1, 2. (a) Nemene la tingeting ka ej the së? (b) Pine nemene matre tha ka pexeje kö la tingeting enehila? (Wange ju la pane iatr.)

ITRE atr asë hi së ka thel troa mele tingeting, nge pëkö troa xou. Matre, tru la hni ne ole së koi Iehova ke, Nyidrëti a hamë së la “tingetinge ka sisitia.” Tingeting la ka thupë së qa ngöne la itre mekun ka iajolë. (Filipi 4:6, 7) Hnene laka, hne së hna nue la mele së koi Iehova, haawe, “tingetingë hë së me Akötresie.” Kolo lai a hape, lolo hë la aqane imelekeu së me Nyidrë.—Roma 5:1, MN.

² Eje hi laka, tha ijine pala kö tro Iehova a acil la tingeting e celë fen. Easa melëne la itre drai ne la pun, matre nyimutre la itre jol ka traqa koi së. Nge, kola lapa xötreithi së hnene la itre atr ka ngazo. (2 Timoteo 3:1-4) Ketre, easë a icilekeu me Satana memine la itre ini hnei angeic hna tro fë. (2 Korinito 10:4, 5) Ngo, ame la ka troa ajolëne catrëne la hni së tre, ene la icilekeu ne la itre atrene la hnepe lapa së ka tha  nyihlue i Iehova kö. Angatr a hnyimasai së me upe koi së la kola gomegome la hnepe lapa. Maine pena, e tha nuetrije kö së la hmi, tro ha upe triji së qa ngöne la hnalapa. Matre, nemene la aqane tro sa goeëne la icilekeu cili? Nge, nemene la aqane tro pala hi sa thele la tingeting?

3, 4. (a) Nemene la thangane la itre ini hnei Iesu hna tro fë? (b) Eu la ijine laka, jole pi hë troa xötrethenge Iesu?

³ Atre hnyawa hi Iesu laka, tha tro kö a kapa hnene la itre atr asë la itre ini hnei nyidrëti hna hamën. Ketre, nyipiewekë tro la itretre drei Iesu a catr, ke, hetre itre atr ka troa icilekeu me angatr. Matre, tro lai a ajolëne la aqane imelekeu ne la hnepe lapa. Öni Iesu: “The mekune kö, ka hape, traqa ha ni troa upe la tingetinge kowe la fen; tha traqa kö ni troa upe la tingeting, ngo taua pe. Ke traqa ha ni troa iananyine la kuku memine la keme i angeic, me jajinyi memine la thine i angeic, me tesine memine la tesi angeic. Ame la nöjei ithupëjia memine la ate, te, it’ eje kö ngöne la hnalapa i angeice kö.”—Mataio 10:34-36.

⁴ Nemene la aliene la ithanata i Iesu lo kola hape, “The mekune kö, ka hape, traqa ha ni troa upe la tingetinge”? Aja i nyidrë tro la itre atr a trotrohnine laka, ka hetre ejolen la troa xötrethenge nyidrë. Ame la aja i Iesu tre, troa qaja amamane la nyipici göi Akötresie, ngo tha tro pe a ajolëne la aqane imelekeu ne la hnepe lapa. (Ioane 18:37) Tha ka hmaloi kö troa xötrethenge nyidrë la kola icilekeu hnene la itre sinee, maine itre atrene la hnepe lapa.

5. Nemene la hna melëne hnene la itretre drei Iesu?

⁵ Öni Iesu, loi e tro la itretre drei nyidrë a cile hut la kola icilekeu hnene la itre atrene la hnepe lapa. (Mataio 10:38) Hna hnyimasai angatr, me upetriji angatr hnene la hnepe lapa i angatr. Ngo, sisitria kö la hnei angatr hna kapa hun la hnei angatr hna nue pe. Hnei angatr hna cile hut ke, aja i angatr troa amadrinë Iesu.—E jë la Mareko 10:29, 30.

6. Nemene la nyine tro sa mekun la kola icilekeu hnene la itre sinee së?

⁶ Nyipici laka, tro lai a icilekeu me easë hnene la itre sinee së ke, easa nyihlue i Iehova. Ngo loi e tro pala hi sa hnimi angatr. The thëthëhmine pi kö laka, loi e troa sisitria la ihnimi së koi Akötresie me Iesu hune la ihnimi së koi ketre. (Mataio 10:37) Ketre, Satana a kuca matre tro sa hnim catrëne la hnepe lapa së me nuetriji Iehova. Tro sa ce wange la itre xa jol ka traqa koi së, me wang la aqane tro sa cile hut.

