TANE MEKUN 41
Catre Jë Mele Nyipici Ngöne La Ijine “Akötr Atraqatr”
“Aja Iehova jë, nyipunie ange ka hmitöte i nyidë asë; Iehova la ate thupëne la ka nyipici.”—SAL. 31:23.
NYIMA 129 Tro Sa Cile Hut
MEKUN KA TRU *
1-2. (a) Nemene la hna troa qaja hnene la itre musi ne fen? (b) Nemene la itre hnying hne së hna troa sa?
PANE mekune jë laka, itre musi ne fen a qaja ka hape, “tingetinge hë nge pë hë hna mecin.” Angatr a amenu së me hape, angatre hi la ka troa apatrene la nöjei jol. Ngo thatreine kö angatr troa saze la ewekë ka troa traqa e thupen! Pine nemen? Tune la hna perofetan hnei Tusi Hmitrötr, “tro ha aca tro traqa koi angatr, . . . pëkö jë ne kötre i angatr.”—1 Thes. 5:3.
2 Nyipiewekë troa sa la itre hnying celë: Nemene la ka troa traqa ngöne la “akötr atraqatr”? Nemene la hnei Iehova hna ajane tro sa kuca ngöne la ijine cili? Nge nemene la aqane tro sa isa hnëkë enehila, matre troa mele nyipici ngöne la akötr atraqatr?—Mat. 24:21.
NEMENE LA KA TROA TRAQA NGÖNE LA “AKÖTR ATRAQATR”?
3. Thenge la Hna Amaman 17:5, 15-18, nemene la aqane tro Akötresieti a lep apatrenyi “Babulona Atraqatr”?
3 E jë la Hna Amaman 17:5, 15-18. Troa lep apatrenyi “Babulona Atraqatr”! Tune la hna qaja ha, thatreine kö la itre nöj troa saze la ewekë ka troa traqa ngöne la ijine cili. Pine nemen? Pine laka “tro Akötresie a amë hnine la itre hni angatr la aja troa sajuëne la mekuna i nyidrë.” Nemene la mekuna i Nyidrë? Troa lep apatrene la nöjei hmi ka thoi asë, tune la itre hmi ka qaja ka hape, itre hmi Keresiano. * Akötresieti a troa amë la mekuna i Nyidrë e kuhu hni ne “la treene lao jian” ne la “öni ka ses ka madra palulu.” Ame la treene lao jian, tre, kola nyihatrene la nöjei mus ka sajuëne la “öni ka ses,” ene lo Nations Unies. (Hna ama. 17:3, 11-13; 18:8) Ame la itre musi ne fen a lep apatrene la itre hmi ka thoi, tre, kolo lai a nyiqane la akötr atraqatr. Ketre jol ka tru kowe la nöjei atr asë!
4. (a) Nemene la itre kepin hna troa hamëne hnene la itre mus, ngöne la angatr a troa lep apatrene la itre hmi? (b) Nemene la hna troa kuca hnene la itre atr ka hane sine la itre hmi cili?
4 Thatre kö së la itre kepin matre tro la itre mus a lep apatrenyi Babulona Atraqatr. Maine jë, tro angatr a qaja ka hape, hnene la itre hmi matre pëkö tingeting, nge angatr a musinëne la itre huliwa i mus. Maine pena, tro la itre musi a qaja ka hape, ka trenamo la itre hmi. (Hna ama. 18:3, 7) Ame ngöne la kola troa apatrene elanyi la itre hmi, tre, tha kolo kö lai a hape, kola troa lep asë la itre ka hmi. Ngo kolo pe a troa lep la itre organizasio i hmi asë. Ame hë e cili, tro la itre ka hmi a öhn laka, ka thoi la itre hna qaja hnene la itre hene ne hmi. Maine jë, tro la itre xaa ka hmi a qaja ka hape, tha hane fe kö angatr sine la itre hmi cili.
5. Nemene la hnei Iehova hna thingehnaean göne la akötr atraqatr, nge pine nemen?
5 Tha hna qaja kö hnei Tusi Hmitrötr la etrune la itre drai ne troa lep apatrenyi Babulona Atraqatr. Ame pe, tha tro kö a hmitr. (Hna ama. 18:10, 21) Hnei Iehova hna thingehnaean ka hape, tro Nyidrëti a “ahopatrene la itre drai” ne la akötr atraqatr, matre troa mel la “itre hnei nyidrëti hna iën” nge troa cile huti la hmi ka wië. (Mar. 13:19, 20) Ngo nemene la hnei Iehova hna ajane troa sa kuca, ngöne la kola nyiqane la akötr atraqatr me Amagedro?
