1. Nemene la ka hamë madrine së?

 DREI la ketre madrin ka tru la troa sine la ekalesia i Iehova! Kösë easë hë mel e hnine la Paradraiso memine la itre trejin ka madrin me thele tingeting. Ngo nemene la hnëqa i epun e hnine la ekalesia?

2. Nemene la ceitune hna hamëne hnei Paulo?

² Tro sa ce wang la ketre ceitune hna hamën hnei Paulo aposetolo. Celë hi ka troa xatua së troa trotrohnine la hnëqa së e hnine la ekalesia. Hnei Paulo hna aceitunëne la ekalesia memine la ngönetrei ne la atr. Nge hnei nyidrëti hna aceitunëne la itre trejin memine la itre igötranene la ngönetrei.—Rom. 12:4-8; 1 Kor. 12:12-27; Efe. 4:16.

3. Nemene la köni mekun hne së hna troa ce wang ngöne la tane mekun celë?

³ Ame ngöne la tane mekun celë, tro sa xome la köni ini qa ngöne la ceitune i Paulo. Ame la hnapan, tro sa ce wang laka, isa hetre hnëqa * së e hnine la ekalesia. Ame la hnaaluen, tro sa ce wang la nyine tro sa kuca matre troa atre la hnëqa së. Ame la hnaakönin, tro sa ce wang la enyipiewekëne la troa catre xome la hnëqa së e hnine la ekalesia.

4. Nemene la hnei Paulo hna pi qaja ngöne Roma 12:4, 5?

⁴ Ame la pane ini hne së hna xome qa ngöne la ceitune i Paulo ke, isa hetre hnëqa së e hnine la ekalesia. Öni Paulo: “Tune la ngönetrei, nyimutre la itre hnepe igötranen, nge isa hetre huliwa ne itre ej, haawe, tu së mina fe, ngacama ala nyimu së, ngo casi hë së me Keriso, nge easë la itre hnepe ngönetrei hna iacasinekeun.” (Rom. 12:4, 5) Nemene la hnei Paulo hna pi qaja? Ngacama isapengöne kö la itre hnëqa së, ngo ka nyipiewekë asë hi së koi Iehova.

5. Nemene la “itre ahnahna” hnei Iehova hna hamëne kowe la ekalesia?

⁵ Maine jë easa mekun laka, itre trejin trahmanyi hi la ka hetre hnëqa e hnine la ekalesia. (1 Thes. 5:12; Heb. 13:17) Nyipici laka, hnei Iehova hna hamëne koi së la “itre ahnahna” jëne Keriso. (Efe. 4:8) Kola qaja la itre atrene la Lapa Ne Xomi Meköt me itre ka xatua angatr, me itre atrene la filial, me itre atre thupë sirkoskripsio, me itre formateur, me itre qatre thup me itre atre ixatua. Hnei Iehova hna ië angatr hnene la uati hmitrötr, matre troa thupëne la itre mamoe i Nyidrë me xatuane la ekalesia.—1 Pet. 5:2, 3.

6. Thenge la 1 Thesalonika 2:6-8, nemene la aja ne la itre trejin hna acil?

⁶ Isapengöne kö la hnëqa ne la itre trejin trahmanyi e hnine la ekalesia. Tune la enyipiewekëne la itre wanakoime me waca, ka nyipiewekë fe la huliwa hna kuca hnene la itre trejin hna acil. Tha angatre kö a thele troa atrunyi angatr. Ame la aja i angatr, tre, troa ithuecatre me acatrene la lapaunene la itre trejin. (E jë la 1 Thesalonika 2:6-8.) Easa olene koi Iehova ke, hnei Nyidrëti hna hamëne koi së la itre trejin ka catre lapaun me ihnim!

7. Nemene la hna kuca hnene la itre trejin ka cainöj ngöne la drai ka pexej?

⁷ Ame la itre xaa trejin, hna acilë angatr troa mesinare, maine pionie hut maine pionie lapa. Eje hi, alanyimu la itre trejin e cailo fen ka cainöj ngöne la drai ka pexej me inine la itre atr. Angatr a xatuane la itre atr troa hane xötrethenge Iesu. Tha tru kö hnei ewekë i angatr, ngo Iehova a amanathithi angatr. (Mar. 10:29, 30) Tru catr la ihnimi së kowe la itre trejin cili, nge easa madrin laka, ce angatr me easë ngöne la ekalesia!

