TANE MEKUN 47
The Nue Kö La Ketre Ewekë Troa Ananyi Së Qaathei Iehova
“Iehova fe, hnenge hna lapau cilie.”—SAL. 31:14.
NYIMA 122 Cile Huti Ju, The Enienije Kö!
MEKUN KA TRU a
1. Easa atre tune kaa ka hape, Iehova a ajane troa easenyi së?
IEHOVA a ajane tro sa easenyi koi Nyidrë. (Iako. 4:8) Aja i Nyidrë troa Akötresi së, me Keme së, me Sinee së. Nyidrëti a sa la itre thithi së me xatua së ngöne la itre ijine jol. Jëne la organizasio i Nyidrë, Iehova a ini së me thupë së. Ngo, nemene la nyine tro sa kuca matre easenyi Iehova?
2. Tune kaa la aqane tro sa easenyi koi Iehova?
2 Easa easenyi Iehova ngöne la easa thith, me e la Tusi Hmitrötr, me lapa mekune ej. E cili, tro ha kökötre la ihnimi së koi Nyidrë memine la hni ne ole së. Nge tro fe lai a upi së troa drengethenge me atrunyi Nyidrë. (Hna ama. 4:11) Maine tro sa inine troa atre Nyidrëti hnyawa, tro hë sa mejiune koi Nyidrë me kowe la organizasio hnei Nyidrëti hna acile matre xatua së.
3. Nemene la hna kuca hnei Diabolo matre ananyi së me Iehova, nge nemene la ka troa xatua së matre tha tro kö sa nuetriji Iehova me organizasio i Nyidrë? (Salamo 31:13, 14)
3 Ame la easa ixelë memine la itre itupath, ke Diabolo e cili a thel troa ananyi së me Iehova. Nemene la hnei angeic hna kuca? Angeic a thelejëne troa thë la mejiune së koi Iehova me kowe la organizasio i Nyidrë. Ngo, ijiji së hi troa cile koi angeic. Loi e troa catre la lapaune së me mejiune së koi Iehova, matre tha tro kö sa nuetriji Nyidrë memine la organizasio i Nyidrë.—E jë la Salamo 31:13, 14.
4. Nemene la hne së hna troa ce wange ngöne la tane mekune celë?
4 Ame ngöne la tane mekune celë, tro sa ce wange la köni jol ka troa thë la mejiune së koi Iehova me kowe la organizasio i Nyidrë. Tro la itre jole cili a ananyi së tune kaa me Iehova? Nemene la nyine tro sa kuca matre cile koi Satana?
NGÖNE LA EASA CILE KOWE LA ITRE JOL
5. Nemene la aqane tro la itre jol a thë la mejiune së koi Iehova me kowe la organizasio i Nyidrë?
5 Ame itre xaa ijin, easa cile kowe la itre jol, tune la kola icilekeu me easë hnei fami, maine kola pë huliwa së. Nemene la aqane tro la itre jole cili a thë la mejiune së kowe la organizasio i Iehova me ananyi së qaathei Nyidrë? E qea palaha la ijine melëne lai jol, ke easa hleuhleu me akötr. Ame ngöne la ijine cili, aja i Satana tro sa mekune ka hape, pëhë ihnimi Iehova koi së. Diabolo a ajane tro sa mekune ka hape, zöi Iehova me organizasio i Nyidrë la itre akötre së. Celë hi ka traqa kowe la angetre Isaraela, lo angatr e Aigupito. Ame lo xötrei, xecie koi angatr ka hape, Iehova la ka upi Mose me Arona troa thepe angatr qa cili. (Eso. 4:29-31) Ame hë lo Farao a ahacene la mele i angatr, hnei angatr hna upezö Mose me Arona, ka hape: “Zö i epon matre kola methinë huni hnei Farao me itre hlue i nyidrë. Nge hnei epon hna hamë taua kowe la ime i angatr, matre humuthi hun.” (Eso. 5:19-21) Hnei angatr hna qajangazone la lue hna upe hnei Iehova. Ekölöhini pe angatr! Maine ekö hë epun cile kowe la ketre jol, nemene la aqane tro epuni a catre mejiun koi Iehova me kowe la organizasio i Nyidrë?
