1. Nemene la aliene la troa ietra?

 AME la easa kuca la ngazo, ke nyipiewekë tro sa ietra. Ame ngöne la Tusi Hmitrötr, ame la atr ka ietra, ke angeice a akötr pine la huliwa ka ngazo hnei angeice hna kuca, me isine matre tha tro hmaca kö a kei kowe la ngazo cili.​—Mat. 3:8; It. Hu. 3:19; 2 Pet. 3:9.

2. Pine nemene matre loi e tro asë hi së a ietra? (Nehemia 8:​9-​11)

² Loi e tro asë hi la itre atr a ietra. Pine nemen? Pine laka ame e nöjei drai, easa kuca la ngazo. Itre matra i Adramu me Eva së, matre itre ka ngazo asë hi së me mec. (Roma 3:​23; 5:​12) Pëkö atr ka loi e celë fen. Hnene fe la itre atr ka catre lapaun, tui Paulo aposetolo, hna hane isi memine la ngazo. (Roma 7:​21-​24) Hapeu, kolo kö lai a qaja ka hape, tro pala hi sa hleuhleu pine la itre ngazo së? Waea, Akötresie ka utipine Iehova, nge aja i Nyidrë tro sa madrin. Tro sa ce wange la ka traqa kowe la angetre Iudra ngöne la hneijine i Nehemia. (E jë la Nehemia 8:​9-​11.) Tha aja i Iehova kö tro angatr a hace fë la itre ngazo i angatr ekö. Ngo aja i Nyidrëti pe tro angatr a madrin troa nyihlue i Nyidrë. Atre hi Iehova laka, troa madrin la atr ka ietra. Matre Nyidrëti a ini së la aqane troa kuca. Maine tro sa ietrane la itre ngazo së, tro kö la Akötresie së ka utipin a nue la itre ngazo së.

3. Nemene la hne së hna troa ce wang ngöne la tane mekune celë?

³ Ame ngöne la tane mekune celë, tro sa ce ithanatane la aliene la ietra. Tro sa pane ce wange la hnei Iehova hna inine kowe la angetre Isaraela göne la ietra. E thupen, tro  sa ce wange la aqane xatuane Iehova la itre atr ka ngazo matre troa ietra. Nge tro fe sa ce wange la hna inin hnene la itretre drei Iesu göne la ietra.

IEHOVA A ININE LA ANGETRE ISARAELA LA ALIENE LA IETRA

4. Nemene la ini hnei Iehova hna hamëne kowe la angetre Isaraela göne la troa ietra?

⁴ Ame la Iehova a iëne la angetre Isaraela troa nöje i Nyidrë, hnei Nyidrëti hna isisinyikeu me angatr. Maine tro angatr a drengethenge la itre wathebo i Nyidrë, tro Nyidrëti a thupë angatr, me amanathithi angatr. Öni Nyidrë göne la itre wathebo: “Ame lola wathebo la ini a ahnithe koi ‘ö ngöne la drai celë, te, tha hace kö eje koi ‘ö, nge tha nanyi kö ej.” (Dreut. 30:​11, 16) Ngo e tro angatr a icilekeu me Nyidrë, tune la troa thile kowe la itre xaa haze, tro Nyidrëti a xome la manathith qaathei angatr, nge tro angatr a akötr. Ngo ijiji angatre hi troa ‘hmaca koi Iehova Akötesi angatr me drengethenge la aqane ithanata i nyidrë.’ (Dreut. 30:​1-3, 17-​20) Kolo hi lai a hape, ijiji angatre pala hi troa ietra. E cili, tro Iehova a easenyi angatr, me amanathithi angatr.

5. Nemene la aqane amamane Iehova laka, tha tro kö Nyidrëti a nuetrij nöje i Nyidrë? (2 Itre Joxu 17:​13, 14)

⁵ Anyimua catre që la nöje i Iehova koi Nyidrë. Tha angatre hmekuje kö a thile koi itre idrola, ngo angatre fe a kuca la itre huliwa ka sis. Ame ju pë hë la pun, tru la itre akötre ka traqa koi angatr. Ngo tha hnei Iehova kö hna nuetriji angatr. Hnei Nyidrëti pe hna upe pala hi la itre perofeta, matre tro la nöje a ietra me bëeke koi Nyidrë.​—E jë la 2 Itre Joxu 17:​13, 14.

6. Hnei Iehova hna huliwane tune kaa la itre perofeta matre inine la nöje la enyipiewekëne troa ietra? (Wange ju fe la iatr.)

