1-2. Nemene la hne së hna troa ce wang?

 PANE mekune jë laka, hnei epuni hna itöne la ketre ewekë jëne Ëternet, ngo tha traqa palakö ej. Hapeu, epuni kö a kucakuca me hnehengazo? Kola qaja ngöne Ite Edomë 13:12, ka hape: “Ame la mejiune ka hmite, te, ate asimecine la hni.” Ngo tune kaa e atre hi së la itre kepin matre tha canga traqa kö la ewekë hna itön? Tro hë së lai a itreqe hnyawa.

² Ame ngöne la tane mekun celë, tro sa ce wang la itre trepene meköt ka troa xatua së troa lapa treqe Iehova me xomihni aqeany. (Ite teije 3:26) Tro fe sa ce wang la lue ijine ka nyipiewekë troa lapa treqe Iehova. Nge tro sa ithanatan la itre manathith hna troa kapa hnene la itre ka lapa treqe Iehova.

3. Nemene la ini hne së hna xom qa ngöne Ite Edomë 13:11?

³ Ame ngöne Ite Edomë 13:11, kola qaja la enyipiewekëne troa lapa treqen. Kola hape: “Ame la itre mo hna canga xawan, tre, troa acon. Ngo ame la atre hetrenyi hnei iwanakoim, tre, troa amanan.” (MN) Nemene la ini hne së hna xom qa ngöne la xötr celë? Ame la atr ka inamacan, tre, tha kuca nyimenyimëne kö angeice la huliwa. Matre hetre thangan la hnei angeic hna kuca.

4. Nemene la ini hne së hna xom qa ngöne Ite Edomë 4:18?

⁴ Ame ngöne Ite Edomë 4:18 kola qaja ka hape: “Ame la jëne la ite ka meköti, te, tune la lai ka hadehadeu,  kola lai trotro uti hë e hnaipajö.” Kolo lai a amamane laka, tha canga qaja asë kö Iehova la aja i Nyidrë kowe la nöje i Nyidrë. Ketre, ijije fe tro sa xome la xötr celë göne la aqane kökötre la ketre Keresiano ngöne la nyipici. Eje hi, easa xomi ijine troa acatrene la aqane imelekeu së me Iehova. Maine tro sa trongëne la itre eamo hna hamën hnei Tusi Hmitrötr me organizasio i Iehova, tro hë sa nyitipune la itre thiina i Keriso, me atrepengöi Iehova hnyawa. Tro sa ce wang la ceitun hna xom hnei Iesu.

5. Nemene la ceitune hna hamën hnei Iesu matre troa qaja la aqane kökötre la ketre atr ngöne la nyipici?

⁵ Hnei Iesu hna aceitunëne la maca ne la Baselaia memine la itre itine feja ka cia ngöne la hni ne la itre atr. Tune kaa? Öni nyidrë: “Kola fetra me tru trootro la itre qitr, nge thatre pe [la atre eëny] la aqane trongen. Nge hnadro a aciane xanëne la xen, pa i zin, thupene lai, kola eng, ame hna macaje pi la qitr.” (Mar. 4:27, 28) Nemene la aliene la ceitune i Iesu? Ame la atr ka kapa la maca ne la Baselaia, angeic a kökötr ngöne la nyipici tune la ketre feja ka cia. Celë hi hne së hna öhne thene la itre ka ini tus. Angatr a saze la aqane mele i angatr, matre troa easenyi trootro koi Iehova. (Efe. 4:22-24) Ngo tha tro kö sa thëthëhmine laka, Iehova la ka aciane la itine feja e kuhu hni ne la atr.​—1 Kor. 3:7.

6-7. Nemene la ini hne së hna xom qa ngöne la aqane xupe Iehova la ihnadro?

