1-2. (a) Nemene la ngazo, nge nemene la aqane tro sa isi memin? (Wange ju fe “Göi Troa Trotrohnin.”) (b) Nemene la hne së hna troa ce wange ngöne la tane mekune celë, me ngöne la itre tane mekun e thupen? (Wange ju fe “Ithuemacany Kowe La Itre Ka e.)

 ATRE fe hi epuni la ejuine la ihnimi Iehova koi epun? Maine aja i epun troa atre, ke pane mekun ajuine jë la hnei Nyidrëti hna kuca matre thepe epun qa ngöne la ngazo me mec. Ketre ithupëjia ka tru la ngazo. a Nge thatreine kö la ala cas thei easë troa cil kowe la ngazo. E nöjei drai, easa kuca la ngazo, nge easa mec pine la ngazo. (Roma 5:​12) Ngo hetre itre maca ka lolo. Jëne la ixatua i Iehova, ijiji së asë hi troa ngaane la ngazo. Eje hi, xecie hnyawa koi së laka, tro sa ngaane la ngazo!

² Traqa koi 6 000 lao macatre enehila, nge Iehova pala hi a xatuane la itre atr troa cile kowe la ngazo. Pine nemen? Pine laka, Nyidrëti a hnimi së. Pa i Nyidrëti kö hnimi së, matre hnei Nyidrëti pala hi hna xatua së la easa kei kowe la ngazo. Atre hi Akötresie laka, ame la ngazo, ke ej a tro xomi së kowe la mec, nge tha aja i Nyidrëti kö tro sa mec. Aja i Nyidrëti pe tro sa mel uti hë epine palua. (Roma 6:​23) Celë hi lai aja i Nyidrëti koi së. Ame ngöne la tane mekune celë, tro sa sa la köni hnying: (1) Nemene la hnei Iehova hna kuca, matre troa hamë mejiune kowe la itre atr ka ngazo? (2) Nemene  la hna kuca hnene la itre atr ekö, matre troa kepe angatr hnei Iehova? (3) Nemene la hnei Iesu hna kuca, matre amelene la fene celë ka ngazo?

HETRE MEJIUN HNA HAMËNE KOWE LA ITRE ATR KA NGAZO

3. Hnauëne laka, kei pi la lue pane kem me thine së kowe la ngazo?

³ Ame lo Iehova a xupe lo lue pane atr, ke aja i Nyidrë tro nyidroti a mele madrin. Hnei Nyidrëti hna hamë uma i nyidro, me faipoipo nyidro, me hamëne la ketre hnëqa ka mingöminge catr. Hnëqa i nyidro troa nyialiene la ihnadro, me aparadraisone la fen asë, tun e Edrena. Casi hi la wathebo hna hamëne koi nyidro. Hnei Nyidrëti hna hmekë nyidro laka, e tro nyidroti a ena la wathebo, me cile koi Nyidrë, ke tro hë nyidroti lai a mec. Atre hi së la ka traqa. Hnene la ketre u ka ngazo ka pë ihnim koi Akötresie me koi nyidro, hna uku nyidro troa ena la wathebo. Hnei Adramu me Eva hna kei kowe la ngazo. Tha hnei nyidro kö hna mejiune koi Iehova. E thupen, hna eatr la itre hnei Iehova hna qaja. Qaane ju hi la ijine cili, nyidroti ha xeni pune la itre huliwa i nyidro. Nyidroti a qatre trootro utihë la nyidroti a mec.​—Gen. 1:​28, 29; 2:​8, 9, 16-​18; 3:​1-6, 17-​19, 24; 5:5.

