1. Nemene la ka amamane ka hape, ka hame Iehova?

AME ngöne la qaan, Iehova caasi hi. Mekune jë hi Nyidrë troa xupe la nöjei ewekë asë e koho hnengödrai me e celë fen. Atraqatr la madrine i Iehova troa ham. Celë hi matre hna hë Nyidrë ka hape, “Akötesie tene manathith.” (1 Timoteo 1:11; Iakobo 1:17) Iehova a ajane tro fe sa hane madrin. Celë hi matre, Nyidrëti a ini së troa ham.—Roma 1:20.

2, 3. (a) Pine nemene matre ka madrine së troa ham? (b) Nemene la hne së hna troa ce wang ngöne la tane mekune celë?

² Hnei Iehova hna xupe la itre atr hnaiji Nyidrë. (Genese 1:27) Hnei Nyidrë hna xupi së cememine la itre thiina i Nyidrë. Haawe, maine easa ajane troa madrin me kepe manathith qaathei Iehova, nyipiewekë tro sa wangatrune la itre xan me hetre hni ne ham, tui Nyidrë. (Filipi 2:3, 4; Iakobo 1:5) Celë hi aqane xupi së hnei Iehova. Ngacama itre atr ka ngazo së, ngo ijije hi  tro sa nyitipu Iehova me hetre hni ne ham.

³ Tro sa ce wang la itre ini hna hamën hnei Tusi Hmitrötr göne la troa ham. Tro fe sa ce wang la kepin matre Iehova a madrin la easa ham. Ketre, tro sa ce wang laka, ame la easa ham tre, easë hi lai a kuca la huliwa i Iehova, nge tro sa kepe thangane qa ngön. Tro fe sa ce wang la itre kepin matre tro palahi sa ham.

4, 5. Nemene la aqane hame i Iehova me Iesu, nge pine nemene matre nyipiewekë tro sa nyitipu nyidro?

⁴ Iehova a ajane tro sa nyitipu Nyidrë. Atraqatr la madrine i Nyidrë la easa ham. (Efeso 5:1) Nge aja i Nyidrë tro fe sa hane madrin. Celë hi matre, hnei Nyidrëti hna xup la ihnadro me itre xa ewekë, nge ka lolo la aqane xupi së hnei Nyidrë. (Salamo 104:24; 139:13-16) Haawe, ame la easa thele troa amadrinë itre xan ke, easë hi lai a atrunyi Iehova.

⁵ Easë mina fe a nyitipune la aqane hame i Iesu. Öni nyidrë: “Tune la Nekö i ate tha traqa kö troa hete hlue i angeic, ngo tro pe a hlue, me hamëne la mele i angeice nyine thupene mele ne la nöjei ate ka kösau.” (Mataio 20:28) Hnei Paulo aposetolo hna ithuecatre kowe la itre keresiano ka hape: “Loi e ej’ e kuhu ite hni nyipunie la mekune celë, lo ka eje thei Keriso Iesu . . . Hnei nyidëti hna aipië nyidëti kö, me xome la pengö i hlu.” (Filipi 2:5, 7) Haawe, loi e tro sa isa hnying ka hape: ‘Ijijinge kö troa xötrethenge hnyawa la thupa ca i Iesu?’—E jë la 1 Peteru 2:21.

6. Nemene la ini hna hamën hnei Iesu, jëne la tulu ne la atre Samaria? (Wange ju la pane iatr.)

⁶ Tru la madrine i Iehova la easa nyitipu Nyidrë me Iesu. Easa wangatrune la itre xan me thele la aqane troa xatua angatr. Celë hi hna amaman hnei Iesu, ngöne lo nyidrëti a qaja la tulu ne la atre Samaria. (E jë la Luka 10:29-37.) Hnei Iesu hna inine la itretre drei nyidrë troa xatuane la itre xan, ngacama ka mele angatr ngöne la ketre nöj. Mekune hi epun la kepin matre qaja jë Iesu la tulu cili? Hnene lo atre Iuda hna hnyingë nyidrë ka hape: “Dei la ate eashenyi ni?” Jëne la tulu ne la atre Samaria, Iesu a ini së laka, maine easa ajane troa amadrinë Iehova, nyipiewekëtro sa hetre hni ne ham.

7. Nemene la aqane tro sa amamane la mejiune së koi Iehova? Qejepengöne jë.

⁷ Nyimutre la itre kepin matre loi e tro sa hetre hni ne ham. Öni Satana ngöne lo hlapa e Edena ka hape, tro hë Adamu me Eva a mele madrin, e tha drei Iehova kö nyidro me ketre sipu meku nyidroti kö. Hnei Eva hna pi tru me thele troa tui Akötresie. Hnei Adamu fe hna pi tru me thele troa amadrinë Eva. (Genese 3:4-6) Akötr la pune koi nyidro me itre matra i nyidro. Eje hi, pëkö madrine thene la atr ka pi tru. Ame pe la easa hnime la itre xan me hetre hni ne ham,  easë hi lai a amaman la mejiune së koi Iehova.

