Qëmekene tro ni a qaja koi epun la ka traqa e thupen, eni a ajane troa qaja koi epun la ka upi ni troa nyiqane huliwa i Iehova drai ka pexej.

Hna hnaho ni lo 1942 e Caraïbes ngöne la hnapet e Curaçao. Atre Suriname la kemeng, ngo hnei nyidrë hna fek a tro Curaçao matre thele huliwa. Hnei nyidrë hna xomi bapataiso, itre macatre qëmekene troa hnaho ni. Nyidrë la ketre ka pane atre Iehova ngöne la hnapet cili. a Nyidrëti a ini Tusi Hmitrötr me eahun, itre nekö i nyidrë e nöjei wiik, ngacama tha ka hmaloi kö. Traqa koi 14 lao macatreng lo eahuni a fek a tro Suriname matre tro kaka a thupëne la thine i nyidrë ka qatre hë.

Ame e Suriname, hnenge hna nyisineene la itre xaa nekötrahmanyi ne la ekalesia ka catre nyihlue i Iehova. Nango tru kö angatr hung, nge itre ka pionie asë hi angatr. Ame la angatr a porotrikëne la itre ewekë ka traqa ngöne la huliwa ne cainöj, ke ka madrine catr angatr. Thupene la itre icasikeu, eahuni a majemine porotrikëne la itre ini qa hnine la Tusi Hmitrötr. Ame itre xaa ijin, eahun a porotrik e kuhu qëhnelö, me goeëne la itre wëtresij. Hnei angatr hna thue aja koi ni troa catre huliwa koi Iehova, matre hnenge hna xomi bapataiso lo eni a 16 lao macatre. Nge ame hë lo eni a 18 lao macatre, hnenge hna xom la huliwa ne pionie lapa.

Tru catre la itre ini hnenge hna kapa ngöne la eni a pionie lapa, nge ka troa xatua ni ngöne la meleng. Ame la pane ini hnenge hna kapa, ke nyipiewekë troa xatuane la itre xan, matre xom hnyawane la itre hnëqa. Ame la eni a nyiqane pionie, hnei Willem  van Seijl, ketre mesinare hna xatua ni. b Hnei nyidrëti hna ini ni la aqane troa eatrëne hnyawane la itre hnëqang e hnine la ekalesia. Ame ngöne la ijine cili, pëkö ca hnenge hna atre. Ame lo macatre hnapin, hna acili ni troa pionie hut, nge e thupen hnenge hna xatuane la itre gurup nyipine la hnaxulu e Suriname. Eni a olene koi Willem memine la itre xaa trejin ka xatua ni. Ame hë enehila, eni a nyitipu angatr me xatuane la itre xaa trejin troa eatrëne la hnëqa i angatr e hnine la ekalesia.

Ame la hnaaluene ini hnenge hna kapa, ke nyipiewekë troa ahmaloeëne la mel me atreine melëne la hna hetrenyi. Ame lo kola nyiqane la treu, eni memine la trejin ka ce cainöj me ni a canga makëne la nyine tro nyio a itöne kowe la treu. Nge e thupen, ketre a tro troa itö, ngacama gaa nany. Nyio a thupëne la aqane huliwane la mani me xen, matre tro palahi a hetre xen utihë la pune la treu. Ketre, nyio a lapa ngöne la hnaxulu, nge pëkö atre ka lapa ezi nyio. Xecie koi ni laka, hetre thangane la itre hnenge hna inine lo eni a nekötrahmanyi göne la troa ahmaloeëne la mel me mejihnine la hnenge hna hetreny. Celë hi ka xatua ni troa huliwa catre koi Iehova ngöne la meleng.

Ame la hnaakönine ini hnenge hna kapa, ke hetre thangane ka loi la troa inine la itre atr ngöne la sipu qene hlapa i angatr. Qaane lo eni a co, eni a ithanatane la qene néerlandais, me qene papale, me qene papiamento me qene sranan tongo (hna hëne fe ka hape, sranan) lo qene hlapa ne la angetre Suriname. Ngo ame la itre atr ka lapa ngöne la hnaxulu, ke canga tro hi angatr a kapa la maca ka lolo, e hnei eahuni hna ithanatane la sipu qene hlapa i angatr. Jole koi ni troa inine la itre xaa qene hlapa tune la Saramaccan. Ngo hetre thangane ka lolo la hnenge hna nue trengecatr. Ame ngöne la itre macatre thupen, tru catr la itre atr hnenge la ini Tusi Hmitrötre memin ke, eni a qaja la sipu qene hlapa i angatr.

