1. Nemene la hne së hna ajan göne la itre sinee së?

ÖNINE la ketre trejin, Pauline la ëjen: “Qane lo eni a atre la nyipici, eni a ajane tro la faming a ce mel me eni ngöne la Paradraiso. * Eni a ajane tro Wayne memine la nekö i nyio a hane nyihlue i Iehova.” Hapeu, hetre itre sinee i epuni kö ka tha nyihlue i Iehova palakö? Eje hi, tui Pauline, easa ajane tro la itre sinee së a hane nyihlue i Iehova.

2. Nemene la itre hnying hne së hna troa ithanatan?

² Thatreine kö tro sa musinëne la itre sinee së troa kapa la nyipici, matre troa hane mel epine palua. Ngo ijije hi tro sa ithuecatre koi angatr troa hane inine me lapa mekune la hna qaja hnei Tusi Hmitrötr. (2 Tim. 3:14, 15) Pine nemene matre loi e tro sa cainöj kowe la itre sinee së? Pine nemene matre nyipiewekë troa pane thele troa atre la itre aliene hni angatr? Nemene la aqane tro sa xatuane la itre sinee së, troa hane hnimi Iehova? Nemene la aqane tro la itre trejin ne la ekalesia a xatua së?

3. Thenge la hna qaja ngöne 2 Peteru 3:9, pine nemene matre troa cainöj kowe la itre sinee së?

³ Calemi hë la ijine tro Iehova a nyipune la fene celë ka ngazo. Tro ha mele pe hnene la “itre ka hmalahnine troa kapa la mele ka pë pun.” (Itre hu. 13:48) Easa nue la traem me trengecatre së, matre troa cainöj kowe la itre atr hne së hna thatre ngöne la teritoare së. Easë fe a cainöj kowe la itre sinee së, matre tro fe angatr a hane nyihlue i Iehova. Ame Iehova, Tretretro së ka tru ihnimin, tre, “xele kö Nyidrë troa apatrene la ketre  e [easë], ngo loi e tro pe [së] asë a ietra.”—E jë la 2 Peteru 3:9.

4. Nemene la aqane cainöje së kowe la itre sinee së?

⁴ Tha tro pi kö sa thëthëhmine laka, hetre nyine troa kuca me tha nyine tro kö a kuca, matre troa tro fë hnyawa la maca ne iamele. Maine jë, troa menyik la aqane ithanata së ngöne la easa cainöj kowe la itre atr hne së hna thatre. Ngo ame pena la easa cainöj kowe la itre sinee së, catrehnine la aqane ithanata së.

5. Nemene la nyine tro sa thupëne ngöne la easa cainöj kowe la itre sinee së?

⁵ Mekune hi së lo easa xötrei cainöj kowe la itre sinee së. Maine jë, easa kucakuca pine laka, tha ka loi kö la aqane tro fë së la maca. Hane hi la eamo hna hamëne hnei Paulo kowe la itre Keresiano: “Tune la aqane hnyapane la xen hnei sootr, loi e tro palahi la itre trengewekë i nyipunie a menyik matre hnyapa troa dreng, nge tro hë nyipunieti lai a atreine sa.” (Kol. 4:5, 6) Nyipiewekë tro sa dreng la eamo celë, ngöne la easa troa cainöj kowe la itre sinee së. Maine tha hmeke kö së, tro hë angatr lai a sixele troa drei së.

6-7. Qaja jë la ketre ceitun ka amamane la enyipiewekëne troa hetre hni ne utipin, me trotrohnine la itre sinee i angatr ka tha hmi kö.

⁶ Loi e troa hetre utipin. Öni Pauline: “Ame lo xötrei, eni a ajane troa qeje Akötresie me Tusi Hmitrötr kowe la föeng. Tha hne huni kö hna ithanatan e nöjei drai.” Pëkö hna atre hnei Wayne, föi Pauline, ngöne la Tusi Hmitrötr, nge tha trotrohnine kö nyidrëti la hna qaja hnei Pauline. Wayne a xou e ajojezi Pauline jë hnene la hmi.

