1. Nemene la hnei Iehova hna hamën kowe la itre hlue i Nyidrë?

 IHNIM la ka upi Iehova troa hamë hnëqa kowe la itre hlue i Nyidrë e hnine la ekalesia. Ngacama isapengöne kö la itre hnëqa së, ngo nyipiewekë asë hi së koi Iehova me koi itre trejin. Celë hi ketre ini ka lolo hna hamën hnei Paulo.

2. Thenge la Efeso 4:16, pine nemene matre loi e tro sa nyipiewekëne la itre trejin me ce huliwa me angatr?

² Ame ngöne la xötr ka nyitrepene la tane mekun celë, hnei Paulo hna amamane laka, thatreine kö tro sa qaja kowe la ketre trejin, ka hape: “Tha nyipiewekë kö eö koi ni.” (1 Kor. 12:21) Maine aja së troa tingetinge la ekalesia, loi e tro sa wangatrune la itre trejin me ce huliwa me angatr. (E jë la Efeso 4:16.) Maine tro palahi la itre trejin a caas, tro hë angatre lai a ithuecatrekeu me ihnimikeu.

3. Nemene la hne së hna troa ce wange ngöne la tane mekun celë?

³ Nemene la itre aqane tro sa metrötrëne la itre trejin ne la ekalesia? Ame ngöne la tane mekun celë, tro sa pane ce wange la aqane tro la itre qatre thup a metrötrë itre xan. Tro fe sa ce wange la aqane tro sa metrötrëne la itre trejin ka tha faipoipo palakö. Nge tro fe sa ce wange la aqane troa amamane la ihnimi së kowe la itre trejin ka inine la ketre qene hlapa.

4. Thenge la Roma 12:10, nemene la nyine troa kuca hnene la itre qatre thup?

⁴ Ame la itre qatre thup ke, hna ië angatr hnei uati hmitrötr, ngo tha ceitu i angatre asë kö. (1 Kor. 12:17, 18) Ame itre xan, hna xötrei acil matre tha maca hnyawa palakö angatr troa xome la hnëqa. Ame pena itre xan, jole koi angatr ke, angatr a wezipo maine qatre hë angatr. Ngo tha tro kö la itre xaa qatre thup a wangaconyi angatr ke, kösë angatre hi lai a hape: “Tha nyipiewekë kö eö koi ni.” Loi e tro la itre qatre thup a trongëne la eamo i Paulo ngöne Roma 12:10.—E jë.

5. Tune kaa la aqane tro la itre qatre thup a imetrötrekeu, nge pine nemene matre ka nyipiewekë?

⁵ Itre qatre thup a imetrötrekeu ngöne la angatr a drenge la mekuna ne la itre xaa qatre thup, ngöne la angatr a icasikeu. Pine nemen? Kola qaja ngöne la Ita Ne Thup ne la 1 Okotropa 1988, ka hape: “Xecie kowe la itre ka cilë hnëqa laka, jëne la uati hmitrötr, ijije hi tro Keriso a xatuane la ketre qatre thup troa öhne la trepene meköt ka ihmeku memine la jol, me axecië mekune hnyawa e thupen. (Itre hu. 15:6-15) Tha Iehova kö a hamëne la uati hmitrötr kowe hi la caa qatre thup, ngo kowe la lapa ne la itre qatre thup.

6. Tune kaa la aqane troa ce huliwa hnene la itre qatre thup, nge nemene la thangane kowe la ekalesia?

⁶ Ame la qatre thup ka hetre metrötr, tre, tha nyidrëti kö a canga ithanata ngöne la angatr a icasikeu. Nyidrëti pe a nue la itre xan troa isa qeje mekun. Ketre, tha nyidrëti kö a mekun laka, ka nyipici palahi la hnei nyidrëti hna qaja. Nyidrëti pe a amamane la hni ne ipië i nyidrë ngöne la nyidrëti a qeje mekun me hane drei itre xan. Nyidrëti fe a thele la itre trepene meköt, me trongëne la itre hna amekötin hnei “hlue ka nyipici me ka inamacan.” (Mat. 24:45-47) Ame  la itre qatre thup a icasikeu, loi e tro angatr a ihnim me imetrötrekeu. E cili, tro la uati hmitrötr a xatua angatr troa axecië mekune hnyawa thatraqane la ekalesia.—Iako. 3:17, 18.

