloi kö la mele ne trefën, nge hetre mekun nyine tro epon a axeciëne hnyawa, wanga troa hetre ethane kowe la mele i epon elany. Maine tro la lue trefën a mejiune koi Iehova, tro hë nyidroti a axecië mekune hnyawa, me caas, me mele madrin. Ngo maine tha trongëne kö nyidroti la itre trepene meköti Iehova, tha tro hë nyidroti a madrin.—E jë la Salamo 37:3, 4.

² Nyipici laka, hna eköthe la tane mekun celë kowe la itre ka xötrei faipoipo. Ngo ijije hi troa kepe eloine hnene la itre xaa trefën. Tro fe sa ce wang la itre hna melën hnene la itre xaa hlue i Akötresieti ekö me enehila. Celë hi itre ini ka troa xatua së ngöne la mele së, tune la mele ne trefën.

3-4. Nemene la itre jol hna cile kow hnene la itre ka xötrei faipoipo?

³ Maine jë, tro la itre kem me thin me itre sinee a canga upe la itre ka xötrei faipoipo troa hnaho maine itö hnalapa pena me nyialiene ej.

⁴ Maine tha hmeke kö la lue trefën, tha tro hë nyidroti  a axecië mekun hnyawa, nge tro ha tru hnei gufa i nyidro. Nemene hë la pun? Tro la lue trefën a huliwa catr matre troa të la itre gufa. Pëhë traeme i nyidro troa ini tusi caas, me kuca la hmi ne la fami, me cainöj, me sine la itre icasikeu. Eje hi, tha ijiji nyidroti hë troa hane öhne la itre manathith ka tru qa ngöne la hna catre huliwa koi Iehova.

5. Nemene la hna melën hnei Klaus me Marisa?

⁵ Alanyimu la ka qaja ka hape, pëkö madrin hna kapa qa ngöne la hna huliwa catr matre hetre mo. Celë hi lai hna melën hnei Klaus me Marisa. * Thupene la nyidroti a faipoipo, hnei nyidroti hna huliwa i maseta ngöne la drai ka pexej, matre troa hetre mele ka loi. Ame pe, tha madrine kö nyidro. Öni Klaus: “Ngacama tru la itre mo, ngo gufa la mele i nyio ke, pëkö hnei nyio hna kuca koi Akötresie. Nyio a hnehengazo me kucakuca.” Maine jë, hnei epuni fe hna catre huliwa koi maseta matre hetre mele ka loi. Ngo epuni a öhne laka, ka gufa la mele cili, nge tha madrine kö epun. Ame pe, the hnehengazo menu kö. Troa xatua epun hnene la itre tulu ne la itre hlue i Akötresieti ekö me enehila. Tro sa pane ce wang la itre ini hna xom hnene la itre trahmany qa ngöne la tulu i Iehosafata joxu.

6. Ame la Iehosafata joxu a cile kowe la ketre jol ka tru, nemene la aqane trongëne angeic la hna qaja ngöne Ite Edomë 3:5, 6?

⁶ Itre trahmanyi fe, maine jë, jole koi epun troa xome la itre hnëqa ka nyimutre. Tro la tulu i Iehosafata joxu a xatua epun. Eje hi, hnëqa i Iehosafata joxu troa thupëne la nöj! Nemene la hnei angeic hna kuca? Hnei Iehosafata hna ekögölithe hnyawa la traon e Iudra me eköth la ketre trongene isi ka tru, ka traqa koi 1 160 000 lao sooc. (2 A. l. ite jo. 17:12-19) Ame e thupen, hna traqa la ketre jol ka tru. Hnene la trongene isi angetre Amona me Moaba me itre xan qa ngöne la wetr e Seira hna thel troa lepe la traon. E cili, Iehosafata a xou me hnehengazo kowe la nöj me kowe la itre sinee i angeic. (2 A. l. ite jo. 20:1, 2) Ngo nemene la hna kuca hnei Iehosafata joxu? Hnei angeic hna trongëne la hna qaja ngöne Ite Edomë 3:5, 6. (E jë.) Ame ngöne 2 Aqane lapa ite joxu 20:5-12, hnei angeic hna thithi koi Iehova, me sipo Nyidrë troa aegöcatrenyi angeic. Nemene la hna kuca hnei Iehova?