Ame itre xaa ijin, hmahma pi hë ni. Ame lo ketre drai, hnenge hna pi hnyingëne kowe la ketre föe hnenge hna ini Tusi memin, ka qene Saramaccan ka hape, tune kaa lo akötre hni eahlo. Ngo hnenge pena hna hnyingëne ka hape, ka upune eahlo! Hmahma catre eahlo. Traqa ju hë la itre jole cili, ngo hnenge palahi hna isine troa qaja la sipu qene hlapa ne la itre atr hnenge hna cainöje kow.

Ame lo macatre 1970, hna acili ni troa atre thupëne la sirkoskrispio. Ame ngöne la macatre cili, hnenge hna cile fë la ketre cainöj, me amamane la ketre video hna hape, “Une visite au siège mondial des Témoins de Jéhovah” kowe la itre gurup ka mel ngöne la hnaxulu. Hnenge memine la itre trejin trahmanyi hna ti kenu me thupa la itre  hneopegejë matre traqa ngöne la itre tribu. Hnei eahun hna xom trongëne la ketre groupe electrogène, me bido sas, me itre koleman, me itre xaa ewekë ju kö matre amamane lai video. Ame hë la eahuni a traqa ngöne la ketre tribu, eahuni a ajöne trongëne la nöjei ewekë cili, me thupa la hnaxulu utihë la troa traqa ngöne la tribu. Ame la ka ketri ni, ke ene la trenge aja ne la itre trejin troa goeëne lai video. Madrine catre ni troa xatua angatr troa atre Iehova hnyawa, memine la organizasio i Nyidrë e celë fen. Tru catre kö la itre manathith hnenge hna kapa hune la itre trengecatr hnenge hna nu kowe la huliwa i Iehova.

Atre hi ni la itre eloine la troa pë föe ngöne la huliwa ka tune la. Ngo eni a ajan troa faipoipo. Matre hnenge hna sipo Iehova troa xatua ni troa öhne la ketre trejin föe ka atreine cil kowe la itre jol hnenge hna melën ngöne la hnaxulu, nge ka xom la huliwa ne pionie. Ca macatre thupen, hnenge hna iatre me Ethel, ketre pionie hut ka huliwa catr koi Iehova. Qaane lo angeic a co, tru la aja i angeic troa tui Paulo aposetolo, ene la troa huliwa catr ngöne la hna cainöj. Hnei nyio hna faipoipo lo Semitrepa 1971 nge hnei angeic hna ce huliwa me eni ngöne la sirkoskripsio.

Pine laka hna hetru Ethel ngöne la ketre fami ka pë ewekë, matre canga atreine hi angeic melëne la mel ne pionie hut ngöne la hnaxulu. Ame la nyio a wang la itre ekalesia ngöne la hnaxulu, ke nyio hi a xom la ka ijij. Nyio a wasine la itre iheetre i nyio, me si ngöne la hneopegejë. Ketre, majemine hë nyio troa kapa la itre xen hna hamëne hnene la itre trejin tune la itre ithu ka tru, me itre piranhas, me nöjei pengöne öni hnei angatr hna ea. Maine pëkö peleitr, nyio a xom la itre dröne hmetreun. Nge e pëkö fook me sipun, nyio a xen me iwanakoim.  Ame la eni me Ethel a catre huliwa i Iehova, ke casi hë nyio me Nyidrë, kösë eno ka köni wanaeamo hna isilekeun. (Ate cai. 4:12) Ketre mele la ka sisitria koi nyio!

Ame la nyio a bëek qa hna wang la itre ekalesia gaa nany, e cili hi lo kola lö la kenu, lo hnenge hna qaja ekula lo. Hna mejë hmaca la kenu i eahun qa hnine la tim. Eloine pe, isa hetre gilet de sauvetage i eahun, nge pëkö ala cas ka kei qa ngöne la kenu. Ngo ka tiqa la he hnei tim. Matre hnei eahun hna hnenge la itre a i eahun qa ngöne la itre trengen, me jö trij la tim qa hnine la he.

Pine laka, hnei eahun hna trije la itre xen, matre hnei eahun pë hë hna thiny. Ngo pëkö tha i eahun. Matre hnei eahuni hna thithi koi Iehova troa hamë eahuni la xen göne la drai. E thupen, hnene la ketre thei eahun hna ea la ketre ie ka tru, nge ijije hi koi eahun ala 5 ngöne la drai cili.

