1. Nemene la ka troa thue aja koi epun troa inine la itre hna perofetan e hnine la Tusi Hmitrötr?

 ÖNI Ben, ketre trejin ka jeune ka hape, “Pi tro catre ni a inine la itre hna perofetane hnei Tusi Hmitrötr.” Hapeu, aja i epun fe hi lai? Maine jë, ka jole koi epun troa trotrohnine la itre hna perofetan, matre xele kö epun ma inin itre ej. Ngo tro lai a saze la mekuna i epun, e tro epuni a atre la kepin matre Iehova a amë la itre hna perofetan e hnine la Tusi Hmitrötr.

2. Nemene la hne së hna troa ce wange ngöne la tane mekune celë?

² Ame ngöne la tane mekune celë, tro sa ce wange la kepin matre nyipiewekë tro sa inine la itre hna perofetan hnei Tusi Hmitrötr, memine la aqane tro sa inin itre ej. Tro mina fe sa ce wange la lue hna perofetan hnei Daniela, memine la enyipiewekën koi së enehila.

3. Nemene la nyine tro sa kuca matre trotrohnine la itre hna perofetan e hnine la Tus Hmitrötr?

³ Loi e tro sa sipo ixatua koi Iehova matre troa trotrohnine la itre hna perofetan e hnine la Tusi Hmitrötr. Pane mekune jë ka hape, epuni a ngenu ngöne la ketre götran memine la itre sinee i epun. Epuni a ajan troa tro kowe la ketre götran hnei epuni hna thatre. Ngo eloine pe, atre hnyawa hi la ketre sinee i epun lai götrane cili. Ketre, atre hnyawa hi angeic la hmeku i epun, memine la itre xaa mene gojeny. Tro epuni lai a madrin troa ce tro me angeic! Ceitune hi lai me Iehova, atre hnyawa hi Nyidrë la hneijine së, memine la itre ewekë ka troa traqa elany. Maine easa ajane troa trotrohnine la itre hna perofetan e hnine la Tusi Hmitrötr, ke loi e tro sa sipo ixatua koi Nyidrë.​—Dan. 2:28; 2 Pet. 1:19, 20.

4. Pine nemene matre Iehova a amë la itre hna perofetan e hnine la Tusi Hmitrötr? (Ieremia 29:11) (Wange ju fe la iatr.)

 ⁴ Tune la kem me thin ka ihnim, aja i Iehova tro la itre nekö i Nyidrë a hetre mele ka loi elany. (E jë la Ieremia 29:11.) Ngo ame pe Nyidrë, atreine hi Nyidrë qaja la itre ewekë ka troa traqa elany, nge ka eatr palahi. Hnei Nyidrëti hna amë la itre hna perofetan e hnine la Tusi Hmitrötr, matre tro sa atre la itre ewekë ka tru ka troa traqa elany. (Is. 46:10) Matre ahnahna qaathei Iehova la itre hna perofetan. Ngo nemene la nyine tro epuni a kuca matre troa xecie koi epun la itre hna perofetan e hnine la Tusi Hmitrötr?

5. Nemene la ini hna troa xom hnene la itre jeunes qa ngöne la tulu i Max?

⁵ Ame ngöne la hna ini, itre jeunes i easë palahi memine la itre xaa jeunes ka tha metrötrëne kö la Tusi Hmitrötr. Nge ijije hi tro la itre hnei angatr hna qaja maine kuca, a aciane la luelu thei nyudren. Öni Max, ketre trejin trahmanyi ka hape, “Ame lo eni a nekötrahmanyi hna traqa koi ni la luelu. Hnenge hna hnyinge ka hape, kakati kö me nenë a ini ni la nyipici, nge qaathei Akötresieti kö la Tusi Hmitrötr?” Nge nemene hë la hna kuca hnei kem me thine i angeic? Öni angeic, “Hnei nyidroti hna ithanata hnyawa koi ni, ngacama seseu pi hë nyidro.” Hnei nyidroti hna sa la itre hnyinge i angeic jëne la Tusi Hmitrötr. Nge nemene la hna kuca hnei Max? Öni angeic, “Hnenge hna inine ajuin la itre hna perofetan me ce thawa me itre xaa jeunes.” Nemene hë la thangan koi angeic? Öni angeic, “Xecie hë koi ni ka hape, qaathei Akötresie la Tusi Hmitrötr!”

