1. Hnauëne laka, loi e tro sa thele ixatua thene la itre qatr?

 QËMEKENE tro sa axeciëne la itre mekune ka tru, nyipiewekë tro sa pane sipo ixatua koi itre xan. Ijije hi tro sa thele ixatua thene la itre qatre thup, me itre trejine ka macaj. Ngacama qatre catre kö angatre hui easë, tha tro pi kö sa nuetrije la itre eamo i angatr, me mekune ka hape, tha thatraqai së kö enehila. Aja i Iehova tro sa thele ixatua thene la itre atr ka qatre hë. Pine nemen? Pine laka pa i angatre kö öhne la jö, nge tru catre kö la hnei angatre hna atre.​—Iobu 12:12.

2. Nemene la hne së hna troa ce wange ngöne la tane mekune celë?

² Ame ekö, hnei Iehova hna upe la itre qatr troa ithuecatr, me eatrongëne la itre hlue i Nyidrë. Tro sa ce wange la hna kuca hnei Mose, me Dravita, me Ioane aposetolo. Isa huliwa i angatre kö, me hneijine i angatr. Ngo qëmekene tro angatr a mec, hnei angatre hna hamë eamo kowe la itre xötre ka co. Nge hnei angatr asë hna ithuecatre troa drengethenge Akötresie. Aja i Iehova tro fe së a hane drenge la itre eamo i angatr enehila. Jeune ju hë së maine qatr, ngo ka nyipiewekë la itre eamo cili koi së isa ala cas. (Roma 15:4; 2 Tim. 3:16) Ame ngöne la tane mekune celë, tro sa ce wange la iahnikeu ne la köni qatre cili, me xomi ini qa ngön.

“TRO EÖ A LAPANE LA NÖJ”

3. Nemene la itre hnëqa i Mose ngöne la huliwa i Akötresie?

³ Hnei Mose hna nue mele kowe la huliwa i Iehova. Nyidrë la ketre perofeta, me atre amekötin, me ka elemekene la trongene isi me atre cinyihan. Matre tru catre la itre hnei nyidrëti hna atre! Hnei nyidrëti hna thapa la nöje Isaraela lo kola thahluë angatr e Aigupito, me öhne la itre iamamanyikeu ka tru. Hnei Iehova hna upi Mose troa cinyanyine la 5 lao  pane tus ne la Tusi Hmitrötr, memine la Salamo 90, nge maine jë memine fe lo Salamo 91. Nge kola mekun ka hape, Mose la ka cinyanyine la tusi Iobu.

4. Hnei Mose hna ithuecatre koi drei, nge pine nemen?

⁴ Qëmekene tro Mose a mec, nge 120 lao macatre i nyidrë, hnei nyidrëti hna icasikeune la angetre Isaraela, me amexeje koi angatr la itre ewekë hnei angatr hna öhne me melën. Ame lo angatr a jeune, hnei angatre hna sipu öhne la itre iamamanyikeu hnei Iehova hna kuca, me aqane apatrene Nyidrë la angetre Aigupito. (Eso. 7:3, 4) Hnei angatre fe hna tro ngöne la gaa weliwel ne la Hnagejë Ka Palulu, me öhne la Iehova a apatrene la trongene isi i Farao. (Eso. 14:29-31) Nge ame ngöne la hnapapa, hnei Iehova hna thupë angatr me thue a i angatr. (Dreut. 8:3, 4) Ame enehila, ijine hë tro angatr a lö kowe la Nöje Hna Thingehnaean, matre aja i Mose troa iahni me ithuecatre koi angatr. a

5. Nemene la itre ithuecatr hnei Mose hna hamëne kowe la angetre Isaraela ngöne Dreuteronomi 30:19, 20?

⁵ Nemene la hna qaja hnei Mose? (E jë la Dreuteronomi 30:19, 20.) Mele ka loi la ka treqene la angetre Isaraela. Jëne la manathithi i Iehova, tro angatr a mel aqeany ngöne la Nöje Hna Thingehnaean. Ketre nöje ka mingöming, nge gaa hmelek! Hnei Mose hna qejepengöne la götrane cili ka hape: “Troa hamëne koi ’ö, ite lapa ka tru me ka loi lo tha hnei ’ö hna xup; nge ite uma ka tiqa hnei nöjei loi asë lo tha hnei ’ö hna atiqan; me ite hna ku timi lo tha hnei ’ö hna kuj; ite hnënge vine me ite hnënge elaio lo tha hnei ’ö hna eëny; nge eö a xeni mej.”​—Dreut. 6:10, 11.

