1-2. (a) Hnauëne la Paulo a qaja ka hape, ihnim la thiina ka “sisitria”? (b) Nemene la köni hnying hne së hna troa ce ithanatan?

 AME lo Paulo a qaja la lapaun, me mejiun me ihnim, öni angeic ka hape, “hune la köni ewekë celë, sisitria kö la ihnim.” (1 Kor. 13:13) Pine nemene matre Paulo a qaja tune lai? Ame hë elany, tha tro hmaca kö sa lapaune kowe la itre hna thingehnaean, me mejiun tro itre ej a eatr, ke eatr asë hë itre ej. Ngo ka nyipiewekë palahi tro sa hnimi Iehova me itre atr. Eje hi, tro palahi a kökötr la ihnimi së.

² Pine laka, ka nyipiewekë catre la ihnim, tro sa ce ithanatane la köni hnying. Ame la hnapan, hnauëne la tro sa ihnimikeu? Hnaaluen, tro sa amamane tune kaa la ihnimi së koi itre xan? Nge hnaakönin, nemene la aqane tro palahi sa acatrene la ihnimi së koi itre xan?

3. Nemene la itre kepin matre loi e tro sa ihnimikeu?

³ Pine nemene matre nyipiewekë tro sa ihnimikeu? Ame la ketre kepin, ke ihnim la ka amamane ka hape, easë la itre nyipi keresiano. Öni Iesu kowe la itre aposetolo: “Tro la nöjei atr asë a wangatrehmekune laka, nyipunieti la itretre drei ni, e tro nyipunie a ihnimikeu.” (Ioane 13:35) Ketre, ihnim la ka iothekeu së me acatrene la casi  së. Paulo a qaja la ihnimi cili ka hape, “otrene ka nyipi loi.” (Kol. 3:14) Ngo hetre ketre kepin palakö matre nyipiewekë catr tro sa ihnimikeu. Öni Ioane aposetolo kowe la itre trejin ka hape: “Ame la atre hnimi Akötresie, qa i angeice fe troa hnime la trejin me angeic.” (1 Ioane 4:21) Ame la easa ihnimikeu, easë hi lai a amamane la ihnimi së koi Akötresie.

4-5. Hnauëne la easa qaja ka hape, ka ce tro la ihnimi së koi Akötresie me kowe la itre trejin? Qaja jë la ketre ceitun.

⁴ Hnauëne la easa qaja ka hape, ka ce tro la ihnimi easë koi Akötresie me kowe la itre trejin? Tro sa ce wang la ketre ceitun. Ka ce tro hi la wenethëhmi së memine la itre xaa götrane la ngönetrei së. Ijije hi tro la droketre a atrepengöne la wenethëhmi së, e tro angeic a dreng la aqane manomano ne ej ngöne la wanakoime së. Nemene la ini nyine tro sa xome qa ngön?

⁵ Tro la droketre a atrepengöne la wenethëhmi së jëne la wanakoime së. Ketre tune mina fe, tro sa atrepengöne la ecatrene la ihnimi së koi Akötresie, jëne la aqane hnime së la itre trejin. Maine easa öhne ka hape, kola nango puj la ihnimi së kowe la itre trejin, kolo hi lai a amamane ka hape, kolo fe a lapakötre la ihnimi së koi Akötresie. Ngo e tro palahi sa amamane la ihnimi së kowe la itre trejin, ke hatrene hi lai laka, ka catre la ihnimi së koi Akötresie.

6. Hnauëne laka, tro sa canga hmek e kola nyiqane ae trootro la ihnimi së kowe la itre trejin? (1 Ioane 4:7-9, 11)

⁶ Maine easa öhne ka hape, kola nyiqane ae trootro la ihnimi së kowe la itre trejin, ke loi e tro sa canga hmek. Pine nemen? Pine laka, kolo fe hi lai a nyiqane ae trootro la ihnimi së koi Akötresie. Celë hi hna qaja hnei Ioane aposetolo koi së, ka hape: “Ame la ka tha hnime la trejin me angeic, lo hnei angeic hna öhn, thatreine kö troa hnimi Akötresie, lo hna tha öhn.” (1 Ioane 4:20) Nemene la ini koi së? Tro Iehova a kepe së, e tro sa “ihnimikeu.”​—E jë la 1 Ioane 4:7-9, 11.