4. Hnauëne laka Iehova a methinëne la ngazo, me xatua së troa cile kowe ej? (Roma 8:​20, 21)

⁴ Hnei Iehova hna amë la hna melëne cili e hnine la Tusi Hmitrötr, matre ini koi së. Ej a xatua së troa trotrohnine la kepin, matre Iehova a methinëne la ngazo. Eje hi, ngazo la ka ananyi së qaathei Nyidrë, me tro xomi së kowe la mec. (Isa. 59:2) Celë hi matre, ame Satana lo u ka ngazo, atrekëzöne la itre ewekë ka traqa, a hnine la ngazo me ukune la itre atr troa kuca la ngazo. Angeice lo a mekun ekö ka hape, hune hë angeic e Edrena, ngo tha trotrohnine kö angeice la trenge ihnimi i Iehova. Ngo tha saze kö la aja i Iehova kowe la itre matra i Adramu me Eva. Tru catr la ihnimi i Iehova kowe la itre atr, matre hnei Nyidrë hna canga hamë mejiune koi angatr. (E jë la Roma 8:​20, 21.) Atre kö Iehova laka, hetre matra i Adramu ka troa hnimi Nyidrë, me thele ixatua thei Nyidrë, matre cile kowe la ngazo. Pine laka, Nyidrëti la Kem me Atre Xupi së, tro Nyidrëti a xatua së troa utretr qa ngöne la ngazo, me easenyi koi Nyidrë. Troa tune kaa?

5. Eu la Iehova a hamë mejiune kowe la itre atr ka ngazo? Qejepengöne jë. (Genese 3:​15)

⁵ E jë la Genese 3:​15. Hnei Iehova hna hamë mejiune kowe la itre atr ka ngazo, lo Nyidrëti a qaja la pun koi Satana. Ase hë Akötresieti qaja ka hape, tro la ketre “matran” a amelene la itre atr. Tro la matrane cili a waja ficanyi Satana me apatrene lo itre ngazo ka xulu ekö, e Edrena. (1 Ioa. 3:8) Ame pe, tro la matrane cili a pane akötr. Tro Satana a eatrë angeic, nge tro angeic a mec. Tro lai a akötrë Iehova. Ngo tru catre kö la itre manathith hna troa kapa e thupen, ke alanyim la itre atr hna troa amelene qa ngöne la ngazo me mec!

AQANE TRO LA ITRE ATR KA NGAZO EKÖ A AMADRINË IEHOVA

6. Nemene la hna kuca hnene la itre atr ka tui Abela me Noa matre easenyi koi Iehova?

⁶ Ame ngöne la itre macatre thupen, hnei Iehova hna amamane trongëne la aqane tro la itre atr ka ngazo a easenyi Nyidrë. Ame la pane atr ka lapaune koi Iehova thupene la ngazo ka traqa e Edrena, ke Abela lo hnaaluene nekö i Adramu me Eva. Pine laka, tru la ihnimi i Abela koi Iehova, nge aja i angeic troa amadrinë Nyidrë, me easenyi Nyidrë, hnei angeic hna tro fë huuj. Atre thupë mamoe Abela, matre hnei angeic hna humuthe la itre  xaa neköi fekene mamoe, me huujëne koi Iehova. Tune kaa la aqane goeëne Iehova la huuje i angeic? “Ame hnei Iehova hna kepe Abela me huuj i angeic.” (Gen. 4:4) Hnei Iehova mina fe hna kapa la huuj ne la itre atr ka hnimi Nyidrë me lapaune koi Nyidrë tui Noa. (Gen. 8:​20, 21) Ame la Nyidrëti a kapa la itre huuje cili, Nyidrëti hi lai a amamane ka hape, aja i Nyidrë troa kapa la itre atr ka ngazo ka pi easenyi Nyidrë. b

7. Nemene la ini hne së hna xome qa ngöne la tulu i Aberahama?

⁷ Hnei Iehova hna upi Aberahama, ketre atr ka catre lapaune troa huujëne la sipu nekö i angeic Isaaka. Drei jë kö la akötre i Aberahama, la Akötresie a upi angeic troa kuca lai. Ngo hnei angeic hna drengethenge Akötresie. Eloine pe, hnei Nyidrëti hna canga acilë angeic. Hetre ini hne së hna troa xome qa ngön. Tha tro kö Iehova a cipane la sipu Nekö i Nyidrë. Easë hi lai a trotrohnine la ejuine la ihnimi i Nyidrë kowe la itre atr.​—Gen. 22:​1-​18.

