1-2. Nemene la huliwa “ka loi” hna kuca hnene la itre qatre thup?

 MAINE ekö hë eö xome la hnëqa ne atre ixatua, ke easenyi hë troa hane acili eö troa qatre thup. Aja i eö kö troa hane xome la hnëqa ka loi cili?​—1 Tim. 3:1.

² Nemene la hnëqa ne la itre qatre thup? Ketre qatre thup a elemekene la huliwa ne cainöj, me catre wange me inine la itre trejin, me acatrene la lapaune i angatr hnene la aqane ithanata me aqane ujë i nyidrë. Celë hi matre Tusi Hmitrötr a qeje angatre ka hape, “itre ahnahna.”​—Efe. 4:8.

3. Nemene la nyine tro la ketre trejin trahmany a kuca matre troa hane qatre thup? (1 Timoteo 3:1-7; Tito 1:5-9)

³ Nemene la nyine tro eö a kuca matre troa hane qatre thup? Isapengöne kö la troa thele huliwa me troa hane qatre thup. Troa hamë së la huliwa, e hetrenyi së la itre hna thel hnei maseta. Ngo ame goi troa qatre thup, tha tro hmekuje kö a atreine cainöj me hamë ini. Loi e tro fe sa hetrenyi la itre thiina thatraqane la itre qatre thup ka mama ngöne 1 Timoteo 3:1-7 me Tito 1:5-9. (E jë.) Ame ngöne la tane mekune celë, tro sa ce wange la köni götran nyine tro la qatre thup a eatrën: troa qaja aloinyi nyidrë e kuhu hnin me e kuhu trön ne la ekalesia, troa thupëne hnyawa la fami nyidrë, nge troa catre huliwa kowe la ekalesia.

 LOI E TROA QAJA ALOINYI EÖ

4. Kola hapeu la troa “pë gelen”?

⁴ Maine eö a hane pi qatre thup, loi e tro eö “a pë gelen.” Kolo lai a hape, kola qaja aloinyi eö ngöne la ekalesia, ke pëkö ewekë ka ngazo hnei eö hna kuca. Ketre, loi e troa qaja aloinyi eö “qa kuhu trön.” Ngacama itre atre ne fen a xele ma wange la hmi i eö, ngo loi e troa mama hnyawa koi angatr ka hape, eö a huliwa nyipici me thiina ka meköt. (Dan. 6:4, 5) Pane hnyinge jë ka hape, ‘Kolo kö a qaja aloinyi ni e kuhu hnin me e kuhu trön ne la ekalesia?’

5. Nemene la ka amamane ka hape, eö a “hniine la loi”?

⁵ Ame la atr ka “hniine la loi,” ke angeic a thele la ka loi thei itre xan, me qaja aloinyi angatr. Nge angeic a madrine troa kuca la loi koi itre xan, ngacama pëkö ka upi angeic. (1 Thes. 2:8) Hnauëne laka, nyipiewekë tro la qatre thup a hniine la loi? Ke tru la madrine i nyidrë troa nue ijine kowe la itre neköi mamoe me itre xaa hnëqa i nyidrë. (1 Pet. 5:1-3) Eje hi, tru catre kö la madrin hna kapa qa ngöne la hna xatuane la itre trejin hune la itre trengecatre hna nu.​—It. Hu. 20:35.

6. Nemene la itre xaa aqane troa “ikep”? (Heberu 13:2, 16; wange ju fe la iatr.)

⁶ Ame la atr ka “ikep” ke, angeic a hnime la nöjei atr, ngacama tha sinee i angeice kö. (1 Pet. 4:9) Önine la ketre diksioner ka qejepengöne la Tusi Hmitrötr ka hape: “Ame la atr ka ikep, ke ka fe pala hi la uma, me hni angeic kowe la itre trenyiwa.” Isa hnyinge jë ka hape, ‘Ka majemine kö ni ikep?’ (E jë la Heberu 13:2, 16.) Ame la ka ikep, ke ka ce thawa la hnei angeic hna hetreny memine la itre ka traqa koi angeic, tune la itre trejine ka tha tru kö hnei mani, maine itre ka catre huliwa i Iehova, ene la itretre thupë sirkoskripsio me itre qatre thup ka traqa troa cile fë cainöj.​—Gen. 18:2-8; It. Ed. 3:27; Luka 14:13, 14; It. Hu. 16:15; Roma 12:13.