7. Tune kaa la aqane sa Iehova la thithi Iehosafata joxu?

⁷ Hnei Iehova hna upi Iaziela, ketre atre Levi troa qaja koi Iehosafata ka hape: “Tha tro kö nyipunie a ishi, catejë, cileju, mate öhnejë la iamele i Iehova thatraqai nyipunie.” (2 A. l. ite jo. 20:13-17)  Maine jë, tha ka inamacane kö la hna qaja hnei Iaziela. Ngo tha qaathei atre kö la itre hna amekötin celë, ngo qaathei Iehova! Celë hi matre, hnei Iehosafata hna mejiune koi Iehova me idrengethenge. Ame la Iehosafata joxu me trongene isi angeic a mejë troa isi, hnei angeic hna acile la itretre nyima qëmeken, ngo pëkö jiane isi angatr. E cili, hnei Iehova hna eatrëne la hnei Nyidrëti hna thingehnaean me ngaan la ithupëjia me Iehosafata.—2 A. l. ite jo. 20:18-23.

8. Tune kaa la aqane tro la itre trahmanyi a nyitipu Iehosafata joxu?

⁸ Itre trahmanyi fe, Iehosafata joxu la ketre tulu ka lolo. Nyipici laka, hnëqa i epun troa nyihnyawane la mele ne la fami epun. Celë hi matre, epuni a kuca la hnei epuni hna atrein matre troa thupë angatr. Ngo ame ngöne la itre jol, epuni a mekun laka, ijije hi tro epuni a nyinyine itre ej. Ame pe, tha tro kö a mejiune kowe la sipu trengecatre së. Loi e tro pe a sipo ixatua koi Iehova ngöne la thith. Nge ame la epuni a ce thith memine la föe i epun, qaja amamane jë la itre jol. Ketre, loi e tro epuni a ithel me trongëne la itre eamo i Iehova e hnine la Tusi Hmitrötr me itre itusi së. Maine jë, tro itre xan a mekun laka, tha ka inamacane kö la aqane axecië mekune i epun. Ame koi angatr, nyipiewekë troa hetre manie me mo. Ngo goeëne la tulu i Iehosafata joxu. Hnei angeic hna catre lapaune koi Iehova, nge tha hnei Iehova kö hna nuaxöji angeic. Ketre tune fe, tha tro kö Iehova a nuaxöji epun. (Sal. 37:28; Heb. 13:5) Tro sa ce wang la nyine troa kuca hnene la lue trefën matre troa mele madrin.

9. Nemene la hna kuca hnei Isaia me föe i angeic?

⁹ Hnei Isaia me föe i angeic hna amë panëne la huliwa i Iehova ngöne la mele i nyidro. Ame Isaia ke, ketre perofeta angeic. Nge hna hëne la föe i angeic ka hape, “perofeta föe” matre hetre hnëqa i eahlo fe. (Is. 8:1-4) Hnei nyidroti palahi hna amë panëne la huliwa i Iehova ngöne la mele i nyidro. Drei la ketre tulu ka lolo kowe la itre trefën enehila!

10. Pine nemene matre nyipiewekë tro la itre trefën a inine la itre hna perofetan hnei Tusi Hmitrötr?

¹⁰ Itre trefën ka xötrei faipoipo, nyipiewekë tro epon a amë panëne la huliwa i Iehova ngöne la mele i epon, tui Isaia perofeta me föe i angeic. Loi e tro epon a ce inine la itre hna perofetan hnei Tusi Hmitrötr, matre acatrene la lapaune i epon koi Iehova laka, ka eatr palahi la itre hnei Nyidrëti hna qaja. (Tito 1:2) Ketre, jëne la ixatua i epun, kola eatr la itre xaa hna perofetan, tune la hna perofetan hnei Iesu. Eje hi, easa catre cainöjëne la maca ka loi e cailo fen ngöne la ijine la pun. (Mat. 24:14) Itre ka xötrei faipoipo, maine xecie koi epun laka, tro palahi a eatr la itre hna qaja hnei Tusi Hmitrötr, tro hë epuni a catre huliwa koi Iehova.

