TANE MEKUN 34
Loi e Troa Madrine Ngöne La Hnëqa Ka Hnyipixe
“Ka meköti pala hi Akötresie, matre thatreine kö nyidrëti thëthëhmine la itre huliwa i nyipunie, me ihnim hnei nyipunieti hna amamane kowe la ëje i nyidrë.”—HEB. 6:10.
NYIMA 38 Tro Nyidrëti a Aegöcatrenyi Së
MEKUN KA TRU *
1-3. Pine nemene matre kola saze la hnëqa ne la itre xaa trejin ka huliwa i Akötresie, ngöne la drai ka pexej?
ÖNI Robert me Mary Jo, “Hace catre la meci ne la lue keme me thine i nyio, thupene la 21 lao macatre ne xome nyio la hnëqa ne mesinare. Madrine catre nyio troa thupë angatr me ce lapa me angatr. Ngo kucakuca catre nyio pine laka, nyio a troa nue la götrane hnei nyio hna hnim.”
2 Öni William me Terrie, “Hnei nyio hna treij, ngöne lo kola qaja ka hape, tha tro hmaca kö nyio a xome la hnëqa. Nyio a ajane troa nyihlue i Iehova ngöne la itre xaa götran. Ngo hnene laka, hna tithi nyio hnei mec, matre tha ijiji nyio hë.”
3 Öni Aleksey ka hape, “Atre hnyawa hi hun, laka, kola thele troa thinge la filial hnene la itre ka icilekeu. Matre ame la kola upi hun me thinge la filial, eahuni a elëhni.”
4. Nemene la itre hnying hne së hna troa ithanatan?
4 Alanyimu la itre ka huliwa ngöne la drai ka pexej me ka huliwa ngöne la Bethela ka xome la ketre hnëqa, ke hna saze la huliwa i angatr. * Celë hi matre, jole catre kowe la itre trejin troa nue la huliwa hnei angatr hna hniin. Nemene la ka troa xatua angatr troa saze huliwa? Nemene la aqane tro sa xatua angatr ngöne la götrane cili? Troa xatua së hnene la itre mekun ka sa la itre hnying celë, ngöne la easa qëmeke kowe la itre ewekë ka troa saze la mele së.
IXATUA NGÖNE LA KOLA SAZE LA MELE SË
Pine nemene matre jol kowe la itre trejin ka nyihlue i Iehova ngöne la drai ka pexej, troa saze me nue la hnëqa i angatr? (Wange ju la paragarafe 5) *
5. Nemene la thangane koi së ngöne la kola saze la hnëqa së?
5 Maine jë, hna upi së troa cainöj ngöne la ketre nöj, maine pena troa huliwa ngöne Bethela. Ngo easa hnime la itre atr, matre xele hë së troa nue la huliwa së. Celë hi matre, hace koi së ngöne la easa saze huliwa. Easa hnehengazo pine laka, easa nuetrije la itre trejin ngöne la isi me icilekeu. (Mat. 10:23; 2 Kor. 11:28, 29) Ketre, jole catre koi së pine laka, kolo pena upi së kowe la ketre nöj trenyiwa, matre easë hmaca troa saze la aqane mele së. Ijije fe tro sa hnehengazo ngöne la easa bëeke kowe la nöje së. Öni Robert me Mary Jo: “Jole catre koi nyio troa bëeke kowe la aqane mel, ngöne la sipu nöje i nyio. Ketre tune la troa cainöj ngöne la sipu qene lapa i nyio. Pine laka, hna upi nyio troa cainöj ngöne la ketre nöj, matre kösë lue trenyiwa nyio ngöne la sipu nöje i nyio.” Ame la itre trejin ka saze hnëqa ke, maine jë hetre nyine troa nyithupen. E cili, angatr a hnehengazo me kucakuca. Nemene la ka troa xatua angatr?
Loi e tro sa acatrene la aqane imelekeu së me Iehova, me catre lapaune koi Nyidrë (Wange ju la paragarafe 6-7) *
6. Nemene la nyine tro sa kuca matre troa acatrene la aqane imelekeu së me Iehova?
6 Loi e tro sa acatrene la aqane imelekeu së me Iehova. (Iako. 4:8) Nemene la aqane tro sa kuca? Loi e tro sa lapaune kowe la “Ate shamatine la thith.” (Sal. 65:2) Kolo fe a qaja ngöne Salamo 62:8, ka hape: “Nengepi la ite hni nyipunie xajawa i nyidë.” Nge tro kö Iehova a “hamëne atrune hune la itre ewekë hne së hna sipon, maine mekun.” (Efe. 3:20) Ketre, tha Iehova hmekuje kö a hamëne la itre ewekë hne së hna sipon ngöne la thith. Nyidrëti fe a nyinyine la itre jole së, ngacama itre jol hne së hna thatreine cile kow.