⁷ Hnei Pauline hna qaja ka hape, tru la hnei eahlo hna ce tro memine la itre trejin. Hnei eahlo hna ceme angatr e nöjei hej me e nöjei wiik, me ngöne la kola cainöj me  icasikeu me ce xen me elo. Öni Pauline: “Ame itre xaa ijin, Wayne caasi pe hi ngöne la hnalapa ke, pëkö atr. Tha madrine kö nyidrë.” Nyipici laka, aja i Wayne troa ce memine la ifënekö i nyidrë, me nekö i nyidrëti trahmany. Ketre, thatre kö Wayne la itre trejin ka ce tro me nyidro. Ame koi Wayne, ka tru catre kö koi Pauline me nekö i angeic la itre trejin Keresiano, nge co pë hë nyidrë. E cili, hnei Wayne hna qaja koi Pauline ka hape, loi e tro nyidroti a seihnacil. Nemene la aqane tro Pauline a hetre hni ne utipin?

8. Thenge la hna qaja ngöne 1 Peteru 3:1, 2, nemene la ka troa hetre thangane catr thene la itre sinee së?

⁸ Loi e troa amamai tulu ka loi. Nyipici laka, ame la itre atrene la fami së ke, angatr a haine la itre hne së hna kuca, hune la itre hne së hna qaja. (E jë la 1 Peteru 3:1, 2.) Trotrohnine hnyawa Pauline. Öni eahlo, “Hnei Wayne hna wesitr, matre hnei nyidrëti hna qaja ka hape, troa seihnacil. Wayne a hnimi ni memine la nekö i nyio. Ngo trotrohnine hë ni laka, loi e tro ni a trongëne la itre hna qaja hnei Iehova göi faipoipo. Loi e tro ni a pane kuca la itre ewekë ka loi, me cainöj pë hë e thupen koi nyidrë.” Eje hi, tha hnei Pauline hmaca kö hna sipu musi troa ithanata Tusi Hmitrötr me Wayne, me porotrikëne la itre xaa mekun me nyidrë. Öhne hi Wayne, laka, Pauline hi e kuhu hnalapa, nge ka idrengethenge me metrötr la neköi nyidro. (Ite edomë 31:18, 27, 28) Ame la Wayne a öhne la thangane la maca ngöne la fami nyidrë ke, nyidrëti hë lai a nyiqane thele la itre mekun e hnine la Wesi Ula.—1 Kor. 7:12-14, 16.

9. Pine nemene matre loi e tro palahi sa xatuane la itre sinee së?

⁹ Loi e troa catre xatuane la itre sinee së. Iehova la tulu ka sisitria. Hnei Nyidrëti  hna aijijëne la itre atr troa kapa la nyipici, me hetrenyi la mel. (Iere. 44:4) Hnei Paulo aposetolo fe hna ithuecatre koi Timoteo troa xatuane la itre xan. Pine nemen? Pine laka, jëne mele i angeice hi lai me itre ka drei angeic. (1 Tim. 4:16) Easa hnime la itre sinee së, matre easa ajane tro angatr a hane atre la nyipici qa hnine la Wesi Ula i Akötresie. Thupene la itre drai, hnene la itre thiina me aqane ithanata i Pauline, matre tingetinge hë la fami eahlo. Madrine catre eahlo pine laka, eahlo me föi eahlo a ce nyihlue i Iehova. Lue pionie hë nyidro, nge ketre qatre thupe hë Wayne.

10. Pine nemene matre nyipiewekë troa xomihni ahoean?

¹⁰ Loi e troa xomihni ahoean. Ame la easa drengethenge Akötresie, tre, kola saze la mele së memine la itre hne së hna mejiune kow. Jole kowe la itre sinee së troa canga kapa la aqane saze së. Tha easë hmaca kö a sine la itre feete ne hmi, maine lö hnine pena la kuci politik. Maine jë, tro angatr a elëhni ngöne la xötrei. (Mat. 10:35, 36) Ngo tha tro kö sa mekun ka hape, mekuna i angatr hë lai. Loi e tro pe sa thel la aqane troa xatua angatr troa trotrohnine la itre ini hne së hna mejiune kow. Maine tha xatua angatre kö hne së, kösë easë hi lai a sipu amekötin ka hape, tha ijiji angatre kö troa hane hetrenyi la mel ka epine palua. Ngo tha hnëqa së kö lai. Iesu hmekuje hi la ka troa iameköti ke, hnëqa i nyidrëti lai qaathei Iehova. (Ioane 5:22) Eje hi, maine tro palahi sa catre xomihni, tro hë la itre sinee së a hmala troa drenge la maca.—Wange ju la hna eköhagen hna hape, “ Troa Huliwane La Site Së Matre Hamë Ini.”

