1. Nemene la aqane tro sa ce huliwa me Iehova?

IEHOVA la ka xupe la itre atr, nge Nyidrëti a ajane tro angatr a ce huliwa me Nyidrë. Ngacama ka ngazo asë hi la itre atr enehila, ngo ijije hi tro la itre ka lapaun a ce huliwa me Iehova o drai. Drei la ketre ceitun. Ame la easa cainöjëne la itre maca ka lolo ne la Baselaia, easë hi lai a “ce huliwa tro kö me Akötesie.” (1 Korinito 3:5-9) Drei la ketre manathith ka tru, troa ce huliwa memine la Atre Xupi së ngöne la hna cainöj! Ame ngöne la tane mekun celë, tro sa ce wang la itre xa aqane tro sa ce huliwa me Iehova. Easa ce huliwa me Nyidrë ngöne la easa xatuane la hnepe lapa së me ekalesia, ngöne fe la easa hnimi trenyiwa. Easë fe a ce huliwa me Iehova ngöne la easa hamë ixatua ngöne la organizasio, me akökötrene la huliwa së koi Nyidrë.—Kolose 3:23.

2. Pine nemene matre tha tro kö sa aceitunë së me itre xan?

² Ame la easa troa inine la tane mekun celë, nyipiewekë tro sa mekun laka, tha ceitune kö la trengecatre së me macatre së me mele së memine la itre xan. Ketre, tha ceitune kö la itre hne së hna atreine kuca. Celë hi matre, tha  tro kö sa aceitunë së me itre xan. Öni Paulo aposetolo: “Loi la nöjei ate troa isa tupa huliwan, ame hna hetenyi angate la nyine amadine qa thei angate kö, ngo tha qa thei kete kö.”—Galatia 6:4.

3. Pine nemene matre ijije hi tro sa qaja ka hape, easa ce huliwa me Akötresie ngöne la easa thupëne la hnepe lapa së?

³ Iehova a ajane tro sa thupëne la hnepe lapa së. Celë hi matre, easa huliwa manie matre hetreny la ka ijij thatraqai angatr. Ketre, nyimutre la itre thin ka lapa hnalapa matre thupëne la itre nekönatr. Nge ame la kola qatre trootro la kem me thin, easa thupë nyidro. Itre ewekë lai ka sisitria. Öni Tusi Hmitrötr: “Maine kete ate a tha thupëne hnyawa la ite sine i angeic, o thinene hi kowe la lapa ka cahae me angeic, angeic’ a kelikelëne la lapaun, nge atraqate la ngazo i angeice hune la ate tha lapaune kö.” (1 Timoteo 5:8) Hnene la itre ewekë cili matre tha ijiji së kö troa huliwa catr koi Iehova, thenge la aja së. Ngo the kucakuca kö! Iehova a madrine la easa thupëne la hnepe lapa së.—1 Korinito 10:31.

4. Nemene la aqane tro la itre kem me thin a amë panëne la Baselaia, nge nemene la thangane lai?

⁴ Ame la itre kem me thin keresiano a xatuane la itre nekö i angatr troa catre huliwa i Iehova, angatre hi lai a ce huliwa me Nyidrë. Ame la thangane lai ke, itre nekönatr a saen troa huliwa i Iehova ngöne la drai ka pexej. Ame la itre xan, nyudreni a mesinare maine pionie ngöne la itre nöj ka aja ixatua, maine huliwa pena ngöne Bethela. Tha iöhnyi lapa ha nyudren me itre kem me thin ke, nyudreni e ngöne la itre götran gaa nany. Ngo ame pe, tha cile kö la itre kem me thin ithuecatre koi nyudren tro palahi a catre huliwa i Iehova. Pine nemen? Pine laka tru la madrine i angatr troa öhne la itre nekönatr e amë panë Iehova ngöne la mele i nyudren. (3 Ioane 4) Nyimutre la itre kem me thin ka mekune tui Hana. Öni Hana ka hape, hnei eahlo hna “nue” Samuela koi Iehova. Ame kowe la itre kem me thin, ketre manathith ka tru la troa ce huliwa me Iehova tune lai.—1 Samuela 1:28.

