1, 2. (a) Ame koi Iesu, nemene la huliwa ka sisitria, nge pine nemen? (b) Nemene la nyine tro sa kuca matre troa ‘ce huliwa me Akötresie’?

KA TRATRAU sinöe Iesu Keriso ekö, me catre cainöj. (Mareko 6:3; Roma 15:8) Hnei Iesu hna kuca hnyawa la lue huliwa cili. Ame ngöne la kola tratrau sinöe, hnei nyidrëti hna inine la aqane troa huliwane hnyawa la itre jiane huliwa, matre troa cane la itre ewekë. Nge hnei Iesu hna cainöj me xatuane la nöjei atr, troa trotrohnine la itre ini hna hamën hnei Tusi Hmitrötr. (Mataio 7:28; Luka 24:32, 45) Ame lo Iesu a 30 lao macatre ke, hnei nyidrëti hna nue la huliwa ne tratrau sinöe, matre xome pena la huliwa ne cainöj. Atre hnyawa hi nyidrëti laka, celë hi huliwa ka sisitria. Hnei Akötresieti hna upi nyidrëti a tro e celë fen, matre troa cainöjëne la maca ka loi ne la Baselaia. (Mataio 20:28; Luka 3:23; 4:43) Hnei Iesu hna nue la mele i nyidrë, matre troa tro fë la itre maca ka lolo. Nge nyidrëti a ajane tro fe la itre xan a xome la huliwa cili.—Mataio 9:35-38.

² Eje hi laka, tha itre ka tratrau sinöe kö së, ngo easa tro fë me inine la itre maca ka lolo kowe la itre xan. Pine laka ketre huliwa lai ka sisitria, matre Akötresieti a xatua së. Celë hi  matre, Tusi Hmitrötr a qaja ka hape, easa ‘ce huliwa me Akötresie.’ (1 Korinito 3:9; 2 Korinito 6:4) Ce mekuna së hi memine la atre cinyihane la Salamo, kola hape: “Ame la nyipi eköne la wesi ula i cilie, te, nyipici.” (Salamo 119:159, 160) Eje hi, ame la trengewekë i Iehova, tre, celë hi nyipici. Nge easa ajane tro palahi a “thawa hnyawa la wesi ula ka nyipici” ngöne la hna cainöj. (E jë la 2 Timoteo 2:15.) Celë hi matre, easa thele troa atreine huliwane hnyawane la Tusi Hmitrötr, jiane huliwa së ka sisitria, matre xatuane la itre atr troa atre Iehova, me Iesu, memine fe la Baselaia. Nyimutre la itre jiane huliwa hna hamën hnene la organizasio i Iehova, matre xatua së troa maca ngöne la hna cainöj. Nge nyipiewekë tro sa atreine huliwane itre ej. Hna amë la itre jiane huliwa cili ngöne la Keesi Zuti së.

3. Nemene la hne së hna troa thele ngöne la easa cainöj, nge nemene la aqane troa xatua së hnene la Itre Huliwa 13:48?

³ Pine nemene matre qaja jë ka hape, Keesi Zuti së ngo tha Keesi Zuti Ne Cainöje kö? Pine laka, ame la easa “cainöj,” tre, easë hi a tro fë la ketre maca, ngo ame la easa “inin,” tre, easa qejepengöne la maca cili, matre xatuane la ketre atr troa trotrohnin me trongëne la hnei angeic hna inin. Nyipiewekë tro sa catre thele troa ini Tusi Hmitrötr me itre xan me ini angatre la nyipici, matre tro fe angatr a hane itretre drei Keriso. Kolo lai a hape, tro sa catre thele la itre “hna hnëkëne kowe la mele ka tha ase palua kö,” me xatua angatr troa hane nyihlue i Iehova.—E jë la Itre Huliwa 13:44-48.