7. Nemene la aqane tro la qatre thup a amamane ka hape, tha nyidrëti kö a “hni koi mani”?

⁷ “Tha tro kö a hni koi mani.” Kolo lai a hape, tha eö kö a wangatrune la itre mo ne fen. Trene mani ju hë eö maine pëkö, ngo eö pala hi a amë panëne la itre huliwa  ne la Baselaia ngöne la mele i eö. (Mat. 6:33) Eö a nue la traem, me trengecatre i eö, me itre hnei eö hna hetreny matre troa nyihlue i Iehova, me thupëne la fami eö, me catre huliwa kowe la ekalesia. (Mat. 6:24; 1 Ioa. 2:15-17) Isa hnyinge jë ka hape: ‘Tune kaa la aqane goeëne ni la mani? Eni kö a melëne la hnenge hna hetreny? Maine eni pena a isine tro pala hi a hetre mani me thele mo?’​—1 Tim. 6:6, 17-19.

8. Kola mama tune kaa thene la ketre trejin ka hape, angeic a “atreine tulu ewekë” me “xomehnöth”?

⁸ Tro kö a mama thene la atr laka, ka “atreine tulu ewekë” angeic me “atreine xomehnöth.” Kolo lai a hape, atreine angeice tuluth la aqane xen, me aqane ij, me aqane heetr, me itre nyine iamadrinë. Ketre, tha angeice kö a xötrethenge la aqane heetr, me aqane ujë ne la itre atre ne fen. (Luka 21:34; Iako. 4:4) Nge, ame la kola traqa la itre jol, tha angeice kö a elëhni, ngo angeice pe a xomihni. Tha ka “pi iji gorok” kö angeic, maine tha hna atre angeic ka hape, ka iji lapa. Isa hnyinge jë ka hape, ‘Kolo kö a mama koi itre xan ka hape, eni a atreine tulu ewekë me xomehnöth?’

9. Ka tune kaa la atr ka “atreine waiewekë” nge tha ka zikoziko kö?

⁹ Ame la atr ka “atreine waiewekë,” ke angeic a canga thele la hna qaja hnei Tusi Hmitrötr la kola traqa la ketre jole koi angeic. Angeic a lapa mekune la itre trepene meköt, nge celë hi ka xatua angeic troa hetre wangatrehmekun, me trotrohnine la ewekë ka traqa. Nge tha angeice kö a qaja menune koilo, ngo angeice pe a pane xomi ijine troa atre hnyawa la jol. (It. Ed. 18:13) Celë hi ka xatua angeic troa axecië mekun thenge la aqane waiewekë i Iehova. Ketre, tha ka zikoziko kö angeic. Angeic a afenesine la huliwa ngöne la ijin hna sa. Ketre atre lai hna mejiune kow, nge ka trongëne hnyawane la itre hna amekötin. Haawe, huliwane jë la itre thiina hna qaja e caha, nge tro ha qaja aloinyi eö. Tro pena sa ce wange la hnëqa ne la qatre thup ngöne la fami angeic.

TROA ATREINE XOMIUJINE LA FAMI I EÖ

10. Kola hapeue la troa “xomiujine hnyawa” la fami?

¹⁰ Maine ka faipoipo eö, nge eö a ajane troa qatre thup, nyipiewekë troa qaja aloine la fami eö. Matre nyipiewekë tro eö a “xomiujine hnyawa” la fami eö. Loi e tro itre xan a öhne ka hape, eö la ketre he ne fami ka ihnim, nge ka atreine waiewekë. Nyipiewekë tro eö a kuca la hmi ne la fami, me tro fë la fami eö kowe la itre icasikeu, me xatua angatre troa catre cainöj. Pine nemene matre ka nyipiewekë lai? Öni Paulo: “Maine thatreine kö ketre thupëne la [fami] i angeic, troa thupëne tune kaa la ekalesia i Akötresie?”​—1 Tim. 3:5.

