NYIPIEWEKË tro sa atreine xomihni ke, jole catre la mel ngöne la “ite drai hnapin” ne la fene celë. (2 Timoteo 3:1-5) Nyimutre la itre atr ka thatreine xomihni enehila. Angatr a sipu meku angatre hi, me catre fë mekun, nge pëkö xomehnöth. Celë hi matre, loi e tro sa isa hnying ka hape: ‘Hapeu, ceitunge kö memine la itre atr enehila? Nemene la aliene la troa xomihni? Nemene la nyine troa kuca matre troa atreine xomihni?’

Nemene la aliene la “xomihni” e hnine la Tusi Hmitrötr? Tha kolo hmekuje kö a qaja la troa xomihnine la ketre jol. Ame la atr ka atreine xomihni tre, angeic a mejiun laka, troa tro loi la itre ewekë. Tha angeice kö a meku angeice hi, ngo angeic a meku itre xan, ngacama itre ka akötrë angeic. Aja i angeic troa lolo la aqane imelekeu i angatr. Celë hi matre Tusi Hmitrötr a qaja ka hape, ka ihnim la atre xomihni. * (Wange ju la ithuemacany.) (1 Korinito 13:4) Ame la xomihni, tre, ketre götranene “la wene la [u]a.” (Galatia 5:22, 23) Haawe, nemene la ka troa xatua së troa atreine xomihni?

Maine easa ajane troa atreine xomihni, loi e tro sa sipone la uati hmitrötre i Iehova ke, Nyidrëti a hamën kowe la itre ka mejiun koi Nyidrë. (Luka 11:13) Nyipici laka, ka mene la uati hmitrötr, ngo nyipiewekë tro fe sa ujë thenge la hne së hna sipon ngöne la thith. (Salamo 86:10, 11) Eje hi, loi e troa mama ngöne la aqane ujë së laka, easa thele troa hetrenyi la thiina cili. Tha ka hmaloi kö e itre xa ijin. Nemene la ka troa xatua së?

Nyipiewekë tro sa inin me xötrethenge la tulu ka lolo hna hamën hnei Iesu. Ame lo Paulo aposetolo a qejepengöne la “ate ka hnyipixe” laka, ka atreine xomihni, öni nyidrë: “Loi la tingetinge i Keriso troa musinëne la ite hni nyipunie.” (Kolose 3:10, 12, 15) Maine easa ajane troa trongëne la hna qaja e celë, nyipiewekë tro sa xötrethenge la tulu i Iesu. Ketre, tro fe sa mejiun laka, tro Akötresieti a nyinyin la itre jole së, ngöne la nyipi ijin. Maine tro sa mejiun koi Akötresie, tro hë sa atreine xomihni, ngacama kola qanangazo së.—Ioane 14:27; 16:33.

Easë asë hi a trengeneune la fene ka hnyipixe. Ngo loi e tro sa mekun ajuine la aqane xomihni së hnei Akötresie. Öni Tusi Hmitrötr: “Tha hmite kö la Joxu, ngöne la hnei nyidëti hna thinge hnaean, tune la mekune ite xan, ka hape, hmit, ngo nyidëti a xomi hnine ahoeanyi nyipunie, tha ajane kö tro kete at a hnëjin, loi pe tro angat’ asëjëihë a ietra.” (2 Peteru 3:9) Haawe, maine tro sa mekun la aqane xomihni së hnei Akötresie, kola ithuecatre koi së tro fe a xomihnine la itre xan. (Roma 2:4) Eu la itre ijine tro sa hetrenyi la xomihni?

Nyimutre la itre ijine tro sa hetrenyi la xomihni. Maine hetre hne së hna qaja ka nyipiewekë, nge kola ithanata la ketre atr, tha tro kö sa thupa. Tro pe sa nue angeice hnyawa troa afenesin. Easë hi lai a amaman laka, hetrenyi the së la xomihni. (Iakobo 1:19) Loi e tro fe sa hetrenyi la xomihni ngöne la kola qanangazo së. Tha tro kö sa canga elëhni, ngo loi e tro pe sa mekune hmaca la aqane xomihnine Iehova me Iesu la itre ngazo së. Tha nyidroti kö a lapa mekune la itre tria së. Nyidroti pe a goeëne la itre thiina së ka lolo, me nue ijine matre aijijë së troa saze.—1 Timoteo 1:16; 1 Peteru 3:12.

Ketre, nyipiewekë tro sa atreine xomihni, ngöne la kola upezö së maine kola qaja ka hape, ka ngazo la hne së hna qaja maine kuca. Eje hi, canga tro hi sa dreng akötrëne me thele troa sa. Ngo tha celë kö la hna qaja e hnine la Wesi Ula i Akötresie. Kolo pe a hape: “Loi la xomi hni hune la hni tru. The saqe kö la hni eö troa elëhni, ke eëköne la elëhni la hni ne la ate ka hmo.” (Ate Cainöj 7:8, 9) Haawe, ngacama hna silithanata së, ngo loi e tro sa atreine xomihni me mekune hnyawa qëmekene troa kuca la ketre ewekë. Celë hi aqane ujë i Iesu ekö ngöne la kola siliewekë nyidrë.—Mataio 11:19.

