1-2. (a) Nemene la mekuna i Iehova göne la itre trejin ka kuca la ngazo nge ka tha ietra kö? (b) Nemene la hnei Iehova hna ajane troa kuca hnene la itre atr ka kei kowe la ngazo?

 THA madrine kö Iehova kowe la itre aqane ujë ka ngazo, ke methi Nyidrëti la ngazo. (Sal. 5:​4-6) Aja i Nyidrëti tro sa metrötrëne la itre trepene meköt ne la Tusi Hmitrötr, ke nyine loi koi së. Ngo atre hi Nyidrëti ka hape, itre atr ka tha pexeje kö së. Matre tha ijiji easë kö troa xötrethenge asë la itre hnei Nyidrëti hna amekötin. (Sal. 130:​3, 4) Ketre, tha madrine kö Nyidrë kowe la itre atr “ka ujëne la ihnimi gufa ne la Akötresi së, matre nyi kepin troa kuca la itre huliwa nyine hmahman.” (Iud. 4) Celë hi matre öni Tusi Hmitrötr, tro Akötresie a “apatrene la itre atr ka ngazo” ngöne la isi Amagedro.​—2 Pet. 3:7; Hna Am. 16:16.

² Ngo, tha aja i Iehova kö tro la ketre a mec. Tune lo hne së hna ce wang ngöne la itre tane mekun ka ase hë, öni Tusi Hmitrötr, “loi e tro pe nyipunieti asë a ietra.” (2 Pet. 3:9) Itre qatre thup a nyitipu Iehova la angatr a xatuane la itre trejin ka kuca la ngazo troa saze me imelekeu hmaca me Iehova. Ngo, tha angatr asë kö la ka kapa la ixatua cili. (Isa. 6:9) Ngacama itre qatre thup a isine troa xatua angatr troa ietra, ngo itre xane palahi a catre kuca la ngazo. Nemene la nyine troa kuca?

 ‘UPE PI QAATHEI NYIPUNIE LA ATRE KUCA LA NGAZO’

3. (a) Nemene la hnei Tusi Hmitrötr hna amekötin troa kuca kowe la itre trejin ka xele ma ietra? (b) Hnauëne la easa qaja ka hape, zöi angeice matre kola upi angeic qa ngöne la ekalesia?

³ Maine tha ietra kö la trejin ka kuca la ngazo, tro la itre qatre thup a trongën la hna amekötine göne 1 Korinito 5:​13 ka hape: “Xometrije [maine upe] pi qaathei nyipunie la atre kuca la ngazo.” Angeice kö lai a xeni pun la itre huliwa i angeic me menuëne la hnei angeic a hna traan. (Gal. 6:7) Hnauëne la easa qaja tune lai? Ke aija thel hnene la itre qatre thup troa xatua angeic troa ietra, ngo tha saze kö angeic. (2 It. Jo. 17:​12-​15) Angeice hi lai a amamane ka hape, xele kö angeic ma trongëne la itre trepene meköti Iehova.​—Dreut. 30:​19, 20.

4. Hnauëne la kola thuemacanyine la ekalesia ka hape, tha Temoë Iehova hmaca kö ketre?

⁴ Ame la kola upe la ketre trejin ka xele ma ietra, kola thuemacanyine la ekalesia ka hape, tha Temoë Iehova hmaca kö angeic. Tha kolo kö a thuemacanyine la ekalesia matre thaipië angeic. Ngo göne hi matre tro la ekalesia a trongëne la hna qaja hnei Tusi Hmitrötr ka hape, “tha tro hmaca kö nyipunie a nyi sineene” la itre ka tha ietra kö, nge “goi tha tro fe nyipunieti a hane ce xeni me itre ka ujë tun.” (1 Kor. 5:​9-​11) Hetre kepin matre kola amekötine tune lai. Öni Paulo aposetolo: “Hnene hi la ca wamine leven matre cipa asë jë la farin hna ce lomëne me tim.” (1 Kor. 5:6) Eje hi, tro la itre ka tha ietra kö a ajojezine la itre ka isine troa mele thenge la itre trepene meköti Iehova.​—It. Ed. 13:20; 1 Kor. 15:33.