CATRE JË NYIHLUE I IEHOVA NGÖNE LA HMI KA WIË
6. Nemene la nyine tro sa kuca matre troa trotrije la hmi ka thoi?
6 Ame ngöne la tane mekun hnapan, hne së lo hna ce wang laka, Iehova a ajane tro la itre hlue i Nyidrëti a trotriji Babulona Atraqatr. Ngo hetre nyine tro fe sa kuca. Loi e tro sa catre nyihlue i Iehova. Hanawang la lue ewekë nyine tro sa kuca.
Tha tro pi kö sa nue la itre icasikeu, ngacama tru catre la itre jol (Wange ju la paragarafe 7) *
7. (a) Nemene la aqane tro sa trongëne hnyawa la itre trepene meköti Iehova? (b) Nemene la hna qaja ngöne Heberu 10:24, 25, ka amamane la enyipiewekëne la itre icasikeu enehila?
7 Ame la hnapan, loi e tro sa catre trongëne la itre trepene meköti Iehova. Tha ajane kö së troa nyitipune la itre aqane ujë ne la itre atr ne fen. Easa sisine la itre huliwa ka sis, tune la troa faipoipo hnene la lue trahmany maine lue föe pena. (Mat. 19:4, 5; Rom. 1:26, 27) Ame la hnaaluen, loi e tro palahi sa ce hmi memine la itre trejin Keresiano. Celë hi hne së hna kuca ngöne la easa icasikeu ngöne la Uma Ne Baselaia, maine icasikeu juetrë ngöne la ketre hnalapa. Tha tro pi kö sa triane la itre icasikeu. “Pine laka calemi hë la drai i Akötresie, catre pi së kuca tune lai.”—E jë la Heberu 10:24, 25.
8. Hapeu, tro kö a saze la maca hne së hna troa tro fë elany?
8 Ame ngöne la akötr atraqatr, troa saze la maca hne së hna tro fë. Ame enehila, easa cainöjëne la itre maca ka lolo me inine la itre atr. Ngo troa traqa la ijin, tro sa tro fë la ketre maca ka catr. Tusi Hmitrötr a aceitunëne la maca cili me wene mani ka catr. (Hna ama. 16:21) Maine jë, easa troa qaja kowe la itre atr ka hape, easenyi hë la pune la fene i Satana. Tro kö a thuemacanyi së elany la alien memine la aqane tro sa tro fë la maca cili. Hapeu, tro kö sa tro fë la maca cili tune la aqane cainöje së enehila, maine tro pena a saze? Thatre kö së. Ngo ketre manathith ka tru la troa catre cainöjëne la maca ne iameköti Iehova!—Ezek. 2:3-5.
9. Nemene la aqane tro la itre nöj a ujë kowe la maca hne së hna troa tro fë, ngo nemene la ka xecie koi së?
9 Maine jë, tro la itre nöj a thele troa sewe së troa tro fë la maca cili. Ngo loi e tro sa catre mejiune koi Iehova ke, Nyidrëti palahi a xatua së ngöne la huliwa ne cainöj enehila. Xecie hnyawa koi së laka, tro kö Iehova a hamë së la trengecatr, matre troa kuca la aja i Nyidrë.—Mika 3:8.
CANGA HNËKË JË QËMEKENE TROA LEPE LA NÖJE I AKÖTRESIE
10. Thenge la tusi Luka 21:25-28, nemene la thangane la akötr atraqatr kowe la itre atr?
10 E jë la Luka 21:25-28. Ame ngöne la akötr atraqatr, tro la itre atr a sesëkötr ke, troa paatre la itre ewekë ne fen hnei angatr hna mejiune kow. Tro angatr a “akötr” me xou kowe la mele i angatr. (Zef. 1:14, 15) Ame ngöne la ijine cili, nyimutre la itre jol ka troa traqa. Ketre, jole catre fe kowe la nöje i Iehova ke, tha easë kö a sine la fene celë. Maine jë, troa tru hnei ewekë ka troa paatre the së.
11. (a) Pine nemene matre tro la itre nöj a thel troa lep apatrene la Itretre Anyipici Iehova? (b) Pine nemene matre tha tro pi kö sa xouene la akötr atraqatr?
11 Maine jë, tro la itre atr ka sine ekö lo itre hmi hna apatren, a troa elëhni kowe la Itretre Anyipici Iehova, hmi ka lapa pe. Maine jë tro angatr a qaja amamane la elëhni angatr ngöne Ëternet. Troa methinë së hnei Satana me itre nöj ke, hmi së pe hi la ka troa lapa. Tha eatre ju kö lo aja i angatr troa lep apatrene la nöjei hmi asë. Angatre ha troa thel troa lep apatrenyi së. E cili, tro ha hëne la itre nöj ka hape, Gog atre Magog. * Tro la itre nöj a ce xöl matre troa lepe la nöje i Iehova. (Ezek. 38:2, 14-16) Maine jë, tro sa hnehengazone la itre ewekë ka troa traqa ngöne la akötr atraqatr ke, pëkö hne së hna atre. Ngo tha tro pi kö sa xou. Tro kö Iehova a hamë ithuemacany koi së, matre tro sa mel. (Sal. 34:19) Tro hë sa ‘mejë, me gala draië’ ke, “calemi hë la iamele koi [së].” *
