TANE MEKUN 44
NYIMA 33 Nue Pi koi Iehova La Ehnefe i ö
Aqane Tro Sa Ujë La Kola Qanangazo Së
“The nue kö la ngazo troa ngaa nyipunie, ngo catre pi pe nyipunieti ngaane la ngazo hnene la loi.”—ROMA 12:21.
MEKUN KA TRU
Tro sa ce wang la nyine tro sa kuca e tha meköti kö la ewekë hna kuca koi së matre tha tro kö a atrune la jol.
1-2. Tune kaa la aqane ketri së hnene la itre aqane ujë ka tha meköti kö?
HNEI Iesu hna xome la ceitune la sine föe ka thele ixatua thene la atre amekötin, la kola qanangazo eahlo. Hna ketr la hni ne la itretre drei Iesu hnene la ceitune i nyidrë, ke ame ngöne la ijine cili, alanyim la itre atr ne la nöj hna qanangazon. (Luka 18:1-5) Kolo fe a ketr la hni së enehila, ke hna hane fe akötrë së hnei itre xan.
2 Ame ngöne la fene celë, alanyim la itre atr ka ië hna hnim, me ka kuca la itre ewekë ka tha meköti kö, nge ka ixele ma iwai, matre tha sesëkötre kö së la kola thiina ka ngazo koi së. (A. Cai. 5:8) Ngo akötre catre kö la kola thiina ka ngazo koi së hnene la ketre trejin ne la ekalesia. Tha ceitu kö la itre trejin memine la itre ithupëjia, maine itre ka icilekeu me easë, ame pe, itre atr ka tha pexeje kö angatr. Hetre ini nyine tro sa xom qa ngöne la aqane ujë i Iesu kowe la itre huliwa ka tha meköti kö hna kuca hnene la itre ithupëjia. Maine atreine hi së xomihnine la iakötrë qaathene la itre ithupëjia, ke loi e tro fe sa atreine xomihnine la itre trejin. Tune kaa Iehova la kola qanangazo së e kuhu hnin, maine e kuhu tröne la ekalesia? Kolo kö a ketri Nyidrë?
3. Kolo kö a ketri Iehova la kola akötrë së, nge pine nemen?
3 Kola ketri Iehova la Nyidrëti a öhne la aqane ujë i itre xan koi së. “Aja i Iehova la meköt.” (Sal. 37:28) Iesu a qaja ka hape, tro kö Iehova “a canga . . . jele meköti” së ngöne la nyipi ijin. (Luka 18:7, 8) Ketre, easenyi hë tro Iehova a apatrene la nöjei akötr, me itre thiina ka tha meköti kö.—Sal. 72:1, 2.
4. Iehova a xatua së tune kaa troa cile kowe la thiina ka tha meköti kö?
4 Easa lapa treqene la ijine tro la thiina ka meköti a haöthe la fen. Ngo enehila, Iehova a xatua së troa cile catr qëmekene la itre atr ka hetre thiina ka tha meköti kö. (2 Pet. 3:13) Itre ini qaathei Nyidrë a xatua së troa ujë cememine la inamacan. Jëne la tulu i Iesu, Iehova a amamane koi së la aqane tro sa xomihnine la thiina ka tha meköti kö. Ketre, Nyidrëti a hamë eamo koi së matre tro sa atre la nyine tro sa kuca la kola thiina ka ngazo koi së.
THUPËNE KÖ LA AQANE UJË I EÖ LA KOLA AKÖTRË EÖ
5. Pine nemene matre loi e tro sa thupëne la aqane ujë së kowe la itre ewekë ka tha meköti kö?
5 Kola akötrë së, maine jele la trenge hni së la easa öhne la aqane ujë angazone la itre atr. (A. Cai. 7:7) Celë hi hna melën hnene la itre hlue i Iehova ekö, tui Iobu me Habakuka. (Iobu 6:2, 3; Habak. 1:1-3) Aqane ujë ne hi la atr! Ngo loi e tro sa thupëne la nyine tro sa kuca, wanga tro sa ujë tune la hmo.
