1, 2. (a) Nemene la nyine tro sa inin, nge pine nemen? (b) Nemene la hne së hna troa ce wang ngöne la tane mekun celë?

NYIPIEWEKË tro asë hi sa inine troa xom me huliwane hnyawa la itre ithuemacany, matre meköt la aqane tro sa axecië mekun. (Ite Edomë 3:21-23; 8:4, 5) Maine tha hmeke kö së, canga tro hi a amenune la mekuna së hnei Satana memine la fene i angeic. (Efeso 5:6; Kolose 2:8) Maine easa ajane troa axecië mekune hnyawa, nyipiewekë tro sa xome la itre nyipi ithuemacany. Öni Ite Edomë 18:13: “Ame la ate sa kowe la ewekë nge tha pane ate, te, angeic’ a hmo me hmahma.”

² Ame ngöne la tane mekune celë, tro sa ce wang la itre ewekë ka troa ajolë së troa xome la itre nyipi ithuemacany, me axecië mekune hnyawa. Tro fe sa xomi ini qa ngöne la itre trepene meköt me itre tulu hna hamën hnei Tusi Hmitrötr.

3. Pine nemene matre nyipiewekë tro sa trongëne la hna qaja ngöne Ite Edomë 14:15? (Wange ju la pane iatr.)

³ Nyimutre la itre ithuemacany hne së hna kapa enehila,  jëne Ëternet me mail me tele me sms, me qaathene fe la itre sinee së. Celë hi matre, nyipiewekë tro sa hmek. Eje hi laka, pëkö engazone la hna iupi fë hnene la itre sinee së. Ngo ame pe, hetre itre ka iupi fë la itre ithuemacany ka thoi. Nemene la trepene meköt ka troa xatua së troa atre la nyipici? Öni Ite Edomë 14:15: “Ame la ate wangadrapa, te, kola kapa la nöjei tenge ewekë asë; ngo ame la ate maca mek, te, kola trotrohnine la jë i angeic.”

4. Nemene la aqane xatua së hnei Filipi 4:8, 9 troa iëne la itre hne së hna e, nge pine nemene matre nyipiewekë troa xome la itre nyipi ithuemacany? (Wange ju la hna eköhagen hna hape, “Aqane Troa Xome La Itre Nyipi Ithuemacany.”)

⁴ Maine easa ajane troa axecië mekune hnyawa, nyipiewekë tro sa xome hi la itre nyipi ithuemacany. Celë hi matre, loi e tro sa hmek me iëne hnyawa la itre hne së hna e. (E jë la Filipi 4:8, 9.) Tha tro kö sa aluzi traeme menu, troa e la itre ithuemacany hna amë ngöne la itre sit Ëternet maine ngöne mail. Loi e tro sa neëne la itre sit hna kuca hnene la itre ka iamenumenu. Angatr a silitrengathoi matre troa ananazijëne la lapaune ne la itre hlue i Akötresie. Eje hi, maine ka tria la itre ithuemacany hna kapa, tro ha qali la itre mekun hna axeciën. Ketre, loi e tro sa thupën hnyawa, wanga hetre ethane jë koi së la itre ithuemacany ka thoi.—1 Timoteo 6:20, 21.

5. Nemene la itre trengathoi hna qaja kowe la angetre Isaraela, nge nemene la thangane lai?

⁵ Ka hetre ethane la itre trengathoi. Drei la ketre ceitun. Ame ngöne lo ijine i Mose, hna tro juetrë la 12 lao atr troa waipengöne la Nöje Hna Thingehnaean. Treen la ka bëeke fë trengathoi. (Numera 13:25-33) Hnei angatre hna atrune la itre ithuemacany, matre hna xou me kucakuca la nöje i Iehova. (Numera 14:1-4) Pine nemene matre angatr a xou? Pine laka, tha hnei angatre kö hna dreng la itre ithuemacany ka nyipici hna qaja hnene lo lue xan. (Numera 14:6-10) Ketre, tha hnei angatre kö hna thele troa atre la nyipici me mejiune koi Iehova. Hnei angatre hna mejiune kowe la itre trengathoi hna qaja.

