HAPEU, hetre huliwa kö hne së hna ajane troa kuca e hnine la ekalesia, ngo tha ijije palakö? Maine jë, easa ajane troa kuca la ketre huliwa, ngo hna kuca ha hnene la ketre trejin. Maine pena, easë hmaca pi kuca la hnëqa hna athipi koi së ekö. Ngo tha ijiji së hë ke, easa uti ipië trootro, maine hna tithi së hnei mec, maine hetre jol göi manie, maine pena hetre hnëqa së e hnine la hnepe lapa. Maine jë, hetre ewekë ka saze e hnine la organizasio, matre hna amë la hnëqa hne së hna kuca ekö. Nyimutre la itre kepin, matre easa mekun laka, tha ijije kö la hne së hna huliwa i Akötresie. Celë hi matre, easa kucakuca e itre xaa ijin. Ngo nemene la ka troa xatua së matre tha tro kö sa lapa kucakuca, maine wesitr, maine elëhni? Nemene la ka xatua së tro palahi a madrin?

Hetre ini hne së hna troa xom qa ngöne la tulu i Ioane Bapataiso, göne la aqane troa madrin. Madrine catr Ioane la itre hnëqa i angeic, ngo maine jë, tha mekune kö angeic la itre ewekë ka troa traqa koi angeic, ngöne la huliwa i Iehova. Tha mekune kö Ioane laka, tru catre kö la ijine tro angeic a lapa kalabus, hune la ijine angeic a cainöj. Ame pe, ka madrine palahi Ioane. Nemene la ka xatua angeic? Nge nemene la ka troa xatua së tro palahi a madrin, ngacama easa kucakuca?

Ame ngöne la macatre 29 M.K., hnei Ioane hna nyiqane la huliwa hnei Iehova hna ahnith koi angeic, ene la troa hnëkëne la itre atr kowe la ijine troa traqa la Mesia. Öni angeic: “Ietra ju, ke, calemi hë la Baselaia ne hnengödrai.” (Mat. 3:2; Luka 1:12-17) Alanyimu la itre ka drei angeic. Hnene la itre atr ka alanyimu hna traqa qa gaa nany matre troa drenge la maca i angeic. Nge alanyimu la itre ka ietra me xomi bapataiso. Ketre, hnei Ioane hna qaja la pune kowe la itre hene hmi, e tha saze kö angatr. (Mat. 3:5-12) Ame la ka sisitria ngöne la huliwa ne cainöje i Ioane, tre, kolo ijine angeic a bapataiso Iesu, lo macatre 29 M.K. Qaane lo ijine cili, hnei Ioane hna upe la itre xan troa xötrethenge Iesu, ene la Mesia.—Ioane 1:32-37.

Hnei Iesu hna qejepengöne la hnëqa i Ioane, me hape: “Pëkö atr hna hnahon hnei föe ka draië hui Ioane Bapataiso.” (Mat. 11:11) Eje hi, atraqatre la madrine i Ioane ke, hna amanathithi angeic. Tui Ioane, nyimutre la itre atr enehila hna  amanathithin hnei Akötresie. Drei la ceitune i Terry. Hnei Terry me Sandra, föe i angeic, hna huliwa i Akötresie ngöne la drai ka pexej, nge 50 lao macatre enehila. Öni Terry: “Tru catre la itre hnëqa hnenge hna kuca. Hnenge hna xome la huliwa ne pionie, me huliwa ngöne Bethela, me pionie hut, me atre thupëne la sirkoskripsio, me atre thupëne la distrik, nge eni hmaca a pionie hut enehila.” Eje hi laka, easa madrine la kola hamë hnëqa koi së, ngöne la huliwa i Akötresie. Ngo tune la hna amamane hnene la tulu i Ioane, hetre nyine tro sa kuca matre troa palahi a madrin ngöne la kola saze la mele së.

