1. Nemene la ka troa traqa koi së ngöne la huliwa ne cainöj, nge nemene la ka xecie koi së?

 THA tro kö sa sesëkötr laka, troa icilekeu me easë ngöne la easa cainöj. Nge tro kö a catrehnine catre ngöne la itre drai ka calemi. (Dan. 11:44; 2 Tim. 3:12; Hna ama. 16:21) Ngo xecie koi së laka, tro kö Iehova a hamë trengecatre së. Pine nemen? Pine laka hnei Iehova palahi hna xatuane la itre hlue i Nyidrë troa eatrëne la hnëqa i angatr ngöne la kola traqa la itre jol. Tro sa wang la hna melëne hnei Ezekiela ngöne la angeic a tro fë la maca kowe la angetre Iudra hna oth a tro Babulona.

2. Tune kaa la aqane goeëne Iehova la itre atre hnei Ezekiela hna cainöje kow, nge nemene la hne së hna troa ce wang ngöne la tane mekune celë? (Ezekiela 2:3-6)

² Tune kaa la itre atr hnei Ezekiela hna cainöje kow? Iehova a qeje angatr ka hape, itre ka tha idrei, “ka xeti hni,” me “ka cate meke.” Hna aceitunë angatr me itre sinöe ka ithiny me itre sekopio. Celë hi matre anyimua qaja jë kö Iehova koi Ezekiela ka hape: “The qou kö”! (E jë la Ezekiela 2:3-6.) Ngo hnei Ezekiela hna eatrëne hnyawa la hnëqa i angeic, ke (1) Iehova la ka upi angeic, (2) hna xatua angeic hnene la uati hmitrötr i Nyidrë, nge (3) hna thuecatre i angeic hnene la Trengewekë i Nyidrë. Tune kaa la aqane xatua Ezekiela hnene la köni ewekë celë? Nge tune kaa fe la aqane xatua së enehila?

3. Nemene la itre trengewekë ka ithuecatr koi Ezekiela, nge tune kaa la aqane amamane Iehova laka, tro kö Nyidrë a xatua angeic?

³ Öni Iehova koi Ezekiela: “Ini a upi ’ö.” (Ezek. 2:3, 4) Hnene la itre trengewekë celë hna ithuecatre koi Ezekiela.  Pine nemen? Pine laka itre trengewekë hi lai hnei Iehova hna qaja ekö koi Mose me Isaia, lo Nyidrë a upi nyidro troa perofeta i Nyidrë. (Eso. 3:10; Is. 6:8) Ketre, atre hi Ezekiela la aqane xatua nyidro hnei Iehova ngöne la nyidroti a qëmeke kowe la itre jol. Celë hi kepin matre, ame la Iehova a alua qaja koi Ezekiela ka hape: “Ini a upi ’ö,” ke xecie hnyawa koi angeic laka, tro kö Iehova a xatua angeic. Nge anyimua mama ngöne la tusi Ezekiela, la itre trengewekë celë: “Ame hna traqa koi ni la [trengewekë] i Iehova.” (Ezek. 3:16) Kolo fe a mama la itre trengewekë celë: “Traqa ha koi ni la [trengewekë] i Iehova.” (Ezek. 6:1) Matre xecie koi Ezekiela laka, Iehova la ka upi angeic. Pine laka, atre huuj la keme i angeic, matre atre hi angeic laka, hnei Iehova palahi hna xatuane la itre perofeta i Nyidrë. Nge hnei Iehova hna qaja mina fe koi Isaaka, Iakobo, me Ieremia, ka hape: “Ce eni me eö.”—Gen. 26:24; 28:15; Iere. 1:8.