6. Nemene la ini hne së hna xome qaathei Habakuka, göne la aqane troa cil kowe la itre jol? (Habakuka 3:17-19)
6 Fe pi la hni epun koi Iehova ngöne la thith, nge thele ixatua jë thei Nyidrë. Tru catre la itre jol hna cile kow hnei Habakuka perofeta. Hnei angeice fe hna luelu laka, tha Iehova hmaca kö a meku angeic. Matre hnei Habakuka hna fe la hni angeic koi Iehova. Öni angeic: “Iehova fe, uti hë eu la tro ni a xëwe koi nyipë, nge tha drei ni kö hnei nyipë? . . . Nge hnauëne la nyipëti a amamane koi ni la ngazo, nge pëkö hnei nyipëti hna kuca?” (Hab. 1:2, 3, MN) Hnei Iehova hna sa la thithi Habakuka. (Hab. 2:2, 3) Thupene lai, hnei Habakuka hna lapa mekun la aqane iamele i Iehova, matre madrine hmaca pi hi angeic. Xecie koi angeic laka, Iehova a hnimi angeic me xatua angeic troa cil kowe la itre jol. (E jë la Habakuka 3:17-19.) Nemene la ini koi së? Ame la easa cile kowe la itre jol, loi e tro sa fe la hni së koi Iehova, me thele ixatua thei Nyidrë. E tro sa kuca tune lai, tro kö Iehova a hamë së la trengecatr ka ijij. Ame hë la easa öhne la ixatua qaathei Nyidrë, tro ha catrecatre la lapaune së koi Nyidrë.
7. Nemene la hna qaja hnene la ketre atrene la fami Shirley, nge nemene la ka xatua angeic troa catre mejiun koi Iehova?
7 Catre jë easenyi Iehova. Celë hi ka xatua Shirley b, ketre trejin ne Papouasie-Nouvelle-Guinée, ngöne la angeic a cile kowe la itre jol ka tru. Ka pë ewekë la fami Shirley matre ame itre xaa ijin, pëkö a i angatr. Hnene la ketre atrene la fami angeic hna thele troa ananazijëne la mejiune i angeic koi Iehova. Öni xapo: “Tha mama kö ka hape, kola xatua eö hnene la uati hmitrötre i Akötresie! Pëkö ca hne së hna hetreny. Eö a aluzi traem la eö a cainöj.” Matre hnei Shirley hna pane hnying ka hape: ‘Akötresieti kö a hane meku hun?’ Hnenge hna canga thith koi Iehova me fe la hning koi Nyidrë. Hnenge hna catr e Tusi Hmitrötr me itre itusi së, me cainöje trootro me sine la itre icasikeu.” Wangatrehmekune ju hi angeic laka, Iehova a thupëne la fami angeic, ke hetre a i angatre palahi, nge ka madrine angeic. Öni Shirley: “Hnei Iehova hna sa la itre thithing.” (1 Tim. 6:6-8) Maine tro palahi sa easenyi koi Iehova, tha tro kö sa nue la ketre jol troa ananyi së qaathei Nyidrë.
NGÖNE LA KOLA AXÖSISINE LA ITRE KA ELEMEKEN LA ORGANIZASIO
8. Nemene la ka traqa kowe la itre xaa trejin ka elemeken la organizasio i Iehova?
8 Jëne la itre nuvel me itre réseaux sociaux, itre ithupëjia a silitrengathoine la itre trejin ka elemeken la organizasio i Iehova. (Sal. 31:13) Ame itre xan ke, hna othi angatr me upezö angatr ceitu me itre ka ihumuth. Hna traqa fe lai kowe la itre pane keresiano ekö, ngöne la kola upezö Paulo aposetolo me othi nyidrë. Nemene la aqane ujë i angatr?