7. Nemene la aqane goeëne Iesu la itre ka tha faipoipo kö?

⁷ Ame e hnine la ekalesia, hetrenyi la itre trefën, itre fami, me itre trejin ka tha faipoipo kö. Nemene la aqane tro sa goeëne la itre trejin ka tha faipoipo kö? Hane hi la aqane goeë angatre hnei Iesu. Ame lo Iesu e celë fen, tha hnei nyidrëti kö hna faipoipo. Hnei nyidrëti pe hna nue la mele i nyidrë, matre troa eatrëne la hnëqa i nyidrë. Ketre, tha hnei nyidrëti kö hna ielene la itretre drei nyidrë troa faipoipo maine tro pena mele caas. Hnei nyidrëti pe hna qaja ka hape, tro itre xan a mekun laka tha tro kö angatr a faipoipo. (Mat. 19:11, 12) Eje hi, hnei Iesu hna metrötrëne la itre ka tha faipoipo kö. Ame koi nyidrë, tha ka sisitria catre kö la mele ne trefën hune la itre ka tha faipoipo kö.

8. Thenge la 1 Korinito 7:7-9, nemene la hnei Paulo hna qaja kowe la itre Keresiano?

⁸ Tui Iesu, tha hnei Paulo kö hna faipoipo. Ketre, tha hnei nyidrëti kö hna qaja ka hape, tha tro kö la itre Keresiano a faipoipo. Öni nyidrë, isa qanyi së kö iën. Hnei Paulo hna ithuecatre kowe la itre Keresiano ka hape, maine ijiji angatre hi, tha tro kö a faipoipo matre tro angatr a catre nyihlue i Iehova. (E jë la 1 Korinito 7:7-9.) Tha hnei Paulo kö hna wangacone la itre Keresiano ka tha faipoipo kö. Hnei nyidrëti hna hamë hnëqa koi Timoteo, ketre trejin ka tha faipoipo kö. * (Fil. 2:19-22) Eje hi, tha hnene kö laka, tha ka faipoipo kö la ketre trejin matre thatreine kö angeic eatrëne la hnëqa i angeic.—1 Kor. 7:32-35, 38.

9. Nemene la aqane tro sa goeëne la itre trejine ka tha faipoipo kö?

⁹ Tha hnei Paulo kö me Iesu hna qaja ka hape, tro la itre Keresiano a faipoipo maine tha faipoipo. Nemene la aqane tro sa goeëne la itre trejine ka tha faipoipo kö? Kola qaja ngöne la Ita Ne Thup ne  1 Okotropa 2012: “Ame la troa faipoipo me lapa caas, tre, lue ahnahna lai qaathei Akötresie. Ngo ame koi Iehova, tha nyine hmahmane kö la troa lapa caas. Ketre, tha tro kö la itre ka lapa caas a akötr.” Haawe, loi e tro sa metrötrëne la itre trejin ka tha faipoipo kö.

10. Tune kaa la aqane tro sa metrötrëne la itre trejine ka tha faipoipo kö?

¹⁰ Tune kaa la aqane tro sa metrötrëne la itre trejine ka tha faipoipo kö? Ame itre xan, angatr a mekun laka, tha tro kö angatr a faipoipo. Ame pena itre xan, angatr a ajane troa faipoipo ngo pëkö hnei angatre hna öhn. Nge hetre itre xane fe hna mecitrij. Eje hi, nyimutre la itre kepin matre tha faipoipo kö la itre xaa trejin. Hapeu, tro kö sa hnyingë angatr la kepin matre tha ka faipoipo kö angatr? Hapeu, tro kö sa xatua angatr troa öhne la ketre trejin? Maine jë, tro la ketre trejin a sipo ixatua koi së. Ngo nemene la thangan, e sipu mekuna së la troa thele föi angeic? (1 Thes. 4:11; 1 Tim. 5:13) Tro sa ce wang la hna melën hnene la itre trejin ka tha faipoipo kö.

11-12. Nemene la ka akötrëne la itre trejin ka tha faipoipo kö?