7. Nemene la aqane tro la trejin a goeëne la pengöi angeic, e ka tha hmi kö la föi angeic?

⁷ Tusi Hmitrötr a thuemacanyi së ka hape, tro la itre ka faipoipo a “hete aköte i ngönetei,” maine troa traqa la itre jol. (1 Korinito 7:28) Nge, the qaja pala ha e tha ka hmi kö la föi epun. Ame e cili, loi e troa goeëne la pengöi epuni tune la aqane goeëne Iehova. Öni Nyidrë göne la föe së ka tha hmi kö ka hape, tha tro kö sa isalapa, maine seihnacil memin. (1 Korinito 7:12-16) Ngacama tha ka hmi kö la trahmanyi epun, nge tha ka nyipine kö la hmi, ngo qa i epun troa metrötrë angeic ke, angeic la he ne la hnepe lapa. Nge, e tha ka hmi  kö la föe, loi e tro pala hi la trahmanyi a hnim, me nyihnyawa angeic.—Efeso 5:22, 23, 28, 29.

8. Nemene la aqane troa tulu ewekë hnene la föe e traqa ju ami ifego eahlo hnene la trahmany göne la huliwa i Iehova?

⁸ Nemene la nyine tro la trejin föe a kuca, e kola ami ifego eahlo hnene la trahmany göi troa kuca la huliwa i Iehova? Hnene la trahmany hna sa draine hi kowe la föi nyidrë troa cainöje trootro. Maine, celë hi la hnei epuni hna melën, isa hnyinge jë ka hape: ‘Hapeu, kolo lai a sewe ni troa nyihlue i Iehova? E tha eje kö lai, tro kö ni a drengethenge nyidrë?’ E ka atreine tulu ewekë epun, xalaithe hi la itre jol hnei epuni hna troa cile kow e hnine la faipoipo.—Filipi 4:5.

9. Nemene la aqane tro la trejin a inine la itre kuku troa metrötrën la kem maine thine i nyudren ka tha hmi kö?

⁹ Tha ka hmaloi kö troa inine la itre nekönatr, e tha ka nyihlue i Iehova kö la föi epun. Nyipiewekë troa ini nyudreni troa xötrethenge la hna amekötin hnei Tusi Hmitrötr lo hna hape: “Denge thenge ju la ite keme me thine i nyipunie.” (Efeso 6:1-3) Tune kaa e tha ihmeku kö la aqane ujë ne la föi epun memine la hna qaja hnene la Tusi Hmitrötr? Amamai tulu jë kowe la itre kuku, nge metrötrëne ju la föi epun. Wangatrune ju la itre thiina ka lolo thei angeic, me qaja amamane la madrine i epun kowe la itre ewekë ka loi hnei angeic hna kuca. The jelengazo angeice kö qëmekene la itre nekönatr. Nge, qaja jë koi nyudreni laka, easë isa ala cas la ka axeciëne troa nyihlue i Iehova. E tro epuni a inine la itre nekönatr troa metrötrëne la keme maine thine ka tha hmi kö, tro la aqane ujë i nyudren a ea la föi epun kowe la nyipici.

10. Nemene la aqane tro la trejin a xatuane la itre nekönatr troa hnimi Iehova?

¹⁰ Ame itre xa ijin, hnene la trahmanyi ka tha hmi kö hna amekötin laka, tro la itre nekönatr a atrune la itre feete i  wanaithihlë, maine kapa la itre ini ka thoi ne la hmi angeic. Nge, hetre itre trahmanyi ka wathebone la itre föi angatr troa inine la Tusi Hmitrötr kowe la itre nekönatr. Ame e cili, loi e tro pala hi angeic a isin troa inine la nyipici kowe la itre nekönatr. (Ite Huliwa 16:1; 2 Timoteo 3:14, 15) Maine jë, xele kö la trahmanyi tro la föe a ini Tus kowe la itre nekönatr, maine tro sai nyudreni kowe la itre icasikeu. Kola metrötrën hnene la föe la aja i trahmany, ngo e ijij, tro angeic lai a ithanatane kowe la itre nekönatr la itre hnei angeic hna mejiun kow. Celë hi aqane tro nyudreni lai a atrepengöi Iehova, me atrehmekune la loi me ngazo. (Ite Huliwa 4:19, 20) Eje hi laka, qanyine kö la itre nekönatr troa ketre sipu axeciëne troa nyihlue i Iehova. * (Wange ju la ithuemacany.)—Deuteronomi 30:19, 20.