12. Nemene la aqane hnëkë së hnene la “hlue ka nyipici me ka inamacan,” kowe la itre drai elany?
12 Kola hnëkë së hnene la “hlue ka nyipici me ka inamacan,” troa mele nyipici ngöne la akötr atraqatr. (Mat. 24:45) Pane mekune jë lo itre porogaram hna hnëkën kowe lo itre asabele ne 2016-2018. Hnene la itre cainöj hna ithuecatre koi së troa eënyine la itre thiina ka troa xatua së ngöne la drai Iehova. Tro sa ce wang la itre thiina cili.
ACATRENE JË LA AQANE MELE NYIPICI SË ME XOMIHNI ME CATR
Loi e troa canga hnëkë enehila matre mele pe ngöne la “akötr atraqatr” (Wange ju la paragarafe 13-16) *
13. Tro sa acatrene tune kaa la aqane mele nyipici së koi Iehova, nge pine nemene matre nyipiewekë troa canga huliwan enehila?
13 Mele nyipici: Ame la taane la asabele katru 2016, tre, “Nyipici Jë Koi Iehova!” Kola ithuecatre koi së troa acatrene la aqane imelekeu së me Iehova, matre troa mele nyipici koi Nyidrë. Ketre, maine tro sa catre thith me inine la Tusi Hmitrötr, tro hë sa easenyi koi Iehova me atreine cile kowe la itre jol. Pine laka calemi hë la pune la fene celë, haawe, tro lai a tupath la aqane mele nyipici së koi Akötresie me kowe la Baselaia i Nyidrë. Tro palahi la itre atr a hnyimasai së ke, tha easë kö a hane sine la fene i Satana. (2 Pet. 3:3, 4) Haawe, maine tro sa catre mele nyipici koi Iehova enehila, tro hë së lai a catre mele nyipici elany ngöne la akötr atraqatr.
14. (a) Nemene la ka troa saze thene la itre trejin ka elemekene la nöje i Akötresieti e celë fen? (b) Pine nemene matre nyipiewekë tro sa mele nyipici?
14 Ame ngöne la akötr atraqatr, hetre ewekë ka troa saze thene la itre trejin ka elemekene la nöje i Iehova e celë fen. Troa traqa la ijine troa acasine la itre hna iën e koho hnengödrai, matre troa sine la isi Amagedro. (Mat. 24:31; Hna ama. 2:26, 27) E cili, pëhë lo Lapa Ne Xomi Meköt. Ngo tro palahi a lolo la aqane eköthe la huliwa ne la ka alanyim. Itre trejin ka maca la ka troa elemeken. Easa troa amamane laka, easa mele nyipici koi Iehova, ngöne la easa ce huliwa me angatr me drengethenge angatr. Nyipici, emele së hi lai!
15. Nemene la aqane tro sa catre xomihnine la itre jol, nge pine nemene matre nyipiewekë troa canga huliwan enehila?
15 Xomihni: Ame la taane la asabele katru 2017, tre, “The Hmacahmaca Kö!” Hnene la porogarame celë hna xatua së troa xomihnine la itre jol. Easa atreine xomihni, tha hnene kö la sipu trengecatre së, ngo hnene pe la ixatua qaathei Iehova. (Rom. 12:12) Tha tro pi kö sa thëthëhmine la hna thingehnaeane hnei Iesu, lo kola hape: “Ame la atre cile huti uti hë la pun, tro hë angeic a mel.” (Mat. 24:13, ftn.) Iesu a ithuecatre koi së troa mele nyipici, ngacama tru catre la itre jol. Ame la easa xomihnine la itre jol enehila, easë hi lai a acatrene la lapaune së qëmekene la akötr atraqatr.