6. Maine epuni a luelu, ke nemene la nyine tro epuni a kuca, nge pine nemen?

⁶ Maine epuni a nyiqane luelu kowe la hna qaja hnei Tusi Hmitrötr tui Max, ke the kucakuca kö. Ngo canga ithele jë pe. Ceitune hi la luelu memine la xojene fao. Maine tro ej a xuje la ketre ewekë, nge pëkö hne së hna kuca, ke tro hë lai a ae trootro uti hë la pë. Maine ase hë nyiqane “xuje” la lapaune i epun hnene la luelu, ke canga huletrije pi. Nge hnyinge jë ka hape, ‘Eni kö a mejiune kowe la hna qaja hnei Tusi Hmitrötr göne la itre drai elany?’ Maine epuni a luelu, inine jë la itre hna perofetan hnei Tusi Hmitrötr ka eatre hë. Tro sa ce wange la aqane tro epuni a kuca.

7. Nemene la tulu ka lolo hnei Daniela hna amamane koi së göne la aqane tro sa inine la itre hna perofetan? (Daniela 12:10) (Wange ju fe la iatr.)

⁷ Tro la tulu i Daniela a amamai së la aqane troa inine la itre hna perofetan. Hetre nyipi kepin matre angeic a inine la itre hna perofetan. Aja i angeic troa atre la nyipici. Ketre, ka ipië angeic. Atre hi angeic laka, tro kö Iehova a xatua angeic troa trotrohnine la itre hna perofetan, e tro angeic a lapa qale koi Nyidrë me catre metrötrëne la itre trepene meköti Nyidrë. (Dan. 2:27, 28; e jë la Daniela 12:10.) Hnei Daniela hna amamane la ipië i angeic, la angeic palahi a thele ixatua thei Iehova. (Dan. 2: 18) Hnei Daniela fe hna inine ajuin la itre hna cinyihan. Hnei angeic hna ithel ngöne la itre xaa itus ne la Tusi Hmitrötr ka hetreny ngöne la hneijine i angeic. (Iere. 25:11, 12; Dan. 9:2) Tro epuni a nyitipu angeic tune kaa?

8. Hnauëne laka, tha jelenyipicine kö itre xan la itre hna perofetan hnei Tusi Hmitrötr, ngo nemen la nyine tro sa kuca?

⁸ Thele jë la nyipi kepin. Hapeu, epuni kö a inine la itre hna perofetan matre troa atre hnyawa la nyipici? Maine eje hi lai, tro kö Iehova a amanathithine la itre trengecatr i epun. (Ioane 4:23, 24; 14:16, 17) Hnauëne la itre xan a inine la itre hna perofetan? Aja i angatr troa amamane ka hape, tha qaathei Akötresieti kö la Tusi Hmitrötr. Matre, ame e cili angatr pë hë a isa kuci mekun, me ketre iëne la ka loi me ngazo. Ngo ame kö së, hetre nyipi kepin matre easa inine la itre hna perofetan. Nyipiewekë tro mina fe sa hetreny la ketre thiina, matre trotrohnine la itre hna perofetan hnei Tusi Hmitrötr.

9. Nemene la thiina ka xatua së troa trotrohnine la itre hna perofetan hnei Tusi Hmitrötr? Qejepengöne jë.

⁹ Loi e troa ipië. Öni Iehova, tro kö Nyidrëti a xatuane la itre ka ipië. (Iako. 4:6) Haawe, maine aja së troa trotrohnine la itre hna perofetan e hnine la Tusi Hmitrötr, ke loi e tro sa sipo ixatua koi Nyidrë. Loi e tro mina fe sa kapa la ixatua ne la hlue ka nyipici me ka inamacan, lo hnei Iehova hna acil matre thewe xen ngöne la nyipi ijin. (Luka 12:42) Tha Akötresie ne zikoziko kö Iehova, matre tro sa trotrohnine la itre nyipici qa hnine la Tusi Hmitrötr, jëne hi la hlue cili.​—1 Kor. 14:33; Efe. 4:4-6.

