1, 2. (a) Nemene la ethanyine la itre ewekë ka saze ngöne la mele së? (Wange ju la pane iatr.) (b) Tune la hna qaja ngöne Salamo 131, nemene la ka troa xatua së troa tingeting?

THUPENE la 25 lao macatre ne Lloyd me Alexandra a huliwa ngöne la Bethela, hna upi nyidroti hmaca troa cainöj. Ame ngöne lo xötrei, kucakuca catre nyidro. Öni Lloyd: “Kösë hnalapang la Bethela nge melenge hi la huliwang e cili. Hnenge hi hna kapa la ewekë cili, ngo kola tro la itre wiik me itre treu, nge hace catre la meleng.” Ame e itre xaa ijin, Lloyd a madrin, ngo e thupen, angeice ha kucakuca me hleuhleu.

² Ame e itre xaa ijin, hetre ewekë ka saze ngöne la mele së, nge kola asesëkötrë së, matre pëhë madrine së. (Ite Edomë 12:25) Nemene la nyine tro sa kuca matre tro palahi a tingeting la mekuna së, ngöne ka kola saze la ketre ewekë? (E jë  la Salamo 131:1-3.) Tro sa ce wang la ceitun ne la itre hlue i Iehova, ekö me enehila. Ngacama hetre ewekë ka saze ngöne la mele i angatr, ngo hnei angatr palahi hna hetrenyi la tingeting.

3. Nemene la aqane saze la mele i Iosefa?

³ Pane mekune jë la tulu i Iosefa. Iosefa la neköne hnimina i Iakobo. Celë hi matre, ka zalu catr la itre trejin me angeic. Ame lo Iosefa a 17 lao macatre, hnei angatr hna salemë angeic matre troa nyi hlu. (Genese 37:2-4, 23-28) Kola traqa koi 13 lao macatre ne angeic a akötre e Aigupito. Hnei angeic hna nyi hlu, nge hna akalabusi angeic e thupen. Nanyi catre Iosefa qaathene la keme i angeic, ka hnimi angeic. Maine ju, tro angeic a elëhni me kucakuca, pine la itre hnei angeic hna melën. Nemene la ka xatua Iosefa?

4. (a) Nemene la hna kuca hnei Iosefa lo angeic e hnine la kalabus? (b) Nemene la aqane sa Iehova la itre thithi Iosefa?

⁴ Ame la Iosefa e hnine la kalabus, maine jë, hnei angeice hna lapa mekune la ixatua i Iehova. (Genese 39:21; Salamo 105:17-19) Ketre, maine jë hnei angeic hna mekun lo itre hnei angeic hna meköl goeën ekö, lo thöthi petre kö angeic. Celë hi ka akeukawane la hni angeic laka, ce Iehova me angeic. (Genese 37:5-11) Hnei angeice fe hna catre thith me fe la hni angeic koi Iehova. (Salamo 145:18) Nge hnei Iehova hna sa la itre thithi Iosefa. Eje hi, hnei Nyidrëti hna akeukawane la hni Iosefa laka, tro kö Nyidrëti a ‘ceme angeic.’—Itre Huliwa 7:9, 10. * (Wange ju la ithuemacany.)

5. Nemene la aqane tro la “tingetinge ka sisitia qa thei Akötesie” a xatua së troa catre nyihlue i Iehova?

⁵ Ngacama tru catre la itre jol, ngo ijije hi tro sa hetrenyi la “tingetinge ka sisitia qa thei Akötesie,” ka thupëne “la itre hni së” me xatua së troa xomihni. (E jë la Filipi 4:6, 7.) Ame la easa hnehengazo menu, tro la “tingetinge ka sisitia qa thei Akötesie” a xatua së matre tro palahi sa catre nyihlue i Iehova. Tro sa ce wang la tulu ne la itre trejin enehila ka melëne la ewekë cili.

6, 7. Nemene la aqane troa xatua së hnene la thith matre troa tingeting la mekuna së? Qaja jë la ketre ceitun.

⁶ Hleuhleu catre Ryan me Juliette, la nyidroti a atre laka, tha lue pionie hut hmaca kö nyidro. Öni Ryan: “Hnei nyio hna fe la hni nyio koi Iehova. Atre hi nyio laka, loi e tro nyio a mejiune koi Nyidrë. Nyimutre la itre ka xötrei atre la nyipici. Celë hi matre, hnei nyio hna thithi koi Iehova me sipo Nyidrë troa xatua nyio troa amamai tulu.”

⁷ Nemene la aqane sa Iehova la thithi nyidro? Öni Ryan: “Thupene la hnei nyio hna thith, paatre pi hi la itre mekun ka ngazo me itre hnei nyio hna hnehengazo fë. Hnene la tingeting ka sisitria qaathei Akötresie, hna thupëne la itre hni me itre mekuna i nyio. Maine ka lolo la aqane mekuna i nyio, tro hë nyio a catre huliwa i Iehova.”

8-10. (a) Nemene la aqane tro la uati hmitrötre i Akötresie a xatua së ngöne la easa hnehengazo menu? (b) Nemene la aqane tro Iehova a xatua së, e tro palahi sa catre huliwa i Nyidrë?