4. Nemene la ka troa xatua së troa thele la itre “hna hnëkëne kowe la mele ka tha ase palua kö”?

⁴ Nemene la ka troa xatua së troa thele la itre “hna hnëkëne kowe la mele ka tha ase palua kö”? Hnene la itre pane Keresiano ekö hna catre cainöj. Öni Iesu kowe la itretre drei nyidrë: “Ame la nöjei lapa memine la nöjei hnalapa hnei nyipunie hna troa xulu kow, te, hnyingënejë, ka hape, Dei la ate loi thina e cili.” (Mataio 10:11) Nyipiewekë tro sa kuca tune lai enehila. Ngo, tha tro kö sa sesëkötr, e hetre atr ka xele ma drenge la itre maca ka lolo ke, nyimutre la itre ka pëkö hni ne ipië me ka pë aja troa thele Akötresie. Easa thele la itre atr ka hni ka ipië me ka thele la nyipici. Ceitune hi la huliwa cili memine la huliwa ne tratrau sinöe i Iesu ekö. Qëmekene troa cane la ketre ewekë, tune la qëhnelö maine nyine isilikeun, hnei Iesu hna pane tro troa thele sinöe. Thupene lai, nyidrëti a xome la keesi zuti i nyidrë, me mekune hmaca lo itre hnei nyidrëti hna inin. Ketre tune mina fe enehila, nyipiewekë tro sa pane thele la itre atr. Thupene lai, tro sa xome la keesi zuti së me pane mekune lo itre hne së hna inin, matre xatua angatr troa hane drengethenge Iesu.—Mataio 28:19, 20.

5. Ka tune kaa la itre jiane huliwa së e hnine la Keesi Zuti së? Qaja jë la ketre ceitun. (Wange ju la pane iatr.)

⁵ Ka isa hetre huliwane la itre zuti. Pane mekune jë la itre zuti hna huliwane hnei Iesu, ngöne la nyidrëti a tratrau sinöe. * (Wange ju la ithuemacany.) Hetre zuti nyine tuluth, nyine sija, nyine thupa, nyine kuj, me nyine tratraune la sinöe. Ketre tune mina fe, isa hetre huliwane la itre jiane huliwa së, hna amë e hnine la Keesi Zuti së. Tro sa pane ce wang la aqane tro sa huliwane hnyawa itre ej.

6, 7. (a) Nemene la aqane troa huliwane la itre carte de visite? (b) Pine nemene matre easa tro fë la itre pepa ne ihë göi itre icasikeu?

⁶ Itre carte de visite. Ka co hi la carte cili. Ej a amamane hnyawa la pengö së, memine la sit jw.org. Nyimutre la itre ithuemacany hna hamëne ngöne la sit göne la Itretre Anyipici Iehova. Ijije fe troa sipone hnene la itre atr troa ini tus. Ase hë sasaithe la 400 000 lao atr ka sipone troa ini tus ngöne la sit jw.org. Nge itre hadredre la ka sipon e nöjei drai! Ijije hi tro sa xom trongëne la carte cili, me hamëne kowe la itre atr hne së hna ixelë memin.

⁷ Itre pepa ne ihë. Hna cinyihane ngöne la itre pepa ne ihë koi icasikeu, ka hape: “Vous êtes invité à étudier la bible avec les témoins de Jéhovah.” Thupene lai, hna qaja ka hape, tro sa hane hamëne fe ngöne la itre ijine icasikeu së maine ngöne la easa ini tus. Itre pepa ne ihë a amamane kowe la itre atr la pengö së, me hëne la “ite ka pë ewekë ngöne la u” troa hane ini Tusi Hmitrötr me easë. (Mataio 5:3) Ijije fe kowe la itre atr ka tha ini tusi kö troa sine la itre icasikeu. Ame la angatr a traqa troa icasikeu, angatre lai a hane drenge la itre ini hna hamën hnei Tusi Hmitrötr.

