AME la lapaun, tre, ketre thiina lai ka hamë trengecatre së. Drei la ketre ceitun. Satana a ajane troa thë la aqane imelekeu së me Iehova. Ngo hnene la lapaun, matre kola “thupë [së] qa ngöne la itre ewekë hna hna koi [së].” (Efe. 6:16) Ketre, maine ka lapaune së, haawe, ijije hi tro sa elë hune la itre jol, ka ceitu memine la itre wetr ka draië. Öni Iesu kowe la itretre drei nyidrë: “Maine tro la lapaune i nyipunie a tune la itine sinapi, tro nyipunie a qaja kowe la wetre celë ka hape, ‘Kötre jë qa lai kowe la,’ nge tro eje lai a kötre pi.” (Mat. 17:20) Atre hi së laka, troa catr la aqane imelekeu së me Iehova, e ka lapaune së. Haawe, loi e tro sa isa hnying ka hape: Nemene la lapaun? Nemene la aqane tro la itre aliene hni së a hetre thangane kowe la lapaune së? Nemene la aqane tro sa acatrene la lapaune së? Nge drei la atr hne së hna troa lapaune kow?—Rom. 4:3.

Ame la lapaun, tre, tha kolo hmekuje kö a qaja la troa atre me mejiun kowe la nyipici qa hnine la Tusi Hmitrötr. “Itre dremoni fe a hane mejiun [koi Akötresie] me hmengöhmengön.” (Iako. 2:19) Haawe, nemene la lapaun?

Tusi Hmitrötr a qaja la lue pengöne la lapaun. Ame la hnapan, tre, “mejiune ka hetre nyipi trepen laka, troa eatre la nöjei ewekë hna thingehnaean.” (Heb. 11:1a) Ame la atr ka lapaun, tre, ka xecie hnyawa koi angeic laka, ka nyipici asë hi la itre hnei Iehova hna qaja, nge tro kö a eatr. Drei la ketre ceitun. Öni Iehova koi angetre Isaraela: “Maine ateine nyipunie troa axeciëne la isisinyikeunge lai, me isisinyikeunge jid, mate tha tro kö a lai me jidi ngöne la isa ijine lu’ ej; hawe, tro kö a axeciëne la isisinyikeunge me Davita hlueng.” (Iere. 33:20, 21) Hapeu, epuni kö a xou e troa paatre la jö, matre pëhë drai me jidr? Maine ka xecie hnyawa koi së laka, tha tro kö a saze la aqane kanothe la jö hnene la ihnadro, hapeu, tro kö sa luelu ka hape, atreine kö la Atre Xup troa eatrëne la itre trengewekë i Nyidrë? Ohea!—Is. 55:10, 11; Mat. 5:18.

Ame la hnaaluene pengöne la lapaun, tre, “ej a anyipicine la nöjei ewekë ka tha mama kö koi luemek.” (Heb. 11:1b) Kola hapeue lai? Pane mekune jë laka, ketre nekönatr a hnyingë së ka hape, ‘Drei la ka qaja koi eö ka hape, ka nyipici la eny?’ Ngacama tha öhne kö së la eny, ngo ame pe, ijije hi tro sa amamane koi nyëne la itre ewekë ka anyipicine laka, ka nyipici la eny. Maine jë, tro sa mano maine amamane la itre thangane la eny. Tro hë nyëne lai a kapa laka, ngacama tha öhne kö së, ngo ame pe, ka nyipici la eny. Ketre tune fe, hna nyitrepene la lapaun hnene la itre ewekë ka nyipici.—Rom. 1:20.

