TANE MEKUN 33
NYIMA 130 Loi e Tro Sa Inualoinekeun
Aqane Tro Sa Goeëne La Atr Ka Kuca La Ngazo Tui Iehova
“E traqa ju ketre kuca la ngazo, hetre ixatua.” —1 IOA. 2:1.
MEKUN KA TRU
Tro sa xomi ini qa ngöne la aqane nyinyine la ketre jol ka tru ngöne la ekalesia ne Korinito ekö.
1. Nemene la aja i Iehova kowe la nöjei atr?
HNEI Iehova hna xup la itre atr memine la atreine troa isa ië ewekë. Ame la easa xom la itre mekun, easë hi lai a huliwane lai ahnahna cili. Ame la mekun ka tru hne së hna xom ngöne la mele së, ke ene la troa nue mel koi Iehova me sine la fami i Nyidrë e celë fen. Aja i Iehova tro asë hi la nöjei atr a kuca lai. Pine nemen? Ke tru la ihnimi Nyidrë kowe la itre atr, nge aja i Nyidrë tro angatr a mele ka loi. Aja i Nyidrëti fe tro angatr a hane nyisinee i Nyidrë, me mel uti hë epine palua.—Dreut. 30:19, 20; Gal. 6:7, 8.
2. Nemene la aja i Iehova kowe la itre atr ka kuca la ngazo nge tha ka ietra kö? (1 Ioane 2:1)
2 Ngo tha Iehova kö a musinëne la itre atr troa nyihlue i Nyidrë. Nyidrëti pe a nue la itre atr troa isa xomi mekun. Ngo nemene la ewekë ka traqa e tro la ketre keresiano ka bapataiso a ena la itre wathebo i Nyidrë, me kuca la ketre ngazo ka tru? E tha ietra kö angeic, troa upi angeic qa ngöne la ekalesia. (1 Kor. 5:13) Ngo aja i Iehova palahi tro angeic a bëeke hmaca koi Nyidrë. Celë hi kepin matre, hnei Nyidrëti hna hamën la thupene mel, göi troa aijijëne la itre atr ka kuca la ngazo troa ietra. (E jë la 1 Ioane 2:1.) Tru la ihnimi Iehova, matre Nyidrëti a iele angatr troa ietra.—Zaka. 1:3; Roma 2:4; Iako. 4:8.
3. Nemene la hne së hna troa ce wang ngöne la tane mekun celë?
3 Aja i Iehova tro sa goeëne la ngazo me itre ka kuca la itre ngazo ka tru tui Nyidrë. Ame ngöne la tane mekune celë, tro sa ce wang la aqane tro sa nyitipu Nyidrë. Ame la epuni a e la tane mekun celë, thele jë (1) la aqane nyinyin la jol ka tru ka traqa ngöne la ekalesia ne Korinito ekö, (2) la itre hna amekötin hnei Paulo hna hamën, e kola ietra la atr ka kuca la ngazo, me (3) la aqane goeëne Iehova la itre keresiano ka kuca la itre ngazo ka tru.
NEMENE LA AQANE NYINYINE LA JOL KA TRU EKÖ?
4. Nemene la jol ka traqa ngöne la ekalesia ne Korinito ekö? (1 Korinito 5:1, 2)
4 E jë la 1 Korinito 5:1, 2. Ame ngöne la hnaakönine tronge i Paulo, hnei angeic hna dreng ka hape, hetre ewekë ka ngazo hna kuca ngöne la ekalesia ka hnyipixe e Korinito. Ketre trejin trahmanyi a ce mama memine la föe ne la keme i angeic. Ketre huliwa lai ka sis, nge ‘hna tha hane kö öhn thene la itre atre ne fen’! Ame kowe la ekalesia, tha ka ngazo kö la aqane ujë i angeic. Angatre pe a madrin, ke öni itre xan, kolo hi lai a amamane ka hape, ka itrotrohni nge ka utipin Akötresie. Ngo tha kapa kö Iehova la itre huliwa ka ngazo hna kuca hnene la itre hlue i Nyidrë. Ketre, tro la itre xan ka tha nyihlue i Iehova kö a qaja angazone la ekalesia. Nge, tro fe la aqane ujë i angeic a ajojezine la itre xaa keresiano ka ce tro me angeic. Haawe, nemene la hnei Paulo hna upe la ekalesia troa kuca?