Thupene la 5 lao macatre hnei nyio hna wange trootro la itre ekalesia, hnei nyio hna sesëkötr ke, upune hë Ethel. Madrine catre ni, ngo nyio fe a seseu. Aja i nyio tro palahi a huliwa koi Iehova drai ka pexej. Hna hnaho Ethniël lo pane nekö i nyio lo 1976. Nge thupene la lue macatre nge sin, kola hnaho Giovanni.

Pine laka, kola aja ixatua hnene la itre ekalesia e Suriname, hnene la Bethela hna amekötine laka, tro palahi ni a xom la huliwa ne atre iwai trootro, me hiane la lue nekö i nyio. Ame lo co petre kö nyidro, hnei angatr hna upi ni troa wang la itre ekalesia ka co. Ame ngöne la itre xaa wiik ne la treu, eni a wang trootro la itre ekalesia, ame pë hë la itre xaa ijin, eni a pionie ngöne la ekalesiang. Ethel me lue nekötrahmanyi a ce tro me ni ngöne la eni a wang la itre ekalesia gaa easeny. Ngo ame la eni a wang la itre ekalesia nyipine la hnaxulu me hnëkëne la itre asabele, ke eni a tro cas.

Eni a hnëkë hnyawa matre eatrëne la itre hnëqang. Eni a isine matre tro palahi eahun a hmi ne la fami e nöjei wiik. Ame la eni a wang la itre ekalesia gaa nany, ke Ethel la ka xomiujine la hmi ne la fami. Hnei nyio hna majemine ce elo, me ngenu memine la lue nekö i nyio. Ame itre xaa ijin, eni a hnëkëne la itre icasikeu me itre xaa ewekë thatraqane la itre ekalesia utihë hnenyipajidr. Nge Ethel a hlë sine hmakanyi tune lo  föe loi thiina hna qaja ngöne Ite Edomë 31:15. Angeic a isine matre tro eahuni a ce goeëne la topik ne la drai, me ce iji tri qëmekene tro la lue nekönatr a ini. Madrine catre ni troa öhne la ketre föe ka catre huliwa koi Iehova, nge ka xatua ni troa eatrëne hnyawane la itre hnëqang!

Hnei nyio hna isine troa xatuane la lue nekö i nyio troa hnimi Iehova me catre cainöj. Aja i nyio tro nyidro a huliwa koi Iehova drai ka pexej, tha koi troa amadrinë nyio, ngo aja i nyidro. Hnei nyio palahi hna amamane koi nyidro laka, easa madrin la easa huliwa koi Iehova drai ka pexej. Tha hnei nyio kö hna juetrën la itre jol ka traqa koi eahun, ngo hnei nyio pe hna qaja atrune la aqane xatua eahun hnei Iehova me itre manathith hnei eahuni hna kapa. Ketre, nyio a thele jëne matre tro la lue nekö i nyio a ce tro memine la itre trejin ka amë panë Iehova ngöne la mele i angatr.

Hnei Iehova palahi hna thupëne la fami eahun. Hnenge hna isine troa eatrëne la hnëqang ngöne la fami. Ame lo eni a nekötrahmany, me pionie hut ngöne la hnaxulu, hnenge hna inine troa melën la hna hetrenyi me hmek. Ngo ame itre xaa ijin, pëhë a i eahun, ngacama hnei eahuni hna kuca la hnei eahuni hna atrein. Nge ame e cili, Iehova a xatua eahun. Ame lo pune la itre macatre 1980 koi itre macatre 1990, hna traqa la ketre isi e Suriname. Ame ngöne la itre macatre cili, jole catr troa hetrenyi la itre ka nyipiewekë kowe la mel. Ngo hnei Iehova palahi hna thupëne la mele i eahun.—Mat. 6:32.

Qaane ekö, hnei Iehova palahi hna thupëne la mele i eahun. Hnei Nyidrë hna hamë hun la ka ijij matre mele madrin. Ahnahna ka tru la lue nekö i nyio. Nge nyio a madrin laka, nyidroti hë a hane nyihlue i Iehova. Hnei Ethniël me Giovanni hna isa sine la ketre ini qaathei Iehova, nge nyidroti hë me lue föi nyidro a huliwa ngöne la Bethela e Suriname.

Qatre hë ni me Ethel, ngo nyio palahi a catre huliwa koi Iehova. Nyio hë a pionie hut. Pine laka tru catr la itre huliwa i nyio, pëkö ijineng troa inine aj. Ngo tha nyipiewekë kö, ke ame la eni a mekune hmaca la meleng, madrine catre ni la hnenge hna canga huliwa koi Iehova drai ka pexej, nge nekötrahmanyi palakö ni.