1. Nemene la hne së hna mekun ngöne la easa goeëne la itre hna xup hnei Iehova?

 AME la easa goeëne la nöjei ewekë hna xup hnei Iehova, easa mekun tui Dravita ka hape: “E ini a goeëne la hnengödrai i cilie, huliwa ne la iwanakothemie i cilie, ene la teu me ite wëtesiji lo hnei cilieti hna isa amë; ka ue la ate, mate tro cilieti a mekune koi angeic? memine la nekö i ate, mate tro cilieti a wai angeic?” (Sal. 8:3, 4) Tui Dravita, kola ketr la hni së laka, ngacama wanamamike së ngöne la fene hnengödrai, ngo Iehova a nyipii së. Easa troa ce wang laka, hnei Iehova hna wangatrunyi Adramu me Eva me aijijë nyidro troa hane sine la lapa i Nyidrë.

2. Nemene la aja i Iehova kowe la lue pane nekö i Nyidrë?

² Adramu me Eva la lue pane nekö i Iehova e celë fen, nge ketre Kem ka ihnimi Nyidrë. Hetre hnëqa hnei Iehova hna ahnith koi nyidro. Öni Nyidrë: “Manapi me hate, me atiqane la fene hnengödrai, me xom’ acon’ ej.” (Gen. 1:28) Hnëqa i nyidro troa hnaho me nyihnyawane la ihnadro. Maine hnei Adramu ju me Eva hna idrengethenge, tro hë nyidro me itre matra i nyidroti a sine la lapa i Iehova uti hë epine palua.

3. Nemene la ka amamane laka, Iehova a wangatrunyi Adramu me Eva?

³ Hnei Iehova hna wangatrunyi Adramu me Eva me aijijë nyidro troa sine la lapa i Nyidrë. Celë hi matre, öni Dravita koi Iehova: “Hnei cilieti hna celohmë angeice eashenyi fe ite angela, nge hnei cilieti hna petë angeice  hnene la lolo me atrun.” (Sal. 8:5) Eje hi, tha ceitu kö la trengecatr, me inamacan, me atreine ne la itre atr memine la itre angela. (Sal. 103:20) Ngo hna xupe la itre atr “eashenyi” la itre angela. Hnei Iehova hna xupe la lue pane atr matre tro nyidroti a mele madrin!

4. (a) Nemene la pune la hna tha idrei hnei Adramu me Eva? (b) Nge nemene la hne së hna troa ce wang?

 ⁴ Ngo hnei Adramu me Eva hna tha idrei, matre tha sine hmaca kö nyidroti la lapa i Iehova. Nge tune la hne së hna troa ce wang, hetre ethane lai kowe la itre matra i nyidro. Eloine pe, tha saze kö la aja i Iehova kowe la itre atr. Aja i Nyidrëti tro la itre ka idrengethenge a sine la lapa i Nyidrë uti hë epine palua. Tro sa pane ce wang la aqane wangatrunyi së hnei Iehova. Thupene lai, tro sa ce wang la aqane tro sa amamane la aja së troa sine la lapa i Iehova. Nge tro fe sa ce wang la itre manathith hna troa kapa hnene la itre nekö i Iehova e celë fen.

5. Tune kaa la aqane tro sa atrunyi Iehova?

⁵ Hnei Iehova hna xupi së hnaiji Nyidrë. (Gen. 1:26, 27) Matre ijije hi tro sa nyitipune la itre thiina i Nyidrë, tune la ihnim, me utipin, me nyipici, me meköt. (Sal. 86:15; 145:17) Ame la easa eënyine la itre thiina cili, easa atrunyi Iehova me amamane la hni ne ole së koi Nyidrë. (1 Pet. 1:14-16) Ketre, easa amadrinë Nyidrë, nge celë fe hi ka thue madrine koi së. Eje hi, ame la Iehova a xupi së hnaiji Nyidrë, Nyidrëti a aijijë së troa sine la lapa i Nyidrë.

