AME lo macatre ka ase hë, itre thauzane la itre trejine trahmany ka hane xome la hnëqa ne qatre thup me drikona. Maine jë, epuni la ketre, nge tru la madrine i epun troa nyihlue i Iehova tune lai, me xatuane la itre trejin.

Tro epuni a nango seseu. Öni Jason, ketre qatre thup ka thöthi palakö: “Ame lo kola hamë hnëqa koi ni, kösë hace catre palaha, nge tha ijijinge kö.” Ame fe koi Mose me Ieremia, tha ijiji nyidroti kö troa kapa la itre hnëqa qaathei Iehova. (Esodo 4:10; Ieremia 1:6) Maine jë, celë fe hi aqane mekune i epun. Nemene la aqane tro sa acatrene la mejiune së, matre troa macaje trootro? Ijije hi tro sa xomi tulu qaathei Timoteo.​—Ite Huliwa 16:1-3.

Maine jë, 20 petre kö la macatre i Timoteo ngöne lo angeic a nyiqane ce tro me Paulo aposetolo. Maine jë, hnei angeice hna mekun laka, tha ijiji angeice kö troa inine me eamon la itre xan ke, thöthi palakö angeic. (1 Timoteo 4:11, 12; 2 Timoteo 1:1, 2, 7) Ame pe, hnei angeice palahi hna catr. Celë hi matre, thupene la treen lao macatre, öni Paulo koi angetre Filipi: “Ini a mejiune koi Joxu Iesu laka tro ni a canga upi Timoteo koi nyipunie.” Pine nemene matre Paulo a mekune tune lai? Öni nyidrë: “Pëkö kete ate thenge ka ce pengöne memin.”​—Filipi 2:19, 20.

Pine nemene matre Timoteo la ketre tulu ka lolo kowe la itre qatre thup? Hane hi la sikisi lao kepin.

1. Ka tru koi angeic la itre atr. Hnei Paulo hna qaja kowe la itre trejin e Filipi ka hape, tro Timoteo a “wange nyipicine” la pengöi angatr. (Filipi 2:20) Ketre, aja i Timoteo tro la itre trejin a lapa qale catr koi Iehova. Celë hi matre, hnei angeic hna xomi ijin me nue trengecatr, matre troa xatua angatr.

William la ketre trejin, nge 20 hë la itre macatre ne qatre thupe nyidrë. Nyidrëti palahi a qaja kowe la itre trejin ka xötrei xome la hnëqa ne qatre thup, ka hape: “Hnime jë la itre trejin. Ame la ka nyipiewekë, tre, troa xatua angatr.” The tune kö la itre ka xomi kar ke, ame koi angatr, nyipiewekë catre kö troa traqa kowe la hna acili kar, hune la troa ati atr.

2. Hnei angeic hna amë panëne la huliwa i Iehova. Öni Paulo ka hape, ketrepengöne kö Timoteo memine la itre ka “thele la ite ewekë i angate kö, ngo tha ite ewekë i Iesu Keriso kö.” (Filipi 2:21) Öhne hi Paulo laka, hnene la itre xa trejin hna wangatrune palaha la mele i angatr. Ame e itre xa ijin, angatr a amë panëne la itre sipu aja i angatr hune la huliwa i Iehova. Ngo tha pengöi Timoteo kö! Ame lo ijiji Timoteo hë troa huliwa catr koi Akötresie, hnei angeic hna ujë tui Isaia me hape: ‘Eni hi la, upi ni jë.’​—Isaia 6:8.

Nemene la aqane tro sa wangatrune la itre aja ne la ekalesia memine fe la itre aja së? Ame la hnapan, tro sa xötrethenge la eamo i Paulo, ka hape: “Tupathe hnei nyipunie la nöjei ewekë ka isa pengöne kö.” (Filipi 1:10) Loi e troa tro pa la huliwa i Iehova ngöne la mele së. Ame la hnaaluen, tro sa neëne la itre huliwa ka aluzine la traeme së me trengecatre së. Öni Paulo koi Timoteo: “Kötenepi la ite aja i thupëtesij; nge xötethenge la thina ka meköt, me lapaun, me ihnim, me tingeting.”​—2 Timoteo 2:22.

3. Hnei angeic hna catre huliwa i Iehova. Öni Paulo göi Timoteo: “Hnei angeice hna ce nyi hlue me ini ngöne la maca ka loi, tune la kuku kowe la kem.” (Filipi 2:22)  Eje hi, tha ka genyi kö Timoteo. Hnei angeice palahi hna ce huliwa me Paulo. Nge celë hi ka acatrene la aqane imelekeu i nyidro.