8. Nemene la itre huuj hna qaja ngöne la Trenge Wathebo i Mose? (Levitiko 4:​27-​29; 17:11)

⁸ Ame la Iehova a hamëne la Trenge Wathebo kowe la angetre Isaraela, hnei Nyidrëti hna upi angatr troa huujëne la itre öni, matre tro Nyidrëti a köletrije la itre ngazo i angatr. (E jë la Levitiko 4:​27-​29; 17:11.) Ame la itre huuje cili, ke iahnuene la ketre huuj ka sisitria catre kö, ka troa amelene la itre atr qa ngöne la ngazo. Hnene la itre perofeta i Akötresie hna amamane ka hape, ame la matrane hna lapa treqen, ke sipu nekö i Akötresie ka troa akötre me mec. Troa humuthi angeic tune la ketre mamoe hna huujën. (Isa. 53:​1-​12) Pane mekune jë la: hnei Iehova hna huujëne la sipu Nekö i Nyidrë hna hnim, matre troa amelene la nöjei atr qa ngöne la ngazo me mec, nge eö fe!

NEMENE LA HNEI IESU HNA KUCA MATRE AMELENE LA ITRE ATR?

9. Tune kaa la aqane qeje Iesu hnei Ioane Bapataiso? (Heberu 9:​22; 10:​1-4, 12)

⁹ Hnei Ioane Bapataiso, ketre hlue i Akötresie hna qeje Iesu ne Nazareta ka hape: “Hanawange la Neköi Mamoe i Akötresie, atre apatrene la ngazo ne la fen!” (Ioa. 1:​29) Angeice hi lai a amamane ka hape, Iesu hi la matran hna lapa treqen, nge ka troa huujëne la mele i nyidrë. Eje hi, hetre mejiune hë kowe la itre atr ka ngazo. Tro la huuje cili a thepe angatr qa ngöne la ngazo.​—E jë la Heberu 9:​22; 10:​1-4, 12.

10. Nemene la aqane amamane Iesu laka, nyidrëti a traqa troa “hëne” la itre atr ka ngazo?

¹⁰ Hnei Iesu hna pane xatuane la itre atr ka hace fë la itre ngazo i angatr, me hë angatr troa xötrethenge nyidrë. Atre hi nyidrë laka, zöi ngazo matre itre atr a akötr. Celë hi matre, hnei nyidrëti hna xatuane la itre trahmanyi me föe ka kuca la ngazo. Hnei nyidrëti hna hamëne la ketre ceitun me hape: “Tha nyipiewekë kö la droketre kowe la itre ka egöcatr, ngo koi itre wezipo. Eni a hëne la itre ka ngazo, ngo tha itre ka meköti kö.” (Mat. 9:​12, 13) Celë hi la hnei Iesu hna kuca. Hnei nyidrëti hna nue la ngazo ne la föe ka köle la lue ca i nyidrë hnene la trenge timidra i eahlo. (Luka 7:​37-​50) Hnei nyidrëti fe hna hamëne la itre ini ka tru kowe la föe ne Samaria ngöne la hnë tha tim, ngacama atre hi nyidrë la itre huliwa ka ngazo hnei eahlo hna kuca. (Ioa. 4:​7, 17-​19, 25, 26) Hnei Akötresie hna aijijë Iesu troa apatrene la thangane la ngazo, ene la mec. Tune kaa? Hnei Iesu hna amelene hmaca la itre trahmanyi me föe, me itre nekönatr.​—Mat. 11:5.

11. Pine nemene matre itre atr ka ngazo a pi easenyi Iesu?

 ¹¹ Tha sesëkötre kö së laka, itre atr ka kuca catrëne la ngazo a pi easenyi me Iesu. Hnei nyidrëti hna hnim me thiina ka loi koi angatr. Tha ka jole kö koi angatr troa easenyi nyidrë. (Luka 15:​1, 2) Nge hnei Iesu hna qaja aloin me amanathithine la itre atre cili ka lapaune koi nyidrë. (Luka 19:​1-​10) Iesu hi lai a amamane la pengöi Iehova, memine la aqane nue Nyidrëti la ngazo. (Ioa. 14:9) Jëne la itre trengewekë, me itre huliwa i Iesu, nyidrëti a amamane ka hape, Iehova a utipine me hnime la itre atr, nge aja i Nyidrë tro angatr a cile kowe la ngazo. Hnei Iesu hna xatuane la itre atre ka ngazo troa saze me xötrethenge nyidrë.​—Luka 5:​27, 28.

