1, 2. Nemene la hnëqa ka tru hna xome hnei Iosua thupene la kola meci hnei Mose?

ÖNI Iehova koi Iosua: “Meci hë Mose sinelapang; nge enehila cilejë, troja shashaithe Ioridano ce, eö, me nöjei ate asëjëihë celë, kowe la nöje hnenge hna hamë angat.” (Iosua 1:1, 2) Hane hi la ketre hnëqa ka hnyipixe me ka ketrepengöne koi Iosua. Traqa koi 40 lao macatre ne ce huliwa angeic me Mose!

² Nyimu macatre ne eatrongëne Mose la nöje Isaraela. Iosua pë hë la ka troa nyihna i Mose. Maine jë hnei angeic hna mekun ka hape, tha tro kö a kepe angeic hnene la nöje Isaraela. (Deuteronomi 34:8, 10-12) Tune la hna qaja ngöne Iosua 1:1, 2, ketre jol ka tru la kola nyihnan ekö la atre elemekene la nöj, nge tune mina fe enehila.

3, 4. Nemene la aqane amanathithi Iosua hnei Akötresie, nge nemene la hne së hna isa thel?

 ³ Hetre nyipi kepine matre kola hnehengazo hnei Iosua. Ngo ame pe, hnei angeic hna catre lapaune koi Iehova, me canga trongëne la itre hna amekötin. (Iosua 1:9-11) Celë hi matre, hnei Iehova Akötresie hna amanathithi Iosua. Hnei Nyidrëti hna upe la ketre angela, matre troa eatrongë Iosua me angetre Isaraela. Maine jë, Hupuna i Akötresie la angela cili, ene la Logo.—Esodo 23:20-23; Ioane 1:1.

⁴ Hnei Iehova hna xatua angetre Isaraela, matre troa kapa hnyawa la itre ewekë ka saze me kepe Iosua hnyawa, lo atre elemeken. Ame fe enehila, nyimutre la itre ewekë ka saze. Maine jë easa isa hnying ka hape, ‘Pine laka, nyimutre la itre ewekë ka saze ngöne la organizasio i Akötresie, hapeu, tro kö sa mejiune koi Iesu, joxu së?’ (E jë la Mataio 23:10.) Tro sa ce wang la aqane eatrongëne Iehova la nöje i Nyidrëti ekö, ngöne la kola saze la itre ewekë. E cili, tro hë sa atreine sa la hnying.

5. Nemene la ewekë ka traqa koi Iosua e Ieriko? (Wange ju la pane iatr.)

⁵ Thupene la hna sasaithe la hneopegejë ne Ioridano hnei angetre Isaraela, hna traqa la ketre ewekë koi Iosua. Hnei angeic hna ixelë memine la ketre atr ne Ieriko ka xomi taua. Öni Iosua kowe lai atr: “Nyipëti a ce enexöle me eëhun, hape u, me ite ithupëjia me eëhun?” Kola sesëkötre hnei Iosua ngöne la kola sa koi angeic ka hape, kolo “tane ishi Iehova,” ketre angela ka troa thupëne la nöje i Akötresie. (E jë la Iosua 5:13-15.) Eje hi laka, Tusi Hmitrötr a qaja ka hape, hnei Iehova hna ithanata meköti koi Iosua. Ngo ame pe, kola mama laka, hnei Nyidrëti hna upe la angela matre troa ithanata koi Iosua, tune la aqane kuca i Nyidrëti ekö.—Esodo 3:2-4; Iosua 4:1, 15; 5:2, 9; Itre Huliwa 7:38; Galatia 3:19.

6-8. (a) Pine nemene matre kösë tha loi kö la itre hna amekötin hnene la angela? (b) Nemene la ka amamane ka hape, ka lolo la itre hna amekötin? (Wange ju fe la ithuemacany.)

⁶ Hnene la angela hna amamane hnyawa koi Iosua la aqane troa lepe la traon e Ieriko. Ngo kösë tha ka loi kö la itre hna amekötin. Hnene lai angela hna upi Iosua troa peritomone la itre sooc, matre itre drai ne tha tro kö angatr a isi. Hapeu, ijine tro kö lai a peritomo angatr?—Genese 34:24, 25; Iosua 5:2, 8.

