TANE MEKUN 48
Waiewekë Hnyawa Ju Ngöne La Kola Tupathi Epun
“Waiewekë hnyawa ju ngöne la nöjei götran asë.”—2 TIM. 4:5.
NYIMA 123 Loi e Nyipici Me Trongën La Itre Hna Amekötine Qaathei Akötresie
MEKUN KA TRU a
1. Kola hapeu la troa “waiewekë hnyawa”? (2 Timoteo 4:5)
AME la easa cile kowe la itre jol, ke kola tupath la lapaune së koi Iehova me kowe la organizasio i Nyidrë. Nemene la aqane tro sa elë hun la itre jole cili? Loi e tro sa waiewekë hnyawa me hmek me cile huti ngöne la lapaun. (E jë la 2 Timoteo 4:5.) Easa waiewekë hnyawa, ngöne la easa xomihni me isine troa waiewekë tui Iehova. Ame la easa ujë tun, ke tha easë kö a nue la itre aliene hni së troa musinë së.
2. Nemene la hne së hna troa ce ithanatan ngöne la tane mekune celë?
2 Ame ngöne lo ketre tane mekun, hne së hna ce wange la köni jol hne së hna ixelë memin e kuhu tröne la ekalesia. Ame ngöne la tane mekune celë, tro pena sa ce ithanatane la köni jol ka traqa e hnine la ekalesia, nge ka tupath la aqane mele nyipici së koi Iehova. Tro sa ce wang la köni jol celë: (1) ngöne la kola akötrë së hnene la ketre trejin, (2) ngöne la kola haji së, me (3) ngöne la kola saze la ketre ewekë e hnine la organizasio i Iehova. Nemene la aqane tro sa waiewekë hnyawa me mele nyipici koi Iehova me kowe la organizasio i Nyidrë, ngöne la easa cile kowe la itre jole cili?
NGÖNE LA KOLA AKÖTRË SË HNENE LA KETRE TREJIN
3. Tune kaa easë ngöne la kola akötrë së hnene la ketre trejin?
3 Hapeu, hna hane kö akötrë epun hnene la ketre trejin ka trene hnëqa e hnine la organizasio i Iehova? Maine jë, tha hnei angeic kö hna thë troa akötrë epun. (Rom. 3:23; Iako. 3:2) Ngo, hna ketri epun hnene la hnei angeic hna kuca. Tha meköle hnyawa ha epun. Maine jë, tro epun a mekun ka hape, ‘Maine celë hi aqane ujë ne la itre trejin, ke tha easë kö ngöne la organizasio i Akötresie!’ Aja i Satana tro sa mekune tun. (2 Kor. 2:11) Tro la mekune cili a ananyi së qaathei Iehova memine la organizasio i Nyidrë. Maine celë hi ka traqa koi easë, nemene la aqane tro sa waiewekë hnyawa, me lepetrij la itre mekun ka ngazo?
4. Nemene la aqane ujë i Iosefa ngöne la kola qanangazo angeic, nge nemene la itre ini hne së hna xome qa ngöne la tulu i angeic? (Genese 50:19-21)
4 The lapa fë trengehni kö. Ame lo Iosefa a nekötrahmany, hnene la itre mama i angeic hna lapa qanangazo angeic. Angatr a methinë angeic me pi humuthi angeic. (Gen. 37:4, 18-22) Nge, hnei angatr hna salemë angeic nyine hlu. Hnei Iosefa hna melëne la itre jole ka tru ngöne la 13 lao macatre. Maine ju tro Iosefa a mekune ka hape, tha hnimi angeice kö hnei Iehova. Nge hnei Nyidrëti hna nuetriji angeic ngöne la ijine angeic a aja ixatua. Ngo, tha hnei Iosefa kö hna lapa fë trengehni. Hnei angeice pe hna waiewekë hnyawa me xomihni. Ame hë lo itre mama i Iosefa a traqa koi angeic, tha hnei angeice kö hna të la ngazo i angatr. Ngo hnei angeic pe hna xomihni me amamane la ihnimi angeic koi angatr me nue la ngazo hna kuca koi angeic. (Gen. 45:4, 5) Hnei Iosefa hna ujë tun, ke atreine hi angeic waiewekë hnyawa. Tha hnei angeic kö hna wangatrun la itre jol ka traqa koi angeic, ngo hnei angeic pe hna waiewekë tui Iehova. (E jë la Genese 50:19-21.) Nemene la ini koi së? Maine kola akötrë së, the elëhni kö koi Iehova, nge the mekune kö ka hape, ase hë Nyidrëti nuetriji së. Lapa mekune jë pe la aqane xatua së hnei Nyidrë ngöne lai jol. Ketre, ame la kola akötrë së, thele jë troa he la itre tria i angatr hnene la ihnim.—1 Pet. 4:8.