5. Nemene la hnei Paulo hna upe la ekalesia troa kuca, nge kola hapeue lai? (1 Korinito 5:13) (Wange ju fe la iatr.)
5 E jë la 1 Korinito 5:13. Jëne la uati hmitrötr, hnei Paulo hna cinyanyine la ketre tus kowe la ekalesia, me qaja koi angatr ka hape, troa upe la trejin cili ka tha ietra kö, qa ngöne la ekalesia. Tune kaa la aqane tro la itre keresiano a ujë koi angeic? Öni Paulo, ‘tha tro hmaca kö a nyi sinee’ i angeic. Kola hapeue lai? Hnei Paulo hna qaja ka hape, ‘tha tro kö angatr a hane ce xeni me itre ka ujë tun.’ (1 Kor. 5:11) Maine tro sa ce xen memine la atr cili, ke tro së lai a ce porotrik, me nyisinee angeic. Haawe, easa trotrohnine laka, Paulo a upe la ekalesia ka hape, tha tro hmaca kö a ce tro me angeic. Celë hi ka troa thupëne la ekalesia qa ngöne la itre huliwa i angeic ka ngazo. (1 Kor. 5:5-7) Ketre, e tro la ekalesia a ananyine la atr cili, tro angeice lai a trotrohnine ka hape, ka ngazo la hnei angeic hna kuca, me hmahma. Celë hi ka troa upi angeic troa ietra.
Ame ngöne la pane tusi Paulo koi angetre Korinito, öni angeic koi angatr, troa up la atr ka tha ietra kö qa ngöne la ekalesia (Wange ju la paragaraf 5)
6. Nemene la thangane la tusi Paulo kowe la ekalesia me kowe lai atr ka kuca la ngazo?
6 Paulo a hnying ka hape, tune kaa jë la aqane tro la ekalesia ne Korinito a kapa la tusi angeic. E thupen, hnei Tito hna traqa fë la itre maca ka amadrinë Paulo. Hnene la ekalesia hna kapa hnyawan la tusi Paulo. (2 Kor. 7:6, 7) Hnei angatr hna trongën la itre hnei angeic hna amekötin. Ketre, itre treu thupen la Paulo a iupi fë la tusi angeic, hnene lai atr ka kuca la ngazo hna ietra! Hnei xapo hna saze aqane ujë, me trongëne la itre trepene meköti Iehova. (2 Kor. 7:8-11) Nemene pena la hnei Paulo hna upe la ekalesia troa kuca?
AQANE UJË NE LA EKALESIA KOWE LA ATR KA IETRA
7. Nemene la thangan la hna upe la atr ka ngazo qa ngöne la ekalesia? (2 Korinito 2:5-8)
7 E jë la 2 Korinito 2:5-8. Öni Paulo ngöne la hnaaluene tusi angeic ka hape, ame kowe la atr cili, “ijije hi la ihaji hna hamën hnene la ka ala nyim.” Kola hapeue lai? Hetre thangane la ihaji koi angeic. Nemene la thangan? Hnei angeic hna ietra.—Heb. 12:11.
8. Nemene la hnei Paulo hna upe la ekalesia troa kuca e thupen?
8 Hnei Paulo hna upe la ekalesia troa “nue hnyawane la ngazo i angeic” me “akeukawanyi angeic.” Ketre, loi e tro fe angatr a “amamane la ihnimi angatr koi angeic.” Easa trotrohnine ka hape, tha aja i Paulo kö tro hi la itre trejin a kapa hmaca lai atr ngöne la ekalesia. Ngo aja i Paulo pe tro angatr a amamane jëne la aqane ithanata me aqane ujë laka, ase hë angatr nue hnyawan la ngazo i angeic, nge tru la ihnimi angatr koi angeic. Aqane tro hi angatre lai a amamane ka hape, madrine catre angatr tro hmaca a kepe angeice ngöne la ekalesia.