7. (a) Nemene la ka troa acatrene la aqane imelekeu së me Iehova? (b) Thenge la hna qaja ngöne Heberu 6:10-12, nemene la thangan e tro palahi sa catre nyihlue i Iehova?
7 Tro sa acatrene la aqane imelekeu së me Iehova, e hne së hna e me lapa mekun la Tusi Hmitrötr odrai. Önine la ketre mesinare: “Nyipiewekë troa kuca la hmi ne hnepe lapa me hnëkëne la itre icasikeu, tune lo hna majemine kuca ngöne lo easa xome lo hnëqa hnapan.” Ketre, loi e tro palahi sa catre cainöj memine la itre trejin ne la ekalesia së ka hnyipixe. Tha tro jë kö Iehova a thëthëhmine la itre ka catre nyihlue i Nyidrë, ngacama kucakuca ha angatr enehila.—E jë la Heberu 6:10-12.
8. Nemene la aqane troa xatua së hnene la tusi 1 Ioane 2:15-17, matre troa ahmaloeëne la mele së?
8 Loi e tro sa ahmaloeëne la mele së. Tha tro pi kö sa nue la itre ewekë ne la fene i Satana, troa “thahe” la mele së me sewe së troa nyihlue i Iehova. (Mat. 13:22) Tha tro kö sa dreng la itre ka tha hmi kö, me itre sinee së ka qaja ka hape, jëne madrine la troa hetre huliwa hna nyithupene hnyawa. (E jë la 1 Ioane 2:15-17.) Loi e tro sa mejiune koi Iehova, lo Atre hamë së la ka ijij “ngöne la nyipi ijin.” Tro kö Iehova a xatua së troa acatrene la lapaune së, me mele tingeting, me hamë së la nöjei ewekë hne së hna ajan.—Heb. 4:16; 13:5, 6.
9. Thenge la hna qaja ngöne Ite Edomë 22:3, 7, pine nemene matre tha tro pi kö sa xomi gufa menu, nge nemene la ka xatua së troa axecië mekune hnyawa?
9 Tha tro pi kö sa xomi gufa menu. (E jë la Ite Edomë 22:3, 7.) Ka tru thupene catr la troa saze uma. Canga tro hi sa xomi gufa. Ngo loi e tro sa thupën, matre tha tro kö a xomi gufa troa itöne la itre ewekë ka tha nyipiewekë kö. Eje hi laka, ame itre xaa ijin, jole koi së troa mekun la etrune la manie nyine troa sipon. Maine jë, easa hnehengazo ke, easa thupëne la ketre sinee së ka wezipo. Ngo tha tro pi kö sa thëthëhmin laka, jëne “la itre thith me xëwe,” ijije hi tro sa axecië mekune hnyawa. Tro kö Iehova a sa la itre thithi së, me kuca matre troa tingeting la hni së me mekuna së. E cili, tro hë sa atreine axecië mekune hnyawa.—Fil. 4:6, 7; 1 Pet. 5:7.
10. Nemene la aqane tro sa thele sinee së thene la itre trejin?
10 Loi e troa nyi sineene la itre atr ka thiina ka loi. Loi e tro sa qaja kowe la itre sinee së, la itre aliene hni së me itre jol hne së hna cile kow. Maine tro sa fe la hni së kowe la itre sinee së ka hane melëne hë la jol ka eje the së, tro hë sa madrin. (Ate cai. 4:9, 10) Ketre, ame lo itre sinee së ngöne lo nöj hne së hna cainöje kow ekö ke, itre sinee së palahi. Ame hë enehila, nyipiewekë troa nyi sineene la itre xaa trejin. Ngo maine easa ajane troa nyi sineene la itre xan, loi e tro sa loi thiina. Nemene la aqane tro sa kuca? Loi e troa qaja la itre thangane ka loi ne la huliwa i Iehova ngöne la itre xaa nöj. E cili, tro la itre xan a öhne la etrune la madrine së. Ame itre xaa trejin, tha tro kö angatr a trotrohnine la kepin, matre easa madrine troa huliwa i Iehova ngöne la drai ka pexej. Ngo ame pena itre xan, troa ketr la hni angatr, nge tro hë angatr a ajane troa nyi sinee së. Ame pe, tha tro kö sa qaja atrune la itre hne së hna kuca ngöne la huliwa i Iehova, memine la itre ewekë ka ngazo ka traqa koi së.