9. Nemene la aqane ujë ne la itre xaa trejin ngöne lo kola akalabusi Paulo aposetolo?
9 Hnene la itre xaa keresiano hna iananyi me Paulo aposetolo, ngöne lo kola akalabusi nyidrë e Roma. (2 Tim. 1:8, 15) Pine nemen? Maine jë angatr a hmahma pi Paulo ke, itre atr a goeë nyidrë ceitu me ka ihumuth. (2 Tim. 2:8, 9) Maine jë, angatr a xou wanga hane jë akötrë angatr. Thatre kö së la kepin. Ngo tune kaa Paulo ngöne la ijine cili? Hnei nyidrë hna cile kowe la itre jole ka tru, göi nue mele fe nyidrë pi angatr. (Itre hu. 20:18-21; 2 Kor. 1:8) Epi tha tro kö sa tune la itre trejin ka nuetriji Paulo, ngöne lo nyidrëti a aja ixatua! Nemene la nyine tro sa lapa mekune ngöne la kola qanangazone la itre trejin ka elemeken la organizasio i Iehova?
10. Nemene la nyine tro sa lapa mekun ngöne la kola axösisine la itre ka elemeken la organizasio i Iehova, nge pine nemen?
10 The thëthëhmine pi kö së la kepin matre kola axösisi së, nge qaathei drei. 2 Timoteo 3:12 a hape: “Ame la itre ka ajane troa mele thenge la aja i Akötresie, me casi me Keriso Iesu, tro fe a hane axösisi angatr.” Matre tha sesëkötre kö së laka, Satana a nue la trengehni angeic kowe la itre trejin ka elemeken la organizasio i Iehova. Ame la aja i angeic ke, ene la troa thë la aqane mele nyipici së koi Iehova me axounyi së.—1 Pet. 5:8.
Ame lo kola akalabusi Paulo, hnei Onesiforo hna catre xatua nyidrë. Ame enehila, itre trejin a xatuane la itre trejin hna akalabusin, tune la ka mama ngöne la iatr (Wange ju la paragarafe 11-12)
11. Nemene la ini hne së hna xome qa ngöne la tulu i Onesiforo? (2 Timoteo 1:16-18)
11 Catre jë xatuane la itre trejin me mele nyipici koi angatr. (E jë la 2 Timoteo 1:16-18.) Ketre pengöne kö la aqane ujë i Onesiforo ngöne lo kola akalabusi Paulo. “Tha hmahma fë kö angeic la itre icein [i Paulo].” Hnei Onesiforo hna thele Paulo, me xatua nyidrë. Ame e cili, hnei Onesiforo hna nue mel pi Paulo. Nemene la ini koi së? Tha tro kö sa nue la xoue atr troa sewe së troa xatuane la itre trejin hna axösisin. Ngo loi e tro pe sa isigöli angatr me xatua angatr. (Ite edomë 17:17) Aja i angatr tro sa hnimi angatr me ce me angatr.
12. Nemene la ini hne së hna xome qaathene la itre trejin ne Russie?
12 Hnene la itre trejin ne Russie hna xatuane la itre xaa trejin hna akalabusin. Ame lo kola kootrën la itre xan, alanyim la itre trejin ka traqa ngöne la hnakootr matre xatua angatr. Nemene la ini koi së? Tha tro pi kö sa xou la kola qajangazone me oth maine axösisine la itre trejin ka elemeken la organizasio i Iehova. Thithi sai angatre jë pe, nge xatuane jë fe la itre fami angatr. Thele jë la itre xaa aqane troa xatua angatr.—Itre hu. 12:5; 2 Kor. 1:10, 11.