7-8. Nemene la aqane tro sa amamane la ihnimi së koi itre xan?

⁷ Anyimua upi së hnei Tusi Hmitrötr troa “ihnimikeu.” (Ioane 15:12, 17; Rom. 13:8; 1 Thes. 4:9; 1 Pet. 1:22; 1 Ioane 4:11) Ngo, ame la ihnim ke, ketre thiina ka ej e kuhu hni së, nge pëkö atr ka atreine öhn la aliene ne hni së. Matre tro sa amamane tune kaa la ihnimi së koi itre xan? Jëne la hne së hna qaja me kuca.

⁸ Nyimu aqane tro sa amamane la ihnimi së kowe la itre trejin. Hane hi la itre xaa aqane: “Iqajakeunejë la nyipici.” (Zak. 8:16) “Catre pi mele tingetinge me itre xan.” (Mar. 9:50) Troa “pa troa metrötrë ketre.” (Rom. 12:10) “Loi e tro nyipunieti a itö ikep.” (Rom. 15:7) “The mano kö nyipunie . . . inualoinekeun.” (Kol. 3:13) “The mano kö thu la hace ne la itre xan.” (Gal. 6:2) “The mano kö nyipunie iakeukawanyikeu.” (1 Thes. 4:18) “The mano kö . . . itö ixatua.” (1 Thes. 5:11) “Itö ithithi sai ju.”​—Iako. 5:16.

9. Pine nemene matre ame la easa akeukawanyi ketre, ke easë hi lai a amamane la ihnimi së? (Wange ju fe la iatr.)

⁹ Tro sa ce wang la ketre aqane tro sa amamane la ihnimi së hna qaja ngöne la  paragaraf e caha hun. Tro sa ce ithanatane la hna qaja hnei Paulo, ka hape: “The mano kö nyipunie iakeukawanyikeu.” Pine nemene matre ame la easa akeukawanyi ketre, ke easë hi lai a amamane la ihnimi së? Önine la ketre itus ka qeje Tusi Hmitrötr ka hape, ame la Paulo a qaja la hnëewekë ‘iakeukawan’ ke, kola qaja la “troa ce lapa memine la ketre atr ka cile kowe la ketre jol me ithuecatr koi angeic.” Matre ame la easa akeukawan la ketre trejin ka akötr, ke easë hi lai a xatua angeic troa catre nyihlue i Iehova. Nge ame la easa akeukawane la ketre trejin, ke easë hi lai a amamane la ihnimi së koi angeic.​—2 Kor. 7:6, 7, 13.

10. Pine nemene matre ka ce tro la utipin me iakeukawany?

¹⁰ Ka ce tro la utipin me iakeukawan. Pine nemen? Ame la atr ka utipin, ke aja i angeic troa akeukawanyi itre xan me xatua angatr. Matre easa pane utipin, nge tro lai a upi së troa akeukawanyi itre xan. Hnei Paulo hna amamane laka, tru la utipine i Iehova kowe la itre atr, matre Nyidrëti a akeukawanyi angatr. Paulo a qeje Iehova ka hape, “Keme ka tru trenge utipin, me Akötresie ne iakeukawany.” (2 Kor. 1:3) Ame e celë, Paulo a huliwane la hnëewekë “ka tru trenge utipin” matre troa qaja la aqane utipine Nyidrë la itre xan. Matre, kola hë Nyidrë ka hape, Keme maine Qaane ka tru trenge utipin, ke tru la utipine i Nyidrë kowe la itre atr. Nge celë hi ka uku Nyidrë troa akeukawanyi së “ngöne la nöjei akötre së.” (2 Kor. 1:4) Tune la qeqene tim ka menyik kowe la itre ka pi ij, Iehova a akeukawan me ithuecatr kowe la itre ka akötr. Tune kaa la aqane tro sa utipine me akeukawanyi itre xan, tui Iehova? Ame la ketre aqan, ke ene la troa huliwane la itre thiina ka troa xatua së troa utipin me akeukawanyi itre xan. Nemene la itre thiina cili?