6. Hnauëne la Iehova a nue la itre nöje trenyiwa troa lepe la angetre Isaraela?

⁶ Hnei Mose fe hna hmekëne la angetre Isaraela. Maine aja i angatr troa lapa aqeany ngöne la nöje cili ka hamë xen, ke loi e tro angatr a trongëne la itre hna amekötin hnei Iehova. Hnei Mose hna upi angatr “troa iëne la mel.” Tune kaa? Loi e tro angatr a drengethenge Iehova me “fedre koi nyidrë.” Ngazo pe, tha hnei angatre kö hna idrengethenge. Celë hi matre hnei Akötresie hna nue la angetre Asuria, nge e thupen, la angetre Babulona troa lepe me othi angatr kowe la itre nöje trenyiwa.​—2 It. Jo. 17:6-8, 13, 14; 2 Aq. Jo. 36:15-17, 20.

7. Nemene la ini hne së hna xome qa ngöne la hna qaja hnei Mose? (Wange ju fe la iatr.)

⁷ Nemene la ini koi së? Jëne mel la troa idrengethenge. Ceitu së memine la angetre Isaraela lo angatre ha lö kowe la Nöje Hna Thingehnaean. Easenyi hë tro sa lö kowe la fene ka hnyipixe hna thingehnaean hnei Akötresie. Ame e cili, tro ha aparadraisone la ihnadro. (Isa. 35:1; Luka 23:43) Patre hë Diabolo me itre dremoni i angeic. (Hna Am. 20:2, 3) Nge tro fe ha apatrene la itre hmi ka thoi ka silitrengathoi Iehova. (Hna Am. 17:16) Tune fe la itre musi atr ka akötrëne la itre atr enehila. (Hna Am. 19:19, 20) Pëkö göhnene la itre atr ka icilekeu ngöne la paradraiso. (Sal. 37:10, 11) Ame ngöne la fen asë, tro la itre atr a drengethenge la itre wathebo i Iehova, nge tro angatr e cili a cas me tingeting. Matre tro la itre atr asë a ihnimikeu, nge tro ketre a mejiune koi ketre. (Isa. 11:9) Tha ketre mele kö lai ka mingöming? Ngo tha eje hmekuje kö.  E tro sa drengethenge Iehova, tro së lai a mele ngöne la paradraiso, tha koi itre macatre kö, ngo uti hë epine palua.​—Sal. 37:29; Ioa. 3:16.

8. Tune kaa la aqane xatuane la ketre mesinare ka hekö hë hnene la hna thingehnaean göne la mele ka pë pun? (Iudra 20, 21)

⁸ Maine tro sa lapa mekune la mele së elany ngöne la paradraiso, tro së lai a fedre koi Iehova ngacama traqa ju hë koi së la nöjei pengöne jol. (E jë la Iudra 20, 21.) Tro fe lai a xatua së troa isi memine la itre aja së ka ngazo. Önine la ketre mesinare e Afrique ka isi memine la ketre aja ka ngazo ka hape: “Ame la eni a trotrohnine laka, ijije hi troa thapa qaathenge la mele ka pë pun, ke celë hi ka uku ni troa isi memine la aja ka ngazo cili, me catre thithi iele koi Iehova. Jëne la ixatua i Nyidrë, atreine hë ni cile kowe la jole cili.”

“AQANE TRO EÖ LAI A EATRËNE LA NÖJEI HULIWA”

9. Nemene la itre jol hnei Dravita hna melën?

⁹ Dravita la ketre joxu ka lolo. Nyidrë la ketre atr ka elo miuzik, ka sili nyima, ka isi, nge ketre perofeta. Nge tru catre la itre jol hnei nyidrëti hna ixelë memin. Zalu catre Saulo Joxu, matre itre macatre hnei Dravita hna kötre zae. Ame hë la nyidrëti a joxu, hnei Abasaloma nekö i nyidrë hna thele troa thapa la hnanyijoxu, matre hnei nyidrëti hmaca hna kötre mel. Ngacama tru la itre jole hnei Dravita hna melën, me itre tria i nyidrë, ngo hnei nyidrëti hna mele nyipici koi Iehova uti hë mec. Hnei Iehova hna qeje Dravita ka hape, “atre kuca la ajang.” Matre nyipiewekë tro sa drenge la itre eamo qaathei Dravita!​—It. Hu. 13:22; 1 It. Jo. 15:5.

10. Hnauëne la Dravita a hamë eamo koi Solomona nekö i nyidrë?

¹⁰ Tro sa ce wange la eamo hnei Dravita hna hamëne koi Solomona, nekö i nyidrë, nge hna troa acil troa joxu thupei nyidrë. Hnei Iehova hna ië Solomona troa acatrene la hmi ka wië, me xupe la uma ne hmi i Nyidrë. (1 Aq. Jo. 22:5) Ngo tru la itre jol hnei angeic hna troa cile kow. Nemene la hnei Dravita hna troa qaja koi angeic? Tro sa ce wang.