8. Pine nemene matre nypiewekë tro palahi sa könëne la itre atr kowe la itre icasikeu? Qaja jë la ketre ceitun.

⁸ Pine nemene matre nypiewekë tro palahi sa könëne la itre atr kowe la itre icasikeu? Ame la itre atr a sine la itre icasikeu, angatr a öhn laka, Itretre Anyipici Iehova a inine la nyipici qa hnine la Tusi Hmitrötr, me xatuane la itre atr troa atre Akötresie. Angatr a öhn e cili la eisapengö së memine la itre xaa hmi. (Isaia 65:13) Celë hi hna qaja hnei Ray me Linda, lue trefën qa Etazini. Ka mejiune nyidro koi Akötresie, nge nyidroti a ajane troa atre Nyidrëti hnyawa. E cili, hnei nyidroti hna tro troa wang la itre xaa hmi ngöne la traone i nyidro. Lue ewekë hnei nyidroti hna thel ka troa amamane koi nyidro la nyipi hmi. Ame la hnapan, loi e troa hetre ini hna hamën hnene la hmi. Ame la hnaaluen, loi e troa heetre hnyawa la itre ka hmi. Itre macatre ne ithele nyidro ke, nyimutre catr la itre hmi. Celë hi matre nyidroti a kucakuca. Pëkö hnei nyidroti hna inin, nge pëkö metrötr ngöne la aqane heetre ne la itre ka hmi. Thupene la hnei nyidroti hna wang la ketre hmi, hnei Linda hna tro troa huliwa, nge Ray a bëek koi hnalapa. Öhne ju hi nyidrëti la ketre Uma Ne Baselaia. Öni Ray, ‘Eni a pane troa wang ka hape, nemen?’ Lolo catr la hnei nyidrëti hna öhn! Lolo asë hi la itre atr e cili, nge ka thiina ka menyik angatr. Lolo fe la aqane heetre i angatr. Hnei Ray hna lapa ngöne qëmeken, nge nyidrëti a madrine la itre ini hnei nyidrëti hna kapa! Tune la aqane qaja i Paulo aposetolo, önine la atr ka xötrei sine la icasikeu, ka hape: “Nyipici, thei nyipunieti la Akötesie.” (1 Korinito 14:23-25) Thupene lai, hnei Ray hna sine la itre icasikeu e nöjei Sabath. Hnei nyidrëti fe hna sine la itre icasikeu e nyipine la wiik. Hna hane fe sine la itre icasikeu hnei Linda. Ngacama sasaithe hë nyidro la 70 lao macatre, ngo hnei nyidroti hna inine la Tusi Hmitrötr me xomi bapataiso.

9, 10. (a) Pine nemene matre ka hmaloi troa huliwane la itre tarak? (b) Qaja jë la aqane troa huliwane la tarak hna hape, Nemene la Baselaia i Akötresie?

⁹ Itre tarak. Hetrenyi së la 8 lao tarak e  hnine la Keesi Zuti së. Ka hmaloi troa huliwan, matre nyiqane ithanata memine la itre atr. Qane lo macatre 2013, lo kola kapa la pane tarak, hna fejane la 5 miliar lao tarak! Ka ceitun asë hi la itre tarak cili. Celë hi matre, maine atreine hi së huliwane la ketre ke, ijiji së fe hi troa huliwane la itre xan. Nemene la aqane tro sa huliwane la itre tarak matre nyiqane ithanata me ketre atr?

¹⁰ Maine jë, easa ajane troa huliwane la tarak hna hape, Nemene la Baselaia i Akötresie? Amamane jë la hnying kowe la atr, nge hnyingëne jë koi angeic ka hape: “Hnei epuni kö hna hane thele la hnyinge celë? Ame koi epun tre . . . ?” Thupene lai, qaja jë la köni mekun hna cinyihan e cahu fen. The canga qaja kö la mekune ka sa lai hnying. Loi e troa fe lai tarak me amamane la götran hna hape, “Hanawange la hna qaja hnene la Tusi Hmitrötr,” me e la lue xötr hna hamën, Daniela 2:44 me Isaia 9:6. Qëmekene troa tro, qaja jë kowe la atr la hnying hna amë fene lo hna hape, “Tune Kaa La Mekuna i Epun”: “Nemene la pengöne la mel elany la kola troa mus la Baselaia i Akötresie?” Tro pë hë epuni a sa la hnyinge celë ngöne la epuni a troa iwai hmaca. Ame la epuni a bëeke hmaca, amamane jë la ini 7 ne la boroshür, Itre Maca Ka Lolo Qaathei Akötresie!, hna qaja e hnine lai tarak. Celë hi ketre jiane huliwa ka lolo göne troa nyiqane ithanata memine la itre atr.

11. Nemene la eloine la itre zonale së, nge nemene la aqane tro sa huliwane itre ej?

¹¹ Itre zonal. Ame la lue zonal, Ita Ne Thup me Hmeke Jë!, tre, celë hi lue zonal hna ujën me hna fejan atrun e cailo fen! Pine laka, nyimutre la itre atr ka e la lue zonal celë, matre kola nyiqane hnene la itre ewekë hna pi atre hnene la itre atr. Loi e tro sa huliwane la lue zonal celë matre xatuane la itre atr troa atre la ka nyipiewekë enehila. Ngo, loi e tro sa pane iëne hnyawa la itre zonal hne së hna troa hamën ke, isapengöne kö la itre atr.

12. (a) Hna kuca la zonal, Hmeke Jë! thatraqai drei, nge pine nemen? (b) Qaja jë la hnei epuni hna melën ngöne la epuni a tro fë la zonal celë.