 ⁸ Kola xatua së hnene la uati hmitrötre i Akötresie troa tingeting. Ej a xatua së troa xom la itre xötre ne la Tusi Hmitrötr, ka xatua së tro sa atre la ka nyipiewekë kowe la mele së. (E jë la Ioane 14:26, 27.) Hanawang la tulu i Philip me Mary, lue trefëne ka mel e hnine la Bethela koi 25 lao macatre. Tha foa ju kö lao treu, nge kola meci la lue thine i nyidro me itre xaa sinee fe. Ketre, nyidroti a troa thupëne la keme i Mary, ka nango wezipo.

⁹ Öni Philip: “Kösë ase hë ni kapa lai jol. Ngo öhne ju hi ni la xötre Kolose 1:11 hna qaja e hnine la Ita Ne Thup nyine inin. Eje hi laka, hnenge hna xomihnine lai jol, ngo hetre ewekë ka paatr. Nyipiewekë tro ni a ‘cengöne xomi hni me xomi hni ahoeanyi memine la madin.’ Trotrohnine hi ni laka, ame la ka troa amadrinë ni, tre, tha kolo kö la itre ewekë ka traqa ngöne la meleng, ngo kolo pe lo emenene la uati hmitrötre i Akötresie.”

¹⁰ Hnei Philip me Mary hna catre huliwa i Iehova, matre hnei Nyidrëti hna amanathithi nyidro. Thupene la nyidroti a tro qa ngöne la Bethela, hnei nyidroti hna nyiqane ini Tusi Hmitrötr memine la itre atr, nge aja i angatr troa anyimua ini tus ngöne la wiik. Öni Mary: “Madrine catre nyio ke, jëne la itre hnainin, kösë Iehova a akeukawane la lue hni nyio.”

11, 12. (a) Nemene la hna kuca hnei Iosefa, nge hna amanathithine hnei Iehova? (b) Nemene la aqane amanathithi Iosefa hnei Iehova?

¹¹ Hnene la itre ewekë ka saze ngöne la mele së, matre canga hnehengazo menu hi së, nge thëthëhmine pë hë së la itre xaa ewekë. Maine ju, tro fe Iosefa a hane mekune tune lai. Ngo ame pe, hnei angeic hna thel troa kuca hnyawa la huliwa hnei angeic hna atreine kuca ngöne la ijine cili. Hnei Iosefa hna huliwa catr koi Potifara. Ketre tune fe, hnei angeic hna xome hnyawa la huliwa hna hamën hnene la tixene kalabus.—Genese 39:21-23.

¹² Ame ngöne la ketre drai, hna ahnithe koi Iosefa la lue atr hna akalabusin, nge ka huliwa koi Farao. Pine laka, hnei Iosefa hna nyidrawa nyidro, matre pëhë xou thei nyidro troa qaja koi angeic la itre jole i nyidro, me itre hnei nyidroti hna puj. (Genese  40:5-8) Thatre kö Iosefa laka, troa nuamele angeic epin, hnene la hnei angatr hna ce ithanatan. Thupene la lue macatre, hna nue Iosefa hmaca qa kalabus, nge ketre atr ka draië catre hë angeic e Aigupito. Farao hmekuje hi la ka draië hui Iosefa!—Genese 41:1, 14-16, 39-41.

13. Nemene la aqane tro sa thele la manathithi qaathei Iehova, ngöne la itre ijine jol?

¹³ Ceitui easë me Iosefa laka, hetre ijine easa mekune ka hape, hace catre palaha la itre jole së. Ngo maine tro sa xomihni me catr, tro hë Iehova lai a amanathithi së. (Salamo 37:5) Ngacama easa hnehengazo ngo ‘hetre jëne kötr’ maine hetre mejiune pena. (2 Korinito 4:8) Maine tro palahi sa catre cainöj, tro hë Iehova a ceme së.

14-16. Nemene la ka xatua Filipo troa catre cainöj, ngacama nyimutre la itre ewekë ka saze ngöne la mele i angeic?

¹⁴ Fillipo la ketre tulu ka lolo. Hnei angeic hna tro fë maca ka loi. Hnei angeic palahi hna catre cainöj, ngacama kola traqa la itre jol. Hna hamë angeic la ketre hnëqa e Ierusalema. (Itre Huliwa 6:1-6) E cili, hna saze la mele i angeic. Thupene la kola humuthi Setefano, hna nyiqane qanangazone la itre Keresiano. Celë hi matre, hna kötr hnene la itre Keresiano a tro Ierusalema. Ngo aja i Filipo tro palahi a catre huliwa i Iehova. Celë hi matre hnei angeic hna fek a tro Samaria ke, nyimutre la itre atr e cili ka aja itre maca ka lolo.—Mataio 10:5; Itre Huliwa 8:1, 5.