⁷ Maine jë, hnene la itre sooc hna isa hnying ka hape, ‘Nemene la aqane tro sa thupëne la itre hnepe lapa së, e traqa ju lepi së hnene la itre ithupëjia?’ Ngo hna traqa la ketre ewekë! Tha lepi angetre Isaraela ju kö hnei angetre Ieriko. Ngo ame pe, hna traqa la xou koi angatr. Öni Tusi Hmitrötr: “Hna nyipi thingi catën’ e Ieriko göi ite nekö i Isaraela; pekö ate löpi nge pëkö ate löjë.” (Iosua 6:1) Ketre ewekë lai ka acatrene la mejiune ne la angetre Isaraela kowe la itre hna amekötin hnei Iehova!

⁸ Hnene la angela hna qaja koi Iosua ka hape, tha tro kö angetre Isaraela a lepe Ieriko. Ame ngöne la sikisi lao drai, tro angatr a aca kanothe la traon. Nge ame ngöne la hna sevenene drai, tro angatr a asevene lao kanoth la traon. Maine jë hnene la itre sooc hna qaja ka hape, ‘Easë lai a ae drai me aluzi trengecatr!’ Ngo atre hi la angela ka  elemekene la nöje Isaraela, la hnei angeic hna kuca! Kola acatrene la lapaune ne la angetre Isaraela la angatr a trongëne la itre hna amekötin. Tha hnei angatre ju kö hna isi memine la itre sooc e Ieriko.—Iosua 6:2-5; Heberu 11:30. * (Wange ju la ithuemacany.)

9. Nemene la aqane tro sa trongëne la itre hna amekötin hnene la organizasio i Akötresie? Qaja jë la ketre ceitun.

⁹ Nemene la ini koi së? Ame e itre xaa ijin, kola saze la aqane kuca la itre ewekë hnene la organizasio i Iehova, nge tha trotrohnine kö së. Ame ekö, ka ngazo troa huliwane la itre mobilis me itre tabelet, matre troa ini tus maine cainöj maine hnëkëne la itre icasikeu. Ngo easa öhn enehila laka, tha ka ngazo kö troa huliwan itre ej. Ame la easa öhn la eloine la itre ewekë ka saze, kola acatrene la lapaune së me aqane imelekeu së memine la itre trejin.

10. Drei la ka eköthe la icasikeu ne la lapa ne xomi meköt e Ierusalema?

¹⁰ Thupene la 13 lao macatre ne xomi bapataiso Konelio, ketre atre ethen hna tha peritomon, kolo palahi a mekun hnene la angetre Iuda ka hape, nyipiewekë troa peritomo. (Itre Huliwa 15:1, 2) Hnene la itre trejin e Anetioka, hna isi ithanata me iwesitrë pine lai. Ame e cili, hnene la itre qatre thup hna upi Paulo troa wang la lapa ne  xomi meköt e Ierusalema. Ngo drei la ka upi angeic? Öni Paulo: “Hnenge hna tro thenge la amaman.” Eje hi, Keriso la ka elemekene la lapa ne xomi meköt matre troa nyinyine la jole cili.—Galatia 2:1-3.

11. (a) Nemene la mekuna i angetre Iuda göi peritomon? (b) Nemene la aqane amamane Paulo laka, angeic a drengethenge la itre hna amekötin hnene la itre qatre thup ne Ierusalema? (Wange ju fe la ithuemacany.)