Maine hna nyitrepene la lapaun hnene la itre ewekë ka nyipici, haawe, nyipiewekë tro sa pane “atrehmekune hnyawa la nyipici.” (1 Tim. 2:4) Ngo hetre ketre ewekë nyine tro sa kuca. Öni Paulo aposetolo: “[Troa] amamane la lapaune [së] qa kuhu hni.” (Rom. 10:10) Tha tro hi sa mejiun kowe la nyipici, ngo loi e tro fe sa wangatrun ej. E cili, tro ha mama la lapaune së ngöne la mele së.  (Iako. 2:20) Ame la atr ka tha wangatrune kö la nyipici, tre, angeic a thipetrije la itre ewekë nyine anyipicin ke, tha ajane kö angeic troa saze. (2 Pet. 3:3, 4; Iudra 18) Celë hi kepin matre, ala xalaithe hi ekö la itre ka lapaun kowe la itre iamamanyikeu. (Num. 14:11; Ioane 12:37) Tro hi la uati hmitrötre i Akötresieti a acatrene la lapaunene la itre ka hniin la nyipici.—Gal. 5:22; 2 Thes. 2:10, 11.

Davita joxu la ketre atr ka catre lapaun. (Heb. 11:32, 33) Tha ceitune kö memine la itre xaa atrene la hnepe lapa i angeic. Drei la ketre ceitun. Tha lapaune kö Eliaba, mama i Davita, ngöne lo angeic a cile koi Goliatha. Hnei Eliaba hna qaja angazonyi Davita. (1 Sam. 17:26-28) Tha hna xupi së kö memine la lapaun, nge tha ka xulu kö la lapaun qaathei kem me thin. Ka catr la lapaune Davita ke, hnene la aqane imelekeu i angeic me Akötresie.

Ame ngöne Salamo 27, hnei Davita hna qaja la itre ewekë ka xatua angeic troa catre lapaun. (Xötre 1) Hnei Davita hna lapa mekun la itre ewekë hnei angeic hna melën, me aqane ujë Iehova kowe la itre ithupëjia me angeic. (Xötre 2, 3) Hnei angeic hna wangatrune la ēnē i Iehova. (Xötre 4) Hnei Davita hna atrunyi Akötresie nyipine la itre atr ngöne la ēnē. (Xötre 6) Hnei angeic hna thele Iehova ngöne la thith. (Xötre 7, 8) Ketre, aja i Davita troa kepe ini qaathei Akötresie. (Xötre 11) Eje hi, nyipiewekë catr koi Davita la lapaun. Celë hi matre, hnei angeic hna qaja ka hape, maine pëkö lapaune i angeic, thatreine kö angeic troa mele nyipici.”—Xötre 13.

Ijije hi tro sa lapaune tui Davita, e hne së palahi hna trongëne la itre ewekë hna qaja ngöne Salamo 27. Eje hi, hna nyitrepene la lapaun hnene la nyipi atrehmekun. Celë hi matre, loi e tro sa catre inine la Wesi Ula i Akötresie memine la itre itusi së. E cili, tro ha hmaloi koi së troa hetrenyi la thiina cili, ka qaathene la uati hmitrötre i Akötresie. (Sal. 1:2, 3) Loi e tro fe sa xomi ijine troa lapa mekun. Maine tro sa lapa mekune la itre hne së hna inin, tro hë sa hetre hni ne ole koi Iehova. Nge celë hi ka troa thue aja së troa lapaun, me catre nyihlue i Nyidrë ngöne la itre ijine icasikeu, me qaja la mejiune së koi itre xan. (Heb. 10:23-25) Ketre, easa amamane la lapaune së ngöne la easa “thithi lapa, nge tha tro kö a hmaca.” (Luka 18:1-8) Haawe, “the mano kö thithi” koi Iehova ke, “nyidrëti a meku [së].” (1 Thes. 5:17; 1 Pet. 5:7) Maine ka lapaune së, haawe, tro hë sa kuca la loi. Nge ame la easa kuca la loi, kolo lai a acatrene la lapaune së.—Iako. 2:22.

Ame lo jidr qëmekene tro nyidrëti a mec, öni Iesu kowe la itretre drei nyidrë: “Amamane jë la lapaune i nyipunie koi Akötresie; nge lapaune jë fe koi ni.” (Ioane 14:1) Haawe, tro sa lapaune koi  Iehova, ngo tro fe sa lapaune koi Iesu. Nemene la aqane tro sa amamane la lapaune së koi Iesu? Hanawang la köni aqane tro sa kuca.