6. Qaja jë la ketre aqane wangatrune Iehova la itre atr.

⁶ Hnei Iehova hna hnëkëne la ketre götrane ka mingöming. Qëmekene troa xupe la pane atr, hnei Nyidrë hna hnëkëne la ihnadro. (Iobu 38:4-6; Iere. 10:12) Pine laka, ka ihnimi Iehova me catre ham, matre hnei Nyidrëti hna xup la nöjei pengöne ewekë matre tro sa mele madrin. (Sal. 104:14, 15, 24) Thupene la Iehova a xupe la ketre ewekë, öni Nyidrë ka hape, ka “nyipi loi.” (Gen. 1:10, 12, 31) Ketre, hnei Iehova hna aijijëne la itre atr troa ‘musinëne la nöjei huliwa ne la lue ime i Nyidrë.’ (Sal. 8:6) Eje hi, aja i Akötresieti tro sa pexej me nyihnyawane la itre hnei Nyidrëti hna xup uti hë epine palua. Hapeu, easë kö a olene koi Iehova la itre manathith hne së hna troa kapa elany?

7. Nemene la hna amamane ngöne Iosua 24:15?

⁷ Hnei Iehova hna hamë së la atreine troa ië ewekë. Nyipici, ijije hi tro sa isa axecië mekun göne la mele së. (E jë la Iosua 24:15.) Iehova a madrin la easa iëne troa nyihlue i Nyidrë. (Sal. 84:11; Ite edomë 27:11) Ngo nyipiewekë fe tro sa atreine ië ewekë ngöne la itre xaa götrane la mele së. Tro sa ce wang la tulu i Iesu.

8. Nemene la aqane ië ewekë i Iesu?

⁸ Tui Iesu, loi e tro sa wangatrune la aja ne la itre xan hune la itre sipu aja së. Ame la ketre drai, kucakuca catre Iesu me itre aposetolo, matre hnei angatr hna tro troa pane mano. Ngo hna traqa hnene la ka alanyimu troa sipo ini qaathei Iesu. Hapeu, hnei Iesu kö hna elëhni? Waea! Hnei nyidrëti hna utipi angatr me “ini angatr la itre ewekë ka  nyimutre.” (Mar. 6:30-34) Ame la easa nyitipu Iesu, me nue traem me trengecatr koi itre xan, easë hi lai a atrune la Keme së e hnengödrai. (Mat. 5:14-16) Ketre, easë fe hi lai a amamane la aja së troa sine la lapa i Nyidrë.

9. Nemene la hna wangatrune hnene la itre kem me thin?

⁹ Hnei Iehova hna aijijëne la itre atr troa hnaho, me inine la itre nekönatr troa hnime me nyihlue i Nyidrë. Hapeu, hetre hni ne ole së kö koi Iehova göne la ahnahna cili? Nyimutre la itre manathith hna kapa hnene la itre angela qaathei Iehova, ngo tha hna aijijë angatre kö troa hnaho. Celë hi matre, loi e tro la itre kem me thin a wangatrune la ahnahna cili. Hnëqa i angatr troa ‘hia nyudreni ngöne la itre ihaji me itre ini qaathei Iehova.’ (Efe. 6:4; Deu. 6:5-7; Sal. 127:3) Hnene la organizasio i Akötresie hna hnëkën la itre jiane huliwa thatraqane lai, tune la itre itus, itre video, itre nyima me itre tane mekun ngöne Ëternet. Eje hi, tru la ihnimi Iehova me Iesu kowe la itre nekönatr. (Luka 18:15-17) Ame la itre kem me thin a sipo ixatua koi Iehova me kuca la hna atrein matre troa hiane hnyawa la itre nekönatr, angatre hi lai a amadrinë Nyidrë. Ketre, angatre fe a aijijëne la itre nekö i angatr troa sine la lapa i Iehova.

10-11. Nemene la hna aijijën hnei Iehova jëne la thupene mel?

¹⁰ Hnei Iehova hna upe la Nekö hnimina i Nyidrë matre aijijë së troa sine hmaca la lapa i Nyidrë. Tune lo hna qaja ngöne la  paragarafe 4, hnei Adramu me Eva hna tha idrei, matre tha sine hmaca kö nyidroti me itre matra i nyidro la lapa i Iehova. (Rom. 5:12) Eje hi, hnei Iehova hna nuetriji nyidro. Ngo tune kaa pë hë la itre matra i nyidro? Ka ihnimi Iehova, matre aja i Nyidrëti troa kapa la itre ka idrengethenge. Celë hi matre, hnei Iehova hna huujëne la Nekö i Nyidrëti ka caas, Iesu Keriso. (Ioane 3:16; Rom. 5:19) Jëne la huuje cili, hna aijijëne la 144 000 lao atr ka mele nyipici troa hane nekö i Akötresie.—Rom. 8:15-17; Hna ama. 14:1.

