1. Hnauëne laka kola hai Daniela hnene la angetre Babulona?

 NEKÖTRAHMANYI ka co palakö Daniela, lo kola othi angeic me xomi angeic qa Iudra a tro Babulona. Kola hai angeic ngacama ka co petre kö angeic. Hnene la itre hene ka tru e Babulona hna canga “[goeëne] la ka mama.” Hnei angatr hna öhne laka, ketre nekötrahmanyi ‘ka mingöming’ Daniela, nge ketre matra i joxu. (1 Sam. 16:7) Celë hi matre hnei angeic hna hane sine la itre ini hna hamën hnei angetre Babulona, göne troa cilëne la itre hnëqa ka tru e cili.​—Dan. 1:3, 4, 6.

2. Tune kaa la aqane goeë Daniela hnei Iehova? (Ezekiela 14:14)

² Iehova a hnimi Daniela, ke ketre nekötrahmanyi ka loi thiina angeic, ngo tha hnene kö laka, ka mingöminge maine ka cilëne la ketre hnëqa ka tru. Maine jë 20 petre hi lao macatre i Daniela, lo Iehova a qeje angeic ka hape, ketre atr ka meköti tui Noa me Iobu. Ngacama itre macatre ne mele nyipici Noa me Iobu, ngo ame koi Iehova, ceitu i Daniela hi me nyidro. (Gen. 5:32; 6:9, 10; Iobu 42:16, 17; E jë la Ezekiela 14:14.) Nge hnei Iehova hna hnimi Daniela utihë la angeic a mec.​—Dan. 10:11, 19.

3. Nemene la hne së hna troa ce wang ngöne la tane mekune celë?

³ Ame ngöne la tane mekune celë, tro sa ce ithanatane la lue thiina hnei Iehova hna öhne thei Daniela. Tro sa pane qejepengöne la lue thiina cili, memine la itre ijine Daniela a huliwane la lue thiina cili. Ketre, tro sa ce wange la ka xatua angeic troa huliwane la lue thiina cili, memine la aqane tro sa nyitipu angeic. Ngacama hna hnëkëne la tane mekune celë kowe la itre jeunes, ngo ijiji easë asë hi troa xomi ini qaathei Daniela.

4. Qaja jë la ketre ijine Daniela a amamane la catre i angeic.

⁴ Ijiji hi tro la itre atr ka catr a xou, ngo tha angatre kö a nue la xou troa sewe angatr troa kuca la loi. Daniela la ketre nekötrahmanyi ka catr. Tro sa ce wange la lue ijine Daniela a amamane la catre i angeic. Ame la hnapan, ke kolo ijine Nebukaneza Joxu a puje la ketre hnasaatr ka tru, lue macatre thupene la kola apatrenyi Ierusalema. Hnei nyidrëti hna qaja kowe asë hi la itre ka inamacan, ene Daniela fe ka hape, tro nyidrëti a humuthi angatr e tha qejepengöne kö angatr la aliene la pu i nyidrë. (Dan. 2:3-5) Loi e tro Daniela a canga kuca la ketre ewekë, wanga humuthi angatre pi. Matre hnei “Daniela hna löjë, me sipone qa thei joxu laka tro nyidëti a nue koi angeice la ijin, mate tro angeic’ a amamane la pengöne la pu kowe la joxu.” (Dan. 2:16) Hnei Daniela hna amaman e cili laka, ka catr me lapaune angeic. Tha hnei Tusi Hmitrötr kö hna qaja ka hape, hnei angeic ekö hna hane qejepengöne la itre pu. Hnei Daniela hna sipone kowe la itre sinee i angeic, ene Saderaka, me Mesaka, me Abedenego troa thith kowe la Akötresie ne hnengödrai, matre troa xatua angatr göne “la ewekë ka sihngödi cili.” (Dan. 2:18) Hnei Iehova hna sa la itre thithi angatr. Ame hnei Daniela hna qejepengöne la pu i Nebukaneza jëne la ixatua i Nyidrë. Matre mele ju kö Daniela me itre sinee i angeic.