11. Nemene la hna kuca hnei Perisila Me Akula, nge pine nemen?

¹¹ Itre ka xötrei faipoipo, hanawang la tulu i Perisila me Akula, lue trefën ne Iudra ka mele e Roma. Hnei nyidroti hna dreng me kapa la maca ka loi me xötrethenge Iesu. Maine jë, lolo me madrin  la mele i nyidroti e Roma. Ngo hnei Kalaudio, ketre atre musi e Roma, hna amekötin troa helëne la angetre Iudra. E cili, hnei nyidroti hna saze la mele nyidro. Hnei nyidroti hna thele hnalapa, me cane la itre uma mano matre salemëne ngöne la ketre traon. Hapeu, hnene kö la itre jole cili hna sewe Perisila me Akula troa amë panëne la Baselaia? Waea. Hnei nyidroti hna ce huliwa me Paulo e Korinito me ithuecatre kowe la itre trejin ne la ekalesia. Hnei nyidroti fe hna cainöj ngöne la itre xaa traon gaa aja ixatua. (Itre hu. 18:18-21; Rom. 16:3-5) Eje hi, lolo me madrin la mele ne trefëne i nyidro!

12. Pine nemene matre nyipiewekë tro la itre trefën a canga mekun la itre nyine troa eatrën ngöne la huliwa i Iehova?

¹² Tui Perisila me Akula, nyipiewekë tro la itre ka xötrei faipoipo a amë panëne la Baselaia ngöne la mele i nyidro. Loi e tro nyidroti a canga ithanatane la itre mekun göne la huliwa i Iehova, qëmekene troa faipoipo. Maine tro nyidroti a ce axecië mekun me thele troa eatrën itre ej, tro hë nyidroti a öhne la ixatua i Iehova ngöne la mele i nyidro. (Ate cai. 4:9, 12) Hanawang la hna melën hnei Russell me Elizabeth. Öni Russell: “Qëmekene troa faipoipo, hnei nyio hna canga ithanatane la itre hnei nyio hna ajane troa kuca ngöne la huliwa i Iehova.” Öni Elizabeth: “Celë hi lai ka xatua nyio troa axecië mekun hnyawa, me canga eatrëne itre ej.” E cili, hnei Russell me Elizabeth hna fek a tro Micronésie, ketre götrane gaa aja ixatua.

13. Thenge la Salamo 28:7, nemene la itre manathith hna kapa hnene la itre trefën ka lapaune koi Iehova?

¹³ Tui Russell me Elizabeth, alanyimu la itre trefën ka ahmaloeëne la mele i angatr, matre troa catre cainöj me hamë ini. Maine tro la lue trefën a canga mekun la nyine tro nyidroti a kuca ngöne la huliwa i Iehova, tro hë nyidroti a kapa la itre manathith ka tru. Tro nyidroti a öhne la ixatua i Iehova ngöne la mele i nyidro. Nge tro nyidroti a acatrene la lapaune i nyidro koi Iehova me mele madrin.—E jë la Salamo 28:7.

14. Tune kaa la aqane amamane Peteru me föe i angeic laka, nyidroti a lapaune kowe la hna thingehnaean ngöne Mataio 6:25, 31-34?

¹⁴ Loi e tro la itre trejin ka xötrei faipoipo a xomi ini qa ngöne la tulu i Peteru aposetolo me föe i angeic. Ketre atr ka nyi ie Peteru qëmekene tro angeic a iöhnyi me Iesu. Ngo hnei Iesu hna hë angeic troa ce cainöj me nyidrë ngöne la drai ka pexej. E cili, hnei Peteru hna pane mekun la itre nyine troa kuca thatraqane la fami angeic. (Luka 5:1-11) Nemene la ka traqa e thupen? Hnei Peteru aposetolo hna xötrethenge Iesu me ce cainöj me nyidrë. Nge hnene la föe i Peteru hna sajuëne la mekuna i angeic. Tusi Hmitrötr a qaja ka hape, thupene la hna amele Iesu hmaca qa hna mec, hnei eahlo hna ce tro me Peteru ngöne la hna cainöj. (1 Kor. 9:5) Jëne la tulu ka lolo ne la föe i Peteru, ijije hi tro angeic a hamë eamo kowe la itre trahmanyi me itre föe i angatr. (1 Pet. 3:1-7) Ketre, catrecatre la lapaune i Peteru me föe i angeic kowe la itre hna thingehnaean hnei Iehova. Xecie koi nyidro laka, maine tro nyidroti a amë panëne la Baselaia i Iehova, tro hë Nyidrëti a xatua nyidro ngöne la mele i nyidro.—E jë la Mataio 6:25, 31-34.

