TANE MEKUN 46
Iehova a Xatua Së Troa Madrine Ngöne La Itre Jol
“Tro Iehova a teqene mate hnimi nyipunie ; nge qa ngöne lai tro nyidëti a mejë mate utipi nyipunie.”—IS. 30:18.
NYIMA 3 Trenge Catre Hun, Mejiune Hun, Me Hna Troa Qale Kow
MEKUN KA TRU a
1-2. (a) Nemene la itre hnying hne së hna troa ce wang? (b) Nemene la ka amamane la trenge aja i Iehova troa xatua së?
IJIJE hi tro Iehova a xatua së ngöne la itre jol, me öhnyi madrin ngöne la huliwa i Nyidrë. Tune kaa la aqane xatua së hnei Nyidrë? Nemene la nyine tro sa kuca matre tro sa kapa la ixatua qaathei Iehova? Celë hi itre hnying hne së hna troa sa ngöne la tane mekune celë. Ngo qëmekene lai, tro sa pane sa la hnyinge celë: Aja i Iehova kö troa xatua së?
2 Hnei Paulo hna qaja la ketre hnëewekë ngöne la tusi Heberu, ka troa xatua së troa sa la hnyinge celë. Öni angeic: “Iehova la ixatuang, tha tro kö ni a xou. Nemene la hna troa kuca koi ni hnei atr?” (Heb. 13:6) Önine la itre itus ka qejepengöne la Tusi Hmitrötr ka hape, ame la hnëewekë “ixatuang” ngöne la xötre celë, ke kola qaja la ketre atr ka canga nyinyape troa wang la ketre atr ka aja ixatua. Pane mekune jë la Iehova a nyinyape troa canga xatuane la atr ka akötr. Kolo hi lai a amamane la trenge aja i Iehova troa xatua së. E ce Iehova me easë, tro kö sa madrin ngöne la itre jol.
3. Nemene la aqane xatua së hnei Iehova matre tro sa madrin ngöne la itre jol?
3 Nemene la aqane xatua së hnei Iehova matre tro sa madrin ngöne la itre jol? Troa sa koi së hnene la tusi Isaia. Pine nemen? Ame la itre hna perofetan hnei Isaia ke, thatraqane la itre hlue i Iehova enehila. Nge ame la aqane qejepengöi Iehova hnei Isaia, ke ka hmaloi hi tro sa trotrohnin. Tro sa ce wang la tusi Isaia mekene 30. Ame ngöne la mekene celë, Isaia a qaja la itre ceitune ka amamane la aqane xatuane Iehova la nöje i Nyidrëti ekö. Iehova a xatua së enehila ngöne la Nyidrëti a (1) dreng me sa la itre thithi së, (2) eatrongë së, me (3) amanathithi së enehila me elany. Tro sa ce wang la köni aqane xatua së hnei Iehova.
IEHOVA A DREI SË
4. (a) Tune kaa la aqane goeëne Iehova la angetre Iudra ngöne la hneijine Isaia, nge nemene la ka traqa koi angatr? (b) Nemene la mejiune hnei Iehova hna hamën kowe la angetre Iudra ka mele nyipici? (Isaia 30:18, 19)
4 Ame ngöne la qaane la mekene 30, Iehova a qaja göne la angetre Iudra ka hape, “angete ena,” me itre ka “nyi xa ngazo kowe la ngazo.” Ketre, Nyidrëti a qaja ka hape: “Nöje ka ena angat, . . . itete xele ma denge la wathebo i Iehova.” (Is. 30:1, 9) Pine laka, hnei angatr hna tha idrei, öni Isaia, tro Iehova a nyithupene koi angatr. (Is. 30:5, 17; Iere. 25:8-11) Nge, celë hi ka traqa ngöne la kola othi angatr hnene la angetre Babulona. Ngo ame pe, hetre ka mele nyipici thene la angetre Iudra, matre hnei Isaia hna hamëne la ketre maca ka lolo koi angatr. Öni angeic, tro hmaca kö Iehova a bëeke sai angatr a tro Ierusalema. (E jë la Isaia 30:18, 19.) Nge celë hi ka traqa. Hnei Iehova hna thepe angatr qa Babulona. Ngo itre macatre hnei angatr hna pane itreqe matre eatre pi la hna perofetane cili. Öni Tusi Hmitrötr, “Tro Iehova a teqene mate hnimi nyipunie,” kolo hi lai a amamane ka hape, tha tro kö a canga amelene la itre ka mele nyipici qa Babulona. Eje hi, hnene la angetre Isaraela hna lapa koi 70 lao macatre e Babulona qëmekene troa aijijë angatr troa bëeke hmaca a tro Ierusalema. (Is. 10:21; Iere. 29:10) Ame lo angetre Isaraela e Babulona, ke tru la hnei angatr hna treij me hleuhleu. Ngo ame la angatr a bëeke kowe la nöje i angatr, ke angatr ha treij ne madrin.