8. Pine nemene matre ka nyipiewekë asë hi la itre trejin koi Iehova?

⁸ Hapeu, itre trejin trahmany hmekuje hi la ka nyipiewekë, memine la itre ka huliwa i Akötresie ngöne la drai ka pexej? Waea. Ka nyipiewekë asë hi la itre trejin koi Iehova me kowe la ekalesia. (Rom. 10:15; 1 Kor. 3:6-9) Ame la ka nyipiewekë, tre, troa cainöj me xatuane la itre atr troa xötrethenge Iesu Keriso joxu së. (Mat. 28:19, 20; 1 Tim. 2:4) Ame easë e hnine la ekalesia, itre ka bapataiso me itre ka cainöj, easa ajane troa amë panëne la huliwa ne cainöj ngöne la mele së.—Mat. 24:14.

9. Pine nemene matre easa wangatrune la itre trejine föe?

⁹ Ka nyipiewekë mina fe la itre trejine föe e hnine la ekalesia. Iehova a wangatrune la itre föe, me itre thin, me itre sine föe, me itre trejine föe ka tha faipoipo palakö nge ka catre nyihlue i Nyidrë. Alanyimu la itre föe hna qaja aloin  e hnine la Tusi Hmitrötr. Hnei nyudreni hna amamai tulu göne troa lapaun, me inamacan, me catr, me ihnim, me ham me catre huliwa i Akötresie. (Luka 8:2, 3; Itre hu. 16:14, 15; Rom. 16:3, 6; Fil. 4:3; Heb. 11:11, 31, 35) Easa madrin me olene koi Iehova ke, hetrenyi the së la trejine föe ka amamane la itre thiina cili!

10. Pine nemene matre easa wangatrune la itre trejin ka qatre hë?

¹⁰ Easa madrin ke, alanyimu la itre trejin ka qatre hë e hnine la ekalesia. Ame la itre xan, hnei angatr hna nue la mele i angatr troa huliwa i Iehova. Ame pena itre xan, angatr a xötrei atre la nyipici. Pine laka angatr a uti ipië trootro, matre kola tithi angatr hnei mec. Celë hi matre, tha ijiji angatre hë troa huliwa e hnine la ekalesia maine cainöj. Ame pe, angatr a kuca la hnei angatr hna atrein matre troa cainöj me hamë ithuecatre me inine la itre xan. Ijije hi tro sa xomi ini qaathei angatr! Ka mingöming catre angatr koi Iehova me koi së fe!—Ite edomë 16:31.

11-12. Tune kaa la aqane ithuecatre së hnene la itre thöth e hnine la ekalesia?

¹¹ Tune kaa fe la itre thöth? Tha ka hmaloi kö koi nyudren ke, nyudreni a tru ngöne la fene ka ngazo hna musinën hnei Satana. (1 Ioane 5:19) Kola ithuecatre koi së ngöne la itre thöth a hamë mekun ngöne la hna icasikeu, me catre cainöj me cilëgöline la lapaune i nyudren! Itre thöth, ka nyipiewekë epun e hnine la ekalesia!—Sal. 8:2.

¹² Jole kowe la itre xaa trejin troa mekun laka, ka nyipiewekë angatr e hnine la ekalesia. Nemene la ka troa xatua angatr? Celë hi la hne së hna troa ce wang.

13-14. Pine nemene matre itre xan a mekun laka, tha nyipiewekë kö angatr ngöne la ekalesia?

¹³ Tro sa ce wang la hnaaluene ini ka mama ngöne la ceitune i Paulo. Nyimutre  enehila la itre trejin ka mekun laka, tha nyipiewekë hë angatr e hnine la ekalesia. Öni Paulo: “Maine tro la waca a qaja ka hape: ‘Pine laka, tha wanakoime kö ni, tha hnepe ngönetrei kö ni,’ ngo hapeu, tha hnepe ngönetrei kö lai? Nge maine tro la hnangenyë a qaja ka hape: ‘Pine laka tha alameke kö ni, tha hnepe ngönetrei kö ni,’ ngo hapeu, tha hnepe ngönetrei kö lai?” (1 Kor. 12:15, 16) Nemene la aliene la hna qaja hnei Paulo?