Ka madrine palahi Ioane Bapataiso ke, hetre hni ne ole i angeic kowe la itre hnëqa hna hamëne koi angeic. Drei la ketre ceitun. Thupene la kola bapataiso Iesu, hna uti trootro la etrune la itre ka xötrethenge Ioane, nge kolo pena a elë la etrune la itretre drei Iesu. Hnene la itretre drei Ioane hna hnehengazo, me hape koi angeic: “Angeice fe a hane bapataiso atr, nge ala nyimu la itre ka tro koi angeic.” (Ioane 3:26) Öni Ioane: “Eje thene la atre xötrei faipoipo la föi angeic. Ngo ame la sinee ne la atre xötrei faipoipo, angeic a mejë me madrin la kola drenge la aqane ewekë ne la atre xötrei faipoipo. Celë hi matre pexeje hë la madrineng.” (Ioane 3:29) Tha hnei Ioane kö hna iwaja me Iesu, maine mekun göne la hnëqa ka tru i Iesu, ka hape, tha nyipiewekë hë la huliwa i angeic. Ka madrine Ioane ke, hnei angeice palahi hna wangatrune la hnëqa i angeic, ene la troa “sine ne la ate faipoipo.”

Hnei Ioane palahi hna qaja aloine la hnëqa i angeic. Celë hi matre, ka madrine palahi angeic, ngacama tha ka hmaloi kö la hnëqa i angeic. Drei la ketre ceitun. Qaane lo kola hnaho Ioane, ketre Nazeri angeic. Hna wathebo angeic troa iji waina. (Luka 1:15) Hnei Iesu hna qaja la aqane mele i Ioane, me hape, “tha hnei Ioane kö hna xeni me ij.” Isapengöne kö me Iesu me itretre drei nyidrë. Pëkö wathebo hna acile koi angatr, matre ka lolo hi la mele i angatr. (Mat. 11:18, 19) Ketre, tha hnei Ioane kö hna kuca la itre iamamanyikeu. Ngo atre hi angeic laka, hnene la itretre drei Iesu hna kuca la itre iamamanyikeu, tune lo itre ka xötrethenge angeic ekö. (Mat. 10:1; Ioane 10:41) Ngo tha hnei Ioane kö hna nue la itre ewekë cili troa ajolë angeic. Hnei angeice pe hna catre kuca hnyawane la huliwa i angeic koi Iehova.

Ketre tu së fe, maine tro sa wangatrune la hnëqa së ngöne la huliwa i Iehova, tro hë sa madrin. Öni Terry, lo trejin hna qaja ha e caha hun, “Hnenge palahi hna thel troa kuca hnyawa la itre hnëqa hna hamë ni.” Öni angeic göne la mele i angeic, “Pëkö hnenge hna kuca ka ajolë ni enehila, eni pe a madrin.”

Tro sa madrine e hne së hna lapa mekune la enyipiewekëne la ketre hnëqa maine ketre huliwa. Ketre manathith ka tru troa “ce huliwa me Akötresie.” (1 Kor. 3:9) Ame la ewekë ka sisitria koi së, tre, easa nyidrawane ej me thupëne hnyawa. Ketre tune fe, tro palahi sa madrin, e hne së hna mekune lapane laka, manathith ka tru la troa ce huliwa me Iehova. Tha tro hë sa goeëne la itre trengecatre hne së hna kuca, memine la itre trengecatre hna kuca hnei itre xan. Tha tro hë sa wangacone la hnëqa së qaathei Iehova, me qaja ka hape, sisitria kö la hnëqa ne la itre xan.—Gal. 6:4.

Atre hi Ioane laka, troa traqa la ijine tro angeic a afenesine la huliwa i angeic. Ngo maine jë, thatre kö angeic laka, troa canga traqa. (Ioane 3:30) Ame lo 30 M.K., sikisi treu thupene la kola bapataiso Iesu, hnei Heroda joxu hna akalabusi Ioane. Ame pe, hnei Ioane palahi hna catre cainöj. (Mar. 6:17-20) Nemene la ka xatua angeic troa madrine palahi ngacama hetre ewekë ka saze la mele i angeic? Hnei angeic hna lapa mekun la itre ewekë ka sisitria koi Iehova.