NGÖNE LA KOLA QAJANGAZO SË
13. Nemene la aqane tro la itre sinee së a thë la mejiune së koi Iehova me organizasio i Nyidrë?
13 Ame itre xaa ijine kola qajangazo së hnene la itre fami së ka tha hmi kö, me itre sinee huliwa, me itre sinee ini, ke easa cainöj me metrötrëne la itre trepene meköti Iehova. (1 Pet. 4:4) Öni itre xan: “Tha eni kö a xele ma wai epun, ngo hmi epun pe. Kola xomehnöth la mele i epun, nge pëkö eloine la hmi cili.” Ame pena itre xan, tha trotrohnine kö angatr la aqane ujë së kowe la itre hna upetröneë, matre öni angatr: “Hapeu, aqane ihnimi epuni hi lai?” Itre aqane ithanata lai ka troa ajojezine la mekuna së. Ame e cili, tro hë sa hnying ka hape: ‘Hapeu, tha Iehova kö lai a sasaithi tulu? Kolo kö a xomehnöth la meleng hnene la itre hna amekötin qaathene la organizasio i Nyidrë?’ Maine hnei epun hna hane mekune tun, nemene la nyine tro epun a kuca matre troa lapa qale koi Iehova me kowe la organizasio i Nyidrë?
Hnei Iobu hna nuetrij la itre trengathoi ne la itre sinee i angeic ka iaö, me mele nyipici (Wange ju la paragarafe 14)
14. Nemene la aqane tro sa ujë e kola qajangazo së hnei itre xan, ke easa trongëne la itre trepene meköti Iehova? (Salamo 119:50-52)
14 Catre pi së metrötrëne la itre trepene meköti Iehova ka draië. Hnei Iobu palahi hna metrötrëne la itre trepene meköti Iehova, ngacama kola qajangazo angeic. Hnene la ketre sinee i Iobu hna thel troa iaö angeic ka hape, tha ka nyipiewekë kö koi Akötresie la atr ka mele nyipici. (Iobu 4:17, 18; 22:3) Atre hnyawa hi Iobu ka hape, ame la itre trepene meköti Iehova, ke nyine loi palahi. Nge aja i angeic troa trongëne itre ej. Tha hnei angeice kö hna nue itre xan troa sewe angeic troa mele nyipici koi Iehova. (Iobu 27:5, 6) Nemene la ini koi së? The nue kö la itre ka qajangazo së troa uku së troa wangacone la itre trepene meköti Iehova. Mekune hmaca jë la itre ewekë ka traqa ngöne la mele i epun. Hapeu, tha hnei epuni kö hna öhne la itre thangane ka loi thupene la hnei epun hna trongëne la itre trepene meköti Iehova? Catre jë së ce huliwa me metrötrën la itre trepene meköt qaathene la organizasio i Iehova. Haawe, thatreine pi kö la itre ka qajangazo së ananyi së qaathei Iehova.—E jë la Salamo 119:50-52.
15. Pine nemen matre kola qajangazo Brizit?
15 Tro sa ce wange la hna melëne hnei Brizit, ketre trejin qaa Inde. Kolo palahi a qajangazo angeic hnene la fami angeic ke, ketre Temoë Iehova hë angeic. Thupene la hnei angeic hna xomi bapataiso lo 1997, hna pë huliwa la föi angeic ka tha hmi kö. Matre hnei nyidrë me Brizit me lue nekö i nyidro hna tro ngöne la ketre traon troa lapa thene la keme thine i nyidrë. Ngo tru catre hmaca kö la itre jol ka traqa koi Brizit e cili. Pine laka, pëhë huliwa ne la föi angeic, angeic a huliwa drai ka pexej matre thupëne la fami angeic. Ketre, ame la enanyine la ekalesia qa cili, ke traqa koi 350 lao kilomet. Nge kola icilekeu la fami ne la föi angeic pine la hmi angeic. Pine laka, ngazo catre la mele i angatr e cili, hnei angatre hmaca hna fek. Tha hmitre ju kö, nge meci pi hi la föi Brizit. Nge tha qea ju kö, nge meci pi fe hi la nekö i nyidro jajiny ka 12 lao macatre hnei cancer. Nge goi upezö angeice fe hnene la itre sinee i angeic la itre akötr ka traqa. Öni angatr ka hape, hnene la hmi angeic matre traqa pi la itre ewekë cili. Ngo hnei Brizit palahi hna qale koi Iehova me mejiun kowe la organizasio i Nyidrë.