11-12. Maine ketre trejin a hane pi qatre thup, pine nemene matre ka nyipiewekë la thiina ne la fami angeic? (Wange ju fe la iatr.)

¹¹ Maine hetre nekö i eö ka tha 18 pala kö lao macatre, loi e tro eö a “hiane hnyawa” nyudren, nge tro fe nyudren a hane idrei. Loi e tro eö a inine me hia nyudren ngöne la ihnim. Tune la itre xaa nekönatr, tro fe nyudreni lai a hane elo, me ihnyima. Ngo e tro eö a hia nyudreni hnyawa, tro hë nyudreni lai a idrei, me imetrötrë, me hetre thiina ka loi. Ketre, loi e tro eö a isine matre tro nyudren a imelekeu me Iehova, me trongëne la itre trepene meköt, me xomi bapataiso.

 ¹² “Tha tro kö la nekö i eö a hlemu troa qenahmo me catre që.” Nemene la thangane kowe la kem, e tro la nekönatr ka hmi nge ka lapa thei keme me thin a kuca la ketre ngazo ka tru? Maine tha hna amekötine kö maine hajin la nekönatr, tha ijiji nyidrëti kö troa hane xome la hnëqa ne qatre thup.​—Wange ju la Ita Ne Thup ne 15 Okotropa 1996, götrane 21, par. 6-7 (Qene Wiwi).

HULIWA CATRE JË KOWE LA EKALESIA

13. Nemene la ka amamane ka hape, tha ka pi hune kö eö, maine “catre fë mekun”?

¹³ Ka nyipiewekë kowe la ekalesia la itre trejin trahmany ka hetre thiina ka loi. Ame la atr ka tha pi hun, ke ka thele tingeting. Tro la itre atr a öhne ka hape, tha ka pi hune kö eö, e tro eö a drenge la hna qaja hnei angatr, me kapa la itre mekuna i angatr. Pane mekune jë laka, tro la lapa ne la itre qatre thup a axeciëne la ketre mekun thenge la itre trepene meköt qa hnine la Tusi Hmitrötr, ngo tha aja i eö kö. Tro kö eö lai a kapa? “Tha tro kö a catre fë mekun.” Kola hape, tha tro kö a isine matre tro palahi la itre xan a trothenge la mekuna i eö. Loi e tro pe eö a drenge la mekuna i itre xan. (Gen. 13:8, 9; It. Ed. 15:22) Tha tro kö eö a pi “iwesitrë” maine “canga elëhni.” Tha eö kö a ithanata akökötren maine calogitr, ngo eö pe a menyik me ithanata hnyawa. Pine laka eö a thele tingeting, matre pa i eö troa iloi me ketre. (Iako. 3:17, 18) Tro la aqane ithanata i eö ka menyik a apujene la elëhni i itre xan, me itre ka icilekeu me easë.​—Ang. A. 8:1-3; It. Ed. 20:3; 25:15; Mat. 5:23, 24.

14. Pine nemene matre tha tro kö a acile la atr “ka xötrei hmi” nge kola hapeu la troa “mele nyipici”?

¹⁴ Ame la trejin hna acile troa qatre thup, ke tha “ka xötrei hmi” kö. Nyipici laka, pëkö hna amekötine ka qaja ka hape, tro hi a acili qatre thup la itre trejin ka hekö hë bapataiso. Ngo loi e troa nue  ijine matre tro la ketre trejin a macaj. Qëmekene troa acili eö, loi e troa mama ka hape, ka ipië eö tui Iesu, nge atreine eö itreqe hnyawa uti hë la Iehova a hamë eö la ketre hnëqa. (Mat. 20:23; Fil. 2:5-8) Ketre, tro eö a amamane ka hape, ka “mele nyipici” eö, e tro eö a fedre koi Iehova, me kowe la itre trepene meköti Nyidrë, me trongëne la itre hna amekötin hnene la organizasio.​—1 Tim. 4:15.