5. Qaja jë la ketre ijine Daniela a amamane hmaca la catre i angeic.

⁵ E thupen, hnei Daniela hna amamane hmaca la catre i angeic. Hnei Nebukaneza hna puje la ketre ewekë ka iaxoueny, ene la ketre isinöe atraqatr. Tha xou i Daniela kö troa qejepengöne la pu i nyidrë, ngacama kola ithuemacanyi nyidrëti ka hape, tro nyidrëti a menu, nge troa pane ami nyidrë qa ngöne la hnëqa i nyidrë. (Dan. 4:25) Tha cile kö Daniela troa qaja la maca koi joxu, ngacama tro ju hë nyidrëti a elëhni maine humuthi angeic.

6. Nemene la ka xatua Daniela tro palahi a catr?

⁶ Nemene la ka xatua Daniela tro palahi a catr? Hnene la tulu hna amamane hnene la kem me thine i angeic, qaane lo angeic a co. Hnei nyidroti hna ini angeic la Wathebo, thenge lo hna amekötine hnei Iehova  kowe la itre kem me thin ne Isaraela. (Deu. 6:6-9) Atre catre Daniela lo Trene lao Wathebo hna qaja e hnine la Wathebo i Mose, ngo memine fe lo itre xaa wathebo. Matre atre hi angeic la itre xen hna wathebone kowe la angetre Isaraela. b (Lev. 11:4-8; Dan. 1:8, 11-13) Ketre, atre hnyawa hi Daniela la ka traqa kowe la itre hlue i Iehova ekö, ka ena la itre wathebo i Nyidrë. (Dan. 9:10, 11) Hnei Daniela hna öhne ngöne la mele i angeic laka, hnei Iehova palahi me itre angela i Nyidrë hna xatua angeic.​—Dan. 2:19-24; 10:12, 18, 19.

7. Nemene la itre xaa ewekë ka xatua Daniela troa catr? (Wange ju fe la iatr.)

⁷ Hnei Daniela hna lapa mekune la itre hna cinyihane hnene lo itre xaa perofeta i Akötresie, tui Ieremia. Celë hi ka xatua angeic troa atre ka hape, easenyi hë troa nue la angetre Iudra qa Babulona. (Dan. 9:2) Ame la angeic a öhne la kola eatr la itre hna perofetan, ke hna acatrene la lapaune i angeic koi Iehova. Nge atre hi së laka, ame la itre ka mejiune koi Iehova, ke itre ka catr angatr. (Wange ju fe la Roma 8:31, 32, 37-39.) Ngo ame kö la ka sisitria, ke ka thithi lapa Daniela kowe la Keme i angeic e hnengödrai. (Dan. 6:10) Angeic a ietrane la itre ngazo i angeic, me qaja la itre aliene ne hni angeic, me sipo ixatua koi Nyidrë. (Dan. 9:4, 5, 19) Ketre atr ka ceitu hi me easë lae Daniela. Matre tha hna hnaho angeic kö memine la catr. Ngo hna xatua angeic, hnene la hna ini Tus, me thith, me mejiune koi Iehova.

8. Nemene la nyine tro sa kuca, matre tro palahi sa catr?

⁸ Nemene la nyine tro sa kuca, matre tro palahi sa catr? Ijije hi tro la itre kem me thine së a xatua së troa hetrenyi la catr. Ngo thatreine kö sa kapa la thiina cili, tune la easa kapa la ketre edrö. Easa inine troa catr tune la easa inine troa kuca la ketre huliwa. Ame la easa inine troa kuca la ketre huliwa, nyipiewekë tro sa goeëne hnyawane la ka hamë ini, me nyitipu nyidrë. Ketre tun, easa inine troa catr la easa goeëne la itre xan a huliwane la thiina cili, me nyitipu angatr. Matre, nemene la ini hne së hna xom qaathei Daniela? Tui angeic, nyipiewekë tro sa atre hnyawa la Tusi Hmitrötr. Loi e tro sa thithi lapa koi Iehova matre troa acatrene la imelekeu së me Nyidrë. Nge loi e tro sa mejiune koi Iehova laka, tro kö Nyidrëti a xatua së. Matre e traqa ju tupathi së, tro kö së lai a catr.