6. Pine nemene matre tha tro kö sa sesëkötre la kola siliewekëne la nöje i Iehova?

⁶ Nyipiewekë tro sa thupën, ngöne la kola qaja la nöje i Iehova. The thëthëhmine kö laka, hna hë Satana ka hape, “ate nyi ewekëne la ite tejine me eëshë.” (Hna Amamane 12:10) Öni Iesu  ka hape, tro la itre ka icilekeu a ‘siliewekë së la nöjei ewekë ka ngazo asë.’ (Mataio 5:11) Haawe, tha tro kö sa sesëkötre la kola siliewekëne la nöje i Iehova.

7. Nemene la nyine tro sa pane kuca qëmekene troa iupi fë mail maine sms?

⁷ Hapeu, hnei epuni fe kö hna hane iupi fë mail me sms kowe la itre sinee i epun? Ame la epuni a drenge la itre ithuemacany ka hnyipixe, hapeu, epuni kö a canga iupi fë kowe la itre sinee i epun? Loi e tro sa pane isa hnying qëmekene troa iupi fë mail maine sms, ka hape: ‘Hapeu, ka nyipici kö la itre ithuemacany cili?’ Tha tro pi kö sa iupi fë menune la itre xa ithuemacany, wanga iupi fë pi la itre ithuemacany ka thoi. Ngo loi pe tro sa xometrij!

8. Nemene la hna kuca hnene la itre ka icilekeu, nge nemene la nyine tro sa thupën?

⁸ Hetre ketre kepin matre, nyipiewekë tro sa pane mekune hnyawa qëmekene troa iupi fë mail me sms. Ame ngöne la itre xa nöj, hna wathebone la huliwa së. Hnene la itre ka icilekeu hna silitrengathoi matre troa axouenyi së. Angatr a ajane troa luelu la itre trejin. Pane mekune jë la ka traqa ekö e Union Soviétique. Hnene la polis (KGB) hna silitrengathoi ka hape, hetre itre trejin ka mele hnihnine la nöje i Iehova. * (Wange ju la ithuemacany.) Nyimutre la itre trejin ka dreng la itre trengathoi cili me trotrije la organizasio i Iehova. Eje hi laka, alanyimu e thupen la ka bëek, ngo paatre pë hë itre xan. Hnei angatre hna nue la itre ithuemacany ka thoi troa ananazijëne la lapaune i angatr. (1 Timoteo 1:19) Nemene la aqane tro sa neëne la jole cili? Tha tro  kö sa uune la itre ithuemacany ka thoi, me mejiune menune kowe itre ej. Loi pe troa pane thele hnyawa la nyipici.

9. Pine nemene matre jol e itre xa ijin, troa axecië mekune hnyawa?

⁹ Ame e itre xa ijin, jol koi së troa axecië mekune hnyawa ke, hna qaja sinën la itre xa ithuemacany. Eje hi, tha tro pi kö sa mejiune kowe la itre ithuemacany hna qaja sinën. Nemene la nyine troa kuca, matre tha tro kö a amenu së hnene la itre ithuemacany cili?—Efeso 4:14.

10. Pine nemene matre mekune jë la angetre Isaraela ne kuë troa isi memine la itre trejin me angatr, nge pine nemene matre tha isi ju kö angatr?

¹⁰ Hanawang la hna melën ekö hnei angetre Isaraela, ka mele ngöne la götrane kuë ne la Hneopegejë e Ioridano. (Iosua 22:9-34) Hnei angatre hna dreng ka hape, hnene la angetre Isaraela ka lapa ngöne la götrane kohië ne Ioridano, hna cane la ketre ita ne huuj ka tru ezine la tim. Ka nyipici hi la hna qaja, ngo tha ka pexeje kö la ithuemacany. Celë hi matre, hnene la angetre Isaraela ne kuë hna mekuhni angatr ka hape, kola icilekeu me Iehova. E cili, hnei angatr hna mekun troa lepe la angetre Isaraela ne kohië. (E jë la Iosua 22:9-12.) Ngo qëmekene troa isi, hnei angetre Isaraela ne kuë hna upe la itre xa trahmany, matre troa pane hnyingëne thele la nyipici. Nemene la hna qaja koi angatr? Hetre ita ne huuj hna can, ngo tha thatraqane kö la itre haze, ngo göne tro pe a amekunën ka hape, Iehova la Akötresi angatr. Tru la madrinene la angetre Isaraela ne kuë, ke, tha isi ju kö angatr memine la itre trejin me angatr. Hnei angatre pe hna pane thele la nyipici.