5. Nemene la aqane tro sa xatuane la itre trejin ne la ekalesia? (Wange ju la pane iatr.)

⁵ Maine co hi la hnëqa së ngöne la hnepe lapa, hapeu, ijije kö tro sa xatuane la itre trejin ka wezipo maine ka qatre hë? Maine xatuane pena la itre ka thupë angatr? Thele jë e hnine la ekalesia la itre trejin ka aja ixatua. Maine jë, hetre ketre trejine föe ka thupëne la kem maine thine i nyiidro ka qatre hë. Hapeu, ijije kö tro sa ithupë, matre xatua nyiidro troa kuca la itre xa jol? Ketre, ijije fe tro sa trotheng la ketre trejin koi itre icasikeu, maine kuci komisio, maine wang pena la ketre sinee e pital. Celë hi itre aqane tro sa ce huliwa me Iehova. Nge jëne lai, Nyidrëti a sa la thithi ne la itre trejin ka aja ixatua.​—E jë la 1 Korinito 10:24.

6. Nemene la aqane tro sa hnimi trenyiwa?

⁶ Ka hnimi trenyiwa la itre hlue i Akötresie. (Heberu 13:2) Hetrenyi e hnine  la Tusi Hmitrötr, la itre tulu ka xatua së troa hnimi trenyiwa. (Genese 18:1-5) Maine ijij, loi e tro palahi sa xatuane la itre atr, tune la itre “ate ne la lapa i angete lapaun” me itre xane ju kö.​—Galatia 6:10.

7. Nemene la thangan e tro sa kapa la itre trejin ka nyihlue i Iehova o drai?

⁷ Hapeu, ijije kö tro sa ce huliwa me Iehova me kapa la itre trejin ka huliwa i Nyidrë o drai? (E jë la 3 Ioane 5, 8.) Öni Tusi Hmitrötr, kola troa ‘ce akeukawanyi së me angatr.’ (Roma 1:11, 12) Hanawang la tulu i Olaf. Ame lo angeic a co, hna traqa hnene la ketre atre thupëne la sirkoskripsio troa wange la ekalesia i angeic. Pine laka pëkö föi nyidrë, hnei Olaf hna sipone kowe la kem me thine i angeic ka tha hmi kö, troa kepe nyidrë. Hnei nyidroti hna nangëne la sipo i Olaf, ngo tro pë hë Olaf a meköl ngöne salon. Ka tru la madrine i Olaf. Lolo catr la wiik ne Olaf a ce lapa memine la atre thupëne la sirkoskripsio! Ame e hmakany, nyidroti a ce iji kofi me nango porotrik. Tru catr la hnene la atre thupëne la sirkoskripsio hna ithuecatre koi Olaf. E cili, Olaf ha nyiqane huliwa i Iehova o drai. Kola traqa koi 40 lao macatre ne Olaf a mesinare.

8. Pine nemene matre loi e tro palahi sa menyik, ngacama tha kepe së hnyawa kö? Qaja jë la ketre ceitun.

⁸ Nyimutre la itre xa aqane tro sa hnime la trenyiwa, ngacama tha kepe së hnyawa kö. Hnene la ketre trejine föe qa Espagne hna ini tus me Yesica, ketre föe qa Equateur. Ame la ketre ijine nyidroti a ini tus, kola treije hnei Yesica. Hnene la trejin hna hnyingëne la kepin matre Yesica a treij. Öni Yesica, ame la angeic a traqa e Espagne, ka pë manie angeic. Ame la ketre drai, pëkö a i angeic me nekö i angeic, timi hi la ka hetreny. Ame la Yesica a amekölene la nekö i angeic, hnei angeic hna sipo ixatua ngöne la thith. Tha hmitre ju kö nge traqa pi hi la lue Atre Anyipici Iehova troa hamë zonal. Hna elëhni hnei Yesica, ame hnei angeic hna zezene la zonal, me hape: “Tha celë kö la xen hnenge hna ajane kowe la neköng!” Hnene la lue trejin hna thele troa akeukawanyi Yesica, ngo tha hnei angeice kö hna drei nyidro. Thupene lai, hnei nyidroti hna amë ngöne la qënehlö i Yesica la watrengë xen. Celë hi kepin matre angeic a treij. Tha trotrohnine kö angeic ekö laka, Akötresieti a sa lo thithi angeic. Ngo xecie hë koi Yesica laka, angeice ha troa nyihlue i Iehova. Celë hi thangane la hna catre ham hnene la lue trejin.​—Ate Cainöj 11:1, 6.

