AME ngöne lo itre macatre 600 M.P.K., musi Asuria la baselaia ka tru e cailo fen. Kola qaja ngöne la ketre sit Ëternet ka hape: “Ame la musi cili ke, kola nyiqaan e Kupero uti hë Iran, me Aigupito fe.” Ame ekö ke, Nineve la traon ka tru catre kö e cailo fen. Hetrenyi e cili la itre uma me hnasaatr ka tru, me itre gatran, me itre hnë ami itusi ka tru. Kola qaja ngöne la itre hna cinyihan ekö e Nineve laka, hnene la itre xaa joxu ne Asuria, hna hë Asenapa joxu ka hape, “joxu ne la fen.” Fene la musi nyidrë, pëkö ka atreine troa thapa la traon e Nineve me Asuria.

Eje hi, ka catre la musi Asuria. Ngo ame e cili, hnei Zefania perofeta i Iehova, hna qaja ka hape: “Tro [Iehova] a . . . apatenyi Asuria; me apë wenë Nineve, mate qaqacile tune la hnapapa.” Ketre, hnei Nahuma hna perofetan ka hape: “Thöeënejë la sileva, nge thöeënejë fe la gol! . . . Pa ’lien’ ej, hna apa ’lienën, zi sö hë! . . . Nge ame angat’ asë itete goeë eö, te, troa kötenyi eö, me hape, Zi sö hë e Nineve!” (Zef. 2:13; Nah. 2:9, 10; 3:7) Maine jë, tro itre xan a hnying ka hape: ‘Ka nyipici kö lai? Ijije kö troa thapa la mus ka tru ne Asuria?’ Tha canga mejiune kö angatr kowe la itre hna perofetan celë.

Ame pe, hna eatr itre ej! Ame ngöne la pune la itre macatre 600 M.P.K., hnene la angetre Babulona me Madai hna thapa la nöj e Asuria. Nge hna lep apatrene la nöj e Nineve nge pëhë ka mekun ej! Kola qaja ngöne la ketre itusi qene Papale ka hape, “Ame ekö, thatre hë la itre atr la nöj e Nineve. Tusi Hmitrötr hmekuje hi la ka qaja la traone cili.” Kola qaja hnene la ketre organizasio ka hape, ame ngöne lo itre macatre 1800, “thatre kö la itre atr ka hape, hetre traon ekö hna hën ka hape, Nineve, ngacama ketre traone ka tru e Asuria.” Ngo ame hë lo 1845, hnei Austen Henry Layard, ketre atr ka ithel, hna nyiqaane sine me thele la hnapapa e Nineve. Jëne la itre hnei nyidrëti hna öhn, mama hnyawa ha laka, hetre traon ekö ka tru e Nineve.

Eje hi, hna eatre la itre hna perofetan ekö göne la traon e Nineve. Celë hi matre, xecie koi së laka, tro fe a eatr la itre hna perofetan hnei Tusi Hmitrötr göne la itre musi ne la fen.—Dan. 2:44; Hna ama. 19:15, 19-21.