EASË ngöne la pune treu Nofeba 1932 e Mexico. Nge hna sasaithe la itre milio lao atr ka mel e cili. Ame lo wiik hnapan, hna xötrei acile la itre feux de signalisation e cili. Hetre ketre ewekë hna lapa treqene hnene la itre atr. Itre journalistes hë ngöne la hnë traqa itre train, nge angatr a itreqe troa kapa la ketre atr ka tru. Drei jë lai? Joseph F. Rutherford, kolo perezida ne Watch Tower Society. Kolo fe a itreqe hnene la Itretre Anyipici Iehova göi troa kepe Joseph Rutherford, ka traqa ne troa sine la asabele ka köni drai.

Öni L’Âge d’Or (Réveillez-vous! hë enehila) ka hape: “Ame la asabele cili, tre ketre ewekë ka tru lai, nge ka troa akökötrene la huliwa ne cainöj e Mexico.” Ngo, ala 150 hi lao atr ka sin la neköi asabele cili. Nga pine nemene kö matre qaja jë ka hape, ka nyipiewekë catr ej?

Qëmekene la asabele cili, tha nyipi kökötre kö la nyipici e Mexico. Qaane lo 1919, hetrenyi la itre neköi asabele ka co hna kuca, ngo ame hë lo itre macatre thupen, kola uti trootro la etrune la itre ekalesia. Matre ame hë la kola fe la filial lo 1929, mama ha e cili laka, troa hetre thangane la huliwa, ngo hetrenyi pala kö la itre xa ejolen. Hnene la organizasio hna amekötin kowe la itre pionie ka hape, tha tro kö a ce xome la huliwa ne thele mani memine la huliwa ne cainöje trootro. Hnene la ketre pionie hna wesitr pine lai, ame hnei angeic hna trotrije la nyipici, me ketre sipu eköth la sine gurupe i angeic ne ini Tusi Hmitrötr. Ketre, ame ngöne la ijine cili, hna nyihnane la atre thupëne la filial, ke hetre huliwa ka ngazo hna kuca. Matre, kola aja ixatua hnene la Itretre Anyipici Iehova ne Mexico.

Ame ngöne la ijine iwai Joseph Rutherford, hnei nyidrëti hna thuecatrene la itre trejin jëne la 7 lao cainöj, luetre hna cile fë ngöne la hna asabele, nge faifi la hna kuca matre hna drenge ngöne ipos. Itre trejine petre hi lai a hane huliwane la ipos matre troa akökötrene la maca ka loi ngöne la Mexico asë. Thupene la hna asabele, hna acile la ketre atre thupëne la filial matre troa cilëne la huliwa. Hetre trenge ajane hë la itre trejin, nge angatre pë hë a catre cainöje memine la ixatua i Iehova.

Ame hë lo macatre thupen, lo 1933, hna kuca la lue asabele ngöne la nöj, cas e Veracruz nge ketre e Mexico. Hna catre cainöje hnene la itre trejin ngöne la teritoar, matre hetre thangane catre pi hë. Ame lo 1931, ala 82 lao itre ka cainöj. Nge ame hë lo 1941, tru catre hë! Traqa koi 1 000 lao ka traqa e Mexico kowe la asabele ka tru lo 1941.

Ame lo 1943, hnene la itre trejin hna qaja trongëne la asabele ka tru hna hape “Nöje Hna Nuegufan,” nge hna troa hnen ngöne 12 lao traon e ­Mexique. * (Wange ju la ithuemacany.) Hnei angatre hna kuca tune lai jëne la lue pancartes hnei angatre hna isa fena trongën (hna hën qene Faras ka hape, hommes-sandwiches). Ame la lue pancarte, tre, cas qëmeke nge cas e hutrö, nge hna ihnöthekeun hmekune la lue iap. Angatr a xome la itre pancar­tes cili nyine qaja trongëne la itre asabele i angatr qaane lo 1936.

Hna hetre thangane la aqane huliwa i angatr la itre pancartes e Mexico, matre önine la ketre zonal (La Nación) göne la Itretre Anyipici Iehova ka sine la asabele ka hape: “Ame la pane drai ne asabele, hna upi angatr troa könën la itre atr ka alanyim. Ame la drai thupen, tru catre pala ha la iatren matre pëhë göhnë.” Tha madrine kö la itre ka hmi katolik, ame hnei angatr hna icilekeu memine la Itretre Anyipici Iehova. Ngo, tha xoue kö la itre trejin. Hnei angatre pe hna catre qaja trongëne la asabele. Hnene la ketre tane lai zonal hna cinyanyine ka hape: “Öhne asë hi hnene la itre atrene la traon, la itre trahmany me föe ka fena la itre pancartes.” Hetre iatr fe e hnine lai tan, nge kola amamane la itre trejin ngöne la itre gojenyi ne Mexico. Nge, fene lai iatr, hna sija ka hape: “Kola ut ngöne la itre gojeny.”

Ame ngöne la itre macatre cili, hnene la Itretre Anyipici Iehova hna isine troa sine la itre asabele e Mexico. Alanyimu la itre trejin ka traqa qa ngöne la itre götrane nöj gaa nanyi kowe la hnë xomi train matre hna trongëne la itre gojeny. Hna cinyihane hnene la ketre ekalesia ka hape, “Pëkö hnë treqe train ka easenyi koi hun.” Matre kola ti boliko maine tro koi nyimu drai hnene la itre trejin kowe la hnë xomi train ka troa ati angatr kowe la hnë asabele.

Alanyimu la itre trejin ka pë ewekë matre tha tru kö la manie i angatr troa tro koi hnë asabele. Ame la angatr a traqa, angatr a lapa thene la itre xa trejin e cili ka amamane la ihnimi me kepe angatre hnyawa. Ame itre xan, angatr a meköl ngöne la itre Uma Ne Baselaia. Ame la ketre ijin, traqa koi 90 lao trejin ka lapa ngöne la Bethela; hnei angatr hna meköl hune la itre karto itus. Önine la Annuaire, atraqatre la hni ne ole ne la itre trejin ke, “pujepuje kö me keukawa [la itre karto] hune la ibeto.”

Ka tru catr kowe la itre trejine cili troa ce icasikeu memine la itre trejin me angatr, matre ame koi angatr, loi e tro angatr a isine troa traqa kowe la hnë asabele. Traqa koi 850 000 lao Itretre Anyipici Iehova e Mexico enehila, nge eje pala hi thei angatr la hni ne ole cili. * (Wange ju la ithuemacany.) Önine la rapor ne la Annuaire 1949, tha hnene kö la itre jol e cili hna ananazijëne la trenge aja i angatr troa kuca la aja i Iehova. E hetre asabele mina, “itre jëne porotrike i angatre hi lai koi nyimu treu.” Ame la hnying hna amexeje lapan hnene la itre trejin tre, “Eue lo ijin tro sa asabele?”​—Itre hna kuca ekö e Amérique Centrale.