Nyipiewekë fe tro la itre kem me thin a atreine xomihni, ngöne la angatr a xatuane la itre nekönatr, matre tha tro kö a ixomithiina maine kei kowe la ngazo. Hanawang la tulu i Mattias, ketre trejine ka huliwa ngöne la Bethela e Scandinavie. Ame lo Mattias a thöth, hnene la itre sine ini angeic hna hnyimasai angeic pi hmi. Thatre kö la kem me thin. Ngo nyidroti a öhn laka, Matthias ha luelu. Öni Gillis, keme i Mattias, ka hape, hnei nyidrë me ifënekö i nyidrë hna xomihni ngöne lo ijine cili. Hnei Mattias hna hnying ka hape: “Drei lae Akötresie? Ewekë i Akötresieti kö la Tusi Hmitrötr? Easa atre tune kaa ka hape, Akötresieti la ka ajane lai?” Hnei angeice fe hna hnying ka hape: “Pine nemene matre, kola qeje ni ngo tha ka ce hmi kö ni me nyipë?”

Öni Gillis: “Ame e itre xa ijin, ka elëhni Mattias ngöne la angeic a hnying. Tha angeice kö  a elëhni koi nyio, ngo kowe pe la nyipici ke, kola hnöthe la mele i angeic.” Nemene la aqane xatuane Gillis la nekö i nyidrë? “Itre hawa ne nyio a pane lapa me ce porotrik.” Gillis a drei Mattias me hnying, matre troa atre la mekun me aliene hni angeic. Nge ame ngöne la itre xa ijin, Gillis a qejepengöne la ketre ewekë koi Mattias, me pane upi angeic troa thele mekun ngöne la ca drai, qëmekene troa ce ithanatan. Öni Gillis ka hape, nyipiewekë tro fe nyidrëti a xomi ijin, matre troa pane mekun la hna qaja hnei Mattias. Jëne la itre ijin ne pane ce porotrike i nyidro, trotrohnine hë Mattias la aliene la thupene mel. Ketre, trotrohnine fe hë angeic laka, Iehova a hnimi së, nge meköt e tro Nyidrëti a mus. Öni Gillis: “Tha ka hmaloi kö ke, qea pi hë. Ngo ame pe, hna kökötre trootro e kuhu hni Mattias la ihnimi angeic koi Iehova. Tru la madrineng me föeng ke, ame la thangane la hnei nyio hna xomihni ke, trotrohnine hë Mattias.”

Hnei Gillis me ifënekö i nyidrë hna mejiune koi Iehova, ngöne la nyidroti a xatuane la nekö i nyidro. Öni Gillis: “Ame itre xa ijin, eni a qaja koi Mattias ka hape, tru la ihnimi nyio koi angeic, matre nyio a sipo iele Iehova troa xatua angeic troa trotrohnin.” Tru la madrine i nyidro ke, hnei nyidroti palahi hna catr me atreine xomihni!

Nyipiewekë fe tro sa hetrenyi la xomihni, ngöne la easa thupëne la ketre sinee së ka wezipo. Tui Ellen * (wange ju la ithuemacany), ketre trejin ka mel e Scandinavie.

Eitr hë lao macatre enehila, hna kriz la föi Ellen, nge hna ketr la atuate i nyidrë. Pëhë hnei nyidrëti hna dreng, tune la elëhni, me hleuhleu, me utipin. Tha ka hmaloi kö koi Ellen. Öni eahlo: “Hnenge hna xomihni me catre thith. Ame la xötr ka xatua ni tre, Filipi 4:13, kola hape: ‘Ateine ni troa kuca la nöjei ewekë asëjëihë hnei nyidëti ate aegöcatenyi ni.’ ” Hnene la men me ixatua i Iehova, matre hnei Ellen hna xomihnine la jol.—Salamo 62:5, 6.

Eje hi, Iehova la tulu ka sisitria ne xomihni. (2 Peteru 3:15) Tusi Hmitrötr a qejepengöne la aqane xomihni Iehova. (Nehemia 9:30; Isaia 30:18) Pane mekune jë lo ijine Iehova a troa lep apatrene la traon e Sodoma. Nemene la aqane ujë i Iehova ngöne la Aberahama a anyimua hnying koi Nyidrë? Tha hnei Iehova kö hna thupa la Aberahama a ithanata. Hnei Nyidrëti hna drenge hnyawa la itre hnyinge i Aberahama. Thupene lai, hnei Iehova hna amaman ka hape, atre hi Nyidrëti la itre ewekë hna hnehengazon hnei Aberahama. Hnei Nyidrëti fe hna akeukawanyi angeic ka hape, maine treene pe hi lao atr e Sodoma ka loi, tha tro kö Nyidrëti a lepe la traon. (Genese 18:22-33) Tha ka canga elëhni kö Iehova, hnei Nyidrëti palahi hna xomihni!

Nyipiewekë tro la nöjei keresiano asë a hetrenyi la xomihni. Ame la easa catre thele troa hetrenyi la thiina cili, easë hi lai a atrunyi Iehova, Tretretro së ka ihnim me ka atreine xomihni. Ketre, tro hë së lai a “hetenyi la nöjei hna thinge hnaean, thenge la lapaune me xomi hnin.”—Heberu 6:10-12.