¹² Hna kuca la zonal, Hmeke Jë! thatraqane la itre atr ka thatre hnyawa kö la Tusi Hmitrötr. Thatre kö angatr la hmi ne la itre keresiano, nge pëkö lapaune i angatr. Thatre kö angatr laka, hetre eloine la Tusi Hmitrötr kowe la mele së. Hna kuca la zonal, Hmeke Jë! matre troa amamane kowe la itre ka e ka hape, ka mele Akötresie. (Roma 1:20; Heberu 11:6) Eje fe a xatua angatr troa lapaun kowe la Tusi Hmitrötr ke, celë hi “wesi ula i Akötesie.” (1 Thesalonika 2:13) Ame la tane la köni zonal, Hmeke Jë! ne la macatre 2018, tre: “Jëne Madrin,” “12 Lao Jëne Madrine Kowe La Fami,” me “Ixatua Thatraqane La Itre Ka Akötr.”

13. (a) Hna kuca la Ita Ne Thup nyine tro fë thatraqai drei? (b) Qaja jë la hnei epuni hna melën ngöne la epuni a tro fë la zonal celë.

¹³ Ame pena la Ita Ne Thup nyine tro fë, tre, hna kuca matre troa qejepengöne la Tusi Hmitrötr kowe la itre atr ka metrötrë Akötresieti hë memine la Tusi Hmitrötr. Hetre hnei angatr hna atre e hnine la Tusi Hmitrötr, ngo tha trotrohnine kö angatr la aliene ej. (Roma 10:2; 1 Timoteo 2:3, 4) Kola sa hnene la köni Ita Ne Thup ne la macatre 2018, la itre hnying celë: “Hapeu, Ka  Nyipiewekë La Tusi Hmitrötr Enehila?,” “Tune Kaa Jë La Mel Elany?,” me “Hane Kö Akötresie Nyipi Së?”

14. (a) Nemene la foa lao video hna amë e hnine la Keesi Zuti së? (b) Qaja jë la hnei epuni hna melën ngöne la epuni a amamane la itre video celë.

¹⁴ Itre video. Ame ngöne lo hneijine i Iesu, kola tratrau sinöe ngo pë petre kö masin. Ame hë enehila, angatre ha huliwane la itre sine masine nyine thupa, me nyine kuj, me nyine papa sinöe. Ketre tu së fe, ame la easa ini tus, easa nyixane la itre itusi së hnene la itre video ka mingöming. Hetrenyi së la foa lao video ka lolo catr: Hnauëne La Troa Inine La Tusi Hmitrötr?, Nemene La Aqane Trongene La Ini Tusi Epun?, Ka Tune Kaa La Itre Icasikeu Hun?, me Les Témoins de Jéhovah : Qui sommes-nous? Ijije hi tro sa huliwane la itre video cili ngöne la easa xötrei iöhnyi memine la itre atr. Ame pena la itre video ka qea, tro sa amamane kowe la itre atr hne së hna troa wange hmaca ke, hetre traeme i angatr. Ka lolo catr la itre video ke, itre ej a thue aja kowe la itre atr troa inine la Tusi Hmitrötr me sine la itre icasikeu.

15. Nemene la thangane kowe la itre atr, la angatr a goeëne la itre video ngöne la sipu qene hlapa i angatr? Qaja jë la itre ceitun.

¹⁵ Hnene la ketre trejine föe hna iöhnyi memine la ketre föe qa Micronésie, nge eahlo a qene Yapese. Hnene lai trejin hna amamane la video hna hape, Hnauëne La Troa Inine La Tusi Hmitrötr? qene Yapese. Ame la kola nyiqane la video, önine lai föe: “Kolo hi lo qene hlapange la. Ka lolo catr! Drenge hi ni cahu ka ithanata, ketre atrene hi la nöjeng. Nyidrëti a qaja la qene hlapang!” Thupene lai, öni eahlo ka hape, eahlo a troa e me drenge la nöjei itus hna amë ngöne la qene hlapa i eahlo, ngöne jw.org. (Xome jë fe la Itre Huliwa 2:8, 11.) Hanawang la tulu ne la ketre trejine föe qa Etazini. Ame la tresi eahlo, tre, angeic a mel ngöne la ketre nöj. Hnei eahlo hna iupi fë jëne ëternet, la video cili ngöne la sipu qene hlapa i angeic. Thupene la angeic a goeëne la video, öni angeic ngöne mail ka hape: “Hna ketri ni la kola qaja ka hape, Diabolo la ka musinëne la fen. Eni a hane pi ini Tusi Hmitrötr.” Ketre ewekë lai ka lolo catr ke, hna wathebone la huliwa ne la Itretre Anyipici Iehova ngöne la nöje i angeic!