⁶ Hnei Iehova pala hi hna upe la itre perofeta matre troa hmekën, me amekötine la nöje i Nyidrë ka tha idrei. Jëne Ieremia, öni Iehova: “Bëeke jë Isaraela, föe ka tha mele nyipici . . . Tha tro kö ni a goeën amenyi ö hnei elëhni, ke ka mele nyipici  Ni . . . Tha tro kö ni a lapa fë trengehni uti hë epine palua. Wangatrehmekune ju la ngazo i ö, ke hnei ö hna icilekeu me Iehova Akötresi ö.” (Iere. 3:​12, 13) Nge öni Iehova jëne Ioela ka hape: “Bëeke jë koi ni hnene la hni i epun ka pexej.” (Ioela 2:​12, 13) Öni Nyidrëti fe jëne Isaia ka hape: “Sie pi, nge ahmitrötrë epuni ju; xometrije pi qëmekeng la itre huliwa i epun ka ngazo; loi ju hë hna kuca la ngazo.” (Isa. 1:​16-​19) Nge hnei Iehova hna upi Ezekiela troa qaja ka hape: “Hapeu, eni kö a madrine la kola mec la atre ka ngazo? . . . Maine eni pe a madrine la angeic a saze thiina me mel? Tha madrine kö ni la kola mec la ketre atr, . . . matre hmaca ju nyipunie matre mel.” (Ezek. 18:​23, 32) Madrine Iehova la kola ietra la itre atr, ke aja i Nyidrë tro angatr a mel uti hë epine palua! Haawe, tha Iehova kö a lapa treqen tro la itre atr ka ngazo a saze matre xatua angatr. Tro sa ce wange la itre xaa hna melën.

7. Nemene la hnei Iehova hna inine kowe la nöje i Nyidrë, jëne la hna melën hnei Hosea perofeta me föi angeic?

⁷ Tro sa ce wange la ini hnei Iehova hna hamëne kowe la nöje i Nyidrë, jëne la hna melën hnei Gomera, föi Hosea perofeta. Thupene la hnei eahlo hna nyixetë, hnei eahlo hna trotriji Hosea kowe la itre xaa trahmany. Hapeu, ijiji eahlo kö troa saze? Öni Iehova, lo Atre goeëne la itre hni, koi Hosea ka hape: “Hnime hmaca ju la föe hna hnime hnene la ketre trahmany nge ka nyixetë, tune la aqane hnime Iehova la nöje Isaraela, ngacama angatr a thili kowe la itre xaa haze.” (Hos. 3:1; It. Ed. 16:2) Ame lo Iehova a ithanata koi Hosea, ke ka nyixetë pala hi la föi angeic. Ngo hnei Iehova hna upi Hosea troa thei eahlo hmaca, me nue la ngazo i eahlo, me iloi a me eahlo. Ketre tun, tha hnei Iehova kö hna nuetrije la nöje i Nyidrë ka tha idrei. Ngacama angatr pala hi a kuca la ngazo, ngo hnei Iehova hna catre hnimi angatr, me xatua angatr troa ietra, me saze la itre thiina i angatr. Hapeu, kolo kö lai a amamane ka hape, Iehova lo Atre “waipengön la itre aliene hni” së, a xatuane la itre atr ka lapa hnine la ngazo matre tro angatr a ietra? (It. Ed. 17:3) Tro sa ce wange lai.

AQANE KUCA I IEHOVA MATRE TRO LA ITRE ATR A IETRA

8. Nemene la aqane xatua Kaina hnei Iehova matre troa ietra? (Genese 4:​3-7) (Wange ju fe la iatr.)

⁸ Kaina la pane nekö i Adramu me Eva. Ketre atr ka ngazo fe hë angeic qaathei kem me thin. Ketre, öni Tusi Hmitrötr: “Ngazo la nöjei huliwa i angeic.” (1 Ioa. 3:​12) Celë hi matre, tha hnei Iehova kö “hna kepe Kaina, me huuj i angeic.” Ngo tha saze kö angeic, hnei angeice pe “hna elëhni catr, me wesitr ameny.” Nemene la hnei Iehova hna kuca? Hnei Nyidrëti hna ithanata koi Kaina. (E jë la Genese 4:​3-7.) Hnei Iehova hna ithanata hnyawa koi angeic, me qaja ka hape, tro Nyidrëti a amanathithi angeic e tro angeic a kuca la loi. Hnei Nyidrëti mina fe hna hmekë Kaina, e tro palahi angeic a lapa fë trenge hni. Ngazo pe, xele kö Kaina ma dreng. Tha hnei angeice kö hna kapa la ixatua i Iehova. Ngo hapeu, kolo kö lai a hape, tha tro hmaca kö Iehova a xatuane la itre xan troa ietra? Waea!