5. Nemene la aqane xomihni Miqueas ngöne la kola akötrë angeic?
5 Tro sa ce wange la hna melëne hnei Miqueas, b ketre qatre thup ne Amérique du Sud. Angeic hmaca mekun lo ijine kola akötrë angeic hnene la itre xaa trejin ka hetre hnëqa e hnine la organizasio. Öni angeic: “Qane ekö, tha hane fe kö ni akötre tune la. Tru la xoung. Tha meköle hë ni e jidr, nge eni palahi a treij hnei akötr.” Ngo, hnei Miqueas hna isine troa xomihni. Hnei angeic palahi hna thith, me sipo Iehova la uati hmitrötre i Nyidrë matre cile catr. Hnei angeic mina fe hna ithel ngöne la itre itusi së. Nemene la ini koi së? Maine kola akötrë së hnene la ketre trejin, thele jë troa lepetrij la itre mekun ka ngazo. Maine jë hetre kepin matre angeic a ithanata maine ujë tune lai. Ithanata jë koi Iehova jëne la thith, nge sipo Nyidrëti jë troa xatua së troa trotrohni angeic. Celë hi ka troa xatua së troa nue la ngazo i angeic, me thëthëhmine la hna kuca koi së. (Ite edomë 19:11) The thëthëhmine kö laka, atre hi Iehova la hne së hna melën, nge tro kö Nyidrëti lai a xatua së troa cile catr.—2 A. l. ite jo. 16:9; Ate cai. 5:8.
NGÖNE LA KOLA HAJI SË
6. Hnauëne laka, nyipiewekë tro sa goeëne la ihaji ceitu me hatrene ihnimi Iehova koi së? (Heberu 12:5, 6, 11)
6 Tha ka hmaloi kö la kola haji së. Ngo, maine tro sa wangatrune palaha la akötre së, ke tha tro kö sa nyipiewekëne la ihaji. Nge tro fe sa mekune ka hape, tha ka meköti kö la ihaji, maine ka catre palaha. E tro sa ujë tun, tha tro kö së lai a goeëne la ihaji ceitu me hatrene ihnimi Iehova koi së. (E jë la Heberu 12:5, 6, 11.) Maine tha xomihni kö së, tro hë së lai a nue jë i Satana troa iaö së. Aja i Satana tro sa thipetrij la ihaji, me iananyi me Iehova memine la ekalesia. Maine hna haji epun, tro epun a waiewekë hnyawa tune kaa?
Hnei Peteru hna kapa la itre eamo me ihaji, matre hnei Iehova hna hamë hnëqa katru koi angeic (Wange ju la paragaraf 7)
7. (a) Tune la ka mama ngöne la iatr, nemene la itre hnëqa hnei Iehova hna hamë Peteru, thupene la hnei angeic hna kapa la ihaji? (b) Nemene la ini hne së hna xome qa ngöne la tulu i Peteru?
7 Kapa ju la ihaji, nge amekötine ju la aqane ujë së. Anyimua haji Peteru hnei Iesu qëmekene la itre xaa aposetolo. (Mar. 8:33; Luka 22:31-34) Ngacama hmahma pi hë Peteru, ngo hnei angeic hna mele nyipici koi Iesu. Hnei angeic hna kapa la ihaji me xomi ini qa ngön. Celë hi matre hnei Iehova hna amanathithine la aqane mele nyipici Peteru me hamë angeic la itre hnëqa ka tru e hnine la ekalesia. (Ioane 21:15-17; Itre hu. 10:24-33; 1 Pet. 1:1) Nemene la ini hne së hna xome qa ngöne la tulu i Peteru? Ngacama easa hmahma la kola haji së, ngo loi e tro sa kapa la ihaji me amekötine la aqane ujë së. E cili, troa hetre thangane ka loi koi së me koi itre xan. Nge, tro hë Iehova a aijijë së troa huliwa atrun koi Nyidrë me kowe la itre trejin.