¹¹ Hnei Keriso hna elemekene la lapa ne xomi meköt, me amamane ka hape, tha nyipiewekë kö troa peritomo angetre ethen. (Itre Huliwa 15:19, 20) Itre macatre thupen, nyimutre palakö la itre Keresiano ne Iuda ka peritomone la itre nekö i angatr. Thupene lai, hnene la itre qatre thup e Ierusalema hna dreng laka, hnei Paulo hna ena la Wathebo i Mose. Hnei angatre hna upi Paulo troa kuca la ketre ewekë, matre troa metrötrëne la Wathebo. * (Wange ju la ithuemacany.) (Itre Huliwa 21:20-26) Celë hi matre, hnei angatr hna upi angeic troa iëne la foa lao trahmany matre troa tro kowe la ēnē. Maine jë, hnei Paulo hna qaja ka hape: ‘Ka tria la mekune cili! Hnauëne la angatr a iupi troa kuca la ewekë cili? Ame la itre Keresiano ne Iuda ka tha trotrohnine la jole cili, tre, angatre hi la ka aciane lai jol.’ Ngo trotrohnine hi Paulo laka, kola ajane hnene la itre qatre thup tro asë hi la itre Keresiano a caas. Celë hi matre, hnei angeic hna canga drengethenge la itre hnei angatr hna amekötin. Ngo hnauëne laka, tha canga sa kö Iesu la jol göi peritomon, nge tha trongëne hë la Wathebo i Mose thupene lo hna meci hnei Iesu?—Kolose 2:13, 14.

12. Pine nemene matre hnei Keriso hna pane nue ijine qëmekene troa sa la hnying göi peritomon?

¹² Eje hi laka, jole koi së troa canga kapa la ketre ewekë ka saze. Tha canga kapa kö angetre Iuda laka, tha angatre hmaca kö fene la Wathebo. (Ioane 16:12) Angatr palahi a mekun laka, nyipiewekë troa peritomon, matre troa imelekeu hnyawa me Akötresie. (Genese 17:9-12) Ame itre xan, tre, angatr a xoue troa saze, wanga qanangazo angatre pi hnei itre xan. (Galatia 6:12) Ngo hetre ijine tro kö Keriso a hamë ithuemacany ka hnyipixe jëne Paulo.—Roma 2:28, 29; Galatia 3:23-25.

13. Nemene la aqane tro sa sajuë Keriso enehila?

¹³ Keriso la tane la ekalesia enehila. Celë hi matre, e hetre ketre ewekë ka saze e hnine la organizasio nge tha trotrohnine kö së, loi e tro palahi sa mekun la aqane eatrongëne Keriso la nöje i Akötresieti ekö. Qaane lo hneijine i Iosua uti fe hë la hneijine ne la itre aposetolo, hnei Keriso palahi hna hamë itre hna amekötin ka hnyipixe. Nyidrëti a thupëne la nöje i Akötresie, me acatrene la lapaune i angatr, me xatua angatr tro palahi a caas.—Heberu 13:8.

14-16. Nemene la aqane amamane hnene la “hlue ka nyipici me ka inamacan” laka, Keriso a ajane tro palahi sa catre lapaun?

 ¹⁴ Ame enehila, kola eatrongë së hnene “la hlue ka nyipici me ka inamacan.” (Mataio 24:45) Celë hi ka amamane ka hape, Iesu a thupë së. Marc la ketre trejin ka foa lao nekönatr. Öni angeic: “Satana a lepe la itre hnepe lapa, matre apujene la lapaune ne la itre ekalesia. Ame hë enehila, kola ithuecatr kowe la itre hnepe lapa troa kuca la hmi ne hnepe lapa e nöjei wiik. Mama hnyawa hi laka, nyipiewekë tro sa thupëne la hnepe lapa së!”

¹⁵ Ame la easa öhne la aqane eatrongë së hnei Keriso enehila, easë hi lai a trotrohnine laka, nyidrëti a ajane troa xatua së tro palahi sa catre lapaun. Drei la ketre ceitun. Öni Patrick, ketre qatre thup: “Tha madrine kö la itre xaa trejin troa icasikeu göi cainöj ngöne la itre neköi gurup.” Ngo öni nyidrë ka hape, jëne la hna amekötin cili, easa öhne la ihnimi Iesu koi së. Ame la itre xaa trejin, tre, ka xoue atr angatr ekö, matre tha catre cainöje kö angatr. Ngo ame hë enehila, kösë hetre eloine hë koi angatr. Kola xatua angatr troa acatrene la lapaune i angatr.