4. Nemene la itre trengewekë ka hamë ithuecatr koi Ezekiela?

⁴ Tune kaa la angetre Isaraela la Ezekiela a tro fë la maca? Öni Iehova lo: “Tha ’teine kö la lapa i Isaraela troa dei ’ö, ke tha ’teine kö angate troa dei ni.” (Ezek. 3:7) Ame la angatr a xele ma drei Ezekiela, ke angatre hi lai a nuetriji Iehova. Itre trengewekë lai ka ithuecatr koi Ezekiela. Ngacama hna nuetriji angeic hnene la nöj, ngo tha kolo kö lai a hape, tha xome hnyawa kö angeic la hnëqa ne perofeta. Öni Iehova fe koi Ezekiela ka hape, ame la kola amekötine elanyi la angetre Isaraela, ke “tro angat’ a ate laka qa ha thei angate la perofeta.” (Ezek. 2:5; 33:33) Celë hi lai ka ithuecatr koi Ezekiela troa eatrëne hnyawa la hnëqa hna ahnithe koi angeic.

5. Thenge la Isaia 44:8, drei la ka troa hamë trengecatre së?

⁵ Ketre tu së fe enehila, hetre trengecatre së ke, atre hi së laka, Iehova la ka upi së. Nyidrëti a wangatrunyi së la Nyidrëti a hë së ka hape, “itete anyipici” Nyidrë. (Is. 43:10) Ketre manathithi ka tru lai! Tune la aqane thuecatre i Ezekiela hnei Iehova ka hape: “The qou kö,” Nyidrëti fe a ithuecatre koi së ka hape: “The hmengöhmengöne kö.” Hnauëne laka tha tro kö sa xouene la itre ithupëjia? Tui Ezekiela, easë la itre hna upe hnei Iehova, nge ce Nyidrëti me easë.—E jë la Isaia 44:8.

6. (a) Tune kaa la aqane amamane Iehova ka hape, Nyidrëti a xatua së? (b) Nemene la ka troa akeukawanyi së me ithucatre së?

⁶ Öni Iehova, tro kö Nyidrëti a xatua së. Qëmekene lo Nyidrëti a qaja ka hape: “Nyipunie la itete anyipici ni,” ke öni Nyidrë: “E tro eö a trongëne la hnagejë, tro ni a ce me eö ; nge eö a trongëne la ite hneopegejë, tha tro kö a kaca tranyi ’ö ; e tro eö a tro nyipine la eë, tha tro kö a deuthi ’ö, nge tha tro kö eö a weli hnei ukahlokin.” (Is. 43:2) Ame ngöne la hna cainöj, easa cil kowe la itre jole hna aceitunëne me itre hneopegejë, me itre eë. Ngo jëne la ixatua i Iehova, easë palahi a catre cainöj. (Is. 41:13) Tune lo hneijine i Ezekiela, alanyimu la itre atr enehila ka xelene la maca. Ngo tha kolo kö lai a hape, tha ase kö easë eatrëne hnyawa la hnëqa së. Kola akeukawanyi së me ithucatre së la easa atre ka hape, Iehova a madrin la easa catre tro fë la maca i Nyidrë. Öni Paulo: “Tro la nöjei atr a isa kepe thupen, thenge la isa huliwa i angatr.” (1 Kor. 3:8; 4:1, 2) Önine la ketre trejin föe ka hekö hë pionie ka hape: “Eni a madrine troa atre ka hape, Iehova a amanathithine la itre trengecatre së.”

7. Nemene la thangane koi Ezekiela la hnei angeic hna lapa mekun la iamamanyikeu ka traqa koi angeic? (Wange ju la icetrön.)

⁷ Hnei Ezekiela hna öhne la emenene la uati hmitrötre i Akötresie. Hnei angeic hna goeën la huliwa ne la uati hmitrötr thene la itre angela me ngöne la itre wiil ka draië ne la ikariota i Iehova. (Ezek. 1:20, 21) Nemene la hna kuca hnei Ezekiela e thupen? Öni angeic: “Nge öhnë hë ni, ame hnenge hna kei qe ipië.” Tru catre la xou i Ezekiela matre hnei angeic hna kei e kuhu hnadro. (Ezek. 1:28) Hnei Ezekiela hna lapa mekune la iamamanyikeu cili, matre xecie koi angeic laka, tro kö la uati hmitrötre i Akötresie a xatua angeic troa catre cainöj.