16. Nemene la itre manathith hnei Brizit hna kapa?
16 Pine laka, ka nanyi Brizit qa ngöne la ekalesia, matre hnene la atre thupëne la sirkoskripsio hna ithuecatr koi angeic troa cainöj e cili, me kuca la itre icasikeu ngöne la hnalapa i angeic. Ame lo xötrei ke, jole catre koi angeic. Ngo hnei angeic hna idrengethenge. Hnei angeic hna cainöj kowe la itre atr ka lapa xötreithi angeic, me kuca la itre icasikeu, memine la hmi ne la fami. Nemene hë la thangan? Alanyimu la itre ka ini Tus me Brizit, nge hnei itre xan thei angatr hna xomi bapataiso. Ame lo 2005, hnei angeic hna xome la huliwa ne pionie lapa. Hnei angeic hna kapa la itre manathith, ke hnei angeic hna mejiun koi Iehova me kowe la organizasio i Nyidrë. Itre nekö i angeic jajiny palahi a nyihlue i Iehova, nge ame hë enehila lue ekalesia e cili! Xecie koi Brizit ka hape, hnei Iehova hna hamë angeic la trengecatr ka ijij matre cile kowe la nöjei jol tune lo kola qajangazo angeic hnene la fami angeic.
TROA MELE NYIPICI KOI IEHOVA ME KOWE LA ORGANIZASIO I NYIDRË
17. Nemene la nyine tro sa isine troa kuca?
17 Aja i Satana tro sa mekun ka hape, tha tro kö Iehova a xatua së ngöne la easa ixelë memine la itre jol. Nge, kola ahacene la mele së la easa ce huliwa memine la organizasio i Iehova. Ketre, aja i angeic tro sa xou la kola qajangazon, me axösisin maine akalabusin la itre trejin ka elemeken la organizasio i Iehova. Nge angeic a nyijëne la itre ka qajangazo së matre troa sewe së troa mejiun kowe la itre trepene meköti Iehova me kowe la organizasio i Nyidrë. Ngo, atrepengöne hë së la itre huliwa i angeic ka iaö. (2 Kor. 2:11) Haawe, isine jë së troa nuetrij la itre trengathoi Satana me mele nyipici koi Iehova me kowe la organizasio i Nyidrë. The thëthëhmine kö ka hape, tha tro pi kö Iehova a nuetriji së. (Sal. 28:7) The nue pi kö la ketre ewekë troa thepe së qa ngöne la ihnimi Akötresie!—Rom. 8:35-39.
18. Nemene la hne së hna troa ce ithanatan ngöne la tane mekun e thupen?
18 Ame ngöne la tane mekune celë, hne së hna ce wange la itre jol hne së hna ixelë memin qa kuhu trön la ekalesia. Ngo, ijiji fe hi tro la itre jol ka xulu qa hnine la ekalesia a sewe së troa mejiun koi Iehova me kowe la organizasio i Nyidrë. Tune kaa la aqane tro sa cile catr kowe la itre jole cili? Tro pë hë sa ce ithanatane ngöne la tane mekun e thupen.
NYIMA 118 “Nyi Xan Ju La Lapaune Hun”
a Loi e tro sa mejiun koi Iehova me kowe la organizasio i Nyidrë, matre tro sa mele nyipici ngöne la itre drai ne la pun. Ngo aja i Diabolo troa thë la mejiune së jëne la itre itupath. Ame ngöne la tane mekune celë, tro sa ce wange la köni jol qaathei Diabolo, memine la nyine troa kuca matre cile koi itre ej.
b Hna saze la itre ëj.