11. Nemene la nyine tro sa kuca matre tro palahi a madrine la fami së?
11 Ame itre xaa ijin, easa saze hnëqa ke, hna tithi hnei mec la föi easë. Tha tro kö sa upezö angeic maine elëhni. Maine easë pena la ka wezipo, ngo tha tro kö sa hace me mekun ka hape, troa ajolëne la föi easë. Tha tro kö sa thëthëhmine laka, ame la lue trefën ke, “ca ngönetrei” nyidro. Hne së hna sisinyi koi Iehova troa hnim me nyihnyawane la föi easë, ngacama traqa ju hë la itre jol. (Mat. 19:5, 6) Maine jë, tha ijije hmaca kö tro sa xome la huliwa i Iehova ke, hetre nekönatre hë. Loi e troa qaja kowe la nekönatr laka, ka nyipiewekë catre kö nyën hune la hnëqa. Loi e tro sa qaja koi nyëne ka hape, “june” qaathei Akötresie. (Sal. 127:3-5) Ketre, loi e tro sa qaja koi nyën la itre thangane ka loi hne së hna kapa qa ngöne la huliwa i Iehova. Eje hi lai laka, tro ha thue aja koi nyëne troa hane huliwa koi Iehova ngöne la mele i nyën.
IXATUA QAATHEI ITRE XAN
12. (a) Tro sa xatuane tune kaa la itre trejin ka huliwa i Iehova ngöne la drai ka pexej? (b) Nge tune kaa e angatre pena a saze hnëqa?
12 Itre ekalesia me itre trejin a xatuane la itre trejin ka huliwa i Iehova ngöne la drai ka pexej. Angatr a hamë ithuecatr koi nyudren, me hamë nyudreni la itre ewekë ka nyipiewekë. Angatre fe a thupëne la itre atrene la hnepe lapa i nyudren ka lapa pe. (Gal. 6:2) Maine jë, troa upe la itre trejin kowe la ekalesia së, maine saze pena la hnëqa i nyudren. Ngo tha tro kö sa canga mekun ka hape, hnei nyudreni hna kuca la ketre ewekë ka ngazo, maine huliwa menu pena. * Loi e tro pe sa xatua nyudren. Nyipiewekë tro sa kepe nyudreni hnyawa, me qaja aloine la huliwa hnei nyudreni hna kuca ngöne la huliwa i Iehova, ngacama nyudreni ha kucakuca. Loi e tro fe sa thele troa atrepengöi nyudreni hnyawa.
13. Nemene la aqane tro sa xatuane la itre trejin ka saze hnëqa?
13 Ame ngöne la xötrei, tro la itre ka saze hnëqa a aja ixatua göi troa thele uma, maine xomi kar, maine thele huliwa, maine itre xaa ewekë ju kö. Maine pena, angatr a thele la aqane troa hotr maine nyithupei assurance. Ngo ame la ka nyipiewekë catre koi angatr, tre, ene la troa trotrohni angatr. Maine jë, troa tithi angatr hnei mec, maine troa meci pena la ketre atrene la fami angatr. * Ketre, angatr a kucakuca pine laka, angatr a mekune lo itre sinee i angatr, ngöne la götrane hnei angatr hna huliwa ekö. Loi e tro sa trotrohni angatr, pine laka, angatr a cile kowe la ketre jol ka tru.
14. Nemene la aqane xatuane la ketre trejine föe hnene la ekalesia ka hnyipixe?
14 Ijije fe hi tro sa xatua angatr ngöne la easa ce cainöje me angatr me amamai tulu. Önine la ketre trejin ka cainöj ngöne la ketre nöj koi nyimu macatre: “Nyimutre la itre atr ka ini tusi me eni e nöjei drai. Ngo ame enehila, jole koi ni troa e la ketre xötr ne la Tusi Hmitrötr, maine troa amamane pena la ketre video ngöne la eni a cainöj. Hnene la itre trejin ne la ekalesiang ka hnyipixe hna hane hë ni troa sine la itre ini tusi angatr. Hnene la ixatua i angatr matre hetre ajange hmaca troa cainöj ngöne la teritoare ka hnyipixe. Atreine hë ni la aqane troa nyiqaane ithanata memine la itre atr. Madrine hë ni troa huliwa e celë.”
KUCA JË LA HNA ATREIN!
Loi e tro sa thel la aqane tro sa catre cainöj ngöne la teritoare së ka hnyipixe (Wange ju la paragarafe 15-16) *
15. Tro sa xome hnyawa tune kaa la hnëqa së ka hnyipixe?
15 Ijije hi tro sa xome hnyawa la hnëqa së ka hnyipixe. Tha tro kö sa mekun ka hape, ka ngazo la aqane huliwa së ekö, maine pena pëkö hne së hna atrein. Loi e tro palahi sa lapa mekune la itre aqane xatua së enehila hnei Iehova, me catre cainöj. Loi e tro fe sa nyitipune la itre pane Keresiano ekö. Hnei angatr “hna trongëne la itre nöj me tro fë trongëne la trengewekë i Akötresie.” (Itre hu. 8:1, 4) Eje hi, maine tro sa catre cainöj, tro hë sa kepe thangane ka loi. Ame la itre xaa pionie ke, hna upi angatr kowe la ketre nöj ka qaja la sipu qene hlapa i angatr. Tha qea kö nge kola traqa alanyimu la itre atr troa hane sine la gurupe ne la itre pionie.
