1. Nemene la hna perofetan hnei Isaia göi Iesu, nge pine nemene matre kola ithuecatre koi së?

KOLA ithuecatr me hamë mejiune së hnene la hna perofetan hnei Isaia, göi Iesu Keriso. Öni Isaia göi Iesu ka hape, “tha tro kö nyidëti a ishenyine thenge la hna öhne hnei lue mek, nge tha tro kö a amekötine thenge la hna denge hnei lue hnangenyë,” me “ishenyine amekötine kowe la ite ka pë ewekë.” (Isaia 11:3, 4) Pine nemene matre kola ithuecatre koi së? Pine laka, easa mel nyipine la ixöjetrij me iwangatrehmekunyi atr, nge itre atr a kapa la itre xan thenge la hna goeën. Celë hi matre easa treqe Iesu, la Atre Amekötine Ka Pexej ke, tha tro kö nyidrëti a ameköti së thenge la hna goeën!

2. Nemene la hna qaja hnei Iesu, nge nemene la hne së hna troa ce wang ngöne la tane mekun celë?

² Ame e nöjei drai, easa mekuhnine la itre xan. Ngo tha ka pexeje kö së tui Iesu, matre tha pexeje fe la itre mekuna së. Canga tro hi a ajojezi së hnene la hne së hna goeën. Celë hi matre, öni Iesu: “The eate hnine kö a xöte thenge la alamek, ngo loi e eate hnine la hna hnyingëne amekötin.” (Ioane 7: 24) Haawe, Iesu a ajane tro sa nyitipu nyidrë. Tha tro kö sa kapa la itre xan thenge la hna goeën. Ame ngöne la tane mekun celë, tro sa ce wang la köni ewekë ka troa ajolëne la mekuna së göi itre xan: ene la nöje i angatr, la etrune la manie i angatr, memine la macatre i angatr. Tro fe sa ce wang la aqane tro sa xötrethenge Iesu göne la aqane troa goeë itre xan.

3, 4. (a) Pine nemene matre saze pi la aqane goeëne Peteru la angetre ethen? (Wange ju la pane iatr.) (b) Nemene la hna trotrohnine hnei Peteru?

³ Pane mekune jë la mekuna i Peteru ngöne la kola upi angeic koi Konelio, ketre atre ethen e Kaisaria! (Ite Huliwa 10:17-29) Qaane lo Peteru a co, hna ini angeic ka hape, ka hmitrötr nge ka sis la angetre ethen. Ngo hna saze la mekuna i angeic hnene la hnei angeic hna meköle goeën qaathei Akötresie. (Ite Huliwa 10:9-16) Hnei Peteru hna öhne la imaano kola uti qa hnengödrai, nge hetrenyi e hnine la nöjei öni ka pui ngazo. Drenge jë hi angeic la kola qaja qa hnengödrai, ka hape: “Peteru fe, cilejë, humutheju, nge öniju.” Nge akönia thipëne Peteru. Qaja hmaca jë hi ka hape, “Ame la hnei Akötesieti hna nyihnyawan, te, the tro kö eö a hape, hmitöt.” Tha trotrohnine kö Peteru la hna qaja. Thupene lai, hna traqa la itre qeneqaja i Konelio. Hnene la uati hmitrötr hna upi Peteru kowe la hnalapa i Konelio, matre ce tro jë hi angeic me angatr.

⁴ Maine hnei Peteru ju hna axecië mekun thenge hi la hna goeën ke, tha tro jë kö angeic a tro kowe la hnalapa i Konelio. Tha hna hane fe kö tro hnene la ketre atre Iuda kowe la uma ne la ketre atre ethen. Ngo pine nemene kö matre tro jë Peteru koi Konelio? Ngacama ka sisine Peteru la angetre ethen, ngo hna saze la mekuna i angeic hnene la hnei angeic hna meköle goeën. Thupene la hnei Peteru hna drei Konelio, öni angeic: “Nyipici wangate hmekunë hë ni laka tha hnei Akötesieti hna iwangate hmekunyine ite ate, ngo hna kapa hnei anganyidëti la ate qoue nyidë me kuca la thina ka meköt, ngöne la nöjei nöj’ asë.” (Ite Huliwa 10:34, 35) Atraqatr la madrine i Peteru la angeic a trotrohnine la mekun celë. Ketre tune fe la itre xa Keresiano.

5. (a) Nemene la hnei Iehova hna ajane troa trotrohnin hnene la itre Keresiano asë? (b) Ngacama atre hë së la nyipici, ngo nemene la itre mekun ka eje palakö the së?