10. Nemene la ini hne së hna xom qa ngöne la tulu i Esther?

¹⁰ Loi e troa ithele hnyawa. Iëne jë la ketre hna perofetan hnei epuni hna pi atre. Tro sa ce wange la hna kuca hnei Esther, ketre trejine föe. Aja i angeic troa atre hnyawa la itre hna perofetan göne la ijine traqa la Mesia. Öni angeic, “Ame lo eni a 15 lao macatre, hnenge hna nyiqan thel la itre ka anyipicine ka hape, ame la itre hna perofetane cili, ke hna cinyanyin qëmeken troa traqa hnei Iesu.” Hnei angeic hna e la itre hna qaja göne la itre tus hna ewath hna öhne ezine la Hnagejë Ka Palulu. Nge celë hi ka ketri angeic. Öni angeic, “Ame la itre xaa tus hna ewath, ke hna cinyanyin qëmeken troa traqa hnei Iesu. Matre xecie koi ni ka hape, qaathei Akötresie la itre hna perofetan. Anyimua e ni la itre ithuemacanyi cili, matre troa trotrohnine hnyawa.” Madrine catre angeic, ke tha ka luzi kö la itre trengecatr hnei angeic hna nu troa ithel. Hnei angeic hna ithel göne la itre xaa hna perofetan, matre öni angeic, “Eni ha jelenyipicine hnyawa laka, ka nyipici la hna qaja hnei Tusi Hmitrötr!”

11. Pine nemene matre nyipiewekë tro sa ithel e hnine la Tusi Hmitrötr?

¹¹ Ame la easa öhne la aqane eatr ekö la itre hna perofetan hnei Tusi Hmitrötr, ke kola acatrene la mejiune së koi Iehova, me kowe la itre hnei Nyidrëti hna amekötin.  Ketre, ame la easa atre la itre hna perofetan göne la drai elany, ke kola xatua së troa cile catr ngöne la itre itupath enehila. Tro sa ce wange la lue hna perofetane hnei Daniela ka eatr ngöne la hneijine së. Tro lai a xatua së troa axecië mekune hnyawa enehila.

12. Nemene la ka nyihatrene la lue iwaca hna kuca hnei “fao hna ithuenyiköne me dro [ka fedr]”? (Daniela 2:41-43)

¹² E jë la Daniela 2:41-43. Ame ngöne la pui Nebukaneza Joxu hna qejepengöne hnei Daniela, ke kola mama la ketre hnasaatr ka tru. Ame la lue wacan ej, ke hna kuca hnei “fao hna ithuenyiköne me dro [ka fedr].” Easa trotrohnine ngöne la hna perofetane celë, memine la itre xaa hna perofetan ngöne la tusi Daniela me Hna Amaman laka, ame la lue waca, ke kola nyihatrene la musi Amerika me Agele. Musi nyidroti la ka catr enehila. Nge öni Daniela göne la musi cili ka hape, “tro ha cate la sine . . . , nge [puj] la sin.” Pine nemen matre ka “[puje] la sin”? Pine laka, itre atrene la nöje i nyidro hna aceitunëne me dro ka fedr a sawa la musi nyidro troa catr tune la fao. b

13. Nemene la itre ini ka tru hne së hna xom qa ngöne la hna perofetan celë?

¹³ Hetre itre ini ka tru hne së hna xom qa ngöne la aqane qejepengöne Daniela la hnasaatr ka tru memine la lue iwaca. Ame la hnapan, hnene la musi Agele me Amerika hna anyimua amaman laka, ka catre la musi nyidro. Ame ngöne lo lue Isi Ka Tru, hnene la musi cili hna ngaane la itre xaa mus. Ngo puje trootro hë la musi cili, ke kola cil kowe ej hnene la itre atrene la nöj. Ame la hnaaluen, ke eje pe hi la mus tixenuë qëmeken tro la Baselaia i Akötresie a lep apatrene la nöjei musi asë. Ngacama tro ju hë la itre xaa mus a icilekeu, ngo thatreine jë kö angatre lai troa thapa la musi nyidro. Easa atre lai, ke tro “la etë” ka nyihatrene la Baselaia i Akötresie a lep anyilanyilane la lue iwaca ne la hnasaatr, ka nyihatrene la musi Agele me Amerika.​—Dan. 2:34, 35, 44, 45.

14. Pine nemene matre kola xatua së hnene la hna perofetan celë troa axecië mekune hnyawa?

¹⁴ Ka nyipici kö koi epun la hna perofetan göne la lue iwaca fao hna ithuenyiköne me dro ka fedr? Maine eje hi, tro lai a xatua epun troa axecië mekune hnyawa. Tha tro kö epuni lai a thele mani atrun me mo, ke atre hi epun laka, easenyi hë troa apatrene la fene celë. (Luka 12:16-21; 1 Ioane 2:15-17) Tro fe la hna perofetane celë a xatua epun troa wangatrune la huliwa ne cainöj me hamë ini. (Mat. 6:33; 28:18-20) Thupene la hna inine la hna perofetan celë, ke isa hnyinge jë ka hape, ‘Kolo kö a mama ngöne la meleng laka, easenyi hë tro la Baselaia i Akötresie a apatrene la nöjei musi asë?’

