TANE MEKUN 32
Troa Catre Lapaune Kowe La Atre Xup
“Ame la lapaun, tre . . . ej a anyipicine la nöjei ewekë ka tha mama kö koi luemek.”—HEB. 11:1.
NYIMA 11 Nöjei Hna Xup a Atrunyi Iehova
MEKUN KA TRU *
1. Nemene la hna ini epun göi Iehova?
MAINE JË, hna hetru epun ngöne la nyipici. Matre, hna ini epun laka, Iehova la Atre Xup asë. Hnei epuni fe hna inine la itre thiina ka lolo i Nyidrë, memine la aja i Nyidrëti kowe la itre atr.—Gen. 1:1; Itre hu. 17:24-27.
2. Nemene la aqane goeëne enehila la itre ka mejiune kowe la Atre Xup?
2 Nyimutre la itre ka mekun laka, pëkö Akötresie me Atre Xup. Ame koi angatr, hna xulu xane la itre ewekë ka mel nge hnei itre ej hna saze trootro. Ame fe kowe la itre ka inamacan, tha ka ihmeku kö la hna qaja hnei Tusi Hmitrötr memine la sias. Celë hi matre, angatr a jele hmo la itre atr ka lapaune kowe la Atre Xup.
3. Pine nemene matre nyipiewekë tro sa acatrene la lapaune së?
3 Hapeu, tro kö sa nue la aqane mekune itre xan troa ananazijëne la lapaune së koi Iehova, Atre Xupi së? Nyipiewekë tro sa isa thele la itre ewekë ka anyipicine laka, hetre Atre Xup. Hapeu, easë kö a mejiune koi Akötresie ke, hetre ka qaja koi së, maine hne së kö hna sipu ithel? (1 Kor. 3:12-15) Ngacama ekö hë së maine easë xötrei atre la nyipici, ngo nyipiewekë tro sa acatrene la lapaune së. E cili, tha tro kö a ajojezi së hnene la “itre mekune ka pë alien” nge ka tha ihmeku kö memine la Trengewekë i Akötresie. (Kol. 2:8; Heb. 11:6) Tro sa ce wang la (1) kepin matre tha mejiune kö itre xan kowe la Atre Xup, (2) aqane tro sa acatrene la lapaune së koi Iehova, Atre Xupi së, memine la (3) nyine tro sa kuca matre troa catre lapaun.
KEPIN MATRE THA MEJIUNE KÖ ITRE XAN KOWE LA ATRE XUP
4. Thenge la Heberu 11:1, pine nemene matre easa lapaun?
4 Ame itre xan, angatre hi a mejiune kowe la itre ewekë ka mama koi lue mek. Ngo tha celë kö la hna qaja hnei Tusi Hmitrötr. (E jë la Heberu 11:1.) Ej a qaja ka hape, ame la lapaun ke, ka hetre nyipi trepen. (Heb. 11:3) Ngacama tha öhnyi Iehova kö së, me Iesu memine la Baselaia, ngo itre ewekë lai ka hetre nyipi trepen. Önine la ketre trejin ka ini sias: “Hetre nyipi trepene la lapaune së. Eje hi, ka ihmeku la itre hne së hna lapaune kow memine la sias.”
5. Pine nemene matre ame koi itre xan, ka xulu xane la mel?
5 Loi e tro sa isa hnying ka hape: ‘Maine hetre ewekë ka anyipicine laka, hetre Atre Xup, nga pine nemene matre ame koi itre xan, ka xulu xane la mel?’ Ke tha hnei angatre kö hna xomi ijine troa ithel. Celë hi ka traqa koi Robert, ketre trejin. Öni angeic: “Tha hna qaja kö ngöne la uma ne ini ka hape, hetre ka xupe la itre ewekë. Ngo ame lo kola 22 lao macatreng, hnenge hna porotrik memine la itre Temoë Iehova. Nge hnei angatr hna amamane la hna qaja hnei Tusi Hmitrötr, ka anyipicine laka, hetre Atre Xup. *—Wange ju la hna eköhagen hna hape, “ Thatraqane La Itre Kem Me Thin.”