5. Kola akeukawanyi së tune kaa hnene la tusi Isaia 30:19?
5 Ame enehila, kola akeukawanyi së hnene la itre trengewekë celë: “Tro nyidëti a hnimi eö fë la aqane hë eö.” (Is. 30:19) Isaia a amamane e celë laka, tro Iehova a dreng la easa hë koi Nyidrë, nge tro Nyidrëti a sa la itre thithi easë. Nge öni Isaia: “E [drenge] hë, tro nyidëti a sa koi ’ö.” Kolo hi lai a amamane la trenge aja i Iehova troa xatuane la itre ka hë koi Nyidrë. Celë hi ka xatua së troa madrine ngöne la itre jol.
6. Nemene la ka amamane ngöne la tusi Isaia laka, Iehova a dreng la itre thithi së isa ala cas?
6 Nemene la ketre ini hne së hna xom qa ngöne la xötre celë göne la itre thith? Iehova a dreng la itre thithi së isa ala cas. Hnauëne laka, qaja jë së lai? Ame ngöne la qane la Isaia mekene 30, Iehova a qaja la hnëewekë “itete” me “angat” ke, Nyidrëti a ithanata kowe la nöj asë. Ngo ame ngöne la xötre 19, Nyidrëti a hape, “eö” ke Nyidrëti a ithanata kowe ala cas. Öni Isaia: “Tha trojë kö eö a teij”; “tro nyidëti a hnimi eö”; “tro nyidëti a sa koi ’ö.” Tha tro kö Iehova, Keme ka ihnim a qaja kowe la nekö i Nyidrë ka akötr ka hape, “Ka loi tro eö a atreine cile catr tune la trejin me eö.” Ngo Nyidreti pe a wangatrunyi së isa ala cas, me wangatrune la itre thithi së.—Sal. 116:1; Is. 57:15.
Nemene la aliene la Isaia a hape: “The nue [Iehova] kö troa mano”? (Wange ju la paragarafe 7)
7. Tune kaa la aqane amamane Isaia me Iesu la enyipiewekën troa catre thith?
7 Ame la easa sipo Iehova troa xatua së ngöne la ketre jol maine jë, tro Nyidrëti a pane hamë së la trengecatre ka ijij matre troa atreine cil kowe lai jol. Nge e tha canga paatre kö lai jol, tro së lai a sipo Iehova la itre xaa trengecatr matre atreine xomihnine ej. Nge celë hi aja i Nyidrë. Nge kola mama lai ngöne la itre trengewekë i Isaia, kola hape: “The nue [Iehova] kö troa mano.” (Is. 62:7, MN) Kola hapeue lai? Loi e tro sa thithi lapa koi Iehova matre pëkö ijine i Nyidrë troa mano. Itre trengewekë i Isaia a amekunë së la ceitun hna hamëne hnei Iesu göne la thith ngöne Luka 11:8-10, 13. Ame e celë, Iesu a upi së troa thithi ‘iele’ me catre sipone la uati hmitrötr. Ijije fe tro sa sipo Iehova la itre eamo ka troa xatua së troa axecië mekune hnyawa.