9. Nemene la aqane xatua Dravita hnei Iehova matre tro angeic a ietra?

 ⁹ Tru catre la ihnimi i Iehova koi Dravita Joxu. Hnei Iehova hna qeje Dravita ka hape, “atre amadrinëne la hning.” (It. Hu. 13:22) Ngo hnei Dravita hna kei kowe la itre ngazo ka tru, ene la nyixetë me ihumuth. Thenge la Wathebo i Mose, tro angeic a mec. (Lev. 20:10; Num. 35:31) Ngo aja i Iehova troa xatua Dravita troa ietra. b Hnei Iehova hna upi Nathana perofeta koi Dravita, ngacama tha mekune pala kö angeic troa ietra. Hnei Nathana hna xome la ketre ceitun ka troa ketr la hni i angeic. Celë hi ka upi angeic troa ietra. (2 Sam. 12:​1-​14) Hnei angeic hna cinyanyine la ketre salamo ka amamane laka, angeic a nyipi ietra. (Sal. 51, ka qejepengöne la mekene cili) Hnene la salamo cili hna akeukawane la itre ka kuca la ngazo me upi angatre troa ietra. Hapeu, tha madrine kö së laka, hnei Iehova hna xatua Dravita troa ietra?

10. Nemene fe la mekuna i epun göne la aqane xomihni me nue Iehova la ngazo ne la itre atr?

¹⁰ Methi Iehova la nöjei pengöne ngazo, ka co ju hë maine ka tru. (Sal. 5:​4, 5) Atre hi Nyidrë ka hape, itre atr ka ngazo së. Ngo pine laka, tru la ihnimi i Nyidrëti koi së, Nyidrëti a xatua së troa isi memine la ngazo. Nyidrëti pala hi a thel troa xatuane la itre atr ka kuca la itre ngazo ka tru troa ietra, me easenyi koi Nyidrë. Kola akeukawanyi së la easa drenge lai! Ame la easa lapa mekune la aqane xomihni me aqane nue Iehova la ngazo, kola uku së troa catre mele nyipici, me canga ietra e hnei easë hna kuca la ngazo. Tro pena sa ce wange la aqane kuca i Iesu, matre inine la itretre dreng la aliene la ietra.

HNA ININE LA ITRETRE DREI I IESU LA ALIENE LA IETRA

11-12. Nemene la aqane inine Iesu la pengöi Iehova kowe la itre atr ekö? (Wange ju la iatr.)

¹¹ Hna traqa la Mesia ngöne la itre macatre 100 M.K. Tune la hne së hna ce wange ngöne la tane mekune hnapan, hnei Iehova hna upi Ioane Bapataiso me Iesu  Keriso troa inine kowe la itre atr la enyipiewekëne troa ietra.​—Mat. 3:​1, 2; 4:​17.

¹² Qaane lo Iesu a nyiqane cainöj, hnei nyidrëti hna inine kowe la itre atr laka, tru la aja i Iehova troa nue la itre ngazo së. Hnei Iesu hna amamane lai, lo nyidrëti a xome la ceitune la nekötrahmanyi ka bëeke hmaca. Hnei angeic hna trotrije la hnalapa matre troa kuca la nöjei ewekë ka ngazo. “Ame hë la angeic a öhne la aqane menu i angeic,” hnei angeic hna bëeke hmaca koi hnalapa. Tune kaa la aqane ujë ne la kem? Öni Iesu, “angeice pala kö e gaa nany, nge öhnyi angeice ju hi hnei kem. Ame hnei nyidrëti hna utipi angeic, me nyinyap, me haluthi angeic, me dremi angeic.” Ame lo aja i angeic, ke troa nyihlu, ngo hnene la kem hna hë angeic ka hape “nekönge” me alö angeice hmaca ngöne la hnalapa. Önine la kem: “Patre hë nyëne lo, ngo bëeke hmaca ha.” (Luka 15:​11-​32) Ame lo Iesu e hnengödrai, öhne hnyawa hi nyidrë la aqane utipine i Iehova la itre atr ka ngazo. Mingöminge catre la aqane amamane Iesu la pengöi Iehova, Keme së ka tru trenge utipin!