¹¹ Ketre, itre milio la itre atr ka catre nyihlue i Akötresie enehila. Thupene la Caa Thauzane lao macatre, tro fe a aijijë angatr troa hane sine la lapa i Iehova. (Sal. 25:14; Rom. 8:20, 21) Celë hi matre, ijiji angatre fe troa hë Iehova ka hape, “Kaka.” (Mat. 6:9) Ketre, tro fe la itre hna amelene hmaca elany a atre la aja i Iehova. Maine tro angatr a drengethenge Iehova, tro hë angatr a sine la lapa i Nyidrë.

12. Nemene la hne së hna troa ce wang enehila?

¹² Tune la hne së hna ce wang, nyimu aqane wangatrune Iehova la itre atr. Nyidrëti a kapa la itre Keresiano hna iën tune la itre nekö i Nyidrë. Nge Nyidrëti a aijijëne la “ka ala nyimu atraqatr” troa hane nekö i Nyidrëti elany ngöne la fene ka hnyipixe. (Hna ama. 7:9) Tro sa amamane tune kaa la aja së troa sine la lapa i Iehova?

13. Nemene la nyine tro sa kuca matre troa hane sine la lapa i Iehova? (Mareko 12:30)

¹³ Troa amamane la ihnimi së koi Iehova me nyihlue i Nyidrë hnene la hni së ka pexej. (E jë la Mareko 12:30.) Ketre  ahnahna ka tru qaathei Iehova la troa atrunyi Nyidrë. Easa amamane la ihnimi së koi Iehova ngöne la easa “trongëne la itre hna amekötin hnei nyidrë.” (1 Ioane 5:3) Jëne Iesu, Iehova a upi së troa inine la itre atr me bapataiso angatr. (Mat. 28:19) Ketre, hnei Nyidrëti mina fe hna upi së troa ihnimikeu. (Ioane 13:35) Tro kö Iehova a kapa ngöne la lapa i Nyidrë, la itre ka idrengethenge.—Sal. 15:1, 2.

14. Thenge la Mataio 9:36-38 me Roma 12:10, tune kaa la aqane tro sa hnime la itre xan?

¹⁴ Tro sa hnime la itre xan. Ihnim la thiina ka sisitria i Iehova. (1 Ioane 4:8) Hnei Iehova hna hnimi së ngacama thatre Nyidrëti petre kö së. (1 Ioane 4:9, 10) Nge easa nyitipu Nyidrë ngöne la easa hnime la itre xan. (Efe. 5:1) Ame la ketre nyine tro sa kuca, tre, troa xatua angatr troa atre Iehova e ijine petre kö. (E jë la Mataio 9:36-38.) Easë hi lai a aijijë angatr troa hane sine la lapa i Nyidrë. Ketre, maine tro ketre a xomi bapataiso, loi e tro palahi sa hnimi angeic me metrötrë angeic. (1 Ioane 4:20, 21) Tune kaa? Ame la angeic a kuca la ketre ewekë, tha tro kö sa canga mekuhni angeic. Loi e tro pe sa mejiun koi angeic, me mekun laka, ka sisitria kö angeic hui easë.—E jë la Roma 12:10; Fil. 2:3.

15. Tro sa thiina ka loi koi drei me utipin?

¹⁵ Tro sa thiina ka loi me utipine la itre xan. Maine easa ajane troa sine la lapa i Iehova, loi e tro sa trongëne la hna qaja hnei Tusi Hmitrötr. Hnei Iesu hna upi së troa thiina ka loi me utipine la itre xan, tune la itre ithupëjia me easë. (Luka 6:32-36) Ngacama tha ka hmaloi kö, ngo nyipiewekë tro sa nyitipune la aqane mekun me aqane ujë i Iesu, me drengethenge Iehova. Aqane tro hi së lai a amamane laka, aja së troa hane sine la lapa i Iehova uti hë epine palua.