IEHOVA A EATRONGË SË
8. Hna eatre tune kaa ekö la hna qaja ngöne Isaia 30:20, 21?
8 E jë la Isaia 30:20, 21. Ca macatre nge sin ne lapa xötreithi Ierusalema hnene la trongene isi Babulona. Ame ngöne la ijine cili, ka akötre palahi la nöj. Ka ceitune hi la akötre i angatr memine la kola kapa la falawa me tim e nöjei drai. Ngo hnei Iehova hna qaja kowe la angetre Iudra ngöne la xötre 20 me 21 ka hape, tro Iehova a xatua angatr, e tro angatr a ietra me saze. Isaia a qeje Iehova ka hape, “atre ini ka tru” ke, tro kö Nyidrëti a amamane koi angatr la aqane troa hmi koi Nyidrë. Nge hna eatre lai ngöne la angetre Iudra a bëeke hmaca qa Babulona. Hnei angatr hna jelenyipicine hnyawane ka hape, Iehova la Atre Ini Katru ke, hnei Nyidrë hna xatua angatr troa acile hmaca la hmi ka wië. Easa madrine laka, Iehova la Atre Ini Katru koi së enehila.
9. Nemene la ketre aqane ini së hnei Iehova enehila?
9 Isaia a amamane la lue aqane ini së hnei Iehova. Ame la hnapan, öni Isaia: “Troa öhne hnene la lue meke i ’ö la [atre] ini eö.” Ame e celë, kola aceitunë Iehova memine la ketre porofesör ka cil qëmekene la itre hna inin. Tru la madrine së la Nyidrëti a ini së enehila. Nyidrëti a ini së tune kaa? Jëne la organizasio i Nyidrë. Easa olene la itre eamo hna hamëne hnene la organizasio! Easa kapa la itre ini jëne la itre icasikeu, itre asabele katru, itre itusi së, itre emisio JW Télédiffusion me itre xane ju kö. Nge celë hi ka xatua së troa madrin ngöne la itre jol.
10. Tune kaa la aqane tro sa “denge la aqane ewekë hutrö [së]”?
10 Isaia a qaja la hnaaluene aqane ini së hnei Iehova ngöne la kola hape: “Tro la lue hnangenyë i ’ö a denge la aqane ewekë hutrö i ’ö.” Isaia a aceitunë Iehova memine la ketre porofesör ka tro e hutrö ne la itre hna inin, nge Nyidrëti a amamai gojenyi koi angatr. Ame enehila, easa dreng la Iehova a ithanata e hutrö së. Tune kaa? Ekö hë cinyanyine la itre trengewekë i Iehova e hnine la Tusi Hmitrötr. Celë hi matre ame la easa e la Tusi Hmitrötr, ke kösë easa drei Iehova ithanata e hutrö i easë.—Is. 51:4.
11. Maine easa ajan troa madrin ngöne la itre jol, nemene la lue ewekë nyine tro sa kuca, nge nemene la thangan?
11 Nemene la aqane tro sa kepe thangane qa ngöne la itre eamo hnei Iehova hna hamën jëne la organizasio i Nyidrë memine la Tusi Hmitrötr? Lue ewekë nyine tro sa kuca hna qaja hnei Isaia. Ame la hnapan, ke “dei la gojeny.” Nge ame la hnaaluene ke, “tro nyipunie a trongën’ ej.” (Is. 30:21) Tha tro hmekuje kö së a atre la “gojeny.” Ngo loi e tro fe sa trongëne ej. Organizasio a ini së la aja i Iehova, ka ej e hnine la Tusi Hmitrötr. Kolo fe a xatua së troa trongëne la hne së hna inin. Maine easa ajan troa madrin ngöne la huliwa i Iehova, loi e tro sa atre me trongëne la aja i Nyidrë. Nge e cili hi la tro sa kapa la itre manathith qaathei Iehova.