5. Tune kaa la aqane tro sa ujë kowe la trejin hna upe qa ngöne la ekalesia, nge pine nemen?

⁵ Tune kaa la aqane tro sa ujë kowe la ketre trejin hna upe qa ngöne la ekalesia? Ngacama tha easë hmaca kö a ce tro me angeic, ngo tha tro pi kö sa mekune ka hape, ka luzi hë angeic. Ceitui angeic me ketre neköi mamoe ka patr laka, ijiji angeic pala hi troa bëeke hmaca. Eje hi, hnei angeic hna nue la mele i angeic koi Iehova. Ngazo pe, tha hnei angeic kö hna mele nyipici koi Nyidrë, matre jole catre hë la mele i angeic. (Ezek. 18:31) Ngo ijine palakö tro angeic a bëek koi Iehova, nge aja i Nyidrë troa utipi angeic. Nemene la aqane tro la itre qatre thup a amamane ka hape, aja i angatr tro la itre hna up a bëek koi Iehova?

AQANE TRO LA ITRE QATRE THUP A XATUANE LA ITRE HNA UP

6. Nemene la hna kuca hnene la itre qatre thup matre xatuane la ketre hna up qa ngöne la ekalesia?

⁶ Hapeu, ame la kola upe la ketre trejin qa ngöne la ekalesia, itre qatre thup kö a nuetriji angeic? Waea! Ame la komite ne qatre thup a thuemacanyine la trejin ka tha ietra ka hape, tro ha upi angeic, ke angatre fe a qaja la nyine tro angeic a kuca, matre bëeke hmaca kowe la ekalesia. Ngo tha eje hmekuje kö lai. Tro fe la itre qatre thup a qaja koi angeic ka hape, aja i angatr troa iöhnyi hmaca me angeic thupene la itre treu, matre wange ka hape, saze hë la itre thiina i angeic. Maine ajane hi angeic troa iöhnyi me angatr, tro la itre qatre thup a ithuecatr koi angeic ngöne la ijine cili troa ietra me bëeke hmaca. Ngo e tha saze pala kö angeic, tro la itre qatre thup a thele troa iöhnyi hmaca me angeic, matre xatua angeic troa ietra.

7. Tro la itre qatre thup a nyitipune tune kaa la aqane utipine i Iehova, la kola upe la ketre qa ngöne la ekalesia? (Ieremia 3:​12)

 ⁷ Itre qatre thup a isine troa nyitipune la aqane utipine i Iehova, la angatr a ithanata memine la ketre hna upe qa ngöne la ekalesia. Tha hnei Iehova kö hna treqene tro la nöje i Nyidrëti ekö ka tha idrei a bëek koi Nyidrë. Ngacama tha saze kö angatr, ngo pa i Nyidrëti kö thel troa xatua angatr. Ame ngöne lo hnaaluene tane mekun, hne së hna öhne la utipine i Iehova ngöne la aqane ujë i Hosea perofeta kowe la föi nyidrë, ngacama eahlo palahi a kuca la ngazo. (Hos. 3:1; Mala. 3:7) Tui Iehova, itre qatre thup a ajane matre tro la hna up a ietra me bëek hmaca. Nge tha tro kö angatr a ajolë angeic troa bëek.​—E jë la Ieremia 3:​12.

8. Kola mama tune kaa la ihnim me utipine i Iehova ngöne la ceitune i Iesu? (Luka 15:7)

⁸ Pane mekune jë së la ceitune i Iesu göne la nekönatr ka patr, hna qaja ngöne la hnaaluene tane mekun. Ame la kem a öhne la nekö i nyidrë a bëek kowe la hnalapa, hnei nyidrëti hna “nyinyap, me haluthi angeic, me dremi angeic.” (Luka 15:20) Tha hnei nyidrëti kö hna treqene tro la nekö i nyidrëti a qeje menu. Pine laka tru la ihnimi nyidrëti koi angeic, hnei nyidrëti hna canga nyinyap koi angeic. Aqane tro fe hi la itre qatre thup a ujë kowe la itre trejin hna upe qa ngöne la ekalesia. Aja i angatr tro la itre neköi mamoe ka patr a “bëeke hmaca.” (Luka 15:​22-​24, 32) Drei jë kö la madrin e hnengödrai me e celë fen la kola ietra la ketre atr!​—E jë la Luka 15:7.