6. Nemene la ini hne së hna xom qa ngöne la aqane ujë i Abasaloma? (Wange ju fe la iatr.)
6 Maine kola akötrë easë maine ketre atr hne së hna hnim, tro së lai a thele troa të la ngazo hna kuca. Ngo e tro sa ujë tun, tro pe së lai a atrune la jol. Pane mekune jë së la hna kuca hnei Abasaloma, nekö i Dravita Joxu. Elëhni catre angeic koi Aminona, trejine me angeic, pine xapo angazo Tamara, sipu xa i angeic. Thenge la Wathebo i Mose, troa humuthi Aminona. (Lev. 20:17) Ngacama trotrohnine hi easë la elëhni i Abasaloma, ngo tha qanyi angeice kö lo amekötine la jol.—2 Sam. 13:20-23, 28, 29.
Tha ase kö Abasaloma xomehnöthe la elëhni i angeic lo kola angazo Tamara, xa i angeic (Wange ju la paragaraf 6)
7. Tune kaa lo aqane ujë ne la atre cinyihane la Salamo la angeic a öhne la thiina ka tha meköti kö?
7 Ame la easa öhne la itre atr a kuca amamane la ngazo nge pëkö pune koi angatr, tro së lai a mekune ka hape, nyine u la troa kuca la loi. Celë hi mekuna ne la atre cinyihane la Salamo. Angeic a öhne la itre atr ka ngazo a mele ka loi, nge itre atr ka loi hna qanangazon. Öni angeic: “Celë hi pengöne la itre atr ka ngazo laka, ka tingetinge pala hi la mele i angatr.” (Sal. 73:12) Hace catre la hni i angeice la angeic a öhne la ewekë ka tha meköti kö, matre angeice hë a mekune ka hape, ka gufa la troa nyihlue i Iehova. Öni angeic: “Ame lo eni a thele troa trotrohnine lai, ke hna ajolëne la hning.” (Sal. 73:14, 16) Goi qaja fe angeic ka hape: “Xönë hi tro ni a jea; maine ju, tro la lue cang a ucic.” (Sal. 73:2) Celë hi hna melën hnene la ketre trejin hna hën ka hape, Alberto.
8. Nemene la ka traqa kowe la ketre trejin hna upezöne menun?
8 Hna upezö menu Alberto ka hape, hnei angeice hna atrekënö la mani ne la ekalesia. Matre hna xome la hnëqa ne qatre thup qaathei angeic, nge hnene la itre xaa trejin ne la ekalesia ka atre la jol, hna nyiqane pë metrötre koi angeic. Öni angeic, “Pëhë madrineng, eni a wesitr me akötr.” Hace catre Alberto pine la jole cili, matre hnei angeic hna nuetrije la itre huliwa i Iehova, me nanazije koi 5 lao macatre. Kola amaman hnene la hna melëne celë la thangan e tro sa nue la elëhni troa lapane la hni së, la kola thiina ka tha meköti kö koi së.
NYITIPUNE JË LA AQANE UJË I IESU LO KOLA QANANGAZO NYIDRË
9. Nemene la aqane qanangazo Iesu hnei itre xan? (Wange ju fe la iatr.)
9 Iesu a amamai tulu koi së göne la aqane tro sa ujë la kola qanangazo së. Tru catre la itre atr ka thiina ka ngazo koi nyidrë, tune fe la itre atrene la fami i nyidrë. Hnene la itre trejine me nyidrë ka tha hmi kö hna jele hmo nyidrë. Nge itre he ne hmi a qaja ka hape, nyidrëti a ce huliwa me itre dremoni. Nge hnene la itre sooce ne Roma, hna hnyimasai nyidrë, me axösisi nyidrë uti hë la kola humuthi nyidrë. (Mar. 3:21, 22; 14:55; 15:16-20, 35-37) Hnei Iesu hna xomihnine la itre thiina i angatr, nge tha ase kö nyidrëti thele troa të koi angatr. Nemene la ini hne së hna xome qa ngöne la tulu i nyidrë?