IEHOVA A AMANATHITHI SË
12. Thenge la Isaia 30:23-26, tro Iehova a amanathithine tune kaa la nöje i Nyidrë?
12 E jë la Isaia 30:23-26. Hna eatr tune kaa la hna perofetane celë kowe la angetre Iudra ka bëeke qa Babulona a tro Ierusalema? Tru catr la itre manathith hnei angatr hna kapa. Hnei Iehova hna ithua i angatr, me hamën la ka nyipiewekë kowe la mel. Ngo ame la ka sisitria, ke hnei Nyidrë hna xatua angatr troa acatrene hmaca la imelekeu i angatr me Nyidrë, me acile hmaca la nyipi hmi. Tha nyine qaja kö la itre manathith hnei angatr hna kapa ngöne la ijine cili hune ekö. Kola qaja ngöne la xötre 26 ka hape, troa hudrume trootro la lai Iehova. Kolo lai a hape, hnei Nyidrë hna xatua angatr troa trotrohnine la aja i Nyidrë. (Is. 60:2) Hnene la itre manathith qaathei Iehova hna xatua angatr troa catr nyihlue i Nyidrë cememine la madrin ke, ka lolo la hni angatr.—Is. 65:14.
13. Hna eatr tune kaa la perofetane göne la troa acile hmaca la nyipi hmi enehila?
13 Ame la hna perofetan göne la troa acile hmaca la nyipi hmi, ke thatraqai easë fe enehila. Pine nemen? Pine laka ame lo 1919 M.K., itre milio lao atr hna thapa qaathei Babulona atraqatr, ene la itre hmi ka thoi. Hna tro sai angatr kowe la ketre götran ka lolo catre ju kö hune lo Nöje Hna Thingehnaean ekö. Angatr enehila a ce nyihlue i Iehova ngöne la paradraiso ka ketrepengön. (Is. 51:3; 66:8) Nemene lai paradraiso ka ketrepengön?
14. Nemene la paradraiso ka ketrepengön, nge drei la ka nyiatrene la paradraiso cili? (Wange ju la Göi Troa Trotrohnin.)
14 Qaane lo 1919, itre hna iën a ce nyihlue i Iehova ngöne la paradraiso ka ketrepengön. b Nge thupene la itre macatre, hnene fe la itre xaa mamoe hna ce nyihlue i Iehova ngöne la paradraiso cili me kapa la itre manathith ka tru qaathei Nyidrë.—Ioane 10:16; Is. 25:6; 65:13.
15. Ekaa la paradraiso ka ketrepengön?
15 Ekaa la paradraiso ka ketrepengöne enehila? Hetre hlue i Iehova ngöne la fen asë. Nge angatre fe ngöne la paradraiso ka ketrepengön. Haawe, kolo hi lai a amamane ka hape, ame la paradraiso ka ketrepengön, ke ej ngöne la fen asë. Ngacama easë ju hë a mel ngöne la ketre götrane la fen, ngo easë ngöne la paradraiso ka ketrepengön, e tro sa huliwa catre kowe la nyipi hmi.
Nemene la nyine tro së isa ala cas a kuca matre amingömingöne la paradraiso ka ketrepengön? (Wange ju la paragarafe 16-17)
16. Tune kaa la aqane tro palahi sa goeëne la emingömingöne la paradraiso ka ketrepengön?
16 Maine easa ajan troa lapa ngöne la paradraiso ka ketrepengön, loi e tro sa hetre hni ne ole kowe la lapa ne la itre trejin ngöne la fen asë. Tro sa tune kaa? Loi e tro sa goeëne la itre ewekë ka loi thene la itre trejin, ngo tha itre tria i angatre kö. (Ioane 17:20, 21) Pine nemene matre ka nyipiewekë? Pane mekune jë la: Ame ngöne la hnaxulu, ka tiqa hnei sinöe ka isapengön. Ketre tune mina fe, ame ngöne la paradraiso ka ketrepengön, alanyimu la itre trejin ka isapengön, nge hna aceitunën me itre sinöe. (Is. 44:4; 61:3) Loi e tro sa wangatrune la emingömingöne la hnaxulu, ngo tha ene kö la engazone la itre sinöe ka cia ezi së. Tha tro kö sa nue la itre tria së, memine la tria ne la itre trejin troa sewe së troa goeëne la emingömingöne la lapa ne la itre trejin e cailo fen.