11. Pine nemene matre fetra jë la itre jol e hnine la hnepe lapa?

¹¹ Ame lo easa nyiqaane ini Tusi memine la Itretre Anyipici Iehova tre, tha hne së kö hna thuemacane la hnepe lapa së. Nge, kola kökötre trootro la lapaune së, nge kolo fe a mama la enyipiewekën troa qaja koi angatr la aja së troa nyihlue i Iehova. (Mareko 8:38) Matre tro lai a traqa la itre jol e hnine la hnepe lapa. Ngo, loi e tro pala hi sa thel matre tha tro kö a akökötrene lai jol, me thele tingeting. Tro sa ce wange la aqane tro sa eatrëne lai.

12. Pine nemene matre kola icilekeu me easë hnene la itre sinee së, nge nemene la ka amamane laka, easa nyipiewekëne la itre mekuna i angatr?

¹² Thele jë troa trotrohnine la mekuna ne la sinee i epun. Nyipici laka, hetre madrine së la easa atre la itre nyipici ne la Tusi Hmitrötr. Ngo, ame kowe la itre sinee së, hna iaö së, matre tro sa lö kowe la ketre hmi. Maine pena, tha hnimi angatre hë hne së ke, tha ce atrune hmaca kö së me angatr la itre feet. Ketre, angatr a seseu göne la pengö së e meci pi së. Loi e tro sa pane thel troa trotrohnine la mekuna i angatr, me drei angatr hnyawa. Tro hë së lai a atre la kepine matre angatr a seseune la mele së. (Ite Edomë 20:5) Hnei Paulo aposetolo hna thel troa trotrohnine la “nöjei ate asë” matre troa hane ce thawa me angatr la maca ka loi. E tro sa ujë tune lai kowe la itre atrene la hnepe lapa së, tro hë së lai a atreine ce thawa me angatr la nyipici.—1 Korinito 9:19-23.

13. Tune kaa la aqane tro sa ithanata memine la itre sinee së ka tha hmi kö?

¹³ Ithanata jë cememine la menyik. Öni Tusi Hmitrötr: “Loi e ewekë pala hi nyipunie memine la ihnimi.” (Kolose 4:6) Tha ka hmaloi kö e troa ujë tune lai. Sipo Iehova jë la uati hmitrötr matre tro pala hi sa menyik memine la itre sinee së. The isi  ithanata kö me angatr göne la itre ini hnei angatr hna lapaune kow. Maine hna akötrë epuni hnene la aqane ithanata, maine aqane ujë i angatr, loi e tro sa nyitipune la itre aposetolo. Öni Paulo: “Kola qaqa hun, nge eëhuni a ewekë aloin; kola axösisi hun, nge eëhuni a xomi hnine ju; kola jelë hun; nge eëhuni a sipo.”—1 Korinito 4:12, 13.

14. Nemene la itre manathithi hna kapa qa ngöne la elolone la thiina së?

¹⁴ Loi e tro pala hi a lolo la thiina së. Maine nyipici laka, nyipiewekë troa menyik la aqane ithanata së, ngo ka hetre thangane catre kö la aqane ujë së. (E jë la 1 Peteru 3:1, 2, 16.) Tro lai a ketr la itre sinee së. Nge jëne la aqane ujë së, troa mama koi angatr ka hape, ka tingeting la faipoipo ne la Itretre Anyipici Iehova, nge angatr a thupën hnyawan la itre nekö i angatr, me mele thenge la itre trepene meköti ne la Tusi Hmitrötr, nge ka hetre aliene la mele i angatr. Ngacama tha kapa kö la nyipici hnene la itre sinee së, ngo ame la ka tru koi së tre, ene la tro sa amadrinë Iehova hnene la aqane mele nyipici së koi Nyidrë.

15. Nemene la aqane tro sa hnëkë matre tha tro kö sa iwesitrë memine la itre sinee së?

¹⁵ Hnëkën amë jë la nyine troa kuca. Pane mekune ju la itre ijine ka troa aciane la iwesitrë, nge axeciëne jë hë la nyine troa kuca. (Ite Edomë 12:16, 23) Celë hi hna kuca hnene la ketre trejin föe qa Australie. Ka icilekeu catr la keme ne la föi angeic kowe la nyipici, nge ka canga elëhni. Matre, e mekune hë angeic me föi angeic troa hë nyidrë ngöne telefon, nyidroti mina a sipone la ixatua i Iehova matre tro pala hi a menyike la aqane ithanata i nyidro koi nyidrë. Tro nyidroti a hnëkën la itre mekun nyine troa porotrikëne matre tro pala hi a lolo la ijine cili. Nge, hna sa traemene hi la ihë matre tha tro kö a isi ithanata me nyidrë göi hmi.