⁵ Hnei Iehova hna jëne Peteru matre troa xatuane la itre Keresiano troa trotrohnin ka hape, tha ka iwangatrehmekunyi atr kö Nyidrë. Tha Iehova kö a goeëne la nöje ne la atr, maine tribu, maine qene hlapa pena. Ame la ka nyipiewekë tre, tro sa xoue Nyidrë matre tro Nyidrëti a kepe së. (Galatia 3:26-28; Hna Amamane 7:9, 10) Nyipici laka, trotrohnine hë së la mekune cili. Ngo tune kaa e ka iwangatrehmekunyi atr la itre  atr ne la nöje së, maine itre atrene la hnepe lapa së? Ngacama ame koi së ke, tha ka iwaigele kö së, ngo hapeu, tha hane fe kö së qeje gelene la ketre atr? Ngacama ase hë Peteru amamane koi itre xan laka, tha ka iwangatrehmekunyi atr kö Akötresie, ngo tha paatre kö qaathei angeic la iwangatrehmekunyi atr. (Galatia 2:11-14) Haawe, nemene la aqane tro sa drengethenge Iesu, me saze la aqane goeëne së la itre xan?

6. (a) Nemene la ka troa xatua së troa xometrij la iwangatrehmekunyi atr? (b) Nemene la ka mama ngöne la rapor hna kuca hnene la ketre trejin?

⁶ Ame la ka xatua së troa xometrij la iwangatrehmekunyi atr tre, kolo itre ini hna hamën hnei Tusi Hmitrötr. (Salamo 119:105) Ketre, pine laka thatreine kö së troa sipu öhn laka, hetrenyi the së la thiina cili, haawe, loi e tro sa hnyingën kowe la ketre sinee. (Galatia 2:11, 14) Hnene laka, majemine hë së waigelene la itre xan, matre tha öhne hë së laka, hetrenyi the së la thiina cili! Celë hi ka traqa kowe la ketre trejin ka hetre hnëqa. Hnei nyidrëti hna kuca la ketre rapor göne la lue trefëne ka huliwa i Iehova ngöne la drai ka pexej. Ame la trahmany, tre, ka mele nyidrëti ngöne la ketre nöj hna wangacone hnene la itre atr. Hnene lai trejin hna qaja aloine la trahmany, ngo öni nyidrëti fe: “Ngacama ka traqa angeic qa [ngöne la nöje cili], ngo ame pe, easa öhne jëne la itre thiina me aqane mele i angeic ka hape, tha ka dro asë kö me pë hnënyöngön la itre atr ka mel e cili.” Nemene la ini koi së? Ngacama hetre itre hnëqa së e hnine la organizasio i Iehova, ngo loi e tro sa sipu waipengö së. Loi e tro fe sa sipo ixatua matre öhn laka, hetrenyi the së la iwangatrehmekunyi atr. Nemene la nyine tro fe sa kuca?

7. Nemene la aqane tro sa amaman ka hape, “hna atrune la ite hni” së?

⁷ Maine tro sa “atrune la ite hni” së, tro hë sa nyihnane la iwangatrehmekunyi atr hnene la ihnim. (2 Korinito 6:11-13) Drei la itre atr hne së hna lapa ce tro memin? Hapeu, kolo hmekuje hi lo itre atrene la nöj maine tribu së, maine itre ka qaja la qene hlapa së? Maine eje hi, loi e tro sa thele troa hane ce tro memine la itre xan. Loi e tro sa könëne la itre xa trejin troa ce cainöj me easë maine ce xeni pena. (Ite Huliwa 16:14, 15) E cili, troa kökötre la ihnimi së koi angatr, nge tha tro hmaca kö sa iwangatrehmekunyi atr. Tro sa ce wang la ketre aqane tro sa kapa la itre xan thenge la hna goeën hnei ‘lue mek.’

8. Nemene la hna qaja ngöne Levitiko 19:15, göne la aqane troa goeëne la itre atr?

⁸ Ame itre xa ijin, easa goeëne la itre xan thenge la etrune la manie i angatr. Kola qaja ngöne Levitiko 19:15 ka hape: “The tro kö eö a iwangate hmekunyine la ate pë ewekë, nge the metötëne kö la tena mo; ngo qâ i ’ö troa amekötine la ate lapa eashenyi ’ö ngöne la meköt.” Nemene la aqane tro la etrune la manie  ne la ketre atr a ajolëne la aqane goeë angeice hne sê?

9. Nemene la hna qaja hnei Solomona, nge nemene ini koi së?

⁹ Öni Solomona göne la pengöne la atr ka ngazo: “Kola methinëne la ate pë ewekë hnene la ite sine i nyën; ngo ala nyimu la itete hnime la ate tena mo.” (Ite Edomë 14:20) Nemene la hna ini së e celë? Maine tha hmeke kö së, canga tro hi sa nyi sineene la itre trejine ka trenamo, me wangacone la itre ka puafala. Nemene la thangan e tro sa goeëne la atr thenge la hnei angeic hna hetreny?