17. Nemene la nyine tro së isa ala cas a kuca matre troa acatrene la cas e hnine la ekalesia?
17 Nemene la nyine tro së isa ala cas a kuca matre tro palahi a cas la ekalesia? Loi e tro sa thele tingeting. (Mat. 5:9; Rom. 12:18) Ame la easa thele tingeting memine la itre trejin ne la ekalesia, easë hi lai a amingömingöne la paradraiso ka ketrepengön. Tha tro pi kö sa thëthëhmine laka, Iehova la ka ea la itre atr kowe la paradraiso ka ketrepengön. (Ioane 6:44) Pane mekune jë la madrine i Iehova la Nyidrëti a goeë së a isine troa acatrene la tingeting me cas thene la itre hlue i Nyidrë hnei Nyidrëti hna hnim!—Is. 26:3; Hag. 2:7.
18. Nemene la nyine tro sa lapa mekun, nge pine nemen?
18 Nemene la aqane tro sa kepe thangane qa ngöne la itre manathith hne së hna kapa qaathei Iehova? Loi e tro sa lapa mekun la itre ini hne së hna xom qa ngöne la Tusi Hmitrötr memine la itre itusi së. Tro lai a xatua së troa melëne la itre thiina ka loi ka troa upi së troa “ihnimikeu tune la itre sipu trejin” e hnine la ekalesia. (Rom. 12:10) Ame la easa lapa mekun la itre manathith hne së hna kapa enehila, kolo lai a acatrene la aqane imelekeu së me Iehova. Nge tha tro kö sa thëthëhmine la itre manathith hnei Iehova hna hnëkëne koi së elany, ke tro lai a acatrene la mejiune së. Tro hë së lai a madrin troa nyihlue i Iehova enehila.
CATRE JË SË!
19. (a) Thenge la Isaia 30:18, nemene la hne së hna atre? (b) Nemene la ka troa xatua së troa catre nyihlue i Iehova ngöne la madrin?
19 Tro Iehova a “mejë” me isigöli së ngöne la Nyidrëti a troa apatrene la fene i Satana. (Is. 30:18) Atre hi së laka, “Akötresie ka meköti” Iehova matre tha tro kö Nyidrëti a nue paluane la musi Satana. (Is. 25:9) Easa lapa treqene la drai ne tro Iehova a amele së, matre loi e tro sa catre thith, me inine la Tusi Hmitrötr, me trongëne ej me lapa mekun la itre manathith hne së hna troa kapa. E cili, tro hë Iehova a xatua së troa catre nyihlue i Nyidrë ngöne la madrin.
NYIMA 142 Xölehuje Ju Së La Mejiune Hna Amë Qëmeke Së
a Ame ngöne la tane mekune celë, tro sa ce wang la köni aqane xatuane Iehova la itre hlue i Nyidrë matre troa madrine ngöne la itre jol. Tro sa qejepengöne la itre ixatua cili jëne Isaia mekene 30. Tro la mekene celë a amamane koi së la enyipiewekëne troa thith koi Iehova, troa inine la Tusi Hmitrötr, me lapa mekun la itre manathith hne së hna kapa enehila, me elany.
b GÖI TROA TROTROHNIN: Ame la “Paradraiso ka ketrepengön” ke, kola qaja la aqane nyihlue i Iehova së ngöne la cas. Easa kapa la itre ini qaathei Iehova, hna tha löthe kö hnene la itre ini qaathene la hmi ka thoi, nge easa catre cainöjëne la maca ne la Baselaia. Ketre, ka lolo la imelekeu së me Iehova, nge easa mele tingeting memine la itre trejin ka ihnim. Celë hi ka xatua së troa madrin ngöne la itre jol. Easë ngöne la paradraiso ka ketrepengöne ngöne la easa nyiqane nyihlue i Iehova thenge la aja i Nyidrë, me ngöne la easa isine troa nyitipu Nyidrë.