¹⁴ Maine tro palahi sa goeëne la itre xaa trejin, tro hë sa mekun laka, tha nyipiewekë kö së e hnine la ekalesia. Ame la itre xan, ka maca angatr troa cile fë cainöj, me eköthe la huliwa maine thupëne hnyawa la itre trejin. Maine jë, epuni a mekun laka, ka sisitria catre kö angatr hui epun. Kolo lai a amamane laka, itre ka ipië epun. (Fil. 2:3) Ngo loi e tro sa thupën. Maine tro palahi sa goeëne la itre trejin ka maca, tro hë sa kucakuca. Nge tune lo hna qaja hnei Paulo, tro hë sa mekun laka, tha nyipiewekë kö së ngöne la ekalesia. Nemene la ka troa xatua së?

15. Thenge la 1 Korinito 12:4-11, ka ceitune kö la itre ahnahna hna hamën koi së?

¹⁵ Pane mekune jë lo Iehova a isa hamë ahnahna kowe la itre pane Keresiano ekö. (E jë la 1 Korinito 12:4-11.) Ngacama isapengöne kö la itre hnei ahnahna i angatr me itre hnei hna atreine kuca, ngo ka nyipiewekë asë hi angatr koi Iehova. Eje hi laka, ame enehila, tha uati hmitrötre hmaca kö a upi së troa kuca la itre iamamanyikeu. Ngo the thëthëhmine kö laka, hetre itre ewekë hne së hna isa atreine kuca, nge itre ka nyipiewekë së koi Iehova.

16. Nemene la eamo i Paulo nyine tro sa trongën?

¹⁶ Tha tro kö sa goeëne la hna atreine kuca hnene la itre xan. Loi e tro pe sa trongëne la eamo hna hamën hnei Paulo, ka hape: “Loi e troa isa tupa huliwan,  matre isa öhnyi madrine qa ngöne la hna isa kuca, ngo tha qa ngöne kö la hna goeëne la huliwa i ketre.”—Gal. 6:4.

17. Pine nemene matre loi e tro sa trongëne la eamo i Paulo?

¹⁷ Maine tro sa trongëne la eamo i Paulo me isa waipengö së hnyawa, tro hë sa öhn laka, hetre itre ewekë hne së hna atreine kuca. Drei la ketre ceitun. Maine jë, tha ka maca hnyawa kö la ketre qatre thup troa cile fë cainöj. Ngo hetre thangane la huliwa ne cainöje i nyidrë. Atreine hi nyidrë troa xatuane la ketre atr uti hë la angeice a xomi bapataiso. Maine pena, thatreine hnyawa kö nyidrëti troa eköthe la huliwa ne la ekalesia, tune la itre xaa qatre thup. Ame pe, ka hnime nyidrëti la itre mamoe, matre tha xou i angatre kö troa ithanata me nyidrë. Ketre, ka maca nyidrëti troa hamë eamo, nge ka ikep me ham. (Heb. 13:2, 16) Maine tro sa wangatrune la itre hne së hna atreine kuca, tro hë sa madrin troa huliwa kowe la ekalesia. Ketre, tha tro hë sa piine la hna atreine kuca hnene la itre xaa trejin ka maca.

18. Tune kaa la aqane tro sa amamane laka, easa thele troa maca?

¹⁸ Nyipici laka, isa hetre hnëqa së e hnine la ekalesia. Ngo loi e tro palahi sa thele troa maca hnyawa ngöne la huliwa i Akötresie. Celë hi matre, Iehova a xatua së me ini së jëne la organizasio i Nyidrë. Ame ngöne la itre icasikeu e nöjei wiik, kola xatua së troa maca ngöne la hna cainöj. Hapeu, easë kö a wangatrune la itre ini cili qaathei Iehova?