15. Hapeu, nyipiewekë kö tro la qatre thup a atreine cile fë cainöje hnyawa? Qejepengöne jë.

¹⁵ Tusi Hmitrötr a qaja ka hape, loi e tro la atre thup a “maca troa hamë ini.” Kolo kö lai hape, tro eö a atreine cile fë cainöje hnyawa? Waea. Tha ka maca kö la itre xaa qatre thup troa cile fë cainöj. Ame pe, itre ka atreine tro fë hnyawa la maca ka loi, me ithuecatre kowe la itre trejin. (Wange ju la 1 Korinito 12:28, 29 me Efeso 4:11.) Ngo nyipiewekë tro eö a isine matre tro pala hi a maca troa hamë ini. Troa tune kaa?

16. Tune kaa la aqane tro eö a maca la eö a hamë ini? (Wange ju fe la iatr.)

¹⁶ “Tro fe angeic a qale catre kowe la trengewekë ne nyipici.” Tro eö a atreine hamë ini hnyawa, e tro eö a nyitrepene hnei Tusi Hmitrötr la itre ini me itre eamo hnei eö hna hamën. Inine hnyawa jë la Tusi Hmitrötr me itre itusi së. (It. Ed. 15:28; 16:23.) Ame la eö a ini Tusi cas, wange ju la aqane tro eö a trongëne la hna qaja hnei Tusi Hmitrötr. Nge ame la eö a hamë ini, isine jë troa ketr la hni ne la itre atr. Ketre, tro eö a maca e tro eö a sipo ixatua kowe la itre qatre thup ka macaj, me trongëne la itre eamo i angatr. (1 Tim. 5:17) Loi e tro la qatre thup “a atreine hamë ithuecatr” kowe la itre trejin. Nge ame itre xaa ijin, loi e tro nyidrëti a hajine me “hmekë” angatr, ngo troa kuca palahi ngöne la ihnim. Haawe, maine tro eö a menyik me loi thiina, me nyitrepene la itre ini hnei eö hna hamën hnei Tusi Hmitrötr, tro hë eö lai a maca, ke eö  a nyitipu Iesu, lo Atre Hamë Ini Ka Sisitria.​—Mat. 11:28-30; 2 Tim. 2:24.

CATRE JË KÖ!

17. (a) Nemene la ka troa xatuane la atre ixatua troa macaj? (b) Qëmekene tro la itre qatre thup a acile la ketre trejin, nemene la nyine tro angatr a mekune hnyawan? (Wange ju la hna eköhagen “ The Nyi Ka Meköti Kö La Epuni a Acile La Ketre Trejin.”)

¹⁷ Maine jë, tro la itre xaa atre ixatua a mekune ka hape, tha ijiji angatre kö troa hane xome la hnëqa ne qatre thup. Ngo the thëthëhmine kö laka, tha nyipiewekë kö koi Iehova me organizasio i Nyidrë, tro eö a pexej. (1 Pet. 2:21) Ketre, tro kö la mene ka catre i Iehova a xatua eö. (Fil. 2:13) Hetre ketre thiina kö nyine tro eö a huliwan? Maine eje hi, thithi jë koi Iehova, ithele jë ngöne la itre itusi së, nge sipo ixatua jë kowe la ketre qatre thup.

18. Nemene la nyine tro la itretre ixatua a kuca?

¹⁸ Loi e tro asë hi së, memine fe la itre qatre thup a catre huliwane la itre thiina hna qaja ngöne la tane mekune celë. (Fil. 3:16) Ketre atre ixatua kö eö? Nga catre jë kö! Sipo Iehova jë troa ini eö me xatua eö matre tro eö a huliwa catre koi Nyidrë me kowe la ekalesia. (Isa. 64:8) Tro kö Iehova a amanathithine la itre trengecatre i eö matre troa qatre thup.