9. Hnauëne laka, ma xele kö itre xan troa kapa hnyawan la trejin ka ietra?
9 Hapeu, hetre trejine kö ka xele ma kapa hnyawan lai trejin ka ietra? Tha hna qaja kö hnei Tusi Hmitrötr. Ngo maine jë, itre xan a wesitr, ke hnei angeic hna aciane la itre jol ngöne la ekalesia. Maine pena, hetre hnei angeic hna akötrën ngöne la ekalesia hnene la aqane ujë i angeic. Nge ame itre xan, ma tha madrine kö angatr, ke kola kapa hnyawan la trejin ka ietra, nge ame kö angatr, hnei angatr hna isin troa wië qëmekei Iehova. (Wange ju la Luka 15:28-30.) Ngo hnauëne laka, nyipiewekë tro la ekalesia a amamane la ihnimi angatr kowe la trejin ka bëeke hmaca koi Iehova?
10-11. Nemene la ewekë ka troa traqa e xele kö la itre qatre thup ma nue la ngazo ne la atr ka ietra?
10 Pane mekune jë laka, tro la itre qatre thup a xele ma kapa hmaca la atr ka ietra ngöne la ekalesia. Maine tha tro kö la itre trejin a amamane la ihnimi angatr kowe la trejin hna kapa hmaca. Nemene la ka troa traqa? Tro hë lai a “heti angeic hnei hleuhleu.” Tro angeice lai a mekun ka hape, ka luzi hë angeic, me nuetrij la itre trengecatre i angeic troa imelekeu hmaca me Iehova.
11 Ketre, e tha nue kö la itre ngazo i angeic hnene la itre trejin ne la ekalesia, tro lai a angazone la imelekeu i angatr me Iehova. Pine nemen? Ke tha angatre kö lai a nyitipun la aqane nue Iehova la ngazo ne la itre ka ietra. Ngo angatre pe a nyitipu Satana, lo ka ngazo thiina nge ka pë ihnim. Nge angatr a nyijë i Satana matre sawa la atr ka ietra troa nyihlue i Iehova hmaca.—2 Kor. 2:10, 11; Efe. 4:27.
12. Tune kaa la aqane tro la ekalesia a nyitipu Iehova?
12 Tune kaa la aqane tro la ekalesia ne Korinito a nyitipu Iehova, ngo tha Satana kö? Troa nue hnyawane la ngazo ne la itre ka ietra, tui Iehova. Hane hi la aqane qeje Iehova hnene la itre xan ka cinyanyine la Tusi Hmitrötr. Öni Dravita, “Ka lolo nyipë nge nyipëti a treqen troa nue la ngazo.” (Sal. 86:5) Öni Mika: “Drei la Akötresie ka tui nyipë, Akötresie ka nue la ngazo me thëthëhmin la itre tria?” (Mika 7:18) Öni Isaia: “Epi tro la atr ka ngazo a nuetrije la itre thiina i angeic. Nge tro la atr ka menu a nuetrije la itre mekuna i angeic; epi tro angeic a bëeke koi Iehova, matre tro nyidrëti a utipi angeic, lo Akötresi së, ke nyidrëti a nue hnyawane la itre ngazo.”—Isa. 55:7.
13. Pine nemene matre meköt troa kapa hmaca la atr ka ietra ngöne la ekalesia? (Wange ju la hna eköhagen, “ Eu La Kola Kapa Hmaca La Atr Ka Kuca La Ngazo e Korinito?”)
