Öni Paulo aposetolo kowe la itre keresiano ne Thesalonika ka hape: “Maine xele kö ketre ma drenge la hne huni hna qaja hnine la tusi celë, nyi hatre i angeice ju.” (2 Thes. 3:​14) Ame ekö, easa mekune ka hape, thatraqane la itre qatre thup la hna amekötine cili. Eje hi, itre qatre thup a cile fë cainöje matre hmekëne la ekalesia, e tro pala hi la ketre trejin a xele ma kapa la itre eamo qa hnine la Tusi Hmitrötr. E thupen, itre trejin a ce me angeic ngöne la itre icasikeu, maine ngöne la hna cainöj, ngo tha angatre hmaca kö a ce tro lapa me angeic.

Ngo hetre hna saze hë. Easa trotrohnine enehila ka hape, ame la eamo i Paulo ke thatraqane la itre trejin angatr isa ala cas. Matre tha tro hmaca kö la itre qatre thup a cile fë la ketre cainöj matre nyi hatre la ketre trejin. Pine nemen? Tro sa ce wange la itre xötre ka tro pa, me ka tro pi.

Hnei Paulo hna öhne ka hape, ame la itre xaa atrene la ekalesia, ke itre “ka tha idrei.” Xele kö angatre ma drenge la itre eamo hna hamën hnene la ua. Ame lo ketre traqa i Paulo, hnei angeic hna amekötine ka hape: “Maine ketre a xele ma huliwa, tha tro kö angeic a xen.” Ngo ame itre xan, xele pala hi angatre ma huliwa, ngacama ijiji angatre hi. Ketre, angatr a lö hnine la itre ifekë jolen. Nemene la aqane tro la itre trejin a ujë kowe la itre trejine cili ka tha idrei?​—2 Thes. 3:​6, 10-​12.

Öni Paulo: “Nyi hatre i angeice ju.” Ame la hnëewekë qene Geres, ke kola hape, thupëne pala kö la aqane ujë i angeic. Hnei Paulo hna hamëne la hna amekötine cili kowe la ekalesia asë, ngo tha koi itre qatre thupe hmekuje kö. (2 Thes. 1:​1; 3:6) Matre isa qanyine kö la itre keresiano ka öhne la aqane tha idrei la ketre trejin troa axeciëne ka hape, tha tro hmaca kö a nyi sinee i angeic.

Kolo kö lai a qaja ka hape, tro sa ujë koi angeic tune la aqane ujë së kowe la ketre trejin hna upe qa ngöne la ekalesia? Waea, öni Paulo: “Tro pe a catre eamo angeic ke ketre trejine hi lai.” Matre, itre trejin a ce tro me angeic ngöne la itre ijine icasikeu, me ngöne la hna cainöje trootro, ngo isa qanyi angatre kö iëne ka hape, tro kö angatr a ce tro me angeic ngöne la itre ijine madrin. Pine nemen? Öni Paulo: “Matre hmahma pi angeic.” E tro sa nyi hatre i angeic, tro angeice lai a hmahma pine la aqane ujë i angeic, me saze.​—2 Thes. 3:​14, 15.

Tune kaa la aqane tro la itre keresiano enehila a trongëne la eamo celë? Loi e tro sa wange hnyawane ka hape, “ka tha idrei” kö la trejin thenge la hna qaja hnei Paulo. Tha Paulo kö a qaja la itre trejine ka isa mekuthetheu kö me easë, maine aqane ië ewekë. Nge tha angeice kö a qaja la itre trejine ka akötrë së. Paulo pe a qaja la itre trejine ka sipu iëne troa tha drenge la itre eamo hna hamën hnei Tusi Hmitrötr.

Ame enehila, maine easa öhne la ketre trejin ka tha idrei, a isa qanyi easë kö iëne ka hape, tro kö së a ce tro, maine ce madrine memine la atre cili. Pine laka, hnei easë hna ketre sipu axeciën, tro hi sa ithanatane lai memine la itre atrene la fami së e kuhu hnalapa. Ngo tro pala hi së a ce me angeic ngöne la itre ijine icasikeu, me ngöne la hna cainöje trootro. E tro angeic a saze la itre thiina i angeic, tro hmaca sa ce tro me angeic.