8-9. Tune kaa Bernardo thupene lo kola haji nyidrë, nge nemene la ka xatua nyidrë troa amekötine la aqane waiewekë i nyidrë?
8 Tro sa ce wange la ka traqa koi Bernardo, ketre trejin ne Mozambique. Hna pane ami nyidrë qa ngöne la hnëqa ne qatre thup. Tune kaa Bernardo lo xötrei? Öni nyidrë, “Hnenge hna pane wesitr ke, tha kapa kö ni la ihaji.” Nyidrëti a mekun la aqane tro la itre xaa trejin a goeë nyidrë. Öni nyidrë, “Thupene la itre treu, hnenge hna kapa la ihaji qaathei Iehova, me mejiune hmaca koi Nyidrë me kowe la organizasio.”
9 Nemene la ka xatua Bernardo troa amekötine la aqane waiewekë i nyidrë? Öni nyidrë: “Ame lo eni a qatre thup, hnenge hna lapa xome la tusi Heberu 12:7 matre xatuane la itre xan troa kapa la ihaji qaathei Iehova. Ngo ame enehila trotrohnine hë ni ka hape, thatraqane asë hi la itre hlue i Iehova la xötre celë, nge koi eni fe.” Hnei Bernardo hna isine troa acatrene la mejiune i nyidrë koi Iehova me kowe la organizasio. Hnei nyidrë hna catre e la Tusi Hmitrötr me lapa mekun ej. Ngacama nyidrëti palahi a xouene la aqane goeë nyidrë hnene la itre xaa trejin, ngo hnei nyidrë hna catre cainöj me angatr, me hamë mekun ngöne la itre icasikeu. E thupen, hna acili Bernardo hmaca troa qatre thup. Maine hna hane haji epun tui Bernardo, the hmahma kö, ngo kapa jë pe la ihaji, nge amekötine jë la aqane ujë i epun. c (Ite edomë 8:33; 22:4) Maine tro epuni a ujë tune lai, tro kö Iehova a amanathithine la aqane mele nyipici epun koi Nyidrë me kowe la organizasio i Nyidrë.
NGÖNE LA KOLA SAZE LA KETRE EWEKË E HNINE LA ORGANIZASIO I IEHOVA
10. Nemene la ketre hna amekötine ka hnyipixe ka tupath la aqane mele nyipici ne la itre xaa trahmany ne Isaraela ekö?
10 Ijiji hi tro la itre hna saze e hnine la organizasio i Iehova a tupath la aqane mele nyipici së koi Nyidrë. E tha hmeke kö së, tro lai a ananyi së qaathei Iehova. Celë hi ka traqa kowe la angetre Isaraela lo angatr a kapa la Wathebo i Mose. Qëmekene troa acile la Wathebo i Mose, hnëqa ne la itre hene fami troa tro fë huuj. Angatr a acil la itre ita ne huuj, me huuj koi Iehova matre ahmitrötrëne la fami angatr. (Gen. 8:20, 21; 12:7; 26:25; 35:1, 6, 7; Iobu 1:5) Ngo, ame hë la kola acile la Wathebo i Mose, tha hnëqa i angatr hmaca kö lai. Hnei Iehova pë hë hna ahnith la hnëqa cili kowe la itre nekö i Arona. Matre, e tro la ketre hene fami a huuj koi Iehova, nge tha matra i Arona pe, ke tro ha humuth la atre cili. d (Lev. 17:3-6, 8, 9) Maine jë, celë hi ka uku Kora, me Dathana, me Abirama, memine lo ala 250 lao nekö i Isaraela troa icilekeu me Mose me Arona. (Num. 16:1-3) Tha hnei Kora kö me itre sinexöle i angeic hna mele nyipici koi Iehova. Maine tha kapa kö së la ketre hna amekötine ka hnyipixe e hnine la organizasio i Iehova, nemene la nyine tro sa kuca?