8. Pine nemene matre tro hi Adamu me Eva ekö a mekune la itre matra i nyidro?

⁸ Ame lo Adamu me Eva e hnine la hlapa e Edena, tro hi nyidroti ekö a mekune la itre matra i nyidro. Pine nemen? Hnei Iehova hna upi nyidro troa hnaho matre nyialiene me aparadraisone la ihnadro. (Genese 1:28) Tui Iehova, aja i Adamu me Eva tro la itre nekö i nyidroti elany a mele madrin. Maine ju, tro asë hi angatr a ce huliwa matre aparadraisone la ihnadro. Drei la ketre hnëqa ka tru!

9. Pine nemene matre ketre huliwa ka lolo la troa aparadraisone la ihnadro?

⁹ Maine ju, tro la itre atr ka pexej a ce huliwa me Iehova, matre aparadraisone la ihnadro me kuca la aja i Nyidrë. E cili, tro hë angatr a lö kowe la hnamano i Nyidrë. (Heberu 4:11) Pane mekune jë la elolone la huliwa cili! Maine ju, tro Iehova a amanathithine la aqane ihnim me aqane mekune angatr la itre xan.

10, 11. Nemene la ka aijijë së troa eatrëne la huliwa ne cainöj me inine la itre atr?

¹⁰ Ame fe enehila, Iehova a ahnithe koi së la ketre hnëqa ka tru. Nyidrëti  a ajane tro sa cainöj me inine la itre atr. Celë hi matre, loi e tro sa wangatrune la itre xan. Maine tro sa hnimi Akötresie me itre xan, tro hë sa eatrëne hnyawa la hnëqa së.

¹¹ Hnei Paulo hna qaja göi nyidrë me itre pane Keresiano ka hape, itre ka “ce huliwa . . . me Akötresie” angatr. Hnei angatr hna catre cainöj me inine la nyipici kowe la itre atr. (1 Korinito 3:6, 9) Ketre tune mina fe enehila, easa “ce huliwa . . . me Akötresie.” Easa nue la traeme së me trengecatre së me itre mo së, matre troa eatrëne la huliwa hna ahnith hnei Akötresie. Drei la ketre manathith ka tru!

12, 13. Nemene la itre manathith hne së hna kapa qa ngöne la hna inine la itre xan?

¹² Atraqatr la madrine së la easa nue la traeme së me trengecatre së ngöne la huliwa ne cainöj. Celë hi hna qaja hnene la itre trejin ka ini Tusi Hmitrötr me itre xan. Eje hi, madrine catre së troa öhne la Tusi Hmitrötr e ketri la hni ne la hnainin. Kola kökötre la lapaune i angeic nge angeic a saze aqane mel. Ketre, angeic a ce thawa me itre xan la hnei angeic hna inin. Tru la madrine i Iesu, la nyidrëti a öhne lo ala 70 lao atr ka cainöj. Angatr a bëeke hmaca me “madine” ke, hetre thangane la huliwa ne cainöje i angatr.—Luka 10:17-21.

¹³ Tru la madrinene la itre trejin e cailo fen, ngöne la angatr a öhne la thangane la Tusi Hmitrötr thene la itre atr. Hanawang la ketre ceitun. Hnei Anna hna mekune troa huliwa catr koi Iehova. * (Wange ju la ithuemacany.) Hnei angeic hna fek kowe la ketre götran ka aja ixatua e Europe. Öni angeic: “Eni a madrin ke, nyimutre la itre ka ajane troa ini Tusi Hmitrötr e cili. Ame la eni a bëek koi hnalapa, pëkö ijine tro ni a meku ni. Eni a mekun la itre jol ka ej thene la itre hnainin. Eni a thele la aqane troa ithuecatre me xatua angatr. Xecie hnyawa ha koi ni laka, ‘sisitia la manathithi e troa ham hune la troa kapa.’ ”—Ite Huliwa 20:35.

14. Nemene la nyine tro sa kuca ngacama tha drei së kö hnene la itre atr?

¹⁴ Ngacama pëkö ka drei së ngöne la hna cainöj, ngo loi e tro palahi sa madrin ke, hne së hna thele troa ketr la nöjei atr hnene la itre maca ka lolo. Iehova a ajane tro sa kuca lo hnei Nyidrëti hna qaja koi Ezekiela, ka hape: “Tro eö a qaja koi angate la ite tenge ewekëng, maine tro angate a deng, maine pëkö, ke itete ena angat.” (Ezekiela 2:7; Isaia 43:10) Ngacama pëkö ka drei së, ngo ka tru koi Iehova la trengecatre hne së hna nue. (E jë la Heberu 6:10.) Önine la ketre trejin: “Easa tran me fi me thith, matre tro  Iehova a akökötrene la aja ne la atr.”—1 Korinito 3:6.