8-9. (a) Nemene la hnei Iehova hna qaja koi Ezekiela? (b) Tune kaa la aqane xatua Ezekiela hnei Iehova troa cainöj ngöne la teritoare i angeic?

⁸ Öni Iehova koi Ezekiela ka hape: “Nekö i ate fe, cilënejë la lue ca i ‘ö, nge tro ni a ewekë koi ’ö.” Hnene la hna amekötine celë memine la uati hmitrötre i Akötresie hna hamë trengecatre koi Ezekiela troa mejë qa kuhu hnadro. Öni Ezekiela: ‘Ame hna löthi ni hnene la ua, me acilëne la lue cang.’ (Ezek. 2:1, 2) Ame hë la nöjei ijin Ezekiela a cainöj, hna iuji angeic hnene la ‘ime’ i Iehova, ene la uati hmitrötr i Nyidrë. (Ezek. 3:22; 8:1; 33:22; 37:1; 40:1) Hnene la uati hmitrötr i Akötresie hna xatua Ezekiela troa cainöj kowe la itre atr ne la teritoare i angeic ka “cate meke me xeti hni.” (Ezek. 3:7) Öni Iehova mina fe koi Ezekiela ka hape: “Ase hë ni acatene la qëmeke i ’ö hmekune la qëmeke i angat, memine la göpadi ’ö hmekune la göpadi angat. Ase hë ni celohmëne la göpadi ’ö mate tune la [diamant ka catr] hune la [silex] ; the qou  kö e angat, nge the hmengöhmengön’ ene la ite qëmeke i angat.” (Ezek. 3:8, 9) Kösë Iehova a qaja koi Ezekiela ka hape: ‘The kucakuca kö pine la nöje cili. Tro kö ni a aegöcatrenyi ö.’

⁹ Hnene la uati hmitrötre i Iehova hna trosai Ezekiela kowe la teritoar hnei angeic hna troa cainöje ngön. Öni Ezekiela, “Cate la [ime] i Iehova hung.” Ca wiik hnei Ezekiela hna pane lapa troa trotrohnine la maca matre atreine jë angeic tro fë kowe la nöj. (Ezek. 3:14, 15) E thupen, hnei Iehova hna trosai angeic kowe la hnathup, nge hna löthi angeic hnene la ua. (Ezek. 3:23, 24) Ka hnëkë hë Ezekiela troa tro fë la maca.

10. Nemene la ka troa xatua së troa eatrëne hnyawane la huliwa ne cainöj, nge pine nemen?

¹⁰ Nemene la ka troa xatua së troa eatrëne hnyawane la huliwa ne cainöj? Loi e tro hmaca sa mekune lo ka traqa koi Ezekiela. Qëmekene tro angeic a nyiqane cainöj, hnei Iehova hna ithuecatr koi angeic jëne la uati hmitrötr. Tui Ezekiela, tro sa eatrëne hnyawa la huliwa ne cainöj jëne hi la ixatua ne la uati hmitrötre i Iehova. Pine nemen? Pine laka, Satana a isine troa acilëne la huliwa ne cainöj. (Hna ama. 12:17) Thatreine kö la atr troa cile cas koi Satana. Ngo jëne la huliwa ne cainöj, easë hi lai a ngaa Satana! (Hna ama. 12:9-11) Pine nemen? Ke ame la easa catre cainöj, easë hi lai a amamane ka hape, tha easë kö a xoue Satana. Ame la easa xomi ijine troa cainöje trootro, ke ketre aqane tro hi së lai a ngaa Satana. Jëne la uati hmitrötre i Iehova, atreine hi së eatrëne hnyawa la huliwa ne cainöj, ngacama tru la icilekeu. Nge kolo hi lai a amamane ka hape, ce Iehova me easë.—Mat. 5:10-12; 1 Pet. 4:14.

