HNA hnaho ni lo macatre 1934. Ame kaka me nenë, Fred me Edna Molohan, tre, 20 hë lao macatre ne lue Atre Ini Tusi Hmitrötre nyidro (Itretre Anyipici Iehova). Eni a madrine ke, hnei nyidroti hna ini ni troa hnimi Iehova. Eahuni a lapa e Parsons, ketre neköi traon e Kansas. Itre hna iën asë hi la itre trejin ne la ekalesia. Hne huni palahi hna catre sine la itre icasikeu, memine la huliwa ne cainöj. Ame e Mecixen hnaipajö, tre, eahuni a cainöj ngöne la traon, hna hën enehila ka hape, cainöj ngöne la gaa tru atr. Ame e itre xaa ijin, eahuni a nango kucakuca, matre thupene la hna cainöj, kaka a itö sorbet koi hun.

Ka tru la teritoare ne la ekalesia ke, nyimutre la itre neköi traon me itre hnë axö öni. Ame la eahuni a hamë itus kowe la itre atr, tre, tha angatre kö a hamë manie. Angatr a hamë dröne sil me wakuja ka lolo, maine gutu pena. Kaka a kuië manie göne la itre itus, matre kolo pe hi a xatua hun göi xen.

Kaka me nenë a cainöje fë ipatefon. Thatreine palakö ni huliwan ke, co petre kö ni. Ngo madrine catre ni troa xatua kaka me nenë troa ahone la itre cainöje i Rutherford, ngöne la kola iwai hmaca me ini tusi pena.

Hnei kaka hna atë la ketre haut-parleur hune la loto. Ketre jiane huliwa ka lolo catr göne troa cainöj. Eahuni a pane ahone la itre miuzik matre thue aja ne la itre atr troa hane dreng. Ame e thupen, eahuni a amë la ketre cainöj. Thupene lai, eahuni a hamë itus kowe la itre ka ajan.

Hnei kaka hna tro Cherryvale, ketre traon e Kansas, troa ahone la itre cainöj ngöne la ketre park ke, nyimutre la itre atr ka mano e cili e nöjei Sabath. Önine la polis ka hape, troa acile la loto e kuhu tröne lai park. Hna tro hnei kaka troa acile la loto ezine lai park, matre drenge hnyawa hi la itre atr la porogaram. Tru la madrineng troa ce cainöj me kaka me Jerry, mama i eni.

 Ame ngöne la ijine cili, hne huni hna sine la itre campagne, me cainöj ngöne la itre teritoar ka nyimu ka icilekeu. Tune lo hnenge hna qaja e caha hun, hnei huni hna tro e hnenyipajidr troa ami tarak fene la itre qëhnelö ne la teritoar. E thupen, hne huni hna icasikeu e tröne la traon, matre wang ka hape, hetre trejine kö hna othe hnei polis.

Tru fe la madrineng troa sine la itre aqane cainöje fë ekö la itre pancarte. Eahuni a ami pancarte ka tru me tro fë e kuhu gojeny. Mekune palahi ni lo ketre ijine kola tro fë pancarte hnene la itre trejin, nge hna cinyihan ka hape, “La religion est un piège et une escroquerie.” Hnei angatre hna tro koi 1,5 kilomet, qa ngöne la hnalapa uti hë e vil, me bëeke hmaca. Eloine pe, pëkö ka sewe angatr, ngo nyimutre la itre atr ka öhnyi angatr.

Ka majemine huni tro Texas kowe la itre asabele. Ka huliwa kaka ngöne la hnë xomi train, matre tha eahuni kö a nyithupene train troa sine la itre asabele. Ame Fred Wismar, mama i nenë, tre, ka mele nyidrë me tretre Eulalie, e Temple (Texas). Hnei hmihmi Fred hna ini Tusi Hmitrötr ngöne lo itre macatre 1900 lo nyidrëti a thöth, me xomi bapataiso. Hnei nyidrëti hna amamane la itre hnei nyidrëti hna inin kowe la itre trejin me nyidrë, uti fe hë nenë. Atre hmihmi Fred hnyawa hi hnene la itre trejin e Texas ke, ka iwai trotro nyidrë (atre thupë sirkoskripsio enehila). Ka lolo la thina i nyidrë, ka madrine palahi nge ka catre huliwa. Nyidrëti la ketre tulu ka lolo.