Ame la kola saze la hnëqa ne la itre matra i Kohatha, tha cile kö angatr troa nyima, me atre thupë qënehlö, me atre thupëne la trengamo (Wange ju la paragaraf 11)
11. Nemene la ini hne së hna xome qa ngöne la tulu ne la itre matra i Kohatha?
11 Loi e troa kapa la itre ewekë ka saze ngöne la organizasio. Ame lo angetre Isaraela ngöne la hnapapa, ke hna hamëne la ketre hnëqa ka tru kowe la itre matra i Kohatha. Ame la angetre Isaraela a fek kowe la ketre götran, itre matra i Kohatha la ka kapa la pua ne isisinyikeu qëmekene la nöj. (Num. 3:29, 31; 10:33; Ios. 3:2-4) Ketre manathithi ka tru lai! Ngo, ame la angetre Isaraela a lö kowe la Nöj Hna Thingehnaean hna saze la huliwa i angatr. Tha tro hmaca kö a kapa trongëne la pua ne isisinyikeu. Celë hi matre, ame ngöne lo ijine i Solomona joxu, hna upe la itre matra i Kohatha troa nyima, me thupë qënehlö, me thupëne la trengamo. (1 A. l. ite jo. 6:31-33; 26:1, 24) Tha hna qaja kö hnei Tusi Hmitrötr laka, hnene la itre matra i Kohatha hna eetr maine piine la ketre hnëqa ka tru catr. Nemene la ini koi së? Kapa ju la itre ewekë ka saze ngöne la organizasio i Iehova, ngacama tro lai a hetre thangane fe kowe la itre hnëqa i epun. Kapa madrine jë la itre hnëqa hna hamë epun. The thëthëhmine kö laka, tha hnene kö la itre hnëqa së matre kola hnimi së hnei Iehova. Ame la ka sisitria koi Nyidrë, ke ene la aqane idrengethenge së, ngo tha itre hnëqa së.—1 Sam. 15:22.
12. Tune kaa Zaina ngöne lo eahlo a tro qa ngöne la Bethela?
12 Tro sa ce wang la tulu i Zaina, ketre trejin föe qa Moyen-Orient. Hna upi eahlo troa pionie, ngo 23 lao macatre hnei eahlo hna pane huliwa ngöne la Bethela. Öni eahlo: “Akötre catre ni la eni a tro qa ngöne la Bethela. Ame koi ni, pëkö ca eloing, nge eni a hnying ka hape, ‘Nemene la ngazo hnenge hna kuca?’ ” Nge, hnene la itre xaa trejin ne la ekalesia i eahlo hna nyixane la akötre i eahlo. Öni angatr: “Maine ka huliwa hnyawa ju nyipo, ke tro kö nyipoti a lapa ngöne la Bethela.” Hleuhleu catre Zaina, matre eahlo palahi a treij e nöjei jidr. Ngo, öni eahlo: “Tha hnenge kö hna mekun ka hape, tha hnimi ni kö hnei Iehova me organizasio i Nyidrë.” Nemene la ka xatua Zaina troa atreine waiewekë hnyawa?
13. Nemene la hna kuca hnei Zaina matre troa lepetrij la itre mekuna i eahlo ka ngazo?
13 Hnei Zaina hna lepetrij la itre mekuna i eahlo ka ngazo. Tune kaa? Hnei eahlo hna e la itre itusi së ka qaja la jol ka ej thei eahlo. Hna xatua eahlo hnene la tane mekun hna hape, “Vous pouvez vaincre le découragement !” ngöne la Ita Ne Thup 1 Febuare 2001 (Qene Wiwi). Kola qejepengöne ngöne la tane mekune cili, la hna melëne hnei Mareko ngöne la kola upi angeic kowe la ketre götran. Öni Zaina, “Tulu i Mareko hi la ka xatua ni troa hetre mekun ka lolo.” Nge hnei Zaina palahi hna ce tro memine la itre sinee i eahlo. Tha hnei eahlo kö hna lapa cas me treij hleuhleu. Trotrohnine hë eahlo laka, uati hmitrötre i Iehova la ka xomiujine la organizasio i Nyidrë, nge tru la hna hnimi eahlo hnene la itre trejin ka elemeken la organizasio. Hnei eahlo mina fe hna öhne laka, organizasio i Iehova a xomi mekun matre tro palahi a loi la huliwa i Nyidrë.