11. Tune kaa la aqane xatua së hnene la uati hmitrötr, nge nemene la nyine tro sa kuca matre tro palahi a kapa?

¹¹ Nemene la hna ini së göne la aqane  xatua Ezekiela hnei Iehova troa catre cainöj? Tro la uati hmitrötr a xatua së troa cil kowe la itre jol ka troa traqa ngöne la huliwa ne cainöj. (2 Kor. 4:7-9) Nemene la nyine tro sa kuca matre tro palahi sa kapa la uati hmitrötr? Tro sa catre sipo Iehova la uati hmitrötr, ke Nyidrëti a dreng la itre thithi së. Öni Iesu kowe la itretre drei nyidrë ka hape: “Sipo jë the mano kö, . . . thele jë the mano kö, . . . fenafena jë the mano kö.” Nge tro kö Iehova a “hamë uati hmitrötr kowe la angetre sipo nyidrë.”—Luka 11:9, 13; Itre hu. 1:14; 2:4.

12. Thenge la Ezekiela 2:9–3:3, qaathei drei la tusi hna ewath, nge nemene la aliene ej?

¹² Hnene la uati hmitrötre i Iehova hna xatua Ezekiela troa cainöj, nge hna acatrene la lapaune i angeic hnene la trengewekë i Nyidrë. Hnei Ezekiela hna goeëne la ketre iwanakoim a liin koi angeic la ketre tusi hna ewath. (E jë la Ezekiela 2:9–3:3.) Qaathei drei la tusi hna ewath cili? Nemene la aliene ej? Nge hnauëne la Ezekiela a xen la tusi hna ewath? Tro sa ce wang. Ame la tusi hna ewath ke, qa ngöne la therone i Akötresie. Maine jë, hnei Iehova hna upe la ketre angela thene lo ala 4 hna goeën hnei Ezekiela. (Ezek. 1:8; 10:7, 20) Hna cinyanyine e kuhu hnine la maca ne iameköti Akötresie nyine tro Ezekiela a tro fë kowe la angetre Iudra ka tha idrei. (Ezek. 2:7) Nge hna cinyanyine la maca ngöne la lue götrane la tusi hna ewath.

13. Nemene la hnei Iehova hna upi Ezekiela troa kuca memine la tusi hna ewath, nge pine nemene matre ka hnyapa la tusi cili?

¹³ Hnei Iehova hna upi Ezekiela troa xen la tusi hna ewath me “atiqane la hni [angeic].” Ame hnei Ezekiela hna xen asë la tusi hna ewath. Nemene la aliene lai? Nyipiewekë tro Ezekiela a trotrohnine hnyawa la maca nyine tro angeic a tro fë. Loi e tro la maca a ketr la hni angeic. Ezekiela a sesëkötr la angeic a öhne ka hape, ka hnyapa la tusi hna ewath “tune la hani.” (Ezek. 3:3) Pine nemen? Pine laka, ame koi Ezekiela ketre madrine ka tru la troa nyitrengewekë i Iehova. (Sal. 19:8-11) Hnei angeic hna olene koi Iehova ke, hnei Nyidrë hna ië angeic troa nyi perofeta i Nyidrë.

14. Nemene la ka xatua Ezekiela troa eatrëne la hnëqa hna ahnith koi angeic?

¹⁴ E thupen, hnei Iehova hna qaja koi Ezekiela ka hape: “Ame la nöjei tenge ewekënge hnenge hna troa qaja koi ’ö, te, [amë hutine ju] e kuhu hni ’ö, nge dengeju hnene la lue hnangenyë i ’ö.” (Ezek. 3:10) Iehova e celë a upi Ezekiela, troa inine gufan la itre hna cinyanyine e hnine la tusi hna ewath me lapa mekun itre ej. Celë hi matre kolo ha catrecatre la lapaune i Ezekiela. Ketre, atrepengöne hnyawa ha angeic la maca nyine tro angeic a tro fë kowe la nöj. (Ezek. 3:11) Ame hë la Ezekiela a trotrohnine hnyawa la maca qaathei Akötresie, ke tha xou i angeice hë troa cainöj, me afenesine la huliwa hna ahnith koi angeic.—Wange ju fe la Salamo 19:14.