11. (a) Nemene la ka traqa koi Mefiboseth? (b) Maine ju, nemene la aqane tro Davita a ujë koi Mefiboseth?

¹¹ Maine jë, hna hane akötrë së ngöne la kola silitrengathoi së. Celë hi ka traqa koi Mefiboseth. Hnei Davita joxu hna nue koi Mefiboseth la nöjei hlapa i Saulo, qaqaa i angeic. (2 Samuela 9:6, 7) Ngo drenge jë hi Davita la kola qaja angazo Mefiboseth. Tha hnei Davita kö hna thele la nyipici. Hnei nyidrëti hna xome hmaca lo nöjei hlapa hna hamëne koi Mefiboseth. (2 Samuela 16:1-4) Ame e thupen, hnei Davita hna ithanata me Mefiboseth. Trotrohnine ju hi nyidrë laka, ka tria lo hnei nyidrëti hna kuca. E cili, nyidrëti a nue hmaca la nöjei hlapa koi Mefiboseth. (2 Samuela 19:24-29) Maine pane thele ju Davita troa atre la nyipici göi Mefiboseth, tha tro jë kö a tria la aqane ameköti ewekë i nyidrë. Ketre, tha tro kö lai a akötrë Mefiboseth.

12, 13. (a) Nemene la hna kuca hnei Iesu ngöne la kola silithanata nyidrë? (b) Nemene la nyine tro fe sa kuca ngöne la kola silithanata së?

¹² Nemene la nyine tro sa kuca e traqa ju silithanata së? Hna hane fe silithanata Iesu me Ioane Bapataiso. (E jë la Mataio 11:18, 19.) Nemene la hnei Iesu hna kuca? Tha hnei Iesu kö hna aluzi traem me trengecatr, matre troa jelethoine la itre hna qaja. Hnei nyidrëti pe hna ithuecatre kowe la itre atr troa thele la nyipici. Iesu a ajane tro la itre atr  a nyipiine la itre hnei nyidrëti hna kuca memine la itre ini hna hamën. Öni Iesu: “Hna qaja amekötine la inamacane hnene la nöjei huliwa ne ej.”—Mataio 11:19.

¹³ Hetre ini koi së qa ngöne la tulu i Iesu. Ame e itre xa ijin, kola qeje së me silithanata së, matre easa xou troa goeën angazonyi së hnei itre xan. Ngo tune la hna amaman hnene la tulu i Iesu, ijije hi tro sa amamane jëne la aqane mele së laka, itre trengathoi lo hna sil.

14, 15. Pine nemene matre tha tro kö sa axecië mekun thenge la sipu inamacane së?

¹⁴ Tha ka hmaloi kö troa öhne la itre nyipi ithuemacany. Ketre, itre atr ka ngazo së. Ame e itre xa ijin, itre xan a metrötrë së ke, ekö hë së ngöne la nyipici, nge ka inamacane la aqane waiewekë së ngöne la itre xa götran. Ngo nemene la ejolene lai?

¹⁵ Maine tha hmeke kö së, tro hë sa mekun laka, tha nyipiewekë kö troa thel la itre nyipi ithuemacany, matre trotrohnine la ketre jol. Tro hë sa wangatrunyi së kö, me axecië mekun thenge kö la sipu mekuna së. Öni Tusi Hmitrötr, tha tro kö sa axecië mekun thenge la sipu inamacane së.—Ite Edomë 3:5, 6; 28:26.

