Ame ngöne la tane mekune cili, hne së lo hna ce wang la jol hna cile kow hnene la itre atr me itre angela, ene la troa ahmitrötrëne la ëje i Iehova. Ame la easa ahmitrötrëne la ëje i Iehova, ke easë hi lai a amamane ka hape, easa isigöline la musi cile i Nyidrë. Ceitune fe memine la easa mele nyipici koi Nyidrë.

Pine nemene matre ka nyipiewekë koi së la ëje i Iehova memine la troa ahmitrötrën ej? Tro sa ce wange la köni kepin.

Ame la hnapan, hnei Satana hna adrone la ëje i Iehova me thaipië Nyidrë ngöne la hlapa e Edrena. Hnei Satana hna amejëne la ketre hnyinge koi Eva ka amamane ka hape, tha Akötresieti ka hame kö Iehova, nge tha ka meköti kö la aqane acili wathebo i Nyidrë. Thupene lai, hnei Satana hna silitrengathoi Iehova, me qaja ka hape, Akötresieti ka thoi Nyidrë. E cili, hnei angeic hna adrone la ëje i Iehova. Nge e cili fe hi, la kola hë angeic ka hape, “Diabolo,” maine ‘atre ixöjetrij.’ (Ioane 8:44) Ame la Eva a drenge la itre trengathoi Satana, ke angeic hi lai a cile kowe la musi Iehova, me tha drei Nyidrë. (Gen. 3:1-6) Qane ju hi lai, Satana palahi a adrone la ëje i Iehova me silitrengathoi Nyidrë. Ame la itre ka drenge la itre trengathoi Satana, ke tro angatre lai a xele ma drei Iehova. Celë hi matre, kola elë la ngazo me itre akötr e celë fen. Ame kowe la itre hlue i Iehova, ketre ngazo ka tru la troa adrone la ëje i Nyidrë.

Ame la hnaaluen, ke nyine loi kowe la itre hna xup asë la tro Iehova a isigöline la ëje i Nyidrë me awiën hmaca. Ka nyipiewekë catre lai koi Nyidrë. Öni Nyidrëti lo: “Tro ni a ahmitötëne la ëjeng’ atraqat.” (Ezek. 36:23) Nge celë fe hi la hnei Iesu hna upi së troa pane qaja ngöne la itre thithi së. Öni nyidrë: “Epi hmitrötr la ëje i nyipë.” (Mat. 6:9) Anyimua qaja jë kö Tusi Hmitrötr la enyipiewekëne troa atrune la ëje i Iehova. Hane hi la itre xaa xötr ka amamane lai: “Atrune jë la ëje ka draië i Iehova.” (1 A. l. ite jo. 16:29; Sal. 96:8) “Nyimanejë la lolo ne la [ëje] i nyidë.” (Sal. 66:2) “Ajang troa atrune la ëje i nyipë uti hë epine palua.” (Sal. 86:12, NWT) Öni Iesu koi Iehova ngöne la uma ne hmi e Ierusalema ka hape: “Kaka, epi tro pe a ahmitrötrëne la ëje i nyipë.” Nge sa jë hi Iehova qa hnengödrai, ka hape: “Ase hë ni ahmitrötrën ej, nge tro pala kö ni a ahmitrötrën.”​—Ioane 12:28. a

Ame la hnaakönin, ke ka ce tro la aja i Iehova memine la troa ahmitrötrëne la ëje i Nyidrë utihë epin. Pane mekune jë: Nemene hë la ka troa traqa, thupëne la 1 000 lao macatre ne musi Iesu, me thupene la itupath tixenuë? Hapeu, tro palahi la itre atr  me itre angela a icilekeu pine la ëje i Iehova? Waea. Pine nemen? Pine laka, ame ngöne la ijine cili, tha nyipiewekë hmaca kö tro la itre atr a amamane ka hape, angatr a mele nyipici koi Iehova, ke itre atr ka pexej hë angatr, nge ase hë tupathi angatr. Nge tro angatr e cili, a kapa la mele ka pë pun. Ketre, tha nyipiewekë hmaca kö tro angatr a amamane ka hape, ka loi la aqane musi Iehova, ke ame ngöne la ijine cili, tro asë hi la itre ka mel e hnengödrai me e celë fen a cas, me drengethenge Iehova. Nge tune kaa pë hë göne la ëje i Iehova?

Ame ngöne la ijine cili, tro hë la nöjei atr a atre la nyipici göi Iehova, nge pë hmaca kö ka troa adrone la ëje i Nyidrë. Nge tro palahi la itre hlue i Iehova a wangatrune la ëje i Nyidrë. Pine nemen? Ke tro palahi angatr a haine la itre huliwa i Nyidrë. Tro Iesu a hamëne hmaca la mus koi Iehova, matre Nyidrëti casi pë hë la ka “musi hune la nöjei ewekë asë.” (1 Kor. 15:28) E cili, tro hë la itre atr a madrine ke “tro ha nuamacanyi angatr tune la itre nekö i Akötresie.” (Rom. 8:21) Nge tro ha eatr la aja i Iehova, ene la troa acasine la itre hlue i Nyidrë e koho hnengödrai me e celë fen.​—Efe. 1:10.

Tune kaa ha la fami Iehova e hnengödrai me e celë fen, thupene la itre ewekë cili? Tro hë lai a tru catr la aja së troa atrune la ëje ka mingöminge i Iehova. Öni Dravita: “Atrunyi Iehova pala hi . . . Nge atrunejë epine palua la [ëje] ka lolo i nyidë.” (Sal. 72:18, 19) Utihë epin, tro palahi a hetre ewekë ka troa uku së troa atrune la ëje i Iehova.

Nyipici, ëje i Iehova a amamane la pengö i Nyidrë. Ame la easa mekune la ëje i Nyidrë, ke kola mama la ihnimi Nyidrë. (1 Ioane 4:8) Tha tro pi kö sa thëthëhmine laka, ihnim la ka upi Iehova troa xupi së, me hamë së la thupen ne mel. Nge ka meköt me ka ihnim la aqane musi Nyidrë. Tro palahi së lai a öhne la ihnimi Iehova ngöne la itre hnei Nyidrëti hna xup. Matre uti hë epine palua, tro së lai a easenyi catr koi Nyidrë, me thinge la itre nyima ne atrune la ëje i Nyidrë.​—Sal. 73:28.