9. Nemene la aja i Iehova kowe la itre ka kuca la ngazo?

⁹ Tune la hne së hna ce wang, tha Iehova kö a kapa la atr ka kuca la ngazo e tha ka ietra kö. Ngo, tha Nyidrëti kö a nuetriji angatr. Aja i Nyidrë troa angatr a bëeke hmaca koi Nyidrë. Kola mama la ihnimi Iehova kowe la itre ka ietra ngöne Hosea 14:​4, la kola hape: “Tro ni a aloinyi angatr, ke hnei angatr hna tha mele nyipici. Tro ni a hnimi angatre qa kuhu hning, ke tha elëhni hë ni koi angatr.” Kolo lai a amamane kowe la itre qatre thup laka, troa canga xatuane la atr ka pi ietra. Nge kolo fe a ithuecatr kowe la itre ka nuetriji Iehova troa canga bëek.

10-11. Tune kaa la aqane tro la itre qatre thup a xatuane la itre atr laka, ekö hë upi angatr qa ngöne la ekalesia?

¹⁰ Nge tune kaa kowe la itre atr hna upe ekö qa ngöne la ekalesia, a ije macatre hë la? Maine jë, tha kuca hë angatr lo ngazo i angatre ekö, maine thëthëhmine hë angatr la kepin matre upi angatre jë. Loi e tro la itre qatre thup a thele la itre atre cili me wai angatr. Nge ame hë la itre qatre thup a wai angatr, loi e tro nyudren a ce thith me angatr me ithuecatre koi angatr troa bëeke hmaca kowe la ekalesia. Nyipici laka, e qea catre la ijine lapa angatr e kuhu trön, nyipiewekë tro hmaca angatr a atre Iehova me itre nyipici qa hnine la Tusi Hmitrötr. Matre, e aja i ketre troa bëek hmaca kowe la ekalesia, loi e tro la itre qatre thup a upe la ketre trejin troa ini Tus me angeic, ngacama tha ase palakö kepe angeic ngöne la ekalesia. Ngo qanyine kö la itre qatre thup iëne la trejin ka troa ini Tus me angeic.

¹¹ Itre qatre thup a nyitipune la aqane utipine i Iehova, la angatr a xatuane la nöjei atr ka nuetriji Nyidrë troa bëeke hmaca. Maine tro la ketre atr ka kuca la ngazo a ietra me saze la aqane ujë i angeic, ijije hi troa canga kepe angeic ngöne la ekalesia.​—2 Kor. 2:​6-8.

12. (a) Eue la itre ijine tro la itre qatre thup a hmek qëmekene troa kapa hmaca la ketre atr hna up? (b) Pine nemene matre tha tro pi kö sa qaja ka hape, tha ijiji Iehova kö troa nue la ngazo i angeic? (Wange ju la ithuemacany.)

 ¹² Ngo loi e tro la itre qatre thup a hmek, la angatr a mekune troa kapa hmaca la ketre atr ngöne la ekalesia. Ame kowe la itre ka qanangazone la ketre nekönatr ekö, maine ka iamenumenu, maine ka thelejën troa apëne la faipoipo i angatr, loi e tro la itre qatre thup a wange ka hape, itre ka nyipi ietra kö. (Mala. 2:​14; 2 Tim. 3:6) Nyipiewekë tro la itre qatre thup a thupëne la itre neköi mamoe i Akötresie. Ame pe, tha tro kö sa thëthëhmine laka, aja i Iehova troa kapa hmaca la atr ka kuca la ngazo, e ka nyipi ietra me saze aqane ujë. Ngacama itre qatre thup a hmek, ngo tha  tro pi kö angatr a qaja ka hape, tha ijije kö tro Iehova a nue la ngazo ne la itre atre cili. b​—1 Pet. 2:​10.

NYINE TRO LA EKALESIA A KUCA

13. Nemene la aqane ujë së kowe la trejin hna amekötine hnene la itre qatre thup, memine la trejin hna upe qa ngöne la ekalesia?

¹³ Tune la hne së hna ce wange ngöne la tane mekun ka ase hë, ame itre xaa ijin, kola thuemacanyine la ekalesia ka hape, ase hë amekötine la ketre trejin. Ame e cili, easë palahi a ce tro me angeic. Pine nemen? Ke hnei angeic hna ietra me saze aqane ujë. (1 Tim. 5:​20) Angeic palahi a sine la ekalesia, nge loi e tro la itre trejin a ce tro me angeic, matre troa ithuecatre koi angeic. (Heb. 10:​24, 25) Ngo, tha ceitune kö lai memine la kola upe la ketre trejin qa ngöne la ekalesia. Tha tro hmaca kö së ‘a nyi sinee’ angeic, ‘nge goi tha tro fe së a hane ce xeni’ me angeic.​—1 Kor. 5:​11.