15. Nemene la ini hne së hna xom qa ngöne la tulu i Tiago me Esther?

¹⁵ Maine jë, itre macatre ne faipoipo epun. Ngo nemene la aqane troa acatrene la aja i epun kowe la huliwa i Iehova? Maine jë, troa e la hna melën hnene la itre xaa trefën ngöne la Ita Ne Thup. Celë hi lai hna kuca hnei Tiago me Esther qa Brésil. Hnei nyidroti hna e la itre tane mekun cili, matre aja i nyidroti fe troa hane cainöj ngöne la itre götrane gaa aja ixatua. Öni Tiago: “Ame la nyio a öhne la aqane thupë angatr hnei Iehova ke, nyio fe a ajane troa nue Nyidrë troa eatrongëne la mele i nyio me xatua nyio.” Qaane lo 2014, hnei Tiago me Esther hna cainöj e Paraguay kowe la itre atr ka qene Portugais. Öni Esther: “Hna xatua nyio hnene la hna qaja ngöne Efeso 3:20. Hnei nyio hna öhne la kola eatre la xötr celë ngöne la mele i nyio.” Eje hi, hnei Paulo hna qaja ngöne la tusi angeic koi angetre Efeso ka hape, tro Iehova a hamën atrun hune la nöjei ewekë hne së hna sipon!

16. Drei la ka troa hamë eamo kowe la itre ka xötrei faipoipo?

¹⁶ Ijije hi tro la itre ka xötrei faipoipo a nyitipune la tulu ne la itre Keresiano ka catre lapaun koi Iehova. Ame la itre xaa trefën, nyimu macatre ne huliwa angatre koi Iehova ngöne la drai ka pexej. Celë hi matre, ijije hi tro epuni a sipo ixatua koi angatr, ngöne la epuni a lapa mekun la itre nyine tro epuni a eatrën ngöne la huliwa i Iehova. Celë hi lai aqane tro epuni a amamane laka, catrecatre la lapaune i epuni koi Iehova. (Ite Edomë 22:17, 19) Ketre, ijije hi tro la itre qatre thup a xatua epun troa thel me eatrëne la itre mekun göne la huliwa i Iehova.

17. Nemene la ka traqa koi Klaus me Marisa, nge nemene la ini hne së hna xom qa ngön?

¹⁷ Eje hi laka, troa traqa la itre jol ngöne la easa mekun troa ahmaloeëne la mele së. Celë hi ka traqa koi Klaus me Marisa. Thupene la köni macatre ne faipoipo,  hnei nyidroti hna nue la hnalapa i nyidro matre ixatua troa xupe la Bethela e Finlande. Ngazo pe, hna qaja koi nyidro ka hape, sikisi hi lao treu ne tro nyidroti a huliwa e cili, matre kucakuca catre nyidro. Ame pe, hna hë nyidro troa hane inine la qene Arabe. Ame hë enehila, madrine catre nyidro troa cainöj ngöne la ketre nöj ka qaja la qene hlapa cili. Öni Marisa: “Ame lo xötrei, nyio a xou troa nue Iehova troa eatrongëne la mele i nyio. Ngo ame la nyio a öhne la aqane xatua nyio hnei Iehova ke, kola acatrene la lapauneng koi Nyidrë.” Haawe, tui Klaus me Marisa, maine tro palahi sa acatrene la lapaune së koi Iehova, tro hë Nyidrëti a amanathithi së.

18. Tune kaa la aqane tro la itre ka xötrei faipoipo a amamane la lapaune i angatr koi Iehova?

¹⁸ Ame la faipoipo ke, ketre ahnahna qaathei Iehova. (Mat. 19:5, 6) Aja i Nyidrë tro la itre ka xötrei faipoipo a kepe eloine qa ngöne la ahnahna cili. (Ite Edomë 5:18) Celë hi matre, loi e tro angatr a lapa mekun la itre nyine troa kuca ngöne la mele ne trefën. Hapeu, epuni kö a hamëne la ka sisitria koi Iehova me olene la ixatua i Nyidrë? Loi e tro epuni a thithi thatraqane lai, me thele la itre trepene meköti ka troa xatua epun. Ketre, loi e tro epuni a trongëne la itre eamo hna hamën hnei Iehova. Haawe, itre ka xötrei faipoipo, maine tro epuni a amë panëne la huliwa i Iehova ngöne la mele i epun, tro hë epuni a madrin!