16. Nemene la nyine tro sa kuca matre tha tro kö a qaja angazone la lapa i Iehova?

¹⁶ Tro sa thupëne matre tha tro kö a qaja angazone la lapa i Iehova. Ame ngöne la fami, itre ka co a nyitipune la itre ka tru. Maine tro la itre ka tru a trongëne la itre trepene meköt, tro hë la itre ka co a nyitipu angatr. Ngo maine tro angatr a kuca la itre ewekë ka ngazo, tro hë la itre ka co a ixomi thiina. Ketre tune fe e hnine la lapa i Iehova. Maine tro la ketre Keresiano a iamenumenu maine kuca la ketre ewekë ka ngazo, tro ha nyitipu angeic hnene la itre xan. E cili, tro ha qaja angazone la lapa i Iehova. (1 Thes. 4:3-8) Haawe, tha tro kö sa ixomi thiina me nue la ketre ewekë troa ananyi së qaathei Iehova, Keme së ka tru ihnimin!

17. Nemene la mekun nyine tro sa thipetrij, nge pine nemen?

¹⁷ Tro sa mejiune koi Iehova ngo tha kowe kö la itre mo së. Öni Iehova ka hape, maine tro sa thele panëne la Baselaia i Nyidrë me trongëne la itre trepene meköt, tro hë Nyidrëti a hamë xen, me iheetr, me hnalapa së. (Sal. 55:22; Mat. 6:33) Haawe, tha tro kö sa mekun laka, tro la itre mo së a thupë së me hamë madrine së. Maine easa ajane troa hetrenyi la tingeting qaathei Akötresie, loi e tro sa kuca la aja i Nyidrë. (Fil. 4:6, 7) Maine jë, ijije hi tro sa itöne la nöjei ewekë hne së hna ajan. Ngo hapeu, hetre traeme së kö me trengecatr troa huliwan me  nyihnyawane itre ej? Hapeu, easë kö a hniine la itre mo së? Tha tro kö sa thëthëhmine laka, aja i Iehova tro sa catre huliwa koi Nyidrë. Tha tro kö sa nue la ketre ewekë troa ajojezi së. Ketre, tha tro kö sa nyitipune lo thupëtresij ka hniin la itre mo i angeic me nuetriji Iesu. Ame la pun, tha kepe angeice ju kö hnei Iehova ngöne la lapa i Nyidrë.—Mar. 10:17-22.

18. Nemene la itre manathith hna troa kapa hnene la itre ka idrengethenge?

¹⁸ Ame la ketre manathith ka tru hna troa kapa hnene la itre ka idrengethenge, tre, troa hnimi Iehova me nyihlue i Nyidrë uti hë epine palua. Ame la itre ka mejiune troa mel e celë fen, angatr a madrin troa nyihnyawane la ihnadro hna hnëkëne hnei Iehova. Ketre, tro ha paatre la nöjei akötr fene la Baselaia i Akötresie. Tro Iesu a nyinyin la nöjei jol qa ngöne la aqane axecië mekune i Adramu me Eva. Nge tro Iehova a amelene hmaca la itre milio lao atr, matre troa mele palua ngöne la Paradraiso e celë fen. (Luka 23:42, 43) E cili, tro ha pexej la mele ne la itre ka sine la lapa i Iehova. Nge tune la hna qaja hnei Dravita, tro ha ‘petrë angatr hnene la lolo me atrun.’—Sal. 8:5.

19. Nemene la nyine tro sa lapa mekun?

¹⁹ Mingöminge catre la mejiune së, itre ka sine la “ka ala nyimu atraqatr.” Iehova a hnimi së nge Nyidrëti a ajane tro sa sine la lapa i Nyidrë. Celë hi matre, loi e tro sa kuca la hne së hna atrein matre troa amadrinë Iehova, me lapa mekun la itre hnei Nyidrëti hna thingehnaean. Ketre, tro fe sa wangatrune la göhnë së ngöne la lapa i Iehova, memine la mejiune së troa atrunyi Nyidrë uti hë epine palua!