9. Nemene la itre thangan ka loi hne së hna troa kapa e tro sa catr?

⁹ Nyimutre la itre thangane ka loi hne së hna troa kapa e tro sa catr. Tro sa ce wange la ka traqa koi Ben ka mel e Alema. Ame ngöne la hna ini, angatr asë a mejiune kowe la ini Évolution, nge ame koi angatr kösë ifejicatre la hna qaja hnei Tusi Hmitrötr. Ame la ketre ijin, hna aijijë Ben troa qejepengöne qëmeken la itre sine ini angeic la kepin matre angeic a mejiun kowe la Atre Xup. Tha hnei angeic kö hna cil troa qaja amamane la mejiune i angeic. Nemene la hna kuca hnene la porofesör? Öni Ben, “Hnei nyidrë hna drei ni hnyawa. Nge hnei nyidrëti hna xome la itre pepa hnenge hna huliwan ngöne la hnëqang, matre kuci copies me thawa kowe la itre sine ining.” Nge tune kaa fe la itre sine ini Ben? Öni angeic, “Hnei angatr fe hna drei ni hnyawa. Goi haine fe angatr la  aqane qejepengöne ni la mejiuneng.” Kola mama ngöne la hna melëne hnei Ben laka, ame la itre atre ka catr, ke hna metrötrën hnei itre xan. Nge tro la aqane ujë i angatr, a thue aja koi itre xan troa hane atre Iehova. Celë hi matre nyipiewekë tro palahi sa catr.

10. Kola hapeue la troa mele nyipici?

¹⁰ Ame la hnaewekë qene Heberu “mele nyipici,” maine “ihnimi nyipici” e hnine la Tusi Hmitrötr, ke kola qaja la ketre pengöne ihnim. Kola qaja la ihnimi Akötresie kowe la itre hlue i Nyidrë, maine pena la ihnim ka eje thene la itre hlue i Nyidrë. (2 Sam. 9:6, 7) Eje hi, tro palahi a catre trootro la ihnimi së kowe la itre trejin. Tro sa ce wange la hna melën hnei Daniela.

11. Hna tupathe tune kaa la aqane mele nyipici Daniela, lo qatre hë nyidrë? (Wange ju la icetrön.)

¹¹ Qaane lo Daniela a nekötrahmany, hna tupathe palahi la aqane mele nyipici nyidrë. Ngo hetre itupath ka tru catre kö hnei nyidrëti hna cile kow, lo kola 90 lao macatre i nyidrë. Ame ngöne la ijine cili, ase hë thapa la traon e Babulona hnene la angetre Madai me Peresi, nge Dariu hë la ka mus. Xele catr la itre xaa hlue i Dariu ma wai Daniela, nge tha metrötrëne kö angatr la Akötresie i nyidrë. Matre hnei angatr hna thel troa humuthi Daniela. Hnei angatr hna sipo joxu troa acile la ketre wathebo, ka troa tupath la aqane mele nyipici Daniela. Hapeu, tro jë kö Daniela a mele nyipici koi Akötresie maine joxu? Tro nyidrëti lai a mele nyipici koi joxu, e tro nyidrëti a tui itre xan, tha tro kö a thili koi Iehova ngöne la 30 lao drai. Ngo pi tro kö Daniela a mele nyipici koi Iehova, matre hna kuië nyidrë ngöne la hnaope i liona. Eloine pe, hnei Iehova hna amanathithi nyidrë me amele nyidrë. (Dan. 6:12-15, 20-22) Tune kaa la aqane tro sa catre mele nyipici koi Iehova, tui Daniela?