⁶ Ame Iehova, ka atreine xomihni aqeany Nyidrë. Tha nyimenyimëne kö Nyidrëti la huliwa. Aja i Nyidrë troa amadrinë itre xan me atrune la ëje i Nyidrë. Tro sa ce wange lai ngöne la aqane hnëkëne Nyidrëti la ihnadro.

⁷ Öni Tusi Hmitrötr ka hape, hnei Iehova hna “tuluth” la ihnadro, me “të  la tepen’ eje” me “amë la etë nyine xomexöte ne ej.” (Iobu 38:5, 6) Hnei Nyidrëti hna xomi ijine troa kuca la huliwa i Nyidrë. (Gen. 1:10, 12) Pane mekune jë la madrinene la itre angela ngöne la kola mama trootro la emingömingöne la itre hna xup hnei Iehova! Hnei angatr hna “ce hë madin.” (Iobu 38:7) Kola hapeue lai? Nyimu macatre ne xupe Iehova la nöjei ewekë asë. Ngo ame la Nyidrëti a goeëne la thangane la huliwa i Nyidrë, öni Nyidrëti ka hape, ka “nyipi loi.”​—Gen. 1:31.

8. Nemene la hne së hna troa ce wang enehila?

⁸ Eje hi, nyimutre la itre trepene meköt e hnine la Tusi Hmitrötr, ka amamane la enyipiewekëne troa atreine lapa treqen. Ame enehila, tro sa ce wang la lue ijine ka nyipiewekë tro sa lapa treqe Iehova.

9. Qaja jë la ketre ijine ka nyipiewekë tro sa lapa treqe Iehova.

⁹ Tro sa lapa treqe Iehova ngacama tha canga sa kö Nyidrëti la itre thithi së. Maine jë, hne së hna sipo Iehova troa xatua së troa xomihnine la ketre jol, maine xomehnöthe la ketre aja ka ngazo. Ame itre xaa ijin, easa mekun laka, tha canga sa kö Iehova la itre thithi së. Pine nemen?

10. Pine nemene matre loi e tro sa lapa treqe Iehova matre troa sa la itre thithi së?

¹⁰ Iehova a dreng la itre thithi së. (Sal. 65:2) Atre hi Nyidrëti laka, aqane tro hi së lai a amamane la lapaune së. (Heb. 11:6) Ngo aja i Nyidrëti fe tro sa mel thenge la itre thithi së me kuca la aja i Nyidrë. (1 Ioane 3:22) Maine easa ajane troa xomehnöthe la itre aja së ka ngazo, loi e tro sa xomihni aqeanyi me mel thenge la itre thithi së. Hnei Iesu hna amamane laka, tha tro kö Iehova a canga sa la itre thithi së. Öni nyidrë: “Sipo jë the mano kö, nge tro ha hamëne koi nyipunie; thele jë the mano kö, nge tro hë nyipunieti a öhn; fenafena jë the mano kö, nge tro ha thawa koi nyipunie. Ke tro ha kapa hnei atre sipo, nge tro ha öhne hnei atre thel, nge ame koi atre fenafena, tro ha thawa koi angeic.” (Mat. 7:7, 8) Loi e tro sa trongëne la eamo i Iesu ka hape, “The mano kö thith.” E cili, tro la Keme së e hnengödrai a sa la itre thithi së.​—Kol. 4:2.

11. Nemene la ithuecatre hna hamën ngöne Heberu 4:16, e tha canga sa kö la itre thithi së?

¹¹ Maine jë, easa mekun laka, tha canga sa kö Iehova la itre thithi së. Ngo tro kö Nyidrë a sa “ngöne la nyipi ijin.” (E jë la Heberu 4:16.) Celë hi matre tha tro pi kö sa wesitr koi Iehova. Ame itre xan, nyimu macatre ne angatr a sipo Iehova troa nyipune la fene celë. Nge hnei Iesu hna upi së troa thithi thatraqane la Baselaia i Akötresie. (Mat. 6:10) Ngo tha tro pi kö sa nuetriji Akötresie pine laka, tha canga kapa kö Nyidrëti la sipo së! (Hab. 2:3; Mat. 24:44) Loi e tro palahi sa lapa treqe Iehova me catre thith. Tro kö Iehova a eatrëne la aja i Nyidrë ngöne la nyipi ijin, ene la “drai” me “hawa” hnei Nyidrëti hna sa.​—Mat. 24:36; 2 Pet. 3:15.