14. Tune kaa la aqane tro la ketre keresiano a drenge la mekuthetheu i angeic la kola iöhnyi memine la ketre atr hna upe qa ngöne la ekalesia? (Wange ju fe la iatr.)

¹⁴ Hapeu, ame la hna qaja ngöne 1 Korinito 5:​11, kolo kö a qaja ka hape, tha tro kö sa hëne la ketre atr hna upe kowe la icasikeu, maine ibozu me angeic ngöne la ijine icasikeu? Waea. Nyipici laka, tha tro kö së lai a ce tro me angeic. Ngo tro sa isa huliwane la mekuthetheu së hna inine hnei Tusi Hmitrötr, matre axeciëne ka hape, tro kö sa hëne la ketre fami së maine ketre sinee së hna upe qa ngöne la ekalesia, troa hane sine la icasikeu. Nge tune kaa e tro angeic a traqa? Ame ekö, tha easë kö a ibozu memine la atr hna upe qa ngöne la ekalesia. Ngo ame enehila, isa qanyi së pë hë iën, thenge la mekuthetheu i easë hna inine hnei Tusi Hmitrötr. Ame koi itre xan, ka loi koi angatr troa ibozu memine la atre cili me kepe angeic ngöne la ijine icasikeu. Ngo, tha tro pi kö sa porotrik me ca lapa me angeic.

15. Drei la atr hna qaja ngöne 2 Ioane 9-​11? (wange ju fe la hna eköhagen “ Hapeu Casi Kö La Ngazo Hna Qaja Hnei Ioane Me Paulo?”)

¹⁵ Ngo itre xan a hnyinge ka hape, ‘Tha  Tusi Hmitrötre kö lo a qaja ka hape, ame la atr ibozu memine la atre cili, ke angeic a nyixölene la itre ngazo i angeic?’ (E jë la 2 Ioane 9-​11.) Kola amamane hnene la itre xötr ka tro pa me ka tro pi laka, ame la hna amekötine cili, ke thatraqane la itre ka iamenumenu me itre ka iuku troa kuca la ngazo. (Hna Am. 2:​20) Haawe, maine tro la ketre atr a tro fë la itre ini ne la itre ka iamenumenu maine itre xaa thiina ka ngazo, tha tro kö la itre qatre thup a wai angeic. Ngo tha kolo kö lai a hape, tha ijiji angatre kö troa saze. Ame pe, e tha saze kö la atre cili, tha tro pi kö së a ibozu me angeic, maine hë angeic kowe la itre icasikeu.

NYITIPUNE JË LA IHNIM ME UTIPINE I IEHOVA

16-17. (a) Nemene la aja i Iehova kowe la itre atr ka kuca la ngazo? (Ezekiela 18:32) (b) Nemene la aqane tro la itre qatre thup a ce huliwa me Iehova?

¹⁶ Nemene la itre ini hne së hna xom qa ngöne la 5 lao tane mekun? Tha aja i Iehova kö tro la ketre a mec! (E jë la Ezekiela 18:32.) Aja i Nyidrëti pe tro la itre atr ka kuca la ngazo a bëeke hmaca koi Nyidrë. (2 Kor. 5:​20) Celë hi matre qane ekö, anyimua ielen Iehova la nöje i Nyidrë, memine la itre atr ka icilekeu troa ietra me bëek koi Nyidrë. Hnëqa ne la itre qatre thup troa ce huliwa me Iehova, matre xatuane la itre ka kuca la ngazo troa ietra.​—Roma 2:4; 1 Kor. 3:9.

¹⁷ Pane mekune jë la madrine e hnengödrai, la kola ietra la ketre atr ka ngazo! Drei jë kö la madrine Iehova Keme së, la kola bëeke hmaca kowe la ekalesia hnene la itre neköi mamoe ka patr. Kola kökötre la ihnimi easë koi Iehova, la easa lapa mekune la ihnim me utipine me ihnimi gufa i Nyidrë.​—Luka 1:​78.