Hnei Iesu hna amamai tulu koi së göne la aqane tro sa ujë la kola qanangazo së (Wange ju la paragaraf 9-10)
10. Tune kaa la aqane ujë i Iesu kowe la itre huliwa ka tha meköti kö? (1 Peteru 2:21-23)
10 E jë la 1 Peteru 2:21-23. a Hnei Iesu hna amamane koi së la tulu ka lolo. Atre hi nyidrë la ijine troa lapa thaup, me ithanata. (Mat. 26:62-64) Tha hnei nyidrëti kö hna thele troa jelethoine la itre hna qaja göi nyidrë. (Mat. 11:19) Nge ame la nyidrëti a ithanata, tha nyidrëti kö a qaqane maine köjane la itre ka iaxösisi. Nyidrëti pe a xomihni, ke nyidrëti a “mejiune kowe la Atre Iameköti ka meköt.” Atre hi Iesu laka, öhne kö Iehova la ewekë ka traqa koi nyidrë. Nge xecie koi Iesu laka, tro kö Iehova a apatrene la itre huliwa ka tha meköti kö ngöne la nyipi ijin.
11. Nemene la itre aqane tro sa xomehnöthe la thineme së? (Wange ju fe la iatr.)
11 Ame la kola akötrë së, easa nyitipu Iesu la easa xomehnöthe la thineme së. Maine tha nyipiewekë kö la jol, ke loi e tro sa nu. Ketre, e tro sa lapa thaup, tha tro kö së lai a qaja menune koilo, me atrune la jol. (A. Cai. 3:7; Iako. 1:19, 20) Ngo ame itre xaa ijin, loi e tro sa ithanata, matre qaja la ketre huliwa hna kuca ka tha meköti kö, maine isigöline la lapaune së. (It. Hu. 6:1, 2) Nge ame la easa ithanata, loi e tro sa menyik me metrötr.—1 Pet. 3:15. b
Easa nyitipu Iesu la easa mekun hnyawan la ijin, me aqane tro sa ithanata (Wange ju la paragaraf 11-12)
12. Nemene la aqane tro sa nue la jol kowe “la Atre Iameköti ka meköt”?
12 Easë mina fe a nyitipu Iesu, la easa nue la jole kowe “la Atre Iameköti ka meköt.” Öhne hi Iehova la kola qajangazo me qanangazo së. E ka xecie lai koi së, tro së lai a atreine xomihnine la ewekë ka tha meköti kö, ke tro kö Iehova a apatrene la jol elany. E tro sa nue koi Iehova troa amekötine la jol, tha tro kö la elëhni, me trenge hni a cia e kuhu hni së. Eje hi, tro la itre thiina cili a uku së troa huliwa menu, me thapa la madrine së, me angazone la imelekeu së me Iehova.—Sal. 37:8.
13. Nemene la ka troa xatua së, e kola qanangazo së?
13 Nyipici laka, thatreine kö së nyitipu Iesu hnyawa. Ame itre xaa ijin, easa kuca maine qaja la itre ewekë hne së hna hace fë e thupen. (Iako. 3:2) Ketre, ame la itre ewekë hna kuca koi së ekö, ke thatreine kö së thëthëhmin, nge jole troa thu. Maine celë hi ka traqa koi eö, the luelue kö laka, atre hi Iehova la hnei eö hna melën. Nge ame Iesu, hnei nyidrëti fe hna hane melëne la itre ewekë ka tha meköti kö, matre trotrohni eö hi hnei nyidrë. (Heb. 4:15, 16) Jëne la tulu i Iesu, Iehova a xatua së la kola qanangazo së. Ngo Nyidrëti fe a hamë së la itre eamo. Tro sa ce wange la lue xötre qa ngöne la tusi Roma.
“NUE AKÖTRESIETI PI TROA TË LA ELËHNI”
14. Kola hapeue la troa “nue Akötresieti troa të la elëhni”? (Roma 12:19)
14 E jë la Roma 12:19. Hnei Paulo hna ithuecatre kowe la itre keresiano ka hape, “nue Akötresieti pi troa të la elëhni.” Kola hapeue lai? Kolo hi lai a hape, troa nue Akötresie troa ameköti ewekë ngöne la ijin, me aqane ka loi. Öni John, ketre trejine hna akötrëne ka hape: “Tru la ajange troa të la ngazo hna kuca koi ni. Ngo hnei Roma 12:19 hna xatua ni troa treqe Iehova.”