¹¹ Hane hi la hna melën hnene la ketre atre thupëne la sirkoskripsio ka tha faipoipo kö. Ame koi nyidrë, nyimutre la itre manathithi hna kapa e tha hna faipoipo kö. Öni nyidrë, kola akötre nyidrë la kola hnyingëne la kepin matre tha faipoipo palakö nyidrë. Önine la ketre trejin ka tha faipoipo kö nge ka huliwa ngöne Bethela: “Kola utipi ni hnei itre xaa trejin. Tha ketre ahnahna hmaca kö koi ni e tha hna faipoipo, ngo ketre ehnefe pë hë.”

¹² Hane hi la hna melën hnene la ketre trejine föe ka tha faipoipo kö nge ka huliwa ngöne Bethela. Öni angeic: “Ame koi itre xaa trejin, ame la itre ka tha faipoipo kö ke, angatr a thele föe i angatr ngöne la itre ijine madrin. Ame la ketre ijin, hnenge hna tro ngöne la ketre nöj troa huliwa göne la hnëqang ngöne Bethela. Hnenge hna traqa ijije la kola icasikeu. Önine la trejin ka kepe ni ka hape, hetrenyi la lue trejine trahmanyi ne la ekalesia i angeic ka ce macatre me ni. Öni eahlo fe koi ni ka hape, tha eahlo kö a thele föeng. Ngo ame la kola traqa ngöne hnë icasikeu, hnei eahlo hna ce tro me eni troa wange lai lue trejin. Eni a hmahma nge ketre tui nyidroti fe.”

13. Drei la ka ithuecatre kow la ketre trejine föe ka tha faipoipo kö?

¹³ Önine la ketre trejine föe ka huliwa ngöne Bethela: “Hetre itre xaa pionie ka qatre hë nge ka tha faipoipo kö, ngo ka madrin palahi angatr. Angatr a kuca hnyawa la hnëqa i angatr me ixatua e hnine la ekalesia. Angatr a madrin troa mele caas. Ketre, tha angatre kö a mekun laka, ka sisitria catre kö la mele i angatr hune la itre ka faipoipo ke, pëkö föe i angatr me nekönatr.” Eje hi, maine tro la itre trejin a ihnimikeu me metrötrëne la mekuna i ketre göi faipoipo, tro ha madrin me caasi la ekalesia. Pëkö utipi ketre, maine piine la mele i ketre. Tha kolo fe kö a wangaconyi ketre maine pi tru pena.

14. Tune kaa la aqane tro sa metrötrëne la itre trejin ka tha faipoipo kö?

¹⁴ Ame la itre trejin ka tha faipoipo kö ke, tha ajane kö angatr tro sa utipi  angatr. Aja i angatre pe troa wangatrune la itre thiina ka lolo i angatr. Eje hi, loi e tro sa wangatrune la aqane mele nyipici angatr. Maine tha thupëne kö së, kösë easa qaja koi angatre ka hape: “Tha nyipiewekë kö eö koi ni.” (1 Kor. 12:21) Loi e tro angatr a öhn laka, easa metrötrë angatr nge ka nyipiewekë angatr e hnine la ekalesia.

15. Nemene la hna kuca hnene la itre xaa trejin matre troa akökötrene la huliwa ne cainöje i angatr?

¹⁵ Ame enehila, nyimutre la itre trejin ka thele troa akökötrene la huliwa ne cainöje i angatr. Angatre a saze aqane mele i angatr me inine la ketre qene hlapa. Maine jë, hnei angatr hna tro kowe la ketre nöje ka aja ixatua me inine la ketre qene hlapa. (Itre hu. 16:9) Angatr a ajane troa amamane laka, angatr a sajuëne la Baselaia. Maine jë, itre macatre ne tro angatr a pane inine lai qene hlapa. Ngo angatre palahi a thele troa xatuane la itre xan. Eje hi, tha sihngödri kö koi itre xan la itre hnei angatr hna kuca. Kola acatrene la ihnim me caasi e hnine la ekalesia. Nyipici, tru la hnine ole së kowe la itre trejin cili!

16. Nemene la hna goeën hnene la itre qatre thup qëmekene troa acil la ketre trejin troa qatre thup maine atre ixatua?

¹⁶ Ketre, tha tro kö la lapa ne la itre qatre thup a sawa la ketre trejin troa hane xome la hnëqa ne qatre thup maine atre ixatua pena, pine laka, thatre hnyawa kö angeice la qene hlapa. Loi e tro pe la lapa ne la itre qatre thupe cili a nyitrepene la mekuna i angatr thenge la itre hna qaja hnei Tusi Hmitrötr. E cili, tro hë angatr a axecië mekune hnyawa.—1 Tim. 3:1-10, 12, 13; Tito 1:5-9.