Ame lo macatre 1941, hne huni hna tro St. Louis ketre traon e Missouri, matre troa sine la ketre asabele katru. Hna hën asë la itre xötr ka co troa lapa qëmekene la ita hmitrötr, matre troa drenge la cainöje i Rutherford hna hape, “Enfants du Roi.” Ame hë la nyidrëti a afenesine la cainöje i nyidrë, hna hamëne la ketre itusi ka hnyipixe thatraqane la 15 000 lao thöth. Kolo itusi hna hape, Enfant.

Ame lo treu Eiperem 1943, hne huni hna sine la Asabele e Coffeyville e Kansas, hna hape, “Appel à l’action.” E cili, hna thuemacanyi hun laka, hna eköthe la ketre ini ka hnyipixe thatraqane la nöjei ekalesia, kolo Ini Ne Cainöj Qaathei Akötresie. Hnei eahuni fe hna kapa la itus ka qatreng la 52 lao ini thatraqane la ini cili. Ame ngöne lo macatre cili, hnenge hna tro fë lo pane cainöjeng. Ka tru koi ni la asabele celë ke, hnenge hna ce xomi bapataiso memine la itre xan e hnine la neköi rivière ngöne la ketre ferme.

Eni a fenes hna ini ngöne lo macatre 1951, matre eni a troa iëne la hnenge hna troa kuca. Ka huliwa ha Jerry ngöne la Bethela. Nge ajange fe troa hane huliwa ngöne la Bethela, matre hnenge hna iupi fë la pepang. Thupene lai, hna hë ni troa hane huliwa ngöne la Bethela, matre hnenge hna nyiqane lo 10 Maac 1952. Celë hi mekun ka sisitria hnenge hna xom, nge ka aijijë ni troa catre huliwa koi Akötresie.

Ajange catr troa hane huliwa ngöne la hnë feja itus, matre xatuane la itre trejin troa fejane la itre zonal me itre xaa itusi së. Ngo tha eatre ju kö la mekunang. Hna upi ni troa pane tro fë xen, nge e thupen, hna amë ni troa huliwa ngöne kecen. Ka lolo catr la huliwa cili, nge nyimutre la itre hnenge hna inin. Hnenge hna huliwa ngöne la ketre ekip, matre hetre itre ijine mano ngöne la drai. E cili, eni a lapa ngöne la hnë ami itusi ne la Bethela, matre ini tusi caas. Celë hi ka xatua ni troa acatrene la lapauneng me aqane imelekeung me Iehova. Kolo fe a acatrene la ajang troa catre huliwa i Iehova ngöne la Bethela. Hnei Jerry hna tro qa ngöne la Bethela lo macatre 1949, me faipoipo me Patricia, me lapa e Brooklyn. Hnei nyidroti palahi hna xatua ni me ithuecatre koi ni göne la huliwang e hnine la Bethela.

Thupene la hnenge hna lö hnine la Bethela, itre trejin a thel thene la itre Béthelite, la itre ka troa tro fë cainöj. Ame la itre trejin hna iëne cili, tre, angatr a trongëne la 320 lao kilomet qa Brooklyn matre wange la itre ekalesia. E cili, angatr a tro fë cainöj me ce huliwa memine la ekalesia ngöne la hna cainöj. Hna ië ni troa kuca la huliwa cili.  Ngacama eni a xou, ngo hnenge hna iwai trootro me tro fë cainöj. Ame ekö, ka caa hawa la ketre cainöj. Eni a xomi train troa wange la itre ekalesia. Mekune palahi ni lo ewekë ka traqa lo Sabath hnaipajö, kolo ijine hnötr lo macatre 1954. Hnenge hna xomi train troa bëeke qa Neweyok, matre troa traqa heji ngöne la Bethela. Ngo hna traqa la ketre wene ka tru, ka catre lai enyi me kiona (neige). Pë hë tirisite matre cile ju pe hi lai train. Eni a traqa ngöne la Bethela lo Thupenehmi e 5h. E cili, hnenge hna xomi métro uti hë Brooklyn me traqa meköti troa huliwa ngöne kecen. Nango traqa hmitre ni, nge kucakuca catre ni ke, tha meköle kö ni lo jidr. Ngo ame pe, tru catre kö la madrineng, la eni a wange la itre ekalesia me iöhnyi memine la itre xaa trejin.