11-13. Nemene la ini hne së hna xom qa ngöne la hna melën hnei Alice?

¹¹ Loi e troa thiina ka loi, ngo tha tro kö la itre sinee së a ajojezi së. (Ite edomë 15:2) Hanawang la ka traqa koi Alice. Hnei angeic hna atre Iehova, ngöne lo angeic a lapa iananyi memine la kem me thine i angeic. Tha ka mejiune kö nyidro koi Akötresie, nge ka kuci politik nyidro. Ngo tru la aja i angeic troa ce thawa me nyidro la itre hnei angeic hna inin. Öni Alice: “Loi e tro sa canga qaja kowe la itre sinee së, la itre ini hne së hna mejiune kow, matre tha tro kö angatr a hnehengazo menu.” Hnei Alice hna thele la itre tane mekun ka qeje ihnim ke, celë hi hna ajane troa ithanatan hnene la kem me thine i angeic. Thupene lai, hnei Alice hna cinyiany koi nyidro, me qaja la mekuna i Tusi Hmitrötr göne la ihnim, me hnyingëne la mekuna i nyidro. (1 Kor. 13:1-13) Hnei Alice hna nyi ahnahna koi nyidro, matre troa olene la aqane hetrun me nyihnyawa angeic. Ame la Alice a tro troa wai nyidro, hnei angeic hna xatuane la thine i angeic troa nyihnyawane la uma. Ame ngöne lo xötrei, tha madrine kö la kem me thine i Alice, ngöne lo angeic a qaja la itre ini hnei angeic hna mejiune kow.

¹² Ame lo Alice a lapa thei nyidro, hnei angeic hna e Tusi Hmitrötr e nöjei drai. Öni Alice: “Celë hi ka xatua nenë troa trotrohnine laka, ka nyipiewekë catre la Tusi Hmitrötr koi ni.” Ketre, hnene la keme i Alice hna thele troa atrepengöne la itre ini qa hnine la Tusi Hmitrötr. Aja i nyidrëti troa atre la kepin matre, kola saze la nekö i nyidrë. Nge nyidrëti fe a thele jëne troa qaja angazone la Tusi Hmitrötr. Öni Alice: “Hnenge hna hamë Tusi Hmitrötr me cinyanyi koi nyidrë.” Nemene hë la thangan? Pëkö mekune ka tria hnei nyidrëti hna öhn e hnine la Tusi Hmitrötr. Hna ketri nyidrëti pe hnene la itre hnei nyidrëti hna e.

¹³ Loi e tro palahi sa catr. Ngacama easa cile kowe la itre jol ka tru, ngo tha tro pi kö sa nue la ketre ewekë troa ajojezi së. (1 Kor. 4:12b) Hnei Alice hna cile catr ngacama kola icilekeu la thine i angeic. Öni angeic: “Ame ngöne lo eni a xomi bapataiso, hnei nenë hna jelë ni ka hape, ‘jajinyi ka catre  që.’ ” Nemene la hna kuca hnei Alice? Öni angeic: “Tha hnenge kö hna xou troa qaja la hming. Cememine la metrötr, hnenge hna thuemacanyi nyidro ka hape, eni ha troa xomi bapataiso, nge pëkö ka troa sewe ni. Hnenge fe hna qaja koi nenë ka hape, tru la ihniming koi eahlo. Hnei nyio hna isa treij, nge hnenge hna kuci xen koi eahlo. Qaane ju hi lai, nenë a anyipicine laka, hnei Tusi Hmitrötr, matre lolo la thiinang.”