14. Nemene la ewekë ka saze ka jole koi Vlado troa kapa, nge nemene la ka xatua nyidrë?
14 Hane hi la ka traqa koi Vlado, ketre qatre thup ne Slovénie ka 73 lao macatre. Jole pi hë koi nyidrë la kola acasine la ekalesia i nyidrë memine la ketre ekalesia. Nge the qaja palaha la kola thinge la Uma Ne Baselaia hnei nyidrë hna tro kow. Öni nyidrë: “Tha trotrohnine kö ni la kepine matre, kola thinge la Uma Ne Baselaia. Akötre catre ni, ke eahun petre hi a nyihnyawane la Uma Ne Baselaia cili. Ka tratrau sinöe ni, matre hnenge fe hna hane can la itre xaa iseif. Ketre, tha ka hmaloi kö koi hun itre qatr troa saze la hnei eahun hna majemine kuca.” Nemene la ka xatua Vlado troa idrengethenge? Öni nyidrë: “Ame la easa kapa la itre ewekë ka saze e hnine la organizasio, ke ka hetre thangane ka lolo palahi. Itre ewekë lai ka hnëkë së kowe la itre xaa ewekë ka troa saze elany.” Hapeu, hna hane kö acasine la ekalesia i epun memine la ketre ekalesia, maine xome la ketre hnëqa qaathei epun? Ka jole kö koi epun troa kapa lai? Trotrohnine hi Iehova la itre hnei epun hna melën. E tro epuni a kapa la itre mekun hna axeciën e hnine la organizasio, me mele nyipici koi Iehova me kowe la organizasio i Nyidrë, ke tro kö Nyidrëti lai a amanathithi epun.—Sal. 18:25.
WAIEWEKË HNYAWA JU NGÖNE LA NÖJEI GÖTRAN ASË
15. Nemene la itre ewekë ka traqa e hnine la ekalesia, nge nemene la nyine tro sa kuca?
15 Easa melëne la pun la fen celë, matre tha sesëkötre kö së la kola traqa la itre jol e hnine la ekalesia. Itre jole lai ka troa tupath la aqane mele nyipici së koi Iehova. Haawe, loi e tro sa atreine waiewekë hnyawa. Maine hna akötrë epun hnene la ketre trejin, the lapa fë elëhni kö. Nge, maine hna haji epun, the hmahma kö, ngo kapa ju la ihaji, nge amekötine jë la thiina i epun. Ketre, e hetre ewekë ka saze e hnine la organizasio i Iehova, kapa ju nge trongëne jë itre ej.
16. Tune kaa la aqane tro epuni a catre mejiune koi Iehova me kowe la organizasio i Nyidrë?
16 Ijije hi tro epuni a catre mejiun koi Iehova me kowe la organizasio i Nyidrë, ngöne la kola tupathi epun. Celë hi matre, loi e tro sa atreine waiewekë hnyawa, ene la troa tingeting, me waiewekë tui Iehova. Catre jë inine la itre hna melën hnene la itre hlue i Iehova ekö, ka hane fe cil kowe la itre jole cili, nge lapa mekune jë la itre tulu i angatr. Sipo ixatua jë thei Iehova jëne la thith. The ananyine kö la ekalesia. Ngacama traqa ju hë la itre jol, ngo thatreine kö Satana ananyi së qaathei Iehova me organizasio i Nyidrë.—Iako. 4:7.
NYIMA 126 Hmeke Jë, Cile Huti Ju, Catre Jë
a Ijije hi troa tupath la aqane mele nyipici së koi Iehova me kowe la organizasio i Nyidrë ngöne la kola traqa la itre jol e hnine la ekalesia. Ame ngöne la tane mekune celë, tro sa ce ithanatane la köni jol, memine la nyine tro sa kuca matre mele nyipici koi Iehova me kowe la organizasio i Nyidrë.
b Hna saze la itre ëj.
c Wange ju la itre xaa ithuemacanyi ngöne la tane mekun hna hape “Pouvez-vous de nouveau exercer des responsabilités ?” ngöne la Ita Ne Thup 15 Ogas 2009, g. 30 (Qene Wiwi).
d Hna amekötine hnene la Wathebo ka hape, qëmekene troa humuth la ketre öni göi miitr, loi e tro la hene fami a tro fë la öni cili ngöne la uma ne hmi. Ngo, ame la hna amekötine cili, ke tha thatraqane kö la itre hene fami ka lapa gaa nany.—Deu. 12:21.