11. Thenge la 1 Itre Joxu 2:2, 3, nemene la hnei Dravita hna qaja koi Solomona? Nge hna eatre tune kaa la hnei nyidrëti hna qaja? (Wange ju fe la iatr.)

¹¹ Nemene la hna qaja hnei Dravita? (E jë la 1 Itre Joxu 2:2, 3.) Öni Dravita koi Solomona, tro angeic a ketre joxu ka lolo, nge troa amanathithi angeic hnei Iehova, e tro angeic a drengethenge Nyidrë. Nge eje hi lai ka traqa. Ame ngöne la itre macatre thupen, hna amanathithine la musi Solomona. (1 Aq. Jo. 29:23-25) Hnei angeic hna xupe la uma ne hmi ka mingöming. Hnei angeice  fe hna cinyanyine la itre xaa tus ne la Tusi Hmitrötr, nge hna hane qeje angeice fe e kuhu hnin. Ketre atre ka hlemu angeic, ke ka inamacan, me ka trene mani. (1 It. Jo. 4:34) Ngo tune la hna qaja hnene la keme i angeic, tro pala hi a tro loi la mele i angeic, e tro angeic a drengethenge Iehova. Ngazo pe, ame hë la angeic a qatr, hnei angeic hna nyihluene la itre xaa haze. E cili, hnei Iehova hna xome la manathith qaathei Solomona, matre tha meköti hë la aqane musi angeic.​—1 It. Jo. 11:9, 10; 12:4.

12. Nemene la ini hne së hna xome qa ngöne la hna qaja hnei Dravita?

¹² Nemene la ini koi së? Troa tro loi la mele së e tro sa idrengethenge. (Sal. 1:1-3) Nyipici laka, tha tro kö Iehova a hamë së la mani, memine la elolo i Solomona. Ngo e tro sa idrengethenge, tro Nyidrëti a hamë së la inamacan matre xomi mekune ka loi. (It. Ed. 2:6, 7; Iako. 1:5) Itre trepene meköti Nyidrë a xatua së la easa thele huliwa, maine ini aqeany, maine ië nyine iamadrinë, maine huliwane hnyawane la mani. E tro sa trongëne la itre eamo qaathei Iehova, tro lai a thupëne la imelekeu së me Nyidrë, me hamë së la mele ka pë pun elany. (It. Ed. 2:10, 11) Tro fe së lai a hetre nyipi sinee, me mele madrine ngöne la fami.

13. Nemene la hna kuca hnei Carmen matre troa madrin?

¹³ Mekuna i Carmen ka mel e Mozambique ka hape, troa tro loi la mele i angeic e tro angeic a ini aqeany. Matre hnei angeic hna tro koi université matre inine troa architecte. Öni angeic, “Madrine catre ni la eni a inine la architecture. Ame pe, tru catre pi hë la trengecatre me traeme hnenge hna nu. Eni a nyiqane e 7h30 e hmakany uti hë e 6h00 e hej. Matre jole koi ni troa sine la itre icasikeu, nge eni ha nyiqane iananyi me Iehova. Atre hi ni e kuhu hning ka hape, eni a thele troa nyihluene la lue maseta.” (Mat. 6:24) Hnei Carmen hna thith, me ithel ngöne la itre itusi së. Öni angeic: “Hnene la itre trejine trahmanyi ka macaj memine la thineng hna hamë eamo koi ni, matre hnenge hna nuetrije la université, me nyihlue i Iehova drai ka pexej. Ka lolo catre la mekun hnenge hna axeciën, nge madrine catre ni enehila.”

14. Nemene la eamo ka tru hnei Mose me Dravita hna hamën?

 ¹⁴ Tru la ihnimi Mose me Dravita koi Iehova, nge ka xecie koi nyidro laka, ka nyipiewekë troa drengethenge Nyidrë. Ame ngöne la iahnikeu i nyidro, hnei nyidroti hna ithuecatre kowe la itre xan troa fedre catre koi Iehova tui nyidro. Hnei nyidroti hna hmekëne la itre xan ka hape, e tro angatr a trotriji Iehova, tro Nyidrëti a nuetriji angatr, me xome hmaca la manathith. Thatraqai së fe enehila la itre eamo i nyidro. Itre macatre thupen, hnene la ketre hlue i Iehova hna qaja la enyipiewekëne troa mele nyipici koi Nyidrë.

“PËKÖ MADRINENGE KA TRU HUNE LA”

15. Pine nemene matre ketre trejine ka macaje Ioane aposetolo?

¹⁵ Ioane la ketre sinee i Iesu Keriso me aposetolo i nyidrë. (Mat. 10:2; Ioa. 19:26) Hnei Ioane hna ce cainöje me Iesu, me öhne la itre iamamanyikeu i nyidrë. Hnei angeic hna ce lapa me Iesu ngöne la itre ijine jol. Hnei Ioane fe hna öhne la kola humuthi Iesu, me amele nyidrëti hmaca. Ketre, hnei Ioane hna öhne la kola kökötre la hmi Keresiano, lo ala xalaith pala kö la itre trejine uti hë la angatr a cainöjëne la maca ka loi “kowe la nöjei atr e cailo fene hnengödrai.”​—Kol. 1:23.