16. Qaja jë la eloine la itre boroshür celë: (a) Drei Akötresieti Jë Matre Mele Epine Palua. (b) Itre Maca Ka Lolo Qaathei Akötresie! (c) Itre Drei La Ka Kuca La Aja i Iehova Enehila?

¹⁶ Itre boroshür. Nemene la aqane tro sa inine la nyipici kowe la ketre atr ka thatreine hnyawa kö e, maine ketre atr ka pë Tusi Hmitrötr ngöne la sipu qene hlapa i angeic? Ijije hi tro sa huliwane la boroshür hna hape, Drei Akötresieti Jë Matre Mele Epine Palua. * (Wange ju la ithuemacany.) Ame la ketre jiane huliwa ka lolo nyine tro sa xom matre troa nyiqane ini Tusi Hmitrötr, tre, boroshür Itre Maca Ka Lolo Qaathei Akötresie! Amamane jë kowe la atr la 14 lao tane mekun hna cinyihan ngöne la pune lai boroshür, nge upi angeice jë  troa iëne la ketre hnei angeic hna ajane troa ithanatan. Nge nyiqane inine jë me angeic la ini hnei angeic hna iën. Hnei epuni kö hna hane tun ngöne la epuni a iwai hmaca? Ame la hnaakönine boroshüre së, tre, Itre Drei La Ka Kuca La Aja i Iehova Enehila? Hna kuca la boroshür celë matre troa xatuane la itre hnainin troa atre la organizasio së. Wange ju la Mel Me Huliwa Ne Cainöj Ne La Keresiano-Pepa Nyine Huliwan ne Maac 2017, matre troa atre la aqane troa huliwane la boroshür celë thupene la ini tus.

17. (a) Nemene la eloine la itre itusi nyine inin? (b) Nemene la nyine troa kuca hnene la nöjei ka xomi bapataiso asë, nge pine nemen?

¹⁷ Itre Itus. Thupene la epuni a nyiqane ini tus memine la atr jëne la ketre boroshür, loi e tro pena a inine la itus Nemene La Hna Ini Së Hnei Tusi Hmitrötr? Ej a xatuane la itre atr troa atre la itre ini hna hamën hnei Tusi Hmitrötr. Maine trotrohnine hnyawa ha angeic, nge angeic ha afenesine la itus, ijije hë tro pena a inine la itus Thupë Nyipunieti Ju Kö Ngöne La Ihnimi Akötesie. Tro la itusi celë a amamane kowe la hnainin, la aqane tro angeic a trongëne la itre trepene meköti ne la Tusi Hmitrötr ngöne la mele i angeic. Thupene la hnei angeic hna xomi bapataiso, loi e troa afenesine la lue itusi cili. Celë hi ka troa xatua angeic troa catre lapaune koi Iehova, me mele nyipici koi Nyidrë.—E jë la Kolose 2:6, 7.

18. (a) Nemene la ithuecatre hna hamën ngöne 1 Timoteo 4:16 göne troa inine la nyipici koi itre xan, nge nemene la thangane lai? (b) Nemene la aja së ngöne la easa huliwane la itre jiane huliwa hna amë hnine la Keesi Zuti së?

¹⁸ Hnëqa së, Itretre Anyipici Iehova, troa inine la itre atr “la wesi ula ka nyipici ne la maca ka loi,” ka troa eatrongë angatr kowe la mel ka tha ase palua kö. (Kolose 1:5; e jë la 1 Timoteo 4:16.) Celë hi matre hetrenyi së la nyimu pengöne jiane huliwa hna amë ngöne la Keesi Zuti së. (Wange ju la hna eköhagen hna hape, “Keesi Zuti Së.”) Loi e tro palahi sa huliwane hnyawa la itre jiane huliwa cili. Isa qanyi së kö iëne la ijine tro sa huliwane la ketre jiane huliwa. Ngo tha easë kö a hamë itusi hi, maine hamëne pena kowe la itre atr ka xele ma drei së. Easë pe a ajane troa ini Tusi Hmitrötr memine la itre atr ka hetre hni ne ipië, me ka ajane troa atre Akötresie. Itre atr “hna hnëkëne kowe la mele ka tha ase palua kö.”—Itre Huliwa 13:48; Mataio 28:19, 20.