10. Pine nemene matre hnei Iakobo hna hmekëne la itre keresiano?

¹⁰ Maine tro sa goeëne la itre trejin thenge la hnei angatr hna hetreny, tro ha gomegom e hnine la ekalesia. Celë hi ewekë ka traqa ngöne lo hneijine i Iesu, matre hnei Iakobo hna hmekëne la itre keresiano. (E jë la Iakobo 2:1-4.) Eje hi, tha tro pi kö sa aciane la gomegom e hnine la ekalesia. Nemene la ka troa xatua së, matre tha tro kö sa goeëne la atr thenge la hnei angeic hna hetreny?

11. Hapeu, Iehova kö a kapa la atr thenge la hnei angeic hna hetreny? Qejepengöne jë.

¹¹ Loi e tro sa goeëne la itre trejin, ceitu me Iehova. Ame koi Iehova, tha ka sisitria kö la trejin ka trenamo hune la ka puafala. Eje hi, tha tro kö a lolo la aqane imelekeu së me Iehova hnene hi laka, ka trenamo së. Öni Iesu, ‘jole kowe la trenamo  troa lö hnine la baselaia ne hnengödrai,’ ngo tha hna qaja kö ka hape, tha ijije kö. (Mataio 19:23) Öni Iesu mina fe: “Manathithi nyipunie ite ka pë ewekë, ke thatraqai nyipunie la baselaia i Akötesie.” (Luka 6:20) Tha kolo kö lai a hape, ame la nöjei ka puafala ke, tro angatr a drei Iesu me kapa la itre manathith. Hetrenyi fe la itre ka puafala ka tha hane kö drei Iesu. Eje hi, thatreine kö tro sa qaja la aqane imelekeu i ketre me Iehova, thenge la hnei angeic hna hetreny.

12. Nemene la hna qaja hnei Tusi Hmitrötr kowe la itre ka trenamo me ka puafala?

¹² Ame ngöne la nöje i Iehova, hetrenyi la itre trejin ka trenamo me ka puafala. Angatr a hnimi Iehova me ce nyihlue i Nyidrë, hnene la hni ka pexej. Öni Tusi Hmitrötr kowe la itre ka trenamo, “the kete mejiune kö la tenge mo ka tha cile huti kö, loi pe koi Akötesie.” (E jë 1 Timoteo 6:17-19.) Ketre, Tusi Hmitrötr a hmekëne la itre hlue i Akötresie, itre ka trenamo me ka puafala ka hape, ka hetre ethanyin e troa hniin la itre mo. (1 Timoteo 6:9, 10) Eje hi, maine tro sa goeëne la itre trejin ceitu memine la aqane goeëne Iehova, haawe tha tro kö sa goeë angatr thenge la hnei angatr hna hetreny. Ngo hapeu, tro kö sa goeë angatr thenge la macatre i angatr?

13. Nemene la hna qaja hnei Tusi Hmitrötr göne la aqane troa metrötrëne la itre qatr?

¹³ Öni Tusi Hmitrötr ka hape, nyipiewekë tro sa metrötrëne la itre qatr. Öni Levitiko 19:32: “Tro eö a mejë qëmeke ne la qia he me metötëne la qat, me qouene la Akötesi ’ö.” Ketre, öni Ite Edomë 16:31: “Korona ka lolo la iqia e hna öhne ngöne la jëne ka meköt.” Hnei Paulo hna qaja koi Timoteo ka hape, tha tro kö a qaja angazone la itre qatr, ngo tro pe a nyipi angatr ceitu me itre kem. (1 Timoteo 5:1, 2) Ngacama nyimu hnëqa i Timoteo kö hune la itre trejine qatr ne la ekalesia, ngo hnei angeic palahi hna hetre hni ne utipin me metrötr koi nyudren.

14. Eu la ijine tro sa hajine la ketre trejine ka qatre hë?

¹⁴ Tune kaa e traqa ju kuca hnene la ketre trejine qatr, la ketre ewekë hna methinën hnei Iehova? Ngacama ketre qatr hna metrötrën, ngo tha tro kö Iehova a nue la ngazo i nyidrë, e atre hi nyidrë laka, ka ngazo. Hane hi la hna qaja ngöne Isaia 65:20: “Ame la ate ka ngazo ka ca hadede la o macaten, te, tro hë hnëjin.” Celë fe hi hna qaja hnei Ezekiela. (Ezekiela 9:5-7) Ame la ka nyipiewekë, tre, tro sa metrötrë Iehova, lo Qatr Atre Ka Hekö. (Daniela 7:9, 10, 13, 14) Maine tro sa metrötrë Iehova, tha tro kö sa xou troa hajine la ketre trejin ka aja ixatua, ngacama tru catre kö la macatre i angeic.—Galatia 6:1.