Ame lo Ioane ngöne kalabus, hnei angeic hna dreng laka, kola kökötre la huliwa ne cainöje i Iesu. (Mat. 11:2; Luka 7:18) Xecie hnyawa koi Ioane laka, Iesu hi la Mesia. Ngo maine jë, hnei angeic hna hnyingëne thel la aqane tro Iesu a eatrëne la nöjei ewekë hna qaja göne la Mesia. Atre hi Ioane laka, tro la Mesia a joxu. Maine jë, hnei angeic hna hnying ka hape, tro kö Iesu a joxu,  me nuamele angeic qa hnine kalabus. Ajane catre Ioane troa trotrohnine la hnëqa i Iesu, matre hnei angeic hna upe la lue atre dreng troa hnyingë Iesu ka hape: “Nyipëti hi lo Atr Ka Traqa, maine tro pala kö huni a treqene la ketre?” (Luka 7:19) Ame la nyidroti a bëek, hnei nyidroti hna qejepengöne la aqane aloine Iesu la itre sine mec, me kuca la itre iamamanyikeu. Hnei nyidroti hna tro fë la maca i Iesu koi Ioane, ka hape: “Goe hë itre timek, nge tro hë itre ka genyi ca, nge loi hmaca ha itre lepera, nge drenge hë itre ka sim, nge mele hmaca ha itre ka mec, nge itre ka pë ewekë fe a hane kapa la maca ka loi.”—Luka 7:20-22.

Hnene la hna qaja hnene la lue atre dreng hna hamë trengecatre koi Ioane. Kola anyipicine laka, Iesu a eatrëne la itre hna perofetane göne la Mesia. Ngacama tha hnei Iesu kö hna nuamele Ioane qa hnine la kalabus, ngo ame pe, atre hi Ioane laka, ka sisitria la huliwa ne cainöje i Iesu. Ngacama tru catr la itre jol, ngo ka madrine palahi angeic.

Tui Ioane, maine tro sa lapa mekune me catre huliwa i Iehova, tro hë sa atreine xomihni me madrine me xomihni ahoean. (Kol. 1:9-11) Tro sa atreine xomihni, e hne së hna e Tusi Hmitrötr me lapa mekun. Tha tro kö sa thëthëhmine laka, tha ka gufa kö la huliwa hne së hna kuca thatraqai Akötresie. (1 Kor. 15:58) Öni Sandra: “Ame la ka xatua ni troa easenyi catr koi Iehova, tre, ene la troa e la caa mekene tusi ne la Tusi Hmitrötr e nöjei drai. Kola xatua ni troa amë panë Nyidrë, nge pine pë hë ni.” Loi e tro fe sa lapa mekune la itre huliwa hna kuca hnene la itre trejin e cailo fen. Tro hë lai a xatua së troa goeëne la hna kuca hnei Iehova, nge tha tro hë sa sipu goeë së kö. Öni Sandra, “Hnene la itre porogaram ne JW Télédiffusion hna kuca e nöjei treu, matre easa easenyi kowe la organizasio, nge kola xatua së tro palahi a madrin troa kuca la hnëqa së.”

Ame ngöne lo hnepe ijine angeic a cainöj, hnei Ioane Bapataiso hna cainöj memine la “mene i Elia,” nge tui Elia, ketre “ate hi tui eëshë” angeic. (Luka 1:17; Iako. 5:17) Maine tro sa nyitipu angeic, me hetre hni ne ole me catre huliwa i Akötresie, tro hë sa madrine troa xome la hnëqa së, ngacama traqa ju hë la itre jol.