12. Nemene la ka xatua Daniela troa catre mele nyipici koi Iehova?

¹² Tune la hne së hna ce wang, tro sa atreine mele nyipici koi ketre, e ka catr la ihnimi së koi angeic. Hnei Daniela hna catre mele nyipici koi Iehova, ke tru la ihnimi angeic koi Nyidrë. Hnei Daniela hna lapa mekune la itre thiina, me aqane ujë i Akötresie, matre hna akökötrene la ihnimi  angeic koi Nyidrë. (Dan. 9:4) Hnei Daniela hna lapa mekune fe la itre huliwa ka loi hnei Iehova hna kuca koi angeic, me kowe la itre hlue i Nyidrëti ekö.​—Dan. 2:20-23; 9:15, 16.

13. (a) Tune kaa la aqane tupathe la itre jeunes enehila? Qaja jë la ketre hna melën. (Wange ju fe la iatr.) (b) Thenge la video, nemene la aqane tro epuni a sa, e tro la itre atr a hnyingë epuni la kepin matre tha easë kö a kapa la homosexualité?

¹³ Tui Daniela, itre jeunes ne la ekalesia a ce mele memine la itre atr ka tha metrötrë Iehova, me itre trepene meköti Nyidrë. Ame la itre xan, xele angatr ma wange la itre atr ka qaja amamane la ihnimi angatr koi Akötresie. Ame pena la itre xan, angatr a akötrëne la itre jeunes i easë, matre tro nyudren a nuetriji Iehova. Celë hi ka traqa koi Graeme, ketre jeune qa Australie. Ame lo angeic a ini ngöne lycée, hnei angeic hna cile kowe la ketre itupath. Hnene la porofesör hna hnyingëne kowe la klase i angeic, la mekuna i angatr e ka homosexuel la ketre sinee i angatr. Hnene la porofesör hna thawaluëne la klas: itre ka kapa ngöne la ketre götran, nge itre ka tha kapa ngöne la ketre götran. Öni Graeme, “Angatr asë hi a kapa la homosexualité. Eni pe hi memine la ketre Temoë la ka cile ngöne la ketre götran.” Ngo ketre itupath ka tru catre kö la ka traqa koi Graeme e thupen. Öni angeic, “Utihë la kola fenesi la cours, hnene la porofesör me itre sinee ini nyio hna hnyimasai nyio me qaqa nyio. Hnenge hna thele troa qaja amenyikene la lapauneng, ngo xele kö angatr ma drei ni.” Tune kaa ha Graeme e thupen? Öni angeic, “Akötre catre pi hë ni la angatr a qaqa ni, ngo madrine catre ni, ke hnenge hna isigöline la lapauneng, me mele nyipici koi Iehova.” c

14. Nemene la ka xatua së troa mele nyipici koi Iehova?

¹⁴ Tro sa mele nyipici koi Iehova tui Daniela, e tro sa akökötrene la ihnimi së koi Nyidrë. Nge e tro sa atre hnyawa la itre thiina i Iehova, ke tro hë së lai a catre hnimi Nyidrë. Ame la ketre aqane tro sa atre Nyidrë, ke ene la troa goeëne la itre ewekë hnei Nyidrëti hna xup. (Rom. 1:20) Maine epuni a ajan troa acatrene la ihnim me metrötre i epun koi Iehova, ke e jë la itre tane mekun maine goeëne la itre video ngöne la götran hna hape, “Évolution ou conception ?” Maine pena troa e la lue boroshüre hna hape, La vie a-t-elle été créée ? me Cinq questions à se poser sur l’origine de la vie. Hane hi la hna qaja hnei Esther, ketre trejine jajiny qa Danemark: “Lolo catre la itre mekun hna qaja ngöne la lue boroshüre cili. Tha lue eje kö a qaja la nyine tro sa mejiune kow. Ngo lue eje pe a hamëne la itre ithuemacany, nge isa qanyi së pë hë xomi ini qa ngön.” Öni Ben, lo hna qaja ha ekula, ka hape: “Hnene la lue boroshüre cili hna acatren la lapauneng. Hnei lue ej hna anyipicine koi ni laka, Akötresieti la qaane la mel.” Thupene la epuni a inine la lue boroshüre cili, tro epuni lai a jelenyipicine la hna qaja hnei Tusi Hmitrötr, ka hape: “Ijiji nyipë Iehova Akötresi hun troa kapa la lolo, me iatruny, me men, ke hnei nyipëti hna xupe la nöjei ewekë asë.”​—Hna ama. 4:11. d