15. Nemene la hna ini së hnei Paulo aposetolo göne la itre trejin trahmany ka thöth?

¹⁵ Tro kö sa metrötrëne la trejin trahmany, ngacama thöthi angeic? Eje hi. Öni Paulo koi Timoteo: “The tro kö kete ate a xele eö thupëtesij; ngo loi tro eö a nyi tulu kowe la nöjei ate lapaun, ngöne la tenge ewekë, me thina, me ihnim, me lapaun, me thina ka wië.” (1 Timoteo 4:12) Maine jë, 30 hi lao macatre i Timoteo ngöne la Paulo a cinyanyine lai. Ngo hnei Paulo hna hamë hnëqa ka tru koi angeic. Nemene la ini koi së? Tha tro pi  kö sa qeje gelene la itre trejine trahmany ka thöth, hnene la macatre i nyudren. Eje hi, nyimutre la itre huliwa hna kuca hnei Iesu lo nyidrëti a 33 lao macatre!

16, 17. (a) Nemene la ka xatuane la itre qatre thup troa acili hnëqan la ketre trejin? (b) Nemene la thangan e troa mejiune kowe la sipu mekuna së, ngo tha koi Tusi Hmitrötre kö?

¹⁶ Ame ngöne la itre xa nöj, tha hna metrötrëne kö la itre xötr ka co. Celë hi matre, ame kowe la itre xa qatre thup, thatreine kö tro la itre trejine thöth a cilëne la hnëqa ne drikona me qatre thup, ngacama ijiji nyudrene hi. Tha hna qaja kö e hnine la Tusi Hmitrötr ka hape, tro hi a drikona maine qatre thup la itre trejine ka qatre hë. (1 Timoteo 3:1-10, 12, 13; Tito 1:5-9) Ame la qatre thup ka mekune thenge la hna majemine ne la nöj, tre, tha nyidrëti kö e cili a trongëne la Wesi Ula i Akötresie. Tha tro kö la itre qatre thup a goeëne la itre thöth, thenge la sipu mekuna i angatr maine aqane waiewekë ne la nöj. Loi e tro pe a goeë nyudren thenge la hna amekötin hnei Tusi Hmitrötr.—2 Timoteo 3:16, 17.

¹⁷ Maine tha trongëne kö la itre qatre thup la itre hna amekötin hnei Tusi Hmitrötr, göne troa acili hnëqan la ketre trejin, tro ha sewe angeic troa xom la hnëqa, ngacama ijiji angeic. Ame ngöne la ketre nöj, hnene la ketre drikona hna kuca hnyawa la itre hnëqa i angeic. Mama hnyawa hi kowe la itre qatre thup laka, ijiji angeice hi troa xome la hnëqa ne qatre thup. Ngo ame kowe la itre xa qatre thup ka qatre hë, tha ijiji angeice kö ke, thöthi palakö angeic. Celë hi matre, tha acili angeice ju kö troa qatre thup. Nyimutre la itre ka mekune tune lai. Nyipiewekë tro sa trongëne la hna qaja hnei Tusi Hmitrötr. Tha tro kö sa mejiune kowe la sipu mekuna së maine kowe la itre hna majemine ngöne la nöj. Maine tro sa drengethenge Iesu, tha tro hmaca kö sa amekötin thenge la hna goeën hnei lue mek.

18, 19. Nemene la ka xatua së troa goeëne la itre trejin tui Iehova?

¹⁸ Ngacama itre atr ka ngazo së, ngo loi e tro sa inine troa tui Iehova. Tha tro kö sa goeën angazone la itre xan. (Ite Huliwa 10:34, 35) Celë hi matre, nyipiewekë tro palahi sa mekune hnyawa me trongëne la itre hna qaja hnei Tusi Hmitrötr. Easë hi lai a drengethenge la hna qaja hnei Iesu ka hape, ‘The amekötine kö thenge la hna goeën hnei lue mek.’—Ioane 7:24.

¹⁹ Easenyi hë tro Iesu a amekötine la itre atr. Nyidrëti a troa ameköti angatr thenge la itre trepene meköt, ngo tha hnene kö la itre hnei nyidrëti hna goeën maine drenge pena. (Isaia 11:3, 4) Easa trengeneune la ijine cili!