16. Nemene la aqane tro epuni a elë hun la itre mekun ka iajolë?

¹⁶ Nyipici laka, tro pala hi lai a isazikeu la itre mekune i epun memine la itre sinee i epun ka tha hmi kö. Tro lai a ajolëne la hni epun ke, tru la ihnimi epun koi angatr, nge aja i epun troa amadrinë angatr. Ngo, the thëthëhmine kö laka, loi e troa tro pa la ihnimi epun koi Iehova hune la ihnimi epun kowe la hnepe lapa i epun. Maine jë, tro angatre lai a trotrohnine la enyipiewekëne troa nyihlue i Iehova. Ngo, thatreine kö epuni troa musinë ketre me ketre troa kapa la nyipici. Tro kö angatre lai a öhne la itre eloine la troa xötrethenge la itre trepene meköti Iehova. Iehova a aijijë angatre fe troa hane axeciëne troa nyihlue i Nyidrë tui epun.—Isaia 48:17, 18.

17, 18. Nemene la ka troa xatua epun e nuetriji Iehova jë hnene la sinee i epun?

¹⁷ E hetre atrene la hnepe lapa i epun  hna upetröneë, maine ka sipu trotrije la ekalesia, tro epuni lai a akötr. Hna aceitunëne lai memine la kola li hele epun. Matre nemene la aqane tro epuni a cile hut?

¹⁸ Catre jë kuca la itre huliwa i Iehova. Ame la epuni a qëmeke kowe la itre akötr ka tune lai, nyipiewekë tro epuni a acatrene la lapaune i epun. Loi e tro epuni a e la Tusi Hmitrötr, me hnëkën me sine la itre icasikeu. Catre jë cainöjëne la maca ka loi, nge sipo trengecatre jë koi Iehova matre troa cile hut. (Iuda 20, 21) Tune kaa e tha patre kö la akötr? The kucakuca kö! Catre jë huliwa i Iehova. Tro lai a xatua epun troa xomihnine la akötre ka ej thei epun. Celë hi hna kuca hnene la atre cinyihane la Salamo 73. Hna tria la itre mekuna i angeic, ngo hnei angeic hna catre kuca la huliwa i Iehova. Celë hi ka aijijë angeic troa wenë amekötine la mekuna i angeic. (Salamo 73:16, 17) Maine tro epuni a catre kuca la huliwa i Iehova, tro fe a xatua epun tune lai.

19. Nemene la aqane tro epuni a nyipiewekëne la ihaji qaathei Iehova?

¹⁹ Nyipiewekëne jë la ihaji qaathei Iehova. Nyipici laka, troa tro loi la mele ne la atr, e hna kapa hnyawa la itre ihaji qaathei Iehova, ene mina fe la itre hna upetröneë. Maine nyipici laka, kola akötr la kola hajin la atr hne së hna hnim, ngo tro lai a xatua angeic troa bëeke koi Iehova e thupen. (E jë la Heberu 12:11.) Matre, loi e tro sa trongëne la hna amekötine hnei Iehova lo kola hape, [“the ce tro hmaca kö,” MN] memine la itre hna upetröneë. (1 Korinito 5:11-13) Tha ka hmaloi kö. Ngo, tha tro pi kö sa thel troa ihë, me iupi fë maca jëne mobilis, maine tus, maine e-mail, maine porotrik jëne Ëternet pena.

20. Nemene la aqane tro pala hi sa catr me mejiun?

²⁰ Catre pi pe me mejiun! Ame la ihnim tre, “ate mejiune la nöjei ewekë asë,” matre catre jë mejiune laka, tro kö la atr hnei epuni hna hnim a bëeke koi Iehova. (1 Korinito 13:7) Maine epuni a öhne laka, angeic a nyiqaane amekötine la mele i angeic, thithi jë matre tro angeic a hetrenyi pala hi la trengecatr qa hnine la Tusi Hmitrötr, me kapa la ihë i Iehova kola hape: “Hmacaju koi ni.”—Isaia 44:22.

21. Nemene la nyine tro epuni a kuca e kola icilekeu hnene la hnepe lapa i epun?

²¹ Hnei Iesu hna upi së troa hnime catrë nyidrë hune la itre xa atr. Xecie hnyawa koi nyidrë laka, tro la itretre drei nyidrë a nyipici koi nyidrë, ngacama kola icilekeu hnene la hnepe lapa i angatr. Matre, e traqa jë la icilekeu ne la hnepe lapa i epun pine laka epuni a xötrethenge Iesu, haawe, qale jë koi Iehova. Sipo ixatua jë koi Nyidrë matre troa cile hut. (Isaia 41:10, 13) Loi e tro epuni a lapa atre laka, Iehova me Iesu a kepe epun, nge tro nyidroti a amanathithi epun. Celë hi ka troa thue madrine i epun.