16. Drei la itre ka kepe thangan ekö me enehila qa ngöne la itre tusi Ioane?

¹⁶ Ngöne la pune la mele i angeic, hna hane ië Ioane troa cinyanyine la itre xaa tus ne la Tusi Hmitrötr, tune la tusi Hna Amaman. (Hna Am. 1:1) Hnei Ioane fe hna cinyanyine la ketre Evangelia memine la köni tus ka xome la ëje i angeic. Ame la hnaakönine tus, ke thatraqai Gaio, ketre keresiano hnei Ioane hna hnime ceitu me ketre nekö i angeic ngöne la ekalesia. (3 Ioa. 1) Ma hetre itre xaa trejine fe hnei Ioane aposetolo hna hnime catrën, kösë itre sipu nekö i angeic. Itre tusi Ioane qatr a ithuecatre pala hi kowe la itretre drei Iesu enehila.

17. Thenge la 3 Ioane 4, nemene la ka hamë madrin?

¹⁷ Nemene la hna qaja hnei Ioane? (E jë la 3 Ioane 4.) Öni Ioane, ka madrine la atr ka drengethenge Akötresie. Ame lo Ioane a cinyanyine la hnaakönine tusi angeic, hetre atr ka tro fë la itre ini ka thoi, me thë la cas ne la ekalesia. Ngo hetre xaa keresiano “ka catre trongëne pala hi la nyipici.” Angatr a drengethenge Iehova, me “trongëne la itre hnei nyidrëti hna amekötin.” (2 Ioa. 4, 6) Tru la madrine i Ioane la kola goeë angatr a  mele nyipici. Nge the qaja pala ha la madrine i Iehova!​—It. Ed. 27:11.

18. Nemene la ini hne së hna kapa qa ngöne la hna qaja hnei Ioane?

¹⁸ Nemene la ini koi së? Tro sa madrin e tro sa mele nyipici. (1 Ioa. 5:3) Easa madrine la easa atre ka hape, ka madrine Iehova koi së. Iehova a madrine la kola öhnyi së a cile kowe la itre itupath, me kapa la nyipici. (It. Ed. 23:15) Nge drei jë kö la madrin e hnengödrai. (Luka 15:10) Easë fe a madrine la easa öhne la itre trejin a mele nyipici la angatr a cile kowe la itre jol, me itre itupath. (2 Thes. 1:4) Nge thupene la isi Amagedro, tro sa madrin, ke hnei easë hna mele nyipici koi Iehova ngöne la fen hna musinën hnei Satana.

19. Tune kaa Rachel la eahlo a inine la nyipici koi itre xan? (Wange ju fe la iatr.)

¹⁹ Madrine catre easë la easa inine la nyipici koi itre xan. Ame koi Rachel, ketre trejine föe ka mel e République Dominicaine, ke manathithi ka tru la troa qeje Akötresie koi itre xan. Tru catre la itre atr hnei eahlo hna xatuan troa nyihlue i Iehova. Öni eahlo: “Tha nyine qaja kö la madrineng la eni a öhne la itre ka ini Tusi me ni a nyiqane hnimi Iehova, me mejiune koi Nyidrë me saze la mele i angatr. Tru catre kö la madrine cili hune la itre trengecatr hnenge hna nu la eni a ini angatr.”

TRO SA KEPE THANGANE QA NGÖNE LA IAHNIKEU I ANGATR

20. Pine nemene matre ceitu easë me Mose, me Dravita me Ioane?

²⁰ Ceitu easë hi me Mose, me Dravita me Ioane, ngacama isa mel, me hneijine i angatre kö me easë. Tui angatr, easa nyihluene la nyipi Akötresie. Easë fe a thithi koi Iehova, me mejiune koi Nyidrë, me thele ixatua thei Nyidrë. Nge xecie koi së laka, Iehova a amanathithine la itre atr ka idrengethenge.

21. Nemene la itre manathith hne së hna troa kapa e tro sa xötrethenge la itre eamo i Mose, me Dravita me Ioane?

²¹ Haawe, drenge ju la iahnikeu ne la itre qatre cili. Angatr a upi së troa drengethenge la itre wathebo i Iehova. Tro së lai a eatrën asë la hne së hna ajan. Nge tro hë së “a lapane la nöj,” ene la troa mel uti hë epine palua! (Dreut. 30:20) Ketre, tro së lai a amadrinëne la Keme së ka tru ihnimin, nge tru catre kö la manathith hne së hna troa kapa hune la hne së hna mekun.​—Efe. 3:20.