6. Pine nemene matre tha mejiune kö itre xan kowe la Atre Xup?
6 Ame itre xan, tha mejiune kö angatr kowe la Atre Xup ke, angatre hi a mejiune kowe la ka mama koi luemek. Ame pe, angatre fe a mejiune kowe la itre ewekë ka tha mama kö, tune la eny. Tusi Hmitrötr a qaja göne la lapaune ka hape, “ej a anyipicine la nöjei ewekë ka tha mama kö koi luemek.” (Heb. 11:1) Ame itre xan, xele kö angatre ma ithel ke, kola xomi traeme me trengecatr. Ngo maine tha ithele kö së, tro hë sa mekun laka, pëkö Atre Xup.
7. Hapeu, itre ka inamacan asë hi la ka tha mejiune kö kowe la Atre Xup? Qejepengöne jë.
7 Thupene la hna pane ithel, hnene la itre xaa ka inamacan hna öhne laka, Akötresie la Atre Xup la nöjei ewekë asë. * Tui Robert, lo trejin hna qaja e caha hun, tha mejiune kö itre xan kowe la Atre Xup ke, tha celë kö la hna inine ngöne la itre uma ne ini ka tru. Ame pe, hnene la itre xaa ka inamacan hna thele troa atre Iehova me hnimi Nyidrë. Haawe, ngacama hne së fe hna hane tro ngöne la itre uma ne ini ka tru, ngo loi e tro sa isa acatrene la lapaune së koi Akötresie.
AQANE TROA ACATRENE LA LAPAUNE SË KOWE LA ATRE XUP
8-9. (a) Nemene la hne së hna troa ce wang enehila? (b) Nemene la thangan e tro sa goeëne la itre hna xup?
8 Tro sa acatrene tune kaa la lapaune së kowe la Atre Xup? Tro sa ce wang la lue nyine tro sa kuca.
9 Troa goeëne la itre hna xup. Ame la easa goeëne la itre öni, itre feja me itre wëtresij, kola acatrene la lapaune së kowe la Atre Xup. (Sal. 19:1; Is. 40:26) Eje hi, maine tro palahi sa goeëne la itre hna xup, tro ha xecie koi së laka, Iehova la Atre Xup asë. Ame ngöne la itre itusi së, hetrenyi la itre tane mekun ka amamane la emingömingöne la itre hna xup. Ngacama tha ka hmaloi kö troa trotrohnine itre ej, ngo nyipiewekë tro sa e, me goeëne hmaca la itre video ne asabele ka mama ngöne la site së jw.org.
10. Qaja jë la ketre ceitune ka amamane laka, hetre Atre Xup. (Roma 1:20)
10 Ame ngöne la easa goeëne la itre ewekë hna xup, loi e tro sa xomi ini göne la Atre Xup. (E jë la Roma 1:20.) Pane mekune jë la jö. Maine paatre kö la jö, pëkö mel e celë fen. Ngo hetre ethanyine fe la jö koi së. Hapeu, hetre ka thupë së kö qa ngöne lai? Eje hi! Hna hakuthe la ihnadro hnene la hna hape, couche d’ozone. Ej a thupë së qa ngöne la idreuthine la jö. Hapeu, tha ketre atr ka inamacane kö me ka ihnim la ka xupe la ewekë cili?
11. Ekaa la hnë tro sa thele ithuemacany matre acatrene la lapaune së? (Wange ju la hna eköhagen hna hape, “ Itre Ithuemacany Ka Acatrene La Lapaune Së.”)
11 Ame ngöne la Nyine Thele Mekun Ne La Itretre Anyipici Iehova me ngöne la sit jw.org, hetrenyi la itre ithuemacany ka acatrene la lapaune së kowe la Atre Xup. Loi e tro sa e la itre tane mekun me goeëne la itre video ngöne la götrane hna hape, “Évolution ou conception?” Nyimutre la itre ithuemacanyi hna hamën göne la itre öni me itre feja. Itre eje fe a qaja la itre ewekë ka ketrepengön qa ngöne la itre hna xup, nge hna nyitipune hnene la itre ka inamacan.