12. Eu la ijine tro sa lapa treqe Iehova?

¹² Tro sa lapa treqene la ijine tro Iehova a apatrene la nöjei akötr me jole së. Ame enehila, nyimutre la itre hna  qanangazone pine la pengöi angatr, me aqane mele i angatr, me nöj me tribu. Ame itre xan, kola hnyimasai angatr ke, itre ka sinatr me wezipo. Nge ame la itre hlue i Iehova, hna qanangazo angatr pine la lapaune i angatr. Maine easa cile kowe la itre jole cili, loi e tro sa lapa mekun la itre trengewekë i Iesu, ka hape: “Ame la atre cile huti uti hë la pun, tro hë angeic a mel.” (Mat. 24:13) Ngo tune kaa e hna tria hnene la ketre trejin? Loi e tro sa thuemacanyine la itre qatre thup, me lapa treqene la itre hnei angatr hna amekötin, thenge la aja i Iehova. Tro sa ce wang la hna kuca hnene la itre qatre thup ngöne la kola tria hnene la ketre trejin.

13. Nemene la aqane tro la itre qatre thup a axecië mekun ngöne la kola tria hnene la ketre trejin?

¹³ Ame la kola tria hnene la ketre trejin, itre qatre thup a sipo Iehova la “inamacane qa koho,” matre troa atre la mekuna i Nyidrë göne la jole cili. (Iako. 3:17) Angatr a ajane troa xatua angeic, me canga ‘abëekë angeic qa ngöne la gojenyi ka menu.’ (Iako. 5:19, 20) Aja i angatre fe troa thupëne la ekalesia me akeukawane la hni ne la itre hna akötrën. (2 Kor. 1:3, 4) Maine ka ngazo catre la hna kuca hnene lai trejin, itre qatre thup a xomi ijine matre troa thele la nöjei ithuemacany. Thupene la hnei angatr hna thith, angatr a hamë eamo qa hnine la Tusi Hmitrötr, me amekötine la trejin “thenge la meköt.” (Iere. 30:11) Eje hi, angatr a axecië mekune hnyawa, ngo tha kolo kö lai a hape, angatr a nyimenyimëne la aqane nyinyin lai jol. Maine tro la itre qatre thup a trongëne la itre hna amekötin hnei Iehova, tro hë lai a hetre thangane kowe la ekalesia. Maine eje hi laka, ase hë nyinyin lai jol, ngo tha tro kö a canga paatre la akötr thei itre xan. Maine epuni la ketre hna akötrën, nemene la ka troa akeukawane la hni epun?

14. Drei la tulu hna qaja hnei Tusi Hmitrötr ka troa xatua së ngöne la kola akötrë së hnene la ketre trejin?

¹⁴ Hapeu, hna hane kö akötrë epun hnene la ketre trejin? Tusi Hmitrötr a qaja la itre xaa hlue i Iehova ka lapa  treqe Nyidrë. Hanawang la tulu i Iosefa. Hna qanangazo angeic hnene la itre sipu trejin me angeic. Ame pe, tha hnei angeice kö hna wesitre koi angatr. Hnei angeice pe hna catre nyihlue i Iehova. Celë hi matre, hnei Iehova hna amanathithine la aqane xomihni aqeanyi Iosefa me lapa treqe Nyidrë. (Gen. 39:21) Hnei Iosefa hna nue la ngazo ne la itre trejin me angeic, me kepe manathith qaathei Iehova. (Gen. 45:5) Tui Iosefa, maine tro sa easenyi catre koi Iehova, tro hë Nyidrëti a akeukawane la hni së me nyinyin la jole së.​—Sal. 7:17; 73:28.