15. Pine nemene matre loi e troa nue Iehova troa nyinyine la jol?
15 Hetre eloin e tro sa nue Iehova amekötine la jole së. Ame la easa thele troa nyinyine casine la jole së, ke easa hnehengazo menu me hleuhleu. Ngo ame la Iehova a xatua së, kösë Nyidrëti a qaja koi së ka hape, ‘Nue pi koi ni la jol; tro kö ni a nyinyin.’ Maine tro sa mejiune kowe la hnei Nyidrëti hna qaja ka hape, “Qange troa të la ngazo,” tha tro kö së lai a elëhni, ke xecie koi së laka, tro kö Nyidrëti a nyinyine hnyawane lai jol. Eje hi lai ka xatua John, lo hna qaja ha ekula. Öni angeic, “Ame la eni a nue koi Iehova troa nyinyine la jol, ke loi ju kö la aqane kuca i Nyidrëti hung.”
“CATRE PI NGAANE LA NGAZO HNENE LA LOI”
16-17. Tro la thith a xatua së tune kaa troa “ngaane la ngazo hnene la loi”? (Roma 12:21)
16 E jë la Roma 12:21. Hnei Paulo hna ithuecatre kowe la itre keresiano troa “catre ngaane la ngazo hnene la loi.” Ame ngöne la Cainöje Hune La Wetr, öni Iesu: “The mano kö hnime la itre ithupëjia me nyipunie, me thithi sai angetre axösisi nyipunie.” (Mat. 5:44) Celë hi la hnei nyidrëti hna kuca. Pane mekune jë la akötre i Iesu lo kola jei fao nyidrë hnene la itre sooce i angetre Roma hune la sinöe ne iaxösisi. Thatreine kö së trotrohnine la etrune la akötre me hmahma ka eje thei nyidrë lo ijine cili.
17 Hnei Iesu hna catre hnimi Iehova me mele nyipici, ngacama akötre catre nyidrë. Tha hnei nyidrëti kö hna ejine la itre sooce cili, ngo hnei nyidrëti pe hna thithi sai angatre ka hape: “Kaka, nue pi la ngazo i nyudren, ke thatre kö nyudreni la hnei nyudreni hna kuca.” (Luka 23:34) Ame la easa thithi fë la itre ka qanangazo së, ke kola xatua së troa fejetrij la ixele ma iwai me wesitr qa kuhu hni së. Nge tro fe lai a saze la aqane goeë angatre hne së.
18. Tune kaa la aqane xatua Alberto me John hnene la thith matre troa xomihnine la itre ewekë hna kuca koi nyidro?
18 Hnene la thith hna xatuane la lue trejin hne së hna ce ithanatane ngöne la tane mekune celë, troa cile catr ngacama ngazo la aqane ujë koi nyidro. Öni Alberto: “Hnenge hna thithi fë la itre trejin ka jele atrekënö ni. Anyimua sipone ni koi Iehova troa xatua ni troa elë hune la jole cili.” Easa madrine laka, Alberto hmaca a nyihlue i Iehova. Öni John: “Hnenge pala hi hna thithi fë la trejin ka akötrë ni. Hnene la itre thithi cili hna xatua ni matre tha tro hmaca kö ni a qeje gele angeic, me nue la itre ngazo i angeic. Hnene la itre thithi cili matre tingetinge hë la hning.”
19. Nemene la nyine tro sa kuca enehila uti hë la kola traqa la pune la fene celë? (1 Peteru 3:8, 9)
19 Thatre kö së la itre xaa jole hne së hna troa melën uti hë la pune la fene celë. Ngo the mano kö së sipo ixatua koi Iehova. Ketre, catre jë së nyitipune la aqane ujë i Iesu kowe la itre ka qanangazo nyidrë, me trongëne la itre trepene meköt qa hnine la Tusi Hmitrötr. Xecie koi së laka, e tro sa ujë tun, tro kö Iehova a amanathithi së.—E jë la 1 Peteru 3:8, 9.
NYIMA 38 Tro Nyidrëti a Aegöcatrenyi Së
a Ame ngöne la pane tusi Peteru mekene 2 me 3, angeic a qaja la itre jole hna melën hnene la itre keresiano ekö hna qanangazon hnene la itre maseta, maine hnene la itre föi angatr ka tha hmi kö.—1 Pet. 2:18-20; 3:1-6, 8, 9.
b Wange ju la video Aqane Tro La Ihnim a Hamë Së La Tingeting ngöne jw.org.