16. Nemene la aqane tro sa madrin ngöne la hnëqa së ka hnyipixe?
16 “Ame la madine qa thei Iehova, te, egöcate i nyipunieti lai.” (Neh. 8:10, MN) Eje hi, qaathei Iehova hmekuje hi la madrin. Ngo tha qa ngöne kö la hnëqa së, ngacama ka tru eje koi së. Celë hi matre, loi e tro sa acatrene la aqane imelekeu së me Iehova, me catre mejiune kowe la inamacan me eamo me ixatua i Nyidrë. Tha tro kö sa thëthëhmine laka, easa hniin la hnëqa së ekö pine laka, easa kuca la itre hne së hna atrein matre troa xatuane la itre atr. Haawe, catre jë së xome hnyawa la hnëqa së ka hnyipixe, nge tro kö Iehova a xatua së troa hniin ej.—Ate cai. 7:10.
17. Nemene la nyine tro palahi sa lapa mekun?
17 Loi e tro palahi sa lapa mekun, laka, tro palakö sa nyihlue i Iehova uti hë epine palua. Maine jë, tro sa xome la itre xaa huliwa ngöne la fene ka hnyipixe elany. Hnei Aleksey, hna qaja ka hape, hnene la hnei angeice hna saze hnëqa, matre kola hnëkë angeic kowe la itre hnëqa ka hnyipixe hna troa kapa elany ngöne la fene ka hnyipixe. Öni Aleksey: “Ka mele Iehova koi ni, nge tro kö Nyidrëti a acile elany, la fene ka hnyipixe e celë fen.” (Itre hu. 2:25) Ngacama tru ju hë hnei hnëqa së, ngo loi e tro palahi sa lapa qale koi Iehova. Tro kö Nyidrëti a ceme easë. Tro fe Nyidrëti a thue madrine së, matre tro palahi sa catre kuca la hnëqa ngöne la nöjei huliwa i Nyidrë.—Is. 41:13.
NYIMA 90 Itö Ithuecatre Jë Së
^ par. 5 Ame itre xaa ijin, thatreine hë la itre xaa trejin troa huliwa i Iehova ngöne la drai ka pexej, maine pena kola saze la hnëqa i angatr. Easa troa ce wang ngöne la tane mekun celë, la itre jol hnei angatr hna cile kow, memine la ka xatua angatr troa xome hnyawa la hnëqa ka hnyipixe. Tro sa ce wang la aqane tro la itre xan a ithuecatr koi angatr, me aqane tro la Tusi Hmitrötr a xatua së, ngöne la kola saze la aqane mele së.
^ par. 4 Hnene la itre trejin ka qatre hë me kucakuca, hna ahnithe kowe la itre thupëtresij me itre thöth la itre hnëqa hnei angatr hna cilën. Wange ju la lue tane mekun, “Frères d’expérience, Jéhovah chérit votre fidélité,” ngöne la Ita Ne Thup ne Semitrepa 2018, qene Wiwi me “Tingeting Ngacama Kola Saze La Mele Së,” ngöne la Ita Ne Thup ne Okotropa 2018.
^ par. 12 Loi e tro la itre qatre thup ne la ekalesia hnapan a canga cinyianyi tusi kowe la ekalesia ka hnyipixe, matre tro la trejine ka saze hnëqa a xome palahi la huliwa ne pionie, me qatre thup, me drikona.
^ par. 13 Wange ju la tane mekun, hna hape, “Ixatua Ka Tru Kowe La Itre Ka Meci Sineen,” ngöne Hmeke Jë! 2018 Na. 3.
^ par. 57 GÖTRANE: Hace catre kowe la lue trefën mesinare hna upe kowe la ketre nöj trenyiwa, troa nue la itre trejin ne la ekalesia. ^ par. 59 GÖTRANE: Kola thithi sane la itre trejin hnene la lue trefën, matre tro Iehova a xatua angatr troa cile kowe la itre jol ka tru.
^ par. 61 GÖTRANE: Hnene la ixatua i Iehova, matre kolo hmaca a xome hnene la lue trefën mesinare la hnëqa i nyidro, ngöne la ketre teritoar. Nyidroti a cainöj kowe la itre atr ka qaja la ketre qene hlapa, nge ka kötrene la itre isi.