Ame ngöne lo pane macatre ne eni a huliwa ngöne la Bethela, hnenge fe hna nyiqane sine la porogaram ne ini Tusi Hmitrötr, hna kuca ngöne radio WBBR. Hna amë la studio ngöne la hnaaluene étage ne la batima hna hape, 124 Columbia Heights. Alexander H. Macmillan, la ketre trejin ka huliwa ha ngöne la Bethela, nge ka majemine nyidrëti sine la porogarame ne radio. Hne huni hna lapa hë nyidrë ka hape, Mac. Ketre tulu ka lolo nyidrë koi hun, itre thöth ka huliwa ngöne la Bethela ke, ngacama nyimutre la itre jol ka traqa koi nyidrë, ngo hnei nyidrëti palahi hna catre mele nyipici.

Ame lo macatre 1958, hnenge hna saze hnëqa. Eni pena a ce huliwa memine la itre trejin ka sine la Ini Ne Gileada. Qange troa xatua angatr troa hetre visa me billet ne xomi avio, matre troa mesinare ngöne la itre xaa nöj. Pine laka, ka tru thupene troa xomi avio, matre hnene la itre trejin ka tro Afrique me Asie hna ti he. Itre macatre thupen, hna uti la thupene avio, matre hna xomi avio hmaca la itre trejin.

Ame lo macatre 1960, hne huni hna loué la ketre avio matre xome la itre trejin qa Etazini uti hë Europe, matre troa sine la itre asabele katru lo 1961. Hnenge fe hna hane sine la ketre asabele e Allemagne (Hamburg). Thupene la asabele, hnenge hna loué loto memine la köni xaa trejin ka huliwa ngöne Bethela. Hne huni hna tro qa Allemagne uti hë Italie, matre troa wange la Bethela e Rome. E thupen, hne huni hna tro Faras me elë hune la wetr hna hape, Pyrénées, matre traqa e Espagne. Hna wathebone la huliwa së ngöne la nöje cili. Hne huni hna atuthe la itre itus kösë itre ahnahna, matre hamëne kowe la itre trejin e Barcelone. Madrine catre hun troa iöhnyi me angatr! Thupene lai, hne huni hna tro Amsterdam me bëeke hmaca a tro Neweyok.

Ame lo macatre 1962, hna upi troa kuca la itre billet ne avio thatraqane la 583 lao trejin ka troa sine la itre asabele katru e cailo fen. Kola qaja la Asabele ne 1963 hna hape, “La bonne nouvelle éternelle.” Tro la itre trejin a sine la itre asabele e Europe, Asie, me Afrique du Sud. Hetre itre xan ka tro Honolulu, Hawaii, me Pasadena (Californie). Ketre tro fe angatr a tro Liban me Jordanie matre  ihamë ngöne la itre nöj hna qaja hnei Tusi Hmitrötr. Hne huni hna kuca la itre billet me hnëkëne la itre hotel me itre visa.

Ka sisitria la macatre 1963 koi ni. Ame lo 29 Juun, hnenge hna faipoipo me Lila Rogers, ketre föe ne Missouri, nge ka nyiqane huliwa ngöne Bethela lo 1960. Caa wiik thupene la nyio a faipoipo, hnei nyio hna hane ce tro memine la itre xaa trejin, me ihamë ngöne la itre xaa nöj, tune e Grèce, Egypte, me Liban. E cili, hnei nyio hna xom la ketre neköi avio matre troa tro Jordanie. Ngo, hna wathebone la huliwa së ngöne la nöje cili, nge xele kö la itre mus troa hamë visa kowe la Itretre Anyipici Iehova. Celë hi matre, nyio a nango luelu ke, thatre kö nyio la ewekë ka troa traqa. Pane mekune jë la etrune la madrine i nyio, la nyio a öhne la itre trejin e kepe nyio ngöne la hnë xomi avio! Hetrenyi angatre la ketre pancarte hna hape, “Bozu Itretre Anyipici Iehova”! Madrine catre ni troa ihamë ngöne la itre nöj hna qaja hnei Tusi Hmitrötr. Hnei nyio hna tro ngöne la nöje i Aberahama, me Isaaka, me Iakobo, me ngöne la itre nöj hna cainöj ngön hnei Iesu me itre aposetolo. Hnei nyio hna tro ngöne la itre nöj ne lo itre pane Keresiano ekö laka, hna nyiqane la hmi e cili uti hë “la cane la fene hnengödrai.”—Itre Huliwa 13:47.