12. Nemene la nyine tro sa lapa mekun ngöne la easa inine la Tusi Hmitrötr?
12 Troa inine la Tusi Hmitrötr. Ame lo trejin ka ini sias hna qaja e caha hun ke, tha ka lapaune kö nyidrëti ekö kowe la Atre Xup. Ngo hna saze la mekuna i nyidrë. Öni nyidrë: “Hna nyitrepene la lapauneng hnene la sias, me hnene fe la itre ini qa hnine la Tusi Hmitrötr.” Maine jë, atre hë së la hna qaja hnei Tusi Hmitrötr, ngo loi e tro palahi sa ini tus matre acatrene la lapaune së kowe la Atre Xup. (Ios. 1:8; Sal. 119:97) Maine jë, tro sa lapa mekun la itre ithuemacany hna hamën hnei Tusi Hmitrötr göne la itre ewekë ka traqa ekö. Loi e tro fe sa lapa mekun la itre hna perofetan. Ketre, ngacama alanyimu la itre ka cinyihane la Tusi Hmitrötr, ngo caasi hi la itre mekun hna qaja. Hapeu, tha kolo kö lai a acatrene la lapaune së koi Iehova, Atre Xup ka tru ihnimin? *—2 Tim. 3:14; 2 Pet. 1:21.
13. Qaja jë la ketre eamo hna hamën hnei Tusi Hmitrötr.
13 Ame la easa inine la Tusi Hmitrötr, loi e tro sa wangatrune la itre eamo. Eje hi, qaane ekö Tusi Hmitrötr a hmekë së ka hape, ame la itre ka hni koi manie, tre, tro angatr a “akötr.” (1 Tim. 6:9, 10; Ite edomë 28:20; Mat. 6:24) Hapeu, ka nyipiewekë kö la eamo celë enehila? Önine la ketre itus: “Tha ka madrine kö la itre ka hni koi manie nge angatr a hnehengazo. Ngacama angatre hi a aja manie, ngo angatr a akötr nge kola tithi angatr hnei mec.” Eje hi, ka nyipiewekë catre la eamo hna hamën hnei Tusi Hmitrötr göi manie. Maine jë, hetre itre xaa trepene meköti ka xatua epun. Maine tro palahi sa wangatrune la itre ahnahna cili qaathei Iehova, Atre Xupi së ka tru ihnimin, haawe, tro hë sa trongëne itre ej, nge tro hë sa madrin.—Is. 48:17, 18.
14. Nemene la thangan e tro sa thele troa atrepengöi Iehova hnyawa?
14 Loi e tro sa inine la Tusi Hmitrötr matre atrepengöi Iehova hnyawa. (Ioane 17:3) E cili, tro fe hë sa öhne la itre thiina i Iehova ka mama ngöne la itre hna xup. Nge tro ha mama cile koi së laka, hetre Akötresieti hi. (Eso. 34:6, 7; Sal. 145:8, 9) Ame la easa atrepengöi Iehova hnyawa, kola acatrene la lapaune së me ihnimi së me aqane imelekeu së me Nyidrë.
15. Nemene la thangan e tro sa qeje Akötresie koi itre xan?
15 Ame la ketre aqane tro sa acatrene la lapaune së koi Akötresie, tre, troa qeje Nyidrë koi itre xan. Ngo nemene la nyine tro sa kuca, e thatre kö së la aqane troa sa kowe la ketre ka hnyingëne ka hape, ka mele kö Akötresie? Nyipiewekë tro sa ithel ngöne la itre itusi së, me ce ithanatane memine lai atr. (1 Pet. 3:15) Ijije fe hi tro sa sipo ixatua kowe la itre trejin ka macaj. Ngacama tha kapa kö lai atr la itre hne së hna qaja, ngo ame pe, hna acatrene la lapaune së hnene la hne së hna ithel. E cili, tha tro hë sa nue la itre ka inamacan troa ajojezi së me qaja ka hape, pëkö Atre Xup.
CATRE JË SË LAPAUN!
16. Nemene la thangan e tha acatrene kö së la lapaune së?
16 Maine easa xötrei atre la nyipici maine ekö hë së pena, ngo loi e tro palahi sa acatrene la lapaune së. Pine nemen? Wanga troa nanazij. Atre hi së laka, ame la lapaune ke, ej a anyipicine la nöjei ewekë ka tha mama kö koi luemek. Ngo canga tro hi sa thëthëhmine la itre ewekë cili. Öni Paulo ka hape, ame la kola nanazije la lapaune së ke, “ngazo ka canga ajolë së.” (Heb. 12:1) Nemene la ka troa thupë së qa ngöne la hnö cili?—2 Thes. 1:3.