9, 10. (a) Nemene la itre aqane ham ne la angetre Isaraela ekö? (b) Nemene la aqane tro la itre trejin trahmany a ixatua ngöne la ekalesia enehila?

⁹ Nyimutre ekö la itre aqane tro la angetre Isaraela a ham. (Esodo 36:2;  1 Aqane lapa ite Joxu 29:5; Nehemia 11:2) Ame fe enehila, ijije hi tro sa nue la traeme së, me itre mo së, me itre hne së hna atrein, matre troa xatuane la itre trejin. E cili, tro hë sa madrin, nge tro Iehova a amanathithi së.

¹⁰ Hetre ketre aqane tro la itre trejin trahmany a ce huliwa me Iehova. Tusi Hmitrötr a ithuecatre koi angatr troa thele troa hane drikona maine qatre thup. (1 Timoteo 3:1, 8, 9; 1 Peteru 5:2, 3) Angatr a ajane troa xatuane la itre trejin troa imelekeu hnyawa me Iehova. (Ite Huliwa 6:1-4) Hapeu, hna hane kö sipo epun hnene la itre qatre thup troa ixatua troa hamë itus, maine hamë teritoar, maine nyidrawa Uma Ne Baselaia, maine itre xa ewekë ju kö? Tru la madrin hna kapa hnene la itre trejin trahmany ka xome la itre huliwa cili.

11. Nemene la thangan hna kapa hnei Margie qa ngöne la hna ixatua troa xupi Uma Ne Baselaia?

¹¹ Ame la itre ka saen troa xupi Uma Ne Baselaia, tre, angatr a nyisineene la itre xa trejin. Hanawang la tulu i Margie. Kola traqa koi 18 lao macatre enehila ne angeic a ixatua troa xupi Uma Ne Baselaia. Hnei Margie palahi hna thele troa ce tro memine la itre trejine jajiny, matre ini nyudreni la huliwa. Öni angeic ka hape, jëne la huliwa cili, easa ithuecatrekeu. (Roma 1:12) Eje hi, ame la kola traqa la itre jol koi Margie, itre trejin ka xupi Uma Ne Baselaia la ka xatua angeic. Hapeu, hnei epuni kö hna hane ixatua troa xupi Uma Ne Baselaia? Ngacama pëkö hnei epuni hna atreine kuca, ngo ijiji epuni fe troa hane ixatua.

12. Nemene la aqane tro sa ixatua ngöne la kola traqa la ketre hulö?

¹² Easa ce huliwa me Iehova, ngöne la  easa kuië ahnahna thatraqane la itre trejin hna lepe hnei hulö. (Ioane 13:34, 35; Ite Huliwa 11:27-30) Ijije fe tro sa nyidrawane me nyihnyawane la itre uma hna angazon hnei hulö. Celë hi ka traqa koi Gabriela, ketre trejine föe qa Pologne. Hna angazone la uma i eahlo hnei di. Tru la madrine i eahlo la kola traqa hnene la itre trejin troa ixatua. Ame koi eahlo, tha nyipiewekë kö la itre ewekë ka paatr, ngo ene pë hë lo itre ewekë hna kapa. Öni eahlo: “Trotrohnine hë ni laka, manathith ka tru la troa ketre atrene la ekalesia ne la itre Keresiano.” Nyimutre la itre trejin hna xatuane thupene la itre hulö, nge ka mekun tui Gabriela. Nge tru catre fe la madrine ne la itre trejine ka ce huliwa me Iehova, troa xatua angatr.​—E jë la Ite Huliwa 20:35; 2 Korinito 9:6, 7.

13. Nemene la ka acatrene la ihnimi së koi Iehova la easa saen troa ixatua? Qaja jë la ketre ceitun.

¹³ Nyimutre la itre trejin ka ce huliwa me Akötresie, troa xatuane la itre ka kötre mel a tro Etazini. Stephanie la ketre e angatr. Hnei Stephanie hna xatuane la itre trejin ka po troa thele uma. Öni angeic: “Hna ketri hun hnene la madrine i angatr, la angatr a öhne la ihnimi ne la itre xa trejin. Ame kowe la itre trejin, eahuni a xatua angatr. Ngo tru catre kö la hnei angatre hna xatua hun. Hnene la ihnim me aqane ce mel, me lapaun me mejiune i angatr koi Iehova, hna acatrene la ihnimi huni koi Nyidrë. Atraqatr la ole hun koi Iehova, me kowe la nöjei ewekë hne huni hna kapa qaathene la organizasio i Nyidrë.”