11. Thenge la Kolose 3:12 me 1 Peteru 3:8, nemene la itre xaa thiina ka troa xatua së troa hnim la itre trejin me akeukawanyi angatr?

¹¹ Nemene la ka troa xatua së troa acatrene la ihnim, matre tro palahi sa “iakeukawanyikeu” o drai? Loi e tro sa huliwane la itre thiina tune la ihnimi ka ej thene la itre trejin, me thiina ka loi. (E jë la Kolose 3:12; 1 Peteru 3:8.) Troa xatua së tune kaa hnene la itre thiina cili? Ame la easa utipine la itre trejin, nge aja i easë troa xatua angatr, ke celë hi ka uku së troa akeukawanyi angatr, la angatr a akötr. Öni Iesu, “Kola ewekë la që qa kuhu hni. Matre, ame la atre ka loi, tro angeic a axulune la loi, qa ngöne la trengamo i angeice ka loi.” (Mat. 12:34, 35) Ame la easa akeukawane la itre trejin ka akötr, ke aqane tro hi së lai a amamane la ihnimi së koi angatr.

12. (a) Pine nemene matre loi e tro palahi sa hmek? (b) Nemene la hnying hne së hna troa ce wang?

¹² Aja i easë asë “tro pala hi sa ihnimikeu.” (1 Ioane 4:7) Ngo the thëthëhmine kö së lo hna qaja hnei Iesu, öni nyidrë, “troa nanazije la ihnimi ne la ka ala nyim.” (Mat. 24:12) Tha Iesu kö a qaja ka hape, troa nanazij la ihnim thene la itretre drei nyidrë. Ame pe, loi e tro sa hmek wanga tro fe sa pë ihnim tune la fen. Celë hi matre loi e tro sa ce wang la  hnyinge celë: Nemene la ka troa xatua së troa wang ka hape, ka catre palahi la ihnimi së kowe la itre trejin?

13. Nemene la ka troa amamane ka hape, ka catre kö la ihnimi së?

¹³ Ame la ketre aqane tro sa waipengöne la ihnimi së, ke ene la aqane ujë i easë ngöne la itre jol. (2 Kor. 8:8) Ame la ketre jol, ke hna qaja hnei Peteru aposetolo ka hape: “Hune la nöjei ewekë asë, catre jë ihnimikeu, ke ihnim la ka atreine he la nöjei pengöne ngazo.” (1 Pet. 4:8) Matre tro la aqane ujë së ngöne la kola tria maine ngazo la itre xan a amamane ka hape, ka catre kö la ihnimi së koi angatr.

14. Thenge la 1 Peteru 4:8, troa tune kaa la ihnimi së kowe la itre trejin? Qaja jë la ketre ceitun.

¹⁴ Tro sa ce wang la hna qaja hnei Peteru. Ame ngöne la pane götran ne la xötr 8, ke kola upi së troa ‘catre ihnimikeu.’ Ame la Peteru a qaja lai, ke kolo hi lai a hape, “ka kökötr.” Ame ngöne la hnaaluene götrane la xötr, kola qaja la thangane la ihnim cili. Ej a he la nöjei ngazo ne la itre trejin. Tro sa xom la ketre ceitun: Maine jë hetre laulau i easë hna sijasija. Matre easa xom la ketre  imaano me seluth hune la laulau. Tha eje kö a heetrëne la cas maine lue hna sijasija, ngo ej a heetrën asë. Ketre tune mina fe, e ka catr la ihnimi së kowe la itre trejin, tro së lai a “he [maine nu] la nöjei pengöne ngazo.”