15. Drei la “joxu ne kolopi” me “joxu ne kolojë” enehila? (Daniela 11:40)

¹⁵ E jë la Daniela 11:40. Daniela mekene 11 a qaja la lue joxu ka icilekeu, ke aja i nyidroti asë troa musi kowe la fen. Easa trotrohnine jëne la itre xaa hna perofetan laka, musi Russie me itre sine xöle i angeic la “joxu ne kolopi.” Nge musi Agele me Amerika la “joxu ne kolojë.” c

16. Nemene la itre jol hna cile kow hnene la itre hlue i Iehova ka mel fene la musi ne la “joxu ne kolopi”?

 ¹⁶ “Joxu ne kolopi” a axösisine la itre hlue i Iehova ka mele fene la musi angeic. Kola lep me akalabusin la itre xan pine la lapaune i angatr. Ame pe, tha xou i angatre kö la “joxu ne kolopi,” ngo kolo jë pe a acatren catrëne la lapaune i angatr. Pine nemen? Ke atre hi angatr ka hape, kolo hi lai a eatrëne lo hna perofetan hnei Daniela. d (Dan. 11:41) Celë hi ka xatua së troa acatrene la mejiune së me catre mele nyipici.

17. Nemene la itre jol hna cile kow hnene la itre hlue i Iehova ka mel fene la musi ne la “joxu ne kolojë”?

¹⁷ Ame ekö, hna hane fe axösisine la itre hlue i Iehova hnene la “joxu ne kolojë.” Ame ngöne lo lue Isi Ka Tru, alanyim la itre trejin hna akalabusin ke xele angatr troa hane isi. Nge hna upe la itre nekö i angatr qa ngöne la uma ne ini, ke xele nyudren ma sali koi darapo. Ngo qane hë eue lo, ketre aqane tupathe pena la itre hlue i Iehova e  cili. Ame ngöne la ijine voot, ijije hi troa ukune la ketre trejin troa ce xöle memine la ketre parti politik, maine ketre hene politik. Nyipici laka, tha tro kö angeic lai a vootën la ketre parti, ngo tune kaa la hni angeic? Eje hi, tha tro hmekuje kö a mama ngöne la itre huliwa së ka hape, easa iananyi memine la kuci politik, ngo loi e tro fe a mama ngöne la aqane mekune së!​—Ioane 15:18, 19; 18:36.

18. Tune kaa së la kola ihmönyinyi hnene la “joxu ne kolojë” me “joxu ne kolopi”? (Wange ju fe la iatr.)

¹⁸ Kola xou hnene la itre atre ne fen la kola isi hnene la “joxu ne kolojë” me “joxu ne kolopi.” (Dan. 11:40) Lue ka trene boob nucléaire asë hi nyidro, matre ijije hi tro nyidroti a apatrene la itre atr e celë fen. Ngo atre hi së laka, tha tro kö Iehova lai a nue nyidro. (Is. 45:18) Matre tha xou i easë kö la kola ihmönyinyi hnene la lue joxu cili. Kolo pe a acatrene la lapaune së laka, easenyi hë troa apatrene la fene celë.

19. E thatre kö së la aqane troa eatr la ketre hna perofetan, ke nemene la nyine tro sa lapa mekun?

¹⁹ Thatre kö së la aqane troa eatr elany la itre xaa hna perofetan. Goi tha trotrohnine fe Daniela la itre hnei nyidrëti hna perofetan ekö. (Dan. 12:8, 9) Tha hnene kö laka, thatre kö së la aqane troa eatr la ketre hna perofetan, matre tha tro kö eje lai a eatr. Tro kö Iehova a amamane la aqane troa eatr ngöne la nyipi ijin, tune la aqane kuca i Nyidrëti ekö.​—Amosa 3:7.

20. Nemene la itre xaa hna perofetan ka troa eatr, nge nemene la nyine tro sa kuca?

²⁰ Thupene la kola suen ka hape, “Tingetinge hë nge pë hë hna mecin!,” tro la itre musi ne la fen a lep me apatrene la hmi ka thoi. (1 Thes. 5:3; Hna ama. 17:16, 17). Nge ame hë e thupen, tro pena angatr a ujë kowe la itre hlue i Iehova (Ezek. 38:18, 19) E cili hi, la kola nyiqane la isi Amagedro. (Hna ama. 16:14, 16) Nge xecie koi së laka, easenyi catre hë troa eatr la itre ewekë cili. Matre enehila hi la tro sa amamane la hni ne ole së koi Iehova, me inine ajuine la itre hna perofetan, me xatuane la itre xan troa hane tun.