14, 15. (a) Nemene la mekuna i Isaia perofeta? (b) Nemene la aqane tro la itre Keresiano a nyitipu Isaia?

¹⁴ Hapeu, aja i epuni kö troa hane ce huliwa me Iehova? Aja i epuni kö troa hane fek kowe la ketre nöj ka aja ixatua? Eje hi laka, tha nyipiewekë kö troa tro gaa nany matre troa hetre hni ne ham. Ngo hetre itre xa trejin ka tro ke, angatr a mekun tui Isaia perofeta. Ame lo Iehova a hnying ka hape: “Tro ni a upi dei?” Öni Isaia: ‘Eni hi la, upi ni jë.’ (Isaia 6:8) Hapeu, easë kö a ajane troa hane xatuane la organizasio i Iehova? Nemene la aqane tro sa ixatua?

¹⁵ Öni Iesu göne la huliwa ne cainöj:  “Atraqate la meledrai, nge xalaithe hi la angete troa menue; celë hi mate xëwejë nyipunie kowe la Joxu ne la meledrai, mate upepi la angete troa menue kowe la meledrai i anganyidë.” (Mataio 9:37, 38) Hapeu, ijije kö tro sa pionie ngöne la ketre nöj ka aja ixatua? Maine xatuane pena la ketre trejin troa hane pionie? Nyimutre la itre trejin ka mekun laka, ame la troa pionie ngöne la ketre nöj ka aja ixatua, tre, ketre aqane tro hi së lai a amamane la ihnimi së koi Akötresie me kowe fe la itre xan. Ngo hapeu, hetre itre xa aqane tro kö sa akökötrene la huliwa së koi Iehova? Ketre jëne madrine hi lai.

16, 17. Nemene la itre xa aqane tro sa akökötrene la huliwa së koi Iehova?

¹⁶ Hapeu, tha ajane kö epuni troa ami drai ngöne la wiik matre troa huliwa ngöne Bethela maine ixatua pena troa xupi Uma Ne Baselaia? Ka tru kowe la organizasio i Iehova, la itre trejin ka saene troa ixatua ngöne la itre götrane ka aja ixatua. Ka tru fe la itre ka saene troa kuca la itre huliwa ngacama thatreine kö angatr. Eje hi, ka tru koi Iehova la itre trejin ka nue la itre sipu huliwa i angatr, matre troa catre huliwa i Nyidrë ngöne la itre götrane ka aja ixatua.​—Salamo 110:3.

¹⁷ Hapeu, aja i epuni kö troa hane sine la itre ini ka troa hnëkë epuni troa catre huliwa i Iehova? Maine jë, tro epuni a sipone troa sine la Ini Koi Itre Ka Cainöj. Hna hnëkëne la ini cili thatraqane la itre trejin ka macaj, me ka huliwa i Iehova ngöne la drai ka pexej. Ej a xatua angatr troa kökötre ngöne la huliwa ne cainöj. Loi e tro la itre trejin a isa hnëkë ke, thupene la ini cili, kola troa upi angatr kowe la itre xa götran. Hapeu, ijiji epuni kö troa hane sine la ini cili, matre akökötrene la huliwa i epun koi Iehova?​—1 Korinito 9:23.

18. Nemene la thangan e tro palahi sa catre ce huliwa me Iehova o drai?

¹⁸ Pine laka itre hlue i Iehova së, matre easa ham, me menyik, me loi thiina, me ihnim. Easa nyipiewekëne la itre xan. Nge celë hi ka hamë madrine me tingeting koi së. (Galatia 5:22, 23) Ngacama jole ju hë la mele së, ngo ijije hi tro sa madrin, e hne së hna nyitipune la itre thiina ka lolo i Iehova, me catre ce huliwa me Nyidrë!​—Ite Edomë 3:9, 10.