• “Kösë ame koi ni, hnene la föeng hna anyimua nyixetë.”

• “Kola thaipië ni, kösë pëkö ca emingömingö i eni me eloing koi nyidrë.”

• “Jole koi ni troa qaja koi itre xan. Eni a xomi akötre cas.”

• “Kösë hnei Iehova hna nuaxöji ni.”

Kola mama hnene la itre hna qaja e caha ka hape, akötre catr la föe la kola goeë iatr ka sis hnene la föi eahlo. Ngacama tro ju hë nyidrëti a kuca juetrën ngöne la itre treu maine macatre, ngo tro palahi la föi nyidrë a mekuhni. Önine la ketre föe göne la föi eahlo, “Thatre nyidrëti hnyawa kö ni. Maine jë, hetre itre xaa ewekë palakö hnei nyidrëti hna juetrën?”

Ame la tane mekune celë, ke hna hnëkën kowe la itre föe ka hetre föe hmunë ka goeë iatr ka sis. a Hetre itre trepene meköti ka troa akeukawanyi angatr, me amamane koi angatr laka, ce Iehova me angatr. Nge tro mina fe itre ej a xatua angatr troa lapa qale koi Nyidrë, me mele tingeting. b

Tha ijiji epuni kö troa atre asë la hna kuca hnene la föi epun, ngo hetre nyine tro epuni a kuca matre tha tro kö epuni a seseu. Tro sa ce wang.

The nyizö epuni kö. Ijije hi tro la föe a mekune ka hape, zöi eahlo la föi eahlo a goeë iatr ka sis. Ame koi Alice, c tha ka mingöminge kö eahlo. Matre eahlo a hnying ka hape, ‘Hnauëne laka, pi tro kö nyidrëti a goeën la itre xaa föe, nge eni hi la?’ Alanyimu la itre föe ka mekun ka hape, hnene laka, hnei angatr hna elëhni matre tha saze kö la föi angatr. Öni Danielle, “Ma zöi eni la kola ngazo la mele ne trefëne i nyio, ke eni pala pe hi a elëhni me wesitrameny.”

Maine tro epuni a mekune tune lai, the thëthëhmine kö ka hape, ame koi Iehova, tha zöi epuni kö la itre huliwa ne la föi epun. Celë hi hna qaja hnei Iakobo 1:14: “Kolo pe a isa tupathi së, me huli së, me iaö së, hnene la itre sipu aja së.” (Rom. 14:12; Fil. 2:12) Tha Iehova kö a upe  zö epun, ngo Nyidrëti pe a goeëne la aqane mele nyipici epun koi Nyidrë.​—2 A. l. ite jo. 16:9.

Ketre, tha tro pi kö la itre föe a mekun ka hape, zöi angatr la föi angatr a goeë iatr ka sis. Önine la itre ka inamacan ka hape, ame la trahmany a nyiqan goeë iatr ka sis, ke kola ahlëne thei angeic la itre aja ka ngazo laka, thatreine kö la ketre föe troa apatrene la itre aja cili.

The hnehengazo menu kö. Öni Catherine, tha lapa hnyawa kö la mekuna i eahlo, la eahlo a atre ka hape, ka goeë iatr ka sis la föi eahlo, matre hleuhleu catr la mele i eahlo. Ame pena Frances, öni eahlo: “E patre mina la föeng, ke seseu catr ni. Matre eni pala pe hi a elëhni.” Ame la itre xaa föe, angatr a hmahma troa ce tro memine la itre xaa trejin, ke ma atre hi la itre trejine cili la jole ne la föi angatr. Ame pena la itre xaa föe, angatr a mekun ka hape, pëkö ka atreine trotrohni angatr, matre angatre cas pe hi.

Tro fe a hane traqa koi së la itre mekune cili. Ngo maine tro palahi epuni a lapa fë la itre mekune cili, ke tro hë epuni lai a hnehengazo catr. Thele jë pe troa acatrene la imelekeu i epuni me Iehova. Tro hë lai a xatua epun troa cile catr.​—Sal. 62:2; Efe. 6:10.

Ame la ka troa xatua epun, ke ene la troa e me lapa mekune la hna melëne hnene la itre föe ka nyihlue i Iehova ekö, ka hane xomiakötr. Ame la angatr a thith koi Iehova, ke hnei Nyidrëti hna akeukawanyi angatr. Tha hnei Nyidrëti kö hna apatrene la itre jole i angatr, ngo hnei Nyidrëti pe hna hamën la tingeting. “Atraqatre la akötre” i Hana, ke jole catre la mele i angeic. Ngo ame la angeic a ase thith koi Iehova, ke tingetinge pi hi la hni angeic, ngacama thatre kö angeic la ka troa traqa e thupen.​—1 Sam. 1:10, 12, 18; 2 Kor. 1:3, 4.

Thele ixatua jë thene la itre qatre thup ne la ekalesia i epun. Tro angatr a tune ‘la nyine zae eny, me hnapo göi wene.’ (Is. 32:2) Tro fe angatr lai a upi epun kowe la ketre trejin föe, ka troa atreine trotrohnine me drei epuni hnyawa.​—Ite edomë 17:17.

Ijije kö tro epuni a xatuane la föi epun, matre tha tro hmaca kö nyidrëti a goeë iatr ka sis? Öni Tusi Hmitrötr ka “loi la ala lue hune la ala cas” matre nyinyine la ketre jol maine cile kowe la ketre ithupëjia ka catr. (Ate cai. 4:9-12) Önine  la itre ka ithel ka hape, hetre thangane ka loi e tro la föe a xatuane la trahmany troa nuetrije la goeë iatr ka sis. Nge kolo fe a acatrene la mele ne trefëne i nyidro.