16. Ame ngöne la ceitune celë, nemene la ka traqa ngöne la restaurant, nge nemene la hna mekun hnei Tom?

¹⁶ Hanawang la ceitune i Tom, ketre qatre thup. Ame la Tom e ngöne la ketre restaurant, hnei nyidrëti hna öhnyi John, ketre qatre thup, kola ce xen memine la ketre föe. Nyidroti a hnyima  me idrem. Tom a seseu ke, tha kolo kö lo föi John. Angeic a hnying, ka hape: ‘Ase kö John sei hna cil? Tune kaa jë la itre nekönatr?’ Atrepengöne hi Tom la jole cili. Maine epuni ju lai, nemene la hnei epuni hna troa kuca?

17. Nemene la hna trotrohnine hnei Tom e thupen, nge nemene la ini koi së?

¹⁷ Ngacama Tom a mekuhnin laka, John a nyixetë, ngo hnei angeice hna thele troa atre la nyipici. Ame lai hej, Tom a hë John. E cili, trotrohnine ju hi angeic laka, ifaxa i John hi lo föe, nge nyiidroti a traqa qa gaa nany. Itre macatre ne tha iöhnyi nyidro lue tremun. Nge pine laka, kolo hmaca ha canga tro hnei nyiidro, matre ijiji nyidroti hi troa ce xen, ngo tha hane pë hë traqa hnei föi John. Tru la madrine i Tom ke, tha hnei angeice kö hna qaja koi itre xan lo mekuna i angeic! Nemene la ini koi së? Ngacama ekö hë së ngöne la nyipici, ngo nyipiewekë tro palahi sa thele la itre nyipi ithuemacany, matre atre la nyipici.

18. Pine nemene matre easa mekuhnine la ketre trejin e itre xa ijin?

¹⁸ Tha ka hmaloi kö troa axecië mekune hnyawa, ngöne la kola traqa la jol kowe la ketre trejin hne së hna iwesitrë memin. Maine tro palahi sa mekune la iwesitrë cili, tro hë sa luelu. Canga tro hi sa kapa la hna qaja göi angeic, ngacama pëkö ka anyipicine lai. Nemene la ini koi së? Maine tha canga iloi kö së memine la ketre trejin, tro hë sa mekuhni angeic, nge thatre pe së la itre nyipi ithuemacany. (1 Timoteo 6:4, 5) Tha tro kö sa nue la itre mekun ka ngazo troa lapane la hni së, tune la troa meciun. Iehova a ajane tro sa hnime la itre trejin me easë, me nue la itre ngazo i angatr cememine la hni ka pexej.—E jë la Kolose 3:12-14.

19, 20. (a) Nemene la itre trepene meköt ka troa xatua së troa waipengöne hnyawa la itre ithuemacany? (b) Nemene la hne së hna troa ce wang ngöne la tane mekun thupen?

¹⁹ Eje hi, jole koi së enehila troa öhne la itre nyipi ithuemacany, me waipengöne hnyawa itre ej. Pine nemen? Ame la itre ithuemacany, tre, tha ka nyipici asë kö. Ketre, itre atr ka tha pexeje kö së. Nemene la ka troa xatua së? Itre trepene meköt qa hnine la Wesi Ula i Akötresie! Tusi Hmitrötr a qaja ka hape, tha ka inamacane kö la atr ka canga sa, nge tha hna pane atre kö la itre nyipi ithuemacany. (Ite Edomë 18:13) Eje fe a qaja ka hape, tha tro kö sa canga kapa la itre hne së hna dreng. Loi e tro sa pane thele la nyipici. (Ite Edomë 14:15) Eje hi, ngacama ekö hë së ngöne la nyipici, ngo tha tro pi kö sa mejiune kowe la sipu inamacane së. (Ite Edomë 3:5, 6) Tro la itre trepene meköti ne la Tusi Hmitrötr a xatua së troa iëne hnyawa la itre nyipi ithuemacany, qëmekene troa axecië mekun.

²⁰ Ngo hetre ketre kepin matre jole koi së troa atre la nyipici. Pine laka, itre atr ka tha pexeje kö së, matre canga tro hi sa kapa la ewekë thenge la hne së hna goeën. Celë hi la hne së hna troa ce wang ngöne la tane mekun thupen. Tro fe sa ce wang la aqane tro sa neëne la jole cili.