13 Tro la ekalesia ne Korinito a nyitipu Iehova, e tro angatr a kapa hmaca la atr ka ietra, me amamane la ihnimi angatr koi angeic. Eje hi lai hnei angatr hna kuca! Hnei angatr hna kapa la itre hna amekötin hnei Paulo, me amamane ka hape, itre ka idrengethenge “ngöne la nöjei ewekë asë.” (2 Kor. 2:9) Ngacama itre treu hi ne upi angeic qa ngöne la ekalesia, ngo hnene la ihaji hna uku angeic troa ietra. Matre tha nyipiewekë kö troa nu aqeanyi angeic e kuhu tröne la ekalesia.
AQANE TRO SA NYITIPUN LA MEKÖT ME UTIPINE I IEHOVA
14-15. Nemene la ini hne së hna xom qa ngöne la aqane nyinyin la jol ka traqa ekö e Korinito? (2 Peteru 3:9) (Wange ju fe la iatr.)
14 Hna cinyanyine ngöne la Tusi Hmitrötr la aqane nyinyin la jol ka traqa ngöne la ekalesia ne Korinito ekö “göi troa ini së.” (Roma 15:4) Kola amamane hnene la hna melën celë laka, tha Iehova kö a kapa ngöne la ekalesia la itre atr ka kuca la ngazo, nge tha ka ietra kö. Tha Nyidrëti kö a utipine la atr cili, me nue angeic troa cas memine la itre hlue i Nyidrë. Nyipici laka, ka utipine Iehova, ngo tha Nyidrëti kö a kapa la itre huliwa ka ngazo. Nge tha saze kö la itre trepene meköti Nyidrë göi loi me ngazo. (Iud. 4) Maine tro Iehova a nue la atr ka tha ietra kö troa lapa ngöne la ekalesia, tha Nyidrëti kö lai a utipi së, ke tro lai a angazone la ekalesia.—It. Ed. 13:20; 1 Kor. 15:33.
15 Ngo kolo fe a amamane koi së laka, tha aja i Iehova kö troa mec la ala cas. Nyidrëti a isine troa amelene la nöjei atr asë. Maine tro ketre a saze, me isine troa acatrene la imelekeu i angeic me Nyidrë, tro Nyidrëti lai a utipi angeic. (Ezek. 33:11; e jë la 2 Peteru 3:9.) Matre ame la kola ietra hnene la trahmanyi ne Korinito me saze la aqane ujë i angeic, hnei Iehova hna upi Paulo troa qaja kowe la ekalesia troa nue la ngazo i angeic me kepe angeice hmaca.
Itre trejin a nyitipune la ihnim me utipine i Iehova, la angatr a kapa hnyawan la atr ka ietra (Wange ju la paragaraf 14-15)
16. Nemene la ka ej e kuhu hni eö la eö a öhne la aqane ujë i Iehova kowe la atr ka ietra ekö e Korinito?
16 Kola mama qa ngöne la aqane nyinyine la jol ka traqa ekö e Korinito, la ihnim me meköt me thiina ka meköti Iehova. (Sal. 33:5) Tha kolo kö lai a uku së troa atrunyi Iehova? Eje hi. Itre atr ka ngazo asë hi së, matre nyipiewekë tro Iehova a nue la itre ngazo së. Tru la hni ne ole së kowe la thupene mel hnei Iehova hna hamën, ke eje hi lai ka aijijë Nyidrë troa köletrij la itre ngazo së. Kola akeukawanyi së troa atre laka, tru la ihnimi Iehova kowe la nöje i Nyidrë, nge aja i Nyidrë tro la itre hlue i Nyidrë a mele ka loi!
17. Nemene la hne së hna troa ce wang ngöne la itre tane mekun e thupen?
17 Tune kaa la aqane hajine enehila la itre trejin ka kuca la ngazo? Tune kaa la aqane tro la itre qatre thup a nyitipu Iehova, matre tro la atr ka kuca la ngazo a ietra? Tune kaa la aqane tro la ekalesia a ujë la kola upe maine kapa hmaca la ketre atr ngöne la ekalesia? Tro la itre tane mekun e thupen a sa la itre hnyinge celë.
NYIMA 109 Ihnimi Ka Qa Kuhu Hni