¹⁵ Aja i Filipo troa nue la uati hmitrötre i Akötresie troa eatrongë angeic. Celë hi matre, hnei Iehova hna upi angeic kowe la itre nöj, matre troa cainöj kowe la itre atr ka thatre la itre maca ka lolo. Nyimutre la itre atre Iuda ka wangacone la angetre Samaria, me ka qanangazo angatr. Ngo tha ka iwangatrehmekunyi atr kö Filipo. Hnei angeic hna catre tro fë la itre maca ka lolo koi angatr. Nge hnei angetre Samaria hna “ce kapa” la maca i angeic!—Itre Huliwa 8:6-8.

¹⁶ Thupene lai, hnene la uati hmitrötre i Akötresie hna upi Filipo troa cainöj e Azota me e Kaisaria, nge nyimutre la angetre ethen ka lapa e cili. (Itre Huliwa 8:39, 40) E cili, hna saze hmaca la mele i Filipo.  Hnei angeic hna faipoipo, nge hetre neköi angeic. Ngo ame pe, hnei angeic palahi hna catre cainöj, nge hnei Iehova hna amanathithi angeic me hnepe lapa i angeic.—Itre Huliwa 21:8, 9.

17, 18. Ame la kola saze la mele së, nemene la aqane tro la huliwa ne cainöj a xatua së?

¹⁷ Nyimutre la itre trejin ka huliwa i Iehova ngöne la drai ka pexej. Alanyimu la itre ka qaja ka hape, ame la troa catre cainöj tre, celë hi jëne madrine i angatr, ngacama hetre ewekë ka saze ngöne la mele i angatr. Drei la ceitune i Osborne me Polite, lue trefëne qa Afrique du Sud. Ame la nyidroti a tro qa ngöne la Bethela, öni nyidro ka hape, ka hmaloi troa öhnyi huliwa me hnalapa. Ngo öni Osborne: “Tha canga öhnyi huliwa kö nyio.” Öni Polite: “Köni treu ne pane thele huliwa nyio, nge pëkö manie i nyio. Ketre jole ka tru.”

¹⁸ Nemene la ka xatua Osborne me Polite? Öni Osborne: “Hnene laka, hnei nyio hna catre cainöj memine la ekalesia, matre tingeting la itre mekuna i nyio, nge tha hnehengazo menu kö nyio.” Tha hnei nyidroti kö hna hnehengazo menu me lapa hnalapa. Hnei nyidroti pe hna catre cainöj. Celë hi ka thue madrine koi nyidro. Öni Osborne: “Hnei nyio hna thele la nöjei pengöne huliwa, matre hetre huliwa i nyio hë enehila.”

19-21. (a) Nemene la ka xatua së matre tro palahi a tingeting la itre mekuna së? (b) Nemene la thangane ka lolo, e hne së hna kapa la itre ewekë ka saze ngöne la mele së?

¹⁹ Tune la hne së hna ce wang, loi e tro palahi sa catre huliwa i Iehova me mejiune koi Nyidrë, matre troa tingeting la mekuna së ngöne la itre ijine jol. (E jë la Mika 7:7.) Ame la easa kapa hnyawa la ewekë ka saze ngöne la mele së, tre, kolo fe a acatrene la aqane imelekeu së me Iehova. Öni Polite ka hape, ame la angeic a tro qa ngöne la Bethela,  tre, hnei angeic hna inine troa mejiune koi Iehova ngöne la itre ijine jol. Öni angeic: “Eni ha easenyi catre koi Nyidrë.”

²⁰ Ame Mary, lo trejin hna qaja ha e caha hun, tre, ka pionie angeic, nge angeic a thupëne la keme i angeic ka wezipo. Öni angeic: “Trotrohnine hë ni laka, ame la eni a nyiqane hnehengazo ke, loi e tro ni a pane lapa, me thith, me mano. Hnenge hna inine troa mejiune koi Iehova. Celë hi la ini ka sisitria hnenge hna kapa, nge ka troa xatua ni elany.”

²¹ Öni Lloyd me Alexandra ka hape, hace catre koi nyidro la kola saze la mele i nyidro. Ngo ame pe, hetre eloin. Eje hi, catrecatre hë la lapaune i nyidro ke, ngacama hetre jole ju hë, ngo tha hnehengazo menu hmaca kö nyidro. Nge kösë saze hë nyidro, lolo catre nyidro.

22. Nemene la thangane ka lolo hne së hna troa kapa, e tro palahi sa mejiune koi Iehova?

²² Ijije hi tro sa hane saze la aqane mele së ngöne la fene celë. Maine jë, troa saze la hnëqa së ngöne la huliwa i Iehova, maine pena troa tithi së hnei mec. Maine jë, tro sa thupëne la hnepe lapa së. Ngacama traqa ju hë la itre jol, ngo mejiune jë koi Iehova ke, Nyidrëti a wangatrunyi epun, nge aja i Nyidrëti troa xatua epun. (Heberu 4:16; 1 Peteru 5:6, 7) Catre pi. Thithi jë koi Iehova, Tretretro së, nge mejiune jë koi Nyidrë. E cili, troa thupëne la itre mekuna i epun hnene la tingeting ka sisitria qaathei Iehova.