15. Nemene la ketre aqane tro sa acatrene la ihnimi së koi Iehova?

¹⁵ Ame la ketre aqane troa acatrene la ihnimi epun koi Iehova, ke ene la troa atre hnyawa la mele i Iesu, Nekö i Nyidrë. Celë hi hna kuca hnei Samira, ketre trejin jajiny ka mel e Alema. Öni angeic: “Eni a atre  Iehova hnyawa, jëne la tulu i Iesu.” Ame lo angeic a nekönatr, jol koi angeic troa mekun ka hape, Iehova a hnimi së me meku së. Ngo tha celë kö la mekuna i angeic göi Iesu. Öni angeic, “Eni a hnimi Iesu ke ka loi thiina nyidrë, me ka hnime la itre nekönatr.” Ame la angeic a atre Iesu hnyawa, ke angeic a easenyi catre fe koi Iehova. Pine nemen? Öni angeic: “Eni ha öhne laka, Iesu hnyawa hi a nyitipune la Keme i nyidrë. Nyidrëti hnyawa hi la hnaiji Iehova. Trotrohnine hë ni la kepin matre Iesu la hnei Iehova hna iën a tro celë fen. Kolo ke aja i Nyidrë, tro la nöjei atr a atre Nyidrëti hnyawa.” (Ioane 14:9) Maine epuni a ajan troa acatrene la imelekeu i epun me Iehova, ke xomi ijine jë troa atre Iesu hnyawa. Tro hë epun e cili a hnime catrë Iehova, me mele nyipici koi Nyidrë.

16. Nemene la itre thangan ka loi hne së hna troa kapa, e tro sa mele nyipici koi Iehova? (Salamo 18:25; Mika 6:8)

¹⁶ Maine tro sa mele nyipici koi itre xan, ke tro lai a catrecatr la aqane imelekeu së me angatr. (Rutha 1:14-17) Ketre, ame la itre ka mele nyipici koi Iehova, ke ka tingeting palahi la hni angatr. Pine nemen? Ke öni Iehova, tro Nyidrëti a nyipici kowe la itre atr ka mele nyipici koi Nyidrë. (E jë la Salamo 18:25; Mika 6:8.) Tha madrine kö epuni la troa atre ka hape, atraqatr la aja ne la Atre Xup troa nyisinee së! Haawe, pëkö ketre itupath me icilekeu, me mec, ka troa thepe së qa ngöne la ihnimi Akötresie. (Dan. 12:13; Luka 20:37, 38; Rom. 8:38, 39) Celë hi matre nyipiewekë tro sa nyitipu Daniela, me mele nyipici koi Iehova!

17-18. Nemene la itre xaa ini nyine tro sa xome qaathei Daniela?

¹⁷ Ame ngöne la tane mekune celë, hne së hi hna ce wange la lue thiina ka lolo i Daniela. Ngo hetre itre xaa ini palakö nyine tro sa xome qaathei angeic. Eje hi, hnei Iehova hna hamë angeic la itre pu me itre hna meköl goeën, me aijijë angeic troa qejepengöne la itre hna perofetan. Nyimutre la itre hnei angeic hna perofetan ka eatre hë. Ame la itre xan, ke kola qaja la itre ewekë ka troa traqa elany, nge ka troa ketr la nöjei atr e celë fen.

¹⁸ Ame ngöne la tane mekun e thupen, tro sa ce wang la lue hna perofetan hnei Daniela. Tro lue ej a xatua së enehila troa axecië mekune ka loi, ngacama ka jeunes ju hë së maine qatr. Tro fe la lue hna perofetane cili, a xatua së troa catr me mele nyipici koi Iehova. Nge tro fe lai a hnëkë së kowe la itre itupath ka troa traqa elany.