15. E ka catr la ihnimi së kowe la itre trejin, nemene la hne së hna troa kuca? (Kolose 3:13)

¹⁵ Loi e troa catr la ihnimi së kowe la itre trejin, matre tro sa atreine nue la ngazo i angatr, ngacama ame itre xaa ijin, tha ka hmaloi kö. (E jë la Kolose 3:13.) Ame la easa nue la ngazo i itre xan, easë hi lai a amamane ka hape, ka catr la ihnimi easë, nge aja së troa amadrinë Iehova. Nemene la ka troa xatua së troa nue la itre ngazo i itre xan, nge tha tro kö sa wesitr koi angatr?

16-17. Nemene la ka troa xatua së troa thëthëhmine la itre tria hna kuca hnei itre xan? Qaja jë la ketre ceitun. (Wange ju fe la iatr.)

¹⁶ Goeëne jë la itre ewekë ka loi ka ej thene la itre trejin, ngo tha itre ewekë ka ngazo kö. Tro sa xome la ketre ceitun. Pane mekun jë laka, epun a ca lapa memine la itre trejin. Madrine catr epun, matre qëmeken tro epuni a isa ije, epuni a pane ce foto. Hnei epuni hna xom la köni foto, matre e tha loi kö la ketre, ke lue xane palakö. Ngo ame ngöne la ketre ifoto, ke ka cici la luemek ne la ketre trejin. Tro epuni a uëne lai foto? Tro epuni  lai a huletrij lai foto, ke ame ngöne la lue xan, itre trejin asë a hnyimahnyima, memine fe lo lai trejin.

¹⁷ Tro sa aceitunëne la itre foto hne së hna ajane memine la itre hne së hna melën ekö. Tru catre la itre ijine ka loi hne së hna ce mele memine la itre trejin. Ngo, pane mekune jë laka, ame ngöne la ketre ijin, hnene la ketre trejin hna qaja maine kuca la ketre ewekë ka akötrë së. Tro sa tune kaa e cili? Loi e tro sa thëthëhmine la ka traqa, tune la easa huletrij la ketre ifoto. (Ite edomë 19:11; Efe. 4:32) Ijije hi tro sa thëthëhmine la itre tria hna kuca hnene la trejin me easë, ke tru catre kö la itre ijine ka loi hne së hna ce melëne me angeic ekö. Itre hna melëne lai hne së hna ajane troa mekune lapan.

18. Nemene la itre mekune ka tru hne së hna ce wange ngöne la tane mekune celë?

¹⁸ Pine nemene matre loi e tro palahi a catr la ihnimi së koi itre xan? Pine laka, tune la hne së hna ce wang, ame la easa amamane la ihnimi së kowe la itre trejin, ke easë hi lai a amamane la ihnimi së koi Iehova. Tune kaa la aqane tro sa amamane la ihnimi së kowe la itre trejin? Ene la troa akeukawanyi angatr. Tro la utipin a uku së troa “iakeukawanyikeu.” Ketre, nemene la aqane tro palahi sa acatrene la ihnimi së koi itre xan? Ene la troa nue hnyawane la ngazo i angatr.

19. Pine nemene matre ka nyipiewekë enehila troa amamane la ihnimi së koi itre xan?

¹⁹ Pine nemene matre ka nyipiewekë enehila troa amamane la ihnimi së koi itre xan? Öni Peteru ka hape: “Easenyi hë la pune la nöjei ewekë asë. . . . [matre] catre jë ihnimikeu.” (1 Pet. 4:7, 8) Easa easenyi catr kowe la pun la fen celë matre, nemene la ka troa traqa koi së? Öni Iesu kowe la itre drei nyidrë ka hape: “Tro la nöjei nöj a methinë nyipunie pine la ëjeng” (Mat. 24:9) Loi e tro sa cas matre cile kowe la imethinë cili. Tha tro kö Satana a thë la casi së, e ka catre la ihnimi së, lo “otrene ka nyipi loi.”​—Kol. 3:14; Fil. 2:1, 2.