Tru catre fe la itre huliwa nyine troa kuca ngöne la organizasio i Iehova enehila. Itre huliwa lai ka troa hamë madrine së me xatua së troa easenyi kowe la itre trejin. Haawe, “catejë troa huliwa i Joxu pala hi.”​—1 Korinito 15:58.

4. Hnei angeic hna trongëne la itre hnei angeic hna inin. Hnei Paulo hna cinyihane koi Timoteo ka hape: “Hnei ’ö hna xötrethenge hnyawa la hnenge hna ihaji, me thinang, me mekunang, me lapaun, me xomi hni ahoeany, me ihnim, me xomi hni.” (2 Timoteo 3:10) Hnei Timoteo hna trongëne la itre hnei angeice hna inin. Celë hi matre, hna athipi hnëqa i angeic.​—1 Korinito 4:17.

Hapeu, tha ajane kö së troa xomi tulu qaathene la ketre qatre thup? Tom la ketre trejin ka qatre thup, nge nyimu macatre hë enehila. Mekune palahi nyidrë laka, hnene la ketre qatre thup ekö, hna wangatrunyi nyidrë me xatua nyidrë troa xome hnyawa la hnëqa. Öni Tom: “Hnenge palahi hna sipo eamo koi nyidrë me trongën. Celë hi ka xatua ni troa acatrene la mejiuneng, me xome hnyawa la hnëqang.”

5. Hnei angeic palahi hna catre huliwa. Öni Paulo koi Timoteo: “Loi e majemin’ eö troa tune la thina i Akötesie.” (1 Timoteo 4:7) Ame la atre kuci sport, tre, hetre ka xatua angeic. Ngo hetre nyine tro fe angeic a ketre sipu kuca. Öni Paulo koi Timoteo: “Qâ i ’ö troa cate e tus, me eamo, me ini . . . Mekuneju eö la nöjei ewekë celë; majeminejë eö kow’ ite ej; mate mama pi la tropane la huliwa i eö kowe la nöjei ate asë.”—1 Timoteo 4:13-15.

Eje hi, nyipiewekë tro sa thele troa hane macaj. Loi e troa ini Tusi Hmitrötr, me thele troa atre la itre hna amekötin ka hnyipixe qaathene la organizasio. Ketre, tha tro kö sa wangatrunyi së palaha. Tha ka loi kö troa mekun laka, ekö hë së xome la hnëqa, matre ijiji së hi troa ketre sipu axecië mekun, nge tha hna pane ithele kö. Tui Timoteo, loi e tro sa ‘wai së kö memine la aqane ini.’—1 Timoteo 4:16.

6. Hnei angeic hna mejiune kowe la uati hmitrötr. Ame la Paulo a qejepengöne la huliwa ne cainöje i Timoteo, öni nyidrë: “Ame la ewekë ka loi hna nue koi ’ö, thupënejë hnene la [u]ati [h]mitöt, ate lapa e kuhu ite hni shë.” (2 Timoteo 1:14) Nyipiewekë tro Timoteo a sipone la uati hmitrötre i Akötresie.

Donald la ketre trejin ka qatre thup nge nyimu macatre hë enehila. Öni nyidrë: “Nyipiewekë tro la itre trejin ka trene hnëqa a thupëne la aqane imelekeu i angatr me Akötresie. E cili, tro angatr ‘a catre trootro.’ Ketre, maine tro angatr a sipone la uati hmitrötr me eënyine la wene ne la ua ke, tro fe lai a hetre thangane ka loi kowe la itre trejin.”​—Salamo 84:7; 1 Peteru 4:11.

Tru catre la madrine së troa goeëne la itre drikona me itre qatre thup, la angatr a kökötr ngöne la huliwa i Iehova. Öni Jason, lo trejin hna qaja ha e caha hun: “Qane lo eni a xome la hnëqa ne qatre thup, hnenge hna catre ini tus, nge celë hi ka acatrene la mejiuneng. Madrine catre hë ni troa kuca la hnëqang. Ame koi ni, ketre manathithi lai ka tru!”

Hapeu, easë kö a thele troa hane macaje trootro? Maine tro sa xötrethenge la tulu i Timoteo, haawe, tro hë lai a hetre thangane kowe la itre trejin ne la ekalesia.