Pine nemene matre hna wathebone troa xomi ewekë ngöne la site ne la Itretre Anyipici Iehova, matre troa amë ngöne la itre xa sit?

Itre atr a mekun laka, ijije hi troa iupi fë ngöne la itre xa sit, la itre ewekë hna amë ngöne la site së ke, ka pëkö thupen. Ngo troa hetre ethan e tro sa ujë tune lai, nge ka isazikeu memine la hna qaja ngöne la itre Conditions d’utilisation  * (wange ju la ithuemacany) ne la itre site së. Kola qaja hnyawane hnene la itre Condition cili ka hape, tha tro kö a xom qa ngöne la site së, la itre iatr, maine itus, maine miuzik, maine video maine itre xa tane mekune pena, matre troa amë ngöne la itre xa sit Ëternet (sit ne iupi fë video maine itre réseaux sociaux).” Pine nemene matre ka nyipiewekë la itre hna amekötine cili?

Hetre wathebo ka thupëne la site së, hna hëne ka hape, copyright. Ka nyipiewekë catre lai ke, kola thupën matre tha tro kö a atrekënö la site së. Itre ka iamenumenu me itre xa atr a ajane troa ajolëne la huliwa së. Celë hi matre, ame itre xa ijin, angatr a ce amë ngöne la site i angatr, la itre ewekë hna xom qa ngöne la site së memine la itre xa ithuemacany. (Salamo 26:4; Ite Edomë 22:5) Itre xan a xome la logo ne la sit jw.org, matre troa amë ngöne la itre application me itre publicité hnei angatre hna salemën. Ngo pine laka, hetre wathebo ka thupëne la itre itusi së me logo së, matre ijije hi tro sa sewe angatr me uti sai angatr kowe la hnakootr. (Ite Edomë 27:12) Ngo tha tro kö la hnakootr a xatua së, e hne së hna nue la itre xan, tune la itre trejin, troa amë la logo së ngöne la itre xa sit.

Ka hetre ethan e troa télécharger la itre itusi së ngöne la itre xa sit, ngo tha ngöne jw.org. Iehova a hamë së la xeni ne la u, jëne hi la “hlue ka nyipici me ka inamacan.” (Mataio 24:45) Caasi hi la sit hna huliwane hnene la “hlue” cili, ene la sit www.pr418.com, me tv.pr418.com, me wol.pr418.com. Nge könitre hi la itre application ngöne mobilis, ene JW Language^®, JW Library^®, me JW Library Sign Language^®. Pëkö e hnine la itre sit me itre application cili, la itre publicité maine itre xa ewekë hna kuca hnene la fene i Satana. Maine tro sa télécharger la itre itusi së ngöne la itre xa sit ke, tro hë lai a hetre ethan. Eje hi, hna saze la itre xa itus.—Salamo 18:26; 19:8.

Ketre, maine tro sa iupi fë la itre itusi së ngöne la itre xa sit, easë hi lai a aijijëne la itre ka iamenumenu me itre xane fe, troa qajangazone la organizasio i Iehova. Hetre itre trejine ka iwesitrë me angatr, ngo ame pe, tha angatre kö lai a atrunyi Iehova. Tha celë kö aqane tro sa amekötine la mekuna i angatr me xatua angatr troa trotrohnine la nyipici. (1 Timoteo 6:3-5; 2 Timoteo 2:23-25) Ketre, hetre itre xane ka kuca la itre xa site me itre xa compte me qaja ka hape, itre atrene la organizasio angatr maine itre atrene la Lapa Ne Xomi Meköt pena. Ngo angatr a thoi. Ame thene la Lapa Ne Xomi Meköt, pëkö ka hetre sit maine hetre compte pena ngöne ëternet.

Ame la easa amamane la sit jw.org kowe la itre atr, easë hi lai a sajuëne la huliwa ne cainöjëne la itre “maca ka loi.” (Mataio 24:14) Kola kökötre lolo la itre sit me itre application së. Ajan asë hi së tro la itre xan a hane kepe thangane qa ngön. Celë hi matre, hna nue tro sa iupi fë jëne mail la ketre itusi së, maine iupi fë pena la aqane troa tro kowe la site së. Aqane tro hi së lai a eatrongëne la itre atr kowe la xeni ne la u, hna hnëkëne hnei Iehova jëne la “hlue ka nyipici me ka inamacan.”