12. Nemene la hnei Iesu hna ini së göne la meci nyidrë?

¹² Atre hi Iesu la itre ewekë ka troa traqa koi nyidrë. Anyimua qaja nyidrë kowe la itretre dreng ka hape, troa salemë nyidrë me humuthi nyidrë ngöne la sinöe ne iaxösisi. (Mat. 17:22; 20:​18, 19) Atre hi nyidrë ka hape, tro la huuje i nyidrë a köletrije la ngazo ne la fen, thenge lo hna qaja hnei Ioane me itre xaa perofeta. Hnei Iesu hna qaja mina fe ka hape, thupene la nyidrëti a huujëne la mele i nyidrë, tro nyidrëti a ea koi nyidrë la “nöjei pengöne atr.” (Ioa. 12:32) Ijije hi tro la itre atre ka ngazo a amadrinë Iehova, e tro angatr a lapaune koi Iesu me xötrethenge la itre thupaca i nyidrë. Ame e cili, tro ha nuamele angatr “qa ngöne la ngazo.” (Roma 6:​14, 18, 22;  Ioa. 8:​32) Ngacama jole catr koi Iesu, ngo tha cile kö nyidrë troa nue la mele i nyidrë matre amele së.​—Ioa. 10:​17, 18.

13. Tune kaa la aqane meci Iesu, nge nemene la hna ini së göi Iehova? (Wange ju fe la iatr.)

¹³ Hna salemë Iesu, me othi nyidrë, me qaqa nyidrë, me axösisi nyidrë. Hnene la itre sooc hna tro sai nyidrë kowe la götrane hnë humuthi nyidrë, me jei fao nyidrë hune la sinöe ne iaxösisi. Hnei Iesu hna mele nyipici me xomihnine la akötr. Ngo pane mekune jë la hace i Iehova, la Nyidrëti a goeëne la nekö i Nyidrëti a akötr. Tru catre la mene i Iehova, nge ijiji Nyidrëti hi troa apëne la akötre i Iesu. Ngo pëkö hnei Nyidrëti hna kuca. Pine nemen? Kem ka ihnimi Nyidrë, matre hnauëne kö la Nyidrëti a ujë tun? Ke tru catre la ihnimi Iehova kowe la itre atr. Öni Iesu: “Atraqatre la ihnimi Akötresie kowe la fen, matre hnei nyidrëti hna upe la Nekö hnimina i nyidrë ka cas, matre tha tro kö a meci la atre amamane la lapaune i angeic kowe la Nekön, ngo tro pe a hetrenyi la mele ka pë pun.”​—Ioa. 3:​16.

14. Nemene la ini hne së hna xom qa ngöne la huuje i Iesu?

¹⁴ Ame la huuje i Iesu, ke celë hi hatrene la ihnimi i Iehova kowe la itre matra i Adramu me Eva. Kola amamane la etrune la ihnimi i Iehova koi eö. Atre hi Iehova laka, tro Nyidrëti a akötr, ngo hnei Nyidrë hna nue Iesu troa huujën la mele i nyidrë, matre thepe së qa ngöne la ngazo me mec. (1 Ioa. 4:​9, 10) Eje hi, tru la aja i Iehova troa xatua së troa cile me hune qëmekene la ngazo!

15. Nemene la nyine tro sa kuca matre troa kepe thangane qa ngöne la thupene mel?

¹⁵ Ahnahna qaathei Akötresie la thupene mel hna hamën hnei Iesu, nge celë hi ka aijijë Nyidrë troa köletrije la itre ngazo së. Ngo tro Akötresie a nue la itre ngazo së, e hetre ewekë hne së hna kuca. Nemene jë lai? Öni Ioane Bapataiso me Iesu Keriso mina fe ka hape: “Ietra ju, ke, calemi hë la Baselaia ne hnengödrai.” (Mat. 3:​1, 2; 4:​17) Haawe, nyipiewekë tro sa ietra e aja i easë troa cile kowe la ngazo, me easenyi koi Iehova. Ngo kola hapeue la troa ietra, nge ej a xatua së tune kaa troa amadrinë Iehova, ngacama atr ka ngazo së? Tro la tane mekun e thupen a sa la hnyinge celë.