14. Pine nemene matre tha tro kö sa nue la itre fami së troa ajojezi së troa nyihlue i Iehova?

¹⁴ Loi e troa pane nue ijin kowe la itre kem me thin, troa trotrohnine la kepin matre, ka nyipiewekë koi së troa nyihlue i Iehova. Hnene la kem me thine i Alice hna mekun ka hape, tro angeic a kuca la huliwa hnei nyidroti hna iën. Ngo hnei Alice hna xome la huliwa ne pionie. Hnene la thine i Alice hna treij, ngo hnei Alice hna cile catr. Öni Alice: “Maine tro sa kei thenge la aja ne la fami së, tro hë angatr a iele së troa saze la itre mekuna së. Ngo maine tro sa loi thiina me cile catr ngöne la mekuna së, tro ha drei së hnei angatr.” Ame hë enehila, lue pionie la kem me thine i Alice, nge qatre thup hë la keme i angeic.

15. Thenge la hna qaja ngöne Mataio 5:14-16 me 1 Peteru 2:12, tro la “itre huliwa ka loi” ne la itre trejin a xatuane tune kaa la itre sinee së?

¹⁵ Kola atrunyi Iehova hnene la “itre huliwa ka loi” ne la itre hlue i Nyidrë. Celë hi matre, itre atr a thele Iehova. (E jë la Mataio 5:14-16; 1 Peteru 2:12.) Nge maine tha ka nyihlue i Iehova kö la föi epun, hnei angeice kö hna hane iöhny memine la itre trejin ne la ekalesia? Hnei Pauline hna könëne la itre trejin trahmany me föe, matre tro angatr a hane atre Wayne. Mekune hi Wayne la aqane xatua nyidrëti hnene la ketre trejin, matre  troa atrepengöne hnyawa la Itretre Anyipici Iehova. Öni Wayne: “Hnei angeic hna xomi ijine mano, matre troa wai fenibalo me eni. Tha trotrohni angeice kö ni.”

16. Pine nemene matre loi e tro sa könëne la itre sinee së kowe la itre icasikeu?

¹⁶ Ame la ketre aqane tro sa xatuane la itre sinee së, tre, ene la troa hane könë angatr troa sine la itre icasikeu. (1 Kor. 14:24, 25) Ame la pane icasikeu hna sine hnei Wayne, tre, kolo Drai Ne Amekunën. Hnei nyidrëti hna traqa thupene la huliwa, nge tha qeadridri kö la porogaram. Öni Wayne: “Tha trotrohnine kö ni lo cainöj hna cile fë. Ngo eni a haine la etrune la itre atr ka traqa. Angatr a traqa me madrine troa kepe ni. Itre atr ka nyipici angatr.” Ketre, ame la lue xaa trefën ke, lolo la thiina i nyidro. Hnei nyidroti hna xatua Pauline memine la nekö i eahlo ngöne la hna icasikeu me ngöne la hna cainöj. Celë hi matre, ame ngöne la Wayne a thele troa atrepengöne hnyawa la itre ini hna mejiune kow hnei Pauline, hnei nyidrëti hna sipone la trejin trahmany troa ini tusi me nyidrë.

17. Pine nemene matre tha tro pi kö sa hnehengazo menu, nge pine nemene matre tha tro kö sa mekun ka hape, tha tro kö a saze hnene la itre sinee së?

¹⁷ Easa trengeneune laka, tro la itre sinee së a hane ce nyihlue i Iehova me easë. Maine jë, tru la itre trengecatr hne së hna nue, ngo tha nyihlue i Iehova kö angatr. Tha tro pi kö sa hnehengazo, pine la aqane axecië mekune i angatr. Tha tro kö sa musinëne la itre xan, troa kapa la itre ini hne së hne mejiune kow. Ngo öhne hi la fami së laka, ka madrine së troa nyihlue i Iehova. E cili, tro ha hetre thangane koi angatr. Loi e tro sa thith thatraqai angatr. Tha tro kö sa xou troa ithanata koi angatr. Loi e tro palahi sa xatua angatr! (Itre hu. 20:20) Eje hi, loi e xecie hnyawa koi së laka, tha ka sihngödri kö koi Iehova la itre trengecatre së. Nge maine kola drei së hnene la itre sinee së, tro hë angatr a mel!