¹⁶ Keriso a xatua së matre tro palahi sa catre cainöj. Celë hi huliwa ka sisitria catr enehila. (E jë la Mareko 13:10.) André la ketre trejin hna nyipi acil troa qatre thup. Hnei angeic hna thele tro palahi a trongëne la itre hna amekötin ka hnyipixe hna hamën hnene la organizasio i Iehova. Öni angeic: “Hna amekötin ka hape, troa nango acone la etrune la itre ka huliwa e hnine la Bethela. Kola amekunë së hnene la hna amekötin cili laka, nyipiewekë tro sa catre cainöj.”

17, 18. Pine nemene matre loi e tro sa lapa mekune la eloine la troa kapa la itre ewekë ka saze?

¹⁷ Iesu Keriso Joxu së a eatrongë së. Nge  celë hi ka troa xatua së enehila me elanyi fe. Pane mekune jë la eloine la troa kapa la ketre ewekë ka saze e hnine la organizasio. Ame la epuni a kuca la hmi ne hnepe lapa, qaja jë la thangane ka loi hnei epuni hna kapa, qa ngöne la itre ewekë ka saze ngöne la itre icasikeu me ngöne la huliwa ne cainöj.

¹⁸ Maine tro palahi sa lapa mekune la eloine la troa trongëne la itre hna amekötin hnene la organizasio i Iehova, haawe, tro hë lai a hmaloi koi së troa drengethenge me madrin. Pine laka, tha easë hmaca kö a fejane la itre itus tune ekö, haawe, ijiji hë troa huliwane la manie ngöne la itre xaa götrane la huliwa ne cainöj. Ketre, easa huliwane la itre mobilis, matre canga ketr la itre atr e cailo fen, hnene la maca ka loi. Hapeu, tro kö sa huliwane la itre jiane huliwa ka hnyipixe cili? Celë hi ketre aqane tro sa sajuëne la musi Keriso. Nge aja i nyidrë tro sa huliwane hnyawa la itre jiane huliwa qaathene la organizasio.

19. Pine nemene matre loi e tro palahi sa trongëne la itre hna amekötin hnei Keriso?

¹⁹ Ame la easa trongëne la itre hna amekötin hnei Keriso, easë hi lai a xatuane la itre trejin troa caas me acatrene la lapaune i angatr. Hnei André hna qaja la itre ewekë ka saze ngöne la itre Bethela. Öni angeic: “Kola acatrene la mejiuneng la eni a goeëne la itre ka huliwa ngöne Bethela ekö, nge angatr a kapa la ewekë hna saze. Ngacama hna saze la itre hnëqa i angatr, ngo ka madrine palahi angatr troa huliwa i Iehova.”

20, 21. (a) Pine nemene matre loi e tro palahi sa mejiune koi Keriso, Atre Elemeken? (b) Nemene la hnying hne së hna troa ce wang ngöne la ketre tane mekun?

²⁰ Easenyi hë tro Iesu Keriso, Atre Elemeken a “cate me troa cat” me ‘ee cilie kowe la itre huliwa nyine axouen.’ (Hna Amaman 6:2; Salamo 45:4) Nyidrëti a hnëkë së göne la mel me huliwa hna troa kuca elany, ngöne la fene ka hnyipixe. Kola troa inine la itre hna troa amelene hmaca me ixatua troa aparadraisone la ihnadro.

²¹ Maine tro palahi sa mejiune kowe la Joxu së, nge Atre Elemeken, haawe, tro hë nyidrëti a eatrongë së kowe la fene ka hnyipixe. (E jë la Salamo 46:1-3.) Tha ka hmaloi kö enehila troa kapa la itre ewekë ka saze ngöne la mele së, nge ka asesëkötrë së. Nemene la nyine tro sa kuca matre tro palahi a tingeting la mekuna së me catre la lapaune së koi Iehova? Celë hi la hne së hna troa ce wang ngöne la ketre tane mekun.