17. Nemene la nyine tro la itre trejin a mekun ngöne la angatr a tro kowe la ketre nöj?

¹⁷ Ame la itre xaa trejin, hnei angatr me hnepe lapa i angatr hna kötre mel kowe la ketre nöj. Maine pena, angatr a fek matre troa öhnyi huliwa. Angatr a amë la itre nekö i angatr ngöne la uma ne ini ka qaja la ketre qene hlapa. Nge maine angatr a ajane troa öhnyi huliwa, nyipiewekë tro fe angatr a inine lai qene hlapa. Ame itre xaa ijin, hetre ekalesia maine gurup ka qaja la sipu qene hlapa i angatr. Hapeu, tro kö angatr a sine la ekalesia ka qaja la qene hlapa ne la nöj, maine sipu qene hlapa i angatr pena?

18. Thenge la Galatia 6:5, tro sa metrötrëne tune kaa la itre hene fami?

¹⁸ Eje hi, ngacama hene la hnepe lapa la ka amekötin me iëne la ekalesia, ngo nyipiewekë tro angeic a mekune la hnepe lapa i angeic. (E jë la Galatia 6:5.) Ketre,  loi e tro sa metrötrën me kapa la aja i angeic. Loi e tro fe sa kepe angatre hnyawa e hnine la ekalesia.—Rom. 15:7.

19. Nemene la nyine tro la itre hene la fami a pane mekun?

¹⁹ Ame la itre xaa fami, angatr a sine la ekalesia ka qaja la qene hlapa ne la itre kem me thin, ngo tha trotrohnine pe la itre nekönatr. E cili, tha tro kö la itre nekönatr a kökötre ngöne la götrane ua pine laka, tha trotrohnine kö angatre la itre ini hna hamën ngöne la hna icasikeu. Pine nemen? Pine laka, ame ngöne la hnaini, angatr a qaja la qene hlapa ne la nöj, ngo tha ene kö la sipu qene hlapa ne la itre kem me thin. E cili, loi e tro la itre hene la fami a sipo ixatua koi Akötresie. Loi e tro fe nyidrëti a mekun la nyine troa kuca matre xatuane la itre nekönatr troa easenyi koi Iehova me nöje i Nyidrë. Qanyi nyidrëti kö iën: troa inine la qene hlapa i nyidrë kowe la itre nekönatr, maine tro pena kowe la ketre ekalesia ka qaja la qene hlapa i nyudren. Ngo loi e tro la ekalesia a metrötrë angatr me hnimi angatr.

20. Tro sa metrötrëne tune kaa la itre trejin ka inine la ketre qene hlapa?

²⁰ Nyimutre la itre kepin matre itre xaa trejin a inine la ketre qene hlapa. Ame itre xan, nango jol palakö koi angatr troa qaja la qene hlapa. Ngo tha celë kö la ka nyipiewekë. Loi e tro pe sa goeëne la ihnim me aqane catre huliwa i angatr koi Iehova. E cili, tro hë sa metrötrë angatr me ihnimi angatr. Tha tro kö sa qaja koi angatr ka hape: “Tha nyipiewekë kö eö koi ni,” ke thatre hnyawa kö eö la qene hlapa hun.

21-22. Nemene la hna aijijë së hnei Iehova?

²¹ Iehova a aijijëne la itre hlue i Nyidrë troa hane sine la ekalesia. Ngacama thöthi ju hë së maine qatr, ka faipoipo maine tha ka faipoipo palakö, nge maine thatreine palakö së qaja la ketre qene hlapa, ngo ka nyipiewekë asë hi së koi Iehova.—Rom. 12:4, 5; Kol. 3:10, 11.

²² Haawe, catre pi së troa trongëne la köni ini hna hamën hnei Paulo, ngöne lo nyidrëti a aceitunëne la ekalesia memine la ngönetrei. Loi e tro sa thele aqane troa hamë ithuecatre kowe la itre trejin, me metrötrë angatr me hnimi angatr. Celë hi aqane tro sa wangatrune la göhne hun me göhne ne la itre xan e hnine la ekalesia!