19. Nemene la nyine troa kuca matre troa hane sine la Ini Koi Itre Ka Cainöj?

¹⁹ Ka lolo catre fe la Ini Koi Itre Ka Cainöj. Hna kuca la ini cili thatraqane la itre trejin ka 23 koi 65 lao macatre, nge ka cainöj ngöne la drai ka pexej. Maine jë epuni a mekun laka, tha ijiji epuni kö. Ngo the goeëne kö la itre ewekë ka ajolë epun troa sine la ini cili. Sija ju pe la itre kepin matre epuni a ajane troa sine lai ini. Thele jë fe la itre nyine troa pane kuca qëmekene troa sine la ini. Nge jëne la ixatua i Iehova, tro hë epuni a eatrëne la mekuna i epun.

20. Nemene la ini hna hamën ngöne Roma 12:6-8?

²⁰ Ame la hnaakönine ini hne së hna troa xom qa ngöne la ceitune i Paulo ke, eje ngöne Roma 12:6-8. (E jë.) Ame ngöne la xötre celë, Paulo a amamane laka, isapengöne kö la itre hne së hna atreine kuca. Ngo nyidrëti fe a qaja la enyipiewekëne la troa huliwane la itre hne së hna isa atreine kuca matre troa acatrene la ekalesia.

21-22. Nemene la ini hne së hna xom qa ngöne la tulu i Robert me Felice?

²¹ Hane hi la hna melën hnei Robert. Hnei nyidrëti hna pane cainöj ngöne la ketre nöj. Ngo thupene lai, hna upi nyidrë troa huliwa ngöne la Bethela ne la nöje i nyidrë. Önine la itre trejin ka hape, pëkö ngazo hnei nyidrëti hna kuca. Ngo öni Robert: “Itre treu ne eni a akötr. Ame koi ni, tha hnenge kö hna kuca hnyawa la huliwang. Ame itre xaa ijin, eni a mekun troa tro qa ngöne la Bethela.” Nemene la ka hamë madrin koi Robert? Hnene la ketre qatre thup hna qaja koi Robert ka hape, jëne la itre hnëqa hne së hna kuca ekö, Iehova a ini së  matre troa maca ngöne la huliwa së ka hnyipixe enehila. E cili, Robert a trotrohnine laka, tha tro kö a lapa mekun la itre hna kuca ekö, ngo tro pe a mekun la itre hnei nyidrëti hna atreine kuca enehila.

²² Celë fe hi la hna melën hnei Trejin Felice Episcopo. Hnei nyidrëti me föe i nyidrë hna sine la Ini Ne Gileada lo 1956. Thupene lai, hna upi nyidro troa iwai trootro e Bolivie. Ngo ame lo 1964, hna hetre neköi nyidro. Öni Felice: “Hace catr koi nyio troa nue la hnëqa i nyio. Caa macatre ne eni a pane lapa mekun la huliwa i nyio ekö. Ngo jëne la ixatua i Iehova, hnenge hna saze la aqane mekunang, nge hnenge hna thel troa kuca hnyawa la hnëqang ne kem.” Hapeu, epuni kö a mekun tui Robert me Felice? Epuni palahi a lapa mekun la huliwa hnei epuni hna kuca ekö koi Iehova? Maine tro epuni a lapa mekun la hnei epuni hna atreine kuca enehila koi Iehova me kowe la itre trejin, tro hë epuni a madrin. Haawe, catre jë huliwane la itre hna atrein matre troa xatuane la itre xan. Tro hë epuni lai a madrin ke, epuni a ithuecatr me acatrene la ekalesia.

23. Nemene la nyine tro sa kuca, nge nemene la hne së hna troa ce wang ngöne la ketre tane mekun?

²³ Eje hi, ka nyipiewekë asë hi së koi Iehova, nge Nyidrëti a ajane tro sa sine la fami Nyidrë. Haawe, loi e tro sa xomi ijin matre troa thele la itre aqane tro sa acatrene la lapaunene la itre trejin, me xatua angatr. E cili, tha tro hmaca kö sa mekun laka, pëkö göhne së e hnine la ekalesia. Ngo tune kaa la aqane goeëne së la itre xaa trejin? Easë kö a amamane la ihnimi së koi angatr? Celë hi la hne së hna troa ce wang ngöne la ketre tane mekun.