17. Nemene la ka troa xatua së troa catre lapaun?
17 Ame la hnapan, loi e tro sa sipo Iehova la uati hmitrötre i Nyidrë. Pine nemen? Pine laka, ame la lapaun, tre, ketre igötranene la wene ne la ua. (Gal. 5:22, 23) Maine tha sipone kö së la uati hmitrötr, thatreine kö së troa lapaune kowe la Atre Xup. Nyipiewekë tro sa catre sipone ej koi Iehova, matre tro Nyidrëti a hamë së. (Luka 11:13) Tha tro kö sa xou troa qaja koi Nyidrë ka hape: “Nyixane jë la lapaune hun.”—Luka 17:5.
18. Thenge la Salamo 1:2, 3, nemene la ahnahna ka tru hne së hna kapa?
18 Ame la hnaaluen, loi e tro palahi sa inine la Tusi Hmitrötr. (E jë la Salamo 1:2, 3.) Ame la kola cinyihane la Salamo celë ke, xalaithe hi la angetre Isaraela ka hetrenyi la Wathebo i Akötresie. Itre joxu me itre atre huuj hmekuje hi la ka hetrenyi la Wathebo. Ame pë hë la “ite trahmanyi me fö, me nekönat, me tenyiwa” ke, kola hë angatr e nöjei 7 lao macatre, matre troa dreng la kola e la Wathebo. (Deu. 31:10-12) Ame fe ngöne lo hneijine i Iesu, xalaithe hi la itre ka hetrenyi la Itre Hna Cinyihan, nge hna amë fe ngöne la itre sunago. Ngo ame enehila, alanyimu la itre atr ka hetre Tusi Hmitrötr ka pexej maine sine pena. Drei la ketre manathith ka tru! Nemene la aqane tro sa wangatrune la ahnahna cili?
19. Tune kaa la aqane tro sa acatrene la lapaune së?
19 Easa amamane la hni ne ole së kowe la Tusi Hmitrötr ngöne la easa e lapan ej. Tha tro hi sa inine la Tusi Hmitrötr e hetre ijine së. Loi e tro pe sa eköth la ketre porogaram ne ini tusi caas me eatrën. Celë hi aqane tro sa acatrene la lapaune së.
20. Nemene la hne së hna troa kuca?
20 Ame easë, tha ceitu së kö me “itre ka inamacan.” Easa lapaune kowe la Tusi Hmitrötr, nge hetre nyipi trepene la lapaune së. (Mat. 11:25, 26) Pine laka, easa inine la Tusi Hmitrötr, matre atre hi së laka, kola ngazo trootro la fen. Ngo easenyi hë matre tro Iehova a apatrene la itre akötre së. Celë hi matre, loi e tro sa acatrene la lapaune së me xatuane la itre atr troa hane lapaune kowe la Atre Xupi së. (1 Tim. 2:3, 4) Loi e tro fe sa lapa treqene la ijine tro la nöjei atr a atrunyi Iehova me hape: “Ijiji nyipë Iehova Akötresi hun troa kapa la lolo, . . . ke hnei nyipëti hna xupe la nöjei ewekë asë.”—Hna ama. 4:11.
NYIMA 2 Iehova La Ëje i Cilie
^ Nyimutre la itre ka mekun laka, ka xulu xane la mel. Ngo Tusi Hmitrötr a amamane laka, Iehova la Atre Xup. Hapeu, tro kö sa luelu göne lai? Waea. Ame ngöne la tane mekun celë, tro sa ce wang la aqane tro sa acatrene la lapaune së koi Akötresie me kowe la Tusi Hmitrötr.
^ Ame ngöne la itre uma ne ini, tha hna qaja kö ka hape, hetre ka xupe la itre ewekë. Ame kowe la itre porofesör, tro lai a ajolëne la itre nekönatr göne la hmi nyudren.
^ Ame ngöne la Guide de recherche pour les Témoins de Jéhovah, kola amamane la hna qaja hnene la itre xaa ka inamacan. Tro jë kowe la hna hape, “Science, technologie” me “Interview” (rubrique de Réveillez-vous!).
^ Wange ju la tane mekun hna hape, “La science et la Bible sont-elles compatibles?” ngöne la Hmeke Jë! ne Febuare 2011 qene Wiwi, memine la tane mekun hna hape, “Les prédictions de Jéhovah s’accomplissent” ngöne la Ita Ne Thup ne 1 Januare 2008, qene Wiwi.