15. Hapeu, tro hi sa ham kowe la itre atr ka olene koi së? Qejepengöne jë.

¹⁵ Aja i Iesu fe tro sa hetre hni ne ham ke, celë hi jëne madrin koi së. Ame la easa hetre hni ne ham ke, easë hi lai a ithuecatre kowe la itre xan tro fe a hane ham. Celë hi matre, Iesu a ithuecatre koi së ka hape: “Hamënejë, nge tro pena a hamë nyipunie; nge tro hë la nöjei ate a hamëne kowe la imano i nyipunie la tulu ka loi, hna hujan, me ijumejumekeun, me kola malamala. Nge ame la aqane tuluthe hnei nyipunie, te, tro pena a tuluthe koi nyipunie.” (Luka 6:38) Nyipici laka, tha itre atr asë kö la ka troa hetre hni ne ole ngöne la easa ham. Ngo loi e tro palahi sa catre ham ke, nyimutre la itre thangan hna troa kapa qa ngön.

16. Tro sa hetre hni ne ham koi drei, nge pine nemen?

¹⁶ Ame la itre atr ka hetre hni ne ham, tre, tha angatre kö a ham göi thupen. Öni Iesu: “E tro eö a nyikein, könënejë la ite pë ewekë me ite ka pate sine itei, me ite geny, me ite timek nge tro ha manathithi eö; ke tha ’teine kö angate troa hedöthi ’ö.” (Luka 14:13, 14) Öni Tusi Hmitrötre fe: “Troa manathithi la lue meke ka loi,” nge, “Manathithi la ate mekune kowe la ate pë ewekë.” (Ite Edomë 22:9; Salamo 41:1) Eje hi, maine easa ajane troa xatua itre xan, nyipiewekë tro sa ham.

17. Nemene la itre xa nyine tro sa hamën matre hane madrin?

¹⁷ Ame la Paulo a amexej lo hna qaja  hnei Iesu ka hape, “sisitia la manathithi e troa hame hune la troa kapa,” tha nyidrëti hmekuje kö a qaja la itre mo. Ijije fe tro sa ithuecatre kowe la itre xan, me hamë eamo qa hnine la Tusi Hmitrötr, me xatua angatr. (Ite Huliwa 20:31-35) Hnei Paulo hna amamane la enyipiewekëne la troa ham, jëne la aqane ithanata me aqane ujë i nyidrë. Nyipiewekë tro sa hamën maine nue la traem me trengecatre së, me ihnimi së koi itre xan.

18. Nemene la hna qaja hnene la itre ka inamacan göne la troa ham?

¹⁸ Hnene la itre ka inamacan hna öhne la ka amadrinëne la itre atr. Öni angatr ka hape, thupene la hna kuca la loi me xatua itre xan, easa madrin ke, kösë hetre aliene hë la mele së. Celë hi matre, nyimutre la itre ka saen troa kuca la itre xa huliwa. Eje hi, ase hë Iehova qaja ka hape, ka madrin la atre ham.—2 Timoteo 3:16, 17.

19, 20. Pine nemene matre easa ajane troa hetre hni ne ham?

¹⁹ Tha ka hmaloi kö troa hetre hni ne ham kowe la itre atr ka meku angatre kö. Ngo öni Iesu ka hape, ame la lue wathebo ka tru, tre, ene la troa hnimi Iehova hnene la hni së ka pexej, me u së me mekuna së, me trengecatre së. Ketre, tro sa hnime la atr lapa easenyi së tu së kö. (Mareko 12:28-31) Ame ngöne la tane mekun celë, hne së hna ce wang laka, itre ka hnimi Iehova a nyitipu Nyidrë. Ka catre hame Iehova me Iesu. Nyidroti a ajane tro sa nyitipu nyidro ke, atre hi nyidro laka, jëne madrine lai koi së. Ketre, ame la easa ham ngöne la huliwa i Akötresie me ham koi itre xan, easë hi lai a atrunyi Iehova. Nge nyimutre la itre manathith hne së hna troa kapa.

²⁰ Easë palahi a thele troa hetre hni ne ham me hetre aja troa xatuane la itre xan, tune la itre trejin me easë. (Galatia 6:10) E cili, tro hë la itre atr a hnimi së me olene koi së, nge tro hë sa madrin. Öni Tusi Hmitrötr: “Troa atena mone la ate ihaban; nge troa fie la at’ ate ifi.” (Ite Edomë 11:25) Nyimutre la itre xa aqane tro sa ham ngöne la mele së, me ngöne la huliwa ne cainöj. Celë hi hne së hna troa ce wang ngöne la tane mekun thupen.