15. Nemene la ka xatuane la ketre trejin troa xomihnine la ketre akötr?

¹⁵ Maine jë tha hna qanangazo së kö tui Iosefa. Ngo easë fe a akötr ngöne la kola kuca la ketre ewekë ka tha meköti kö koi së. Ngacama tha ka nyihlue i Iehova kö la itre ka akötrë së, ngo loi e tro sa trongëne la itre trepene meköti Nyidrë. (Fil. 2:3, 4) Hanawang la tulu ne la ketre trejine föe hna akötrën me xöjetrije hnene la sine huliwa i angeic. Tha hnei angeice kö hna canga wesitr. Hnei angeice pe hna lapa mekune la tulu i Iesu. Ame lo kola qaqa nyidrë, tha hnei nyidrëti kö hna iqaqa. (1 Pet. 2:21, 23) Celë hi matre, tha hnei angeice kö hna thele troa të la ngazo hna kuca. Angeic pë hë a trotrohnin e thupen laka, hna tithi hnei mec la sine huliwa i angeic. Tru la madrin me tingetinge i angeic ke, hnei angeic hna catre xomihni.

16. Nemene la aqane xatua së hnene la hna qaja ngöne 1 Peteru 3:12, ngöne la kola akötrë së?

¹⁶ Maine hna akötrë së me kuca la ketre ewekë ka tha meköti kö, tha tro kö sa thëthëhmine laka, tha nanyi kö Iehova “koi angete thë fë hni.” (Sal. 34:18) Iehova a hnimi së ke, hne së hna atreine xomihni aqean, me nue koi Nyidrëti la itre ehnefe së. (Sal. 55:22) Eje hi, Iehova la Atre Amekötine la ihnadro, nge pëkö ewekë ka sihngödri koi Nyidrë. (E jë la 1 Peteru 3:12.) Hapeu, tro kö sa lapa treqe Iehova ngöne la kola akötrë  së? Maine eje hi, tro hë sa kapa la itre manathith ka epine palua.

17. Thenge la Isaia 30:18, nemene la ka xecie koi së?

¹⁷ Calemi hë la ijine tro la Keme së e hnengödrai a amanathithi së jëne la Baselaia i Nyidrë. Kola qaja ngöne Isaia 30:18 ka hape: “Tro Iehova a teqene mate hnimi nyipunie; nge qa ngöne lai tro nyidëti a mejë mate utipi nyipunie; ke Akötesie ka meköti Iehova; manathithi angate asëjëihë angete teqe anganyidë.” Xecie koi së laka, tro Iehova a kapa la itre ka lapa treqe Nyidrë enehila me elany ngöne la fene ka hnyipixe.

18. Nemene la itre manathith hne së hna troa kapa ngöne la fene ka hnyipixe?

¹⁸ Ame ngöne la fene ka hnyipixe, tha tro hmaca kö sa akötr, nge patre hë la itre ewekë ka tha meköti kö. (Hna ama. 21:4) Tha tro hmaca kö sa hnehengazo. Tro ha mana la xen me tingeting la ihnadro. (Sal. 72:16; Is. 54:13) Drei la ketre madrin ka tru hne së la lapa treqen!

19. Pine nemene matre Iehova a hnëkë së?

¹⁹ Iehova a hnëkë së matre troa mel fene la musi Nyidrë. Nyidrëti a xatua së troa thipetrije la itre thiina ka ngazo me eënyine la itre thiina ka lolo i Nyidrë. Celë hi matre, tha tro kö sa kucakuca me hnehengazo. Easenyi hë tro sa kapa la itre manathithi ka tru! Haawe, catre jë së lapa treqene tro Iehova a umuthe la huliwa i Nyidrë!