Tro nyidrëti lai a atreine nuetrij la hna majemine cili, e tro nyidrëti a qaja la nyipici koi epun, me nue trengecatr matre tha tro hmaca kö a goeë iatr ka sis. Hapeu, hnei nyidrëti kö hna sipo trengecatr koi Iehova me thele ixatua thene la itre qatre thup? (2 Kor. 4:7; Iako. 5:14, 15) Ka hnëkë kö nyidrëti e traqa ju la itupath? Nyidrëti kö a thupëne la traeme goi aqane huliwane la telefon maine tablet? (Ite edomë 27:12) Nyidrëti kö a kapa la ixatua i epun? Nge nyidrëti kö a qaja la nyipici koi epun? Maine eje hi, ke ijiji epuni hi troa xatua nyidrë.

Tro sa ce wange la hna kuca hnene la lue trefën, Felicia me Ethan. Hnei Ethan hna nyiqane goeë iatr ka sis, lo nekönatr palakö nyidrë. E traqa mina Ethan pi goeë iatr ka sis, ke tha Felicia kö a sewe nyidrë troa qaja koi eahlo. Nge eahlo a drei nyidrëti hnyawa. Öni nyidrë: “Pëkö hnenge hna juetrën kowe la föeng. Angeic a xatua ni troa kötrene la itre ewekë ka troa akeinyi ni hmaca, me hnyingë ni lapa la pengö i eni. Angeice fe a hmekë ni göne la aqane tro ni huliwane la Ëternet.” Nyipici laka, akötre catre koi Felicia, la Ethan a pi goeë iatr ka sis. Öni eahlo, “Ame la eni a amamane koi nyidrë la akötreng me elëhning, ke tha kolo kö lai a xatua nyidrë troa saze. E ase mina nyio ce ithanatane la jole ka eje thei nyidrë, ke nyidrëti pena xatua ni troa elë hune la akötreng.”

Nyipiewekë tro la lue trefën a ifekeune la itre mekun, matre troa xatuane la trahmanyi troa nuetrije la hna majemine cili. Nge tro fe lai a xatuane la föe troa mejiune hmaca koi nyidrë. Maine tro la trahmany a qaja asë kowe la föi nyidrë, la itre aja ka ngazo ka eje thei nyidrë, me itre tronge i nyidrë, ke tro hmaca eahlo lai a mejiune koi nyidrë.

Celë kö lai ka traqa kowe la föi epun? Maine eje hi, loi e tro epon a ce e me ce ithanatan la tane mekune celë. Hnëqane la föi epun troa nuetrije la goeë iatr ka sis, me isine tro hmaca epuni a mejiune koi nyidrë. Tha tro kö nyidrëti a wesitr koi epun la epuni a seseu, ngo tro pe nyidrëti a thel troa trotrohni epun. Ame pena epun, loi e tro epuni a féliciter nyidrë, me thel tro hmaca mejiune koi nyidrë. Loi e tro epon a trotrohnine la kepin, matre ketre atr a nyiqane goeë iatr ka sis, me aqane tro angeic a nuetrije la hna majemine cili. d

Maine xou i epon troa iwesitrë ngöne la epone a ithanatane la jol, ke sipone jë kowe la ketre qatre  thup hnei epone hna atre hnyawa, troa xatua epon göne hi la ketre hnepe ijin. Ngacama ase hë la föi epun nuetrije la hna majemine cili, ngo tro lai a jole koi epun troa mejiune hmaca koi nyidrë. Catre pi pe, nge wangatrune jë la itre ewekë ka loi ngöne la mele ne trefëne i epon. The luelue kö laka, e tro epon a atreine xomihni, ke tro lai a acatrene hmaca la imelekeu i epon.​—Ate cai. 7:8; 1 Kor. 13:4.

Maine tro la föi epun a kei hmaca kowe la hna majemine cili, ke kolo kö lai a hape, tha ka ietra kö nyidrë nge ka luzi hë nyidrë? Waea. E thatreine kö nyidrë nuetrije la hna majemine cili, ma tro pala pë hë nyidrëti lai a isi memin. Ngacama tha hnei nyidrëti hë hna goeë iatr ka sis ngöne la itre macatre, ngo ijije hi tro hmaca nyidrëti a kei. Matre nyipiewekë tro palahi nyidrë a metrötrëne lo itre hnei nyidro hna ce axeciën, ngacama ekö hë nyidrë tha goeë iatr ka sis. (Ite edomë 28:14; Mat. 5:29; 1 Kor. 10:12) Loi e tro nyidrëti a ahnyipixen la “aqane waiewekë i nyidrë” me inine troa “sisine la ngazo,” tune la troa goeëne la itre iatr ka sis maine huliwane menune la gaa hmitrötre i nyidrë. (Efe. 4:23; Sal. 97:10; Rom. 12:9) Hapeu, aja i nyidrëti kö troa saze? Maine eje hi, ke tha ka luzi kö nyidrë. e

Nemene la nyine tro epuni a kuca e xele kö la föi epun troa nuetrije la hna majemine cili? Tro palahi epuni lai a wesitre me elëhni koi nyidrë. Nge aqane kö lai. Thele ixatua jë pe thei Iehova. (1 Pet. 5:7) Catre jë ini Tusi cas, me thith, me lapa mekune la itre hnei epuni hna inin, matre easenyi koi Iehova. Nge tro kö Nyidrëti lai a easenyi koi epun. Kola qaja ngöne Isaia 57:15 ka hape, Nyidrëti a ce mel memine ‘la itre ka akötr me itre ka ipië,’ me amele angatr. Isine jë troa loi thiina. Thele ixatua jë thene la itre qatre thup. Nge mejiune jë laka, tro kö la föi epuni elanyi a saze.​—Rom. 2:4; 2 Pet. 3:9.