Kola traqa koi 55 lao macatre ne xatua ni hnei Lila. Hnei nyio palahi hna tro Espagne me Portugal, ngacama hna wathebone la huliwa së e cili. Hnei nyio hna ithuecatre kowe la itre trejin me hamë itusi koi angatr me itre xaa ewekë ju kö. Ketre, hnei nyio hna wange la itre trejin hna akalabusin e Cádiz (Espagne). Tru catre la madrineng troa tro fë cainöj koi angatr, matre ithuecatre me xatua angatr.

Qaane lo macatre 1963, hnenge hna tro ngöne la itre xaa nöj matre sine la itre asabele katru, tune e Afrique, Australie, me Afrique du Sud me Afrique Central, me Europe, me Asie, me Hawaii, me Nouvelle-Zélande, me Porto Rico. Nyimutre la itre asabele hnenge me Lila hna sin, tune lo asabele ne 1989 e Varsovie (Pologne). Nyimutre la itre trejine qa Russie ka traqa troa sine la asabele katru cili. Celë hi lo pane asabele i angatr! Hnei nyio hna iöhnyi memine la itre trejin, trahmanyi me föe, hna akalabusine nyimu macatre e Union Soviétique.

Tru catre la madrineng troa wange la itre xaa Bethela me mesinare ngöne la itre nöj e cailo fen. Ame ngöne la iwai tixenuë i nyio, hnei nyio hna tro Corée du Sud. E cili, hnei nyio hna iöhnyi memine la 50 lao trejin hna akalabusin e Suwon. Tha kucakuca pi kö angatr, ngo angatr a trengeneune la ijine troa nue angatr troa nyihlue i Iehova. Hnei angatr hna ithuecatre koi nyio!—Roma 1:11, 12.

Hnenge hna öhne la aqane amanathithine Iehova la nöje i Nyidrë. Ame la eni a xomi  bapataiso lo 1943, hetrenyi la 100 000 lao trejin ka cainöj. Ame hë enehila, kola traqa koi 8 milio lao trejin ka nyihlue i Iehova ngöne 240 lao nöj. Celë hi thangane la hna catre huliwa hnene la itre trejin ka sine la Ini Ne Gileada. Madrine catre ni ke, hnenge hna ce huliwa memine la itre mesinare me xatua angatr troa tro kowe la itre nöj hna upi angatre kow.

Tru la madrineng ke, hnenge hna nue la meleng nge eni petre kö a thöth, matre troa huliwa i Iehova ngöne la Bethela. Hnei Iehova palahi hna amanathithi ni. Ame la ketre manathith hnenge me Lila hna kapa ngöne la Bethela, tre, ene la troa ce cainöj memine la itre ekalesia e Brooklyn, nge 50 lao macatre enehila. Nyimutre la itre sinee i nyio.

Eni palahi me Lila a huliwa ngöne la Bethela. Ngacama 84 hë lao macatreng enehila, ngo ka madrine palahi ni troa huliwa i Iehova me xatuane la Filial.

Ketre manathith ka tru la troa sine la organizasio i Iehova, me melëne la hna qaja ngöne Malaki 3:18, kola hape: “Tro hmaca nyipunie a isa wangate hmekune la ate ka meköti me ate ka ngazo, nge ate nyi hlue i Akötesie me ate tha nyi hlue i nyidë.” Kola ngazo trootro la fene i Satana, nge pëkö mejiune me madrine ne la itre atr. Ngo ka mele madrine la itre ka hnim me nyihlue i Iehova. Ngacama jole catr la mel enehila, ngo hetre mejiune i angatr koi elany. Ketre manathith ka tru troa tro fë la itre maca ka lolo! (Mataio 24:14) Easenyi hë matre apatrene pi hnene la Baselaia i Akötresie, la fene celë me aparadraisone la ihnadro. Eahuni a trengeneune la ijine cili! E cili, troa egöcatre me madrine la nöjei atr asë, nge tro angatr a mel epin epine palua.