Ame la hnapan, tro sa goeëne la thupene mel ceitu me ketre ahnahna qaathei Akötresie, koi së isa ala caas. Öni Paulo aposetolo: “Eni a melën thenge la lapauneng kowe la Nekö i Akötresie, atre hnimi ni, me meci pi ni.” (Gal. 2:20) Ame la atr ka lapaune koi Iesu, tre, xecie hnyawa koi angeic laka, ka nyipiewekë la thupene mel. Atre hi angeic laka, jëne la thupene mel, ijije hi troa nue la ngazo së, me mejiune kowe la mel ka tha ase palua kö. Ketre, celë hi hatrene la ihnimi Akötresieti koi së. (Rom. 8:32, 38, 39; Efe. 1:7) Maine ka xecie koi së laka, thatraqai së fe la thupene mel, haawe, tha tro hë a tranyi së hnene la itre mekun ka ngazo, me sipu upezö së kö.—2 Thes. 2:16, 17.

Ame la hnaaluen, tro sa easenyi koi Iehova ngöne la thith. Jëne la thupene mel, ijije hi tro sa thithi koi Iehova “me tha xou [. . . ], matre kapa jë së la utipin, nge öhne jë së la ihnimi gufa nyine xatua së ngöne la nyipi ijin.” (Heb. 4:15, 16; 10:19-22) Ame la easa thith, tre, kola acatrene la aja së tro palahi cile kowe la ngazo.—Luka 22:40.

Ame la hnaakönin, tro sa drengethenge Iesu. Öni Ioane aposetolo: “Ame la atre amamane la lapaune i angeic kowe la Nekön, tro hë angeic a kapa la mele ka pë pun, ngo ame la atre tha drengethenge la Nekön, tha tro kö angeic a hane öhne la mel, ngo tro kö a eje thei angeic la elëhni i Akötresie.” (Ioane 3:36) Hnei Ioane hna amamane la eisapengönene la troa lapaune memine la troa tha idrei. Ame la atr ka lapaune koi Iesu ke, angeic a drengethenge nyidrë. Easa drengethenge Iesu ngöne la easa trongëne “la wathebo i Keriso,” ene la nöjei ini qaathei nyidrë. (Gal. 6:2) Easë fe a drengethenge Iesu ngöne la easa trongëne la itre hnei nyidrëti hna amekötin, jëne “la hlue ka nyipici me ka inamacan.” (Mat. 24:45) Maine tro sa drengethenge Iesu, tro hë sa atreine xomihnine la itre jol ka ceitu me wene ka catr.—Luka 6:47, 48.

Ame la ketre ijin, hnene la ketre atr hna sue koi Iesu, me hape: “Eni a lapaun! Xatua ni jë troa acatrene la lapauneng!” (Mar. 9:24) Eje hi laka, ka lapaune angeic, ngo ame pe, aja i angeic troa nyixane la lapaune i angeic. Tui angeic, tro fe sa hane cil kowe la itre jol ka tru ngöne la mele së, matre nyipiewekë tro sa catre lapaun. Ijiji së asë hi troa acatrene la lapaune së enehila. Tune la hne së hna ce wang, easa acatrene la lapaune së ngöne la easa ini la Wesi Ula i Akötresie, me lapa mekun. E cili, tro hë sa hetre hni ne ole koi Iehova. Ketre, easa acatrene la lapaune së ngöne la easa atrunyi Iehova nyipine la itre trejin, me qaja amamane la mejiune së koi itre xan, me catre thith. Maine tro sa acatrene la lapaune së, tro hë sa kapa la ketre ahnahna ka tru. Öni Tusi Hmitrötr: “Nyipunie itre hnimina, xup adraiëne jë la lapaune i nyipunie . . . matre tro pala hi nyipunieti a lapa fene la ihnim i [Akötresie].”—Iudra 20, 21.