15. Nemene la nyine tro sa amë hutine e kuhu hni së matre tro sa catre cainöj?

¹⁵ Loi e tro sa inine la trengewekë i Akötresie, matre tro palahi sa catre cainöj. Loi e tro sa “amë hutine e kuhu hni së” la itre hnei Iehova hna qaja. Ame enehila, Iehova a ithanata koi së jëne la Trengewekë i Nyidrë, ene la Tusi Hmitrötr. Nemene  la nyine tro sa kuca matre tro la Tusi Hmitrötr a ketr la itre mekuna së, me aliene hni së, me itre aja së?

16. Nemene la nyine tro sa kuca memine la Tusi Hmitrötr, nge tro ej a lapa huti tune kaa ngöne la itre hni së?

¹⁶ Ka hetre thangane kowe la ngönetrei së la xen. Ketre tune mina fe, e tro sa e me inine la Tusi Hmitrötr ke, tro hë lai a hetre thangane kowe la imelekeu së me Iehova. Celë hi ini hne së xome qa ngöne la tusi hna ewath hnei Ezekiela hna xen. Aja i Iehova tro sa [atiqane la hni] së hnene la Trengewekë i Nyidrë, kolo lai a hape, tro sa trotrohnine hnyawan ej. Nge tro lai a ej e hne së hna thith, me e la Tusi Hmitrötr me lapa mekun. Loi e tro sa pane thith matre hnëkëne la hni së troa trotrohnine la itre mekuna i Akötresie. Nge e thupen, easa e la Tusi Hmitrötr. Nge loi e tro sa pane cil me mekune ajuine la hne së hna e. Nemene hë la thangane lai? Maine tro palahi sa lapa mekun la itre hne së hna e, ke tro ha lapa hut la itre ini cili e kuhu hni së.

17. Pine nemene matre nyipiewekë tro sa e me lapa mekune la Tusi Hmitrötr?

¹⁷ Pine nemene matre nyipewekë tro sa e me lapa mekun la Tusi Hmitrötr? Celë hi lai ka troa xatua së troa catre cainöjëne la maca ne Baselaia enehila, me tro fë la maca ne iameköti elany. Ketre, ame la easa lapa mekun la itre thiina i Iehova, kola acatrene la aqane imelekeu së me Nyidrë. E cili, tro hë sa tingeting me mejihnine la hne së hna hetreny.—Sal. 119:103.

18. Nemene la hna troa jelenyipicine elanyi hnene la itre atr, nge pine nemen?

¹⁸ Tha itre perofeta kö së tui Ezekiela. Ngo easa isine troa tro fë la maca i Iehova ka ej e hnine la Tusi Hmitrötr, utihë la ijine tro Nyidrëti a acilëne la huliwa cili. Matre ame elany, ngöne la ijine iameköti, tha tro kö la itre atr a qaja ka hape, tha hane kö thuemacanyi angatr hnei Akötresie. (Ezek. 3:19; 18:23) Tro pe angatr a jelenyipicine e cili ka hape, qaathei Akötresie lo maca hne së hna tro fë.

19. Nemene la ka troa xatua së troa catre cainöj?

¹⁹ Nemene la ka troa xatua së troa catre cainöj? Kolo köni ewekë ka ithuecatr koi Ezekiela. Easa catre cainöj ke, atre hi së laka, hna upi së hnei Iehova, nge easa kapa la ixatua ne la uati hmitrötr memine la Tusi Hmitrötr. Jëne la ixatua i Iehova, tro kö sa eatrëne la huliwa së me cile hut “uti hë la pun.”—Mat. 24:13.