13-14. Nemene la aqane inine Peteru la aliene la troa ietra, nge tune kaa la aqane ini itre xan hnei angeic? (Wange ju fe la iatr.)

¹³ Tru catre la itre ini hnei Peteru hna xome qaathei Iesu göne la troa ietra, me nue la ngazo. Anyimua tria Peteru, ngo hnei Iesu pala hi hna nue la ngazo i angeic. Ame lo Peteru a akönia qaja ka hape, thatre Iesu kö angeic, tru catre la hnei angeic hna akötr e thupen. (Mat. 26:​34, 35, 69-​75) Ngo thupene la kola amele Iesu hmaca, hnei nyidrëti hna mama koi Peteru, lo angeice cas. (Luka 24:​33, 34; 1 Kor. 15:​3-5) Maine jë ngöne la ijine cili, hnei Iesu hna nue la ngazo i Peteru, me qaja amamane la ihnimi i nyidrë koi angeic.​—Wange ju la Mareko 16:7.

¹⁴ Hnei Peteru hna öhne la aqane nue la  ngazo i angeic hnei Iesu, matre ijiji angeice troa ini itre xan la aqane troa ietra me nue la ngazo. Thupene la Penetekos macatre 33, hnei Peteru hna cile fë cainöj kowe la angetre Iudra, me qaja ka hape, hnei angatre hna humuthe la Mesia. Ngo öni angeice koi angatr: “Ietra ju nge ujë jë matre troa köletrije la itre ngazo i nyipunie, nge matre traqa pi koi nyipunie la itre ijine iakeukawanyi qaathei Iehova.” (It. Hu. 3:​14, 15, 17, 19) Peteru a amamane ka hape, ame la kola ietra hnene la atr ka kuca la ngazo, angeic a ujë me saze la itre mekuna i angeic me itre huliwa, me thel troa amadrinë Akötresie. Öni angeice mina fe kowe la angetre Iudra ka hape, tro Iehova a köletrije la itre ngazo i angatr, maine apatrene itre ej. Nge itre macatre thupen, öni Peteru kowe la itre keresiano: “Iehova . . . a xomihni nyipunie ke xele kö Nyidrë troa apatrene la ketre e nyipunie, ngo loi e tro pe nyipunieti asë a ietra.” (2 Pet. 3:9) Kola akeukawanyi së troa atre ka hape, Iehova a nue hnyawane la itre ngazo hne së hna kuca.

15-16. (a) Nemene la ka traqa koi Paulo, nge nemene la hna ini angeic? (1 Timoteo 1:​12-​15) (b) Nemene la hne së hna troa ce wang ngöne la tane mekun e thupen?

¹⁵ Hnei Saulo atre Taraso hna kuca la itre ngazo ka tru. Hnei angeic hna axösisine la itretre drei i Iesu Keriso. Matre ame kowe la itre keresiano, ka luzi hnyawa Saulo, nge tha ijiji angeice kö troa saze. Ngo tha celë kö mekuna i Iesu thupene la kola amele nyidrëti hmaca. Öhne kö nyidrë me Iehova la itre thiina ka loi thei Saulo. Öni Iesu: “Hnenge hna iëne la atre cili troa tro fë trongëne la ëjeng.” (It. Hu. 9:​15) Goi kuca fe Iesu la ketre iamamanyikeu, matre uku Saulo troa ietra. (It. Hu. 7:⁠58–​8:3; 9:​1-9, 17-​20) Thupene la angeic a kapa la hmi keresiano, hna hë angeic ka hape, Paulo. Anyimua olene angeic kowe la aqane menyik, me utipi angeic ekö. (E jë la 1 Timoteo 1:​12-​15.) Öni Paulo kowe la itre trejin: “Hapeu, . . . thatre kö eö ka hape, [Akötresie] a troxomi eö kowe la ietra?”​—Roma 2:4.

¹⁶ Tune kaa la aqane ujë i Paulo, la angeic a drenge ka hape, kola kuca la ketre huliwa ka sis ngöne la ekalesia ne Korinito? Tro la hna melëne cili a ini së la aqane tro pala hi a hamëne la ihaji cememine la ihnim, me aqane ameköti ewekë i Iehova, me utipine i Nyidrë. Tro sa ce ithanatane lai ngöne la tane mekun e thupen.