16. Nemene la ka xatua së troa catr, nge nemene la ka troa acatrene la aqane catre së enehila?
16 Catr: Ame la taane la asabele katru 2018, tre, “Catre Jë!” Hnene la asabele celë hna amekunë së laka, thatreine kö tro sa catr hnene la sipu trengecatre së. Loi e tro pe sa catre lapaune koi Iehova, matre troa atreine xomihni me catr. Nemene la aqane tro sa acatrene la lapaune së koi Iehova? Nyipiewekë tro sa e Tusi Hmitrötr o drai, me lapa mekune la aqane amelene Iehova ekö la nöje i Nyidrë. (Sal. 68:20; 2 Pet. 2:9) Ame ngöne la akötr atraqatr elany, tro la itre nöj a thele troa lepe la nöje i Iehova. Loi e tro sa catr me mejiune koi Iehova. (Sal. 112:7, 8; Heb. 13:6) Maine tro sa catre lapaune enehila, tro hë sa hetre trengecatr ngöne la kola troa lepe la nöje i Iehova hnei Gog. *
CALEMI HË LA IAMELE
Iesu memine la trongene isi nyidrë ngöne la isi Amagedro. Angatr a troa apatrene la itre ithupëjia me Akötresie! (Wange ju la paragarafe 17)
17. Pine nemene matre tha tro pi kö sa xouene la isi Amagedro? (Wange ju la pane iatr.)
17 Hna qaja ngöne lo tane mekun hnapan ka hape, easa mel ngöne la itre drai hnapin. Ngo easë fe a mejiune troa mel ngöne la akötr atraqatr. Kola troa nyipune la fene celë ka ngazo hnene la isi Amagedro. Tha tro pi kö sa xou. Pine nemen? Pine laka, tha easë kö la ka troa isi ke, isi Iehova. (Ite edomë 1:33; Ezek. 38:18-20; Zaka. 14:3) Ame elany, tro Iehova a upi Iesu troa elemekene la trongene isi Nyidrë, ene la itre hna iën me itre miriad lao angela. Angatr a troa isi me Satana me itre dremoni memine la itre musi ne la fen.—Dan. 12:1; Hna ama. 6:2; 17:14.
18. (a) Nemene la hna thingehnaean hnei Iehova? (b) Thenge la hna qaja ngöne Hna Amaman 7:9, 13-17, pine nemene matre tha tro kö sa luelu göi elany?
18 Hnei Iehova hna thingehnaean ka hape: “Pëkö ewekë hna kuca nyine ishi me nyipo hna troa ien.” (Is. 54:17) Ame la itre ka “ala nyimu atraqatr” ne la nöje i Iehova, tre, angatr a troa “xulu qa ngöne la akötr atraqatr.” Tro palahi angatr a catre nyihlue i Nyidrë. (E jë la Hna Amaman 7:9, 13-17.) Tusi Hmitrötr a amamane laka, ijije hi tro sa mel elany! Atre hi së laka, “Iehova la ate thupëne la ka nyipici.” (Sal. 31:23) Troa madrin hnene la itre ka hnim me atrunyi Iehova, ngöne la Nyidrëti a troa ahmitrötrëne la ëje i Nyidrëti elany.—Ezek. 38:23.
19. Nemene la hne së hna lapa treqen elany?
19 Pane mekune jë la hna qaja ngöne 2 Timoteo 3:2-5 laka, kola qaja la mele ne la itre atr elany ngöne la fene ka hnyipixe, tha hna musinëne kö hnei Satana. (Wange ju la hna eköhagen hna hape, “Mele Ne La Itre Atr Elany.”) Celë hi hna kuca hnei George Gangas, ketre atrene la Lapa Ne Xomi Meköt. Öni nyidrë: “Troa mingöminge la fen ke, kola atrunyi Iehova hnene la nöjei atr asë! Easenyi hë matre tro sa mel ngöne la fene ka hnyipixe. Tro sa mel utihë epine palua tui Iehova.” Drei la ketre mejiune ka tru koi së!
NYIMA 122 Cile Huti Ju, The Enienije Kö!
^ par. 5 Atre hi së laka, easenyi hë matre traqa pi la “akötr atraqatr.” Tune kaa la itre hlue i Iehova ngöne la ijine cili? Nemene la hnei Iehova hna ajane tro sa kuca? Nemene la itre thiina nyine tro sa eënyine enehila, nge ka troa xatua së troa mele nyipici ngöne la ijine akötr atraqatr? Tro la tane mekun celë a sa la itre hnying.
^ par. 3 GÖI TROA TROTROHNIN: Kola qaja la itre hmi Keresiano göi ëjen. Angatr a qaja ka hape, angatr a xötrethenge Keriso, ngo tha trongëne pe la itre trepene meköti Akötresie.
^ par. 11 GÖI TROA TROTROHNIN: Ame Gog atre Magog (maine Gog), tre, kola qaja la itre nöj hna acasin, nge ka troa icilekeu memine la nöje i Iehova ngöne la akötr atraqatr.
^ par. 11 Maine epuni a aja itre xaa ithuemacany göne la itre ewekë ka troa traqa qëmekene la isi Amagedro, wange ju la mekene 21 ne la itus, Musi Hë La Baselaia i Akötresie! Maine epuni a aja itre xaa ithuemacany göi Gog atre Magog, me göne la aqane tro Iehova a thupëne la nöje i Nyidrë e Amagedro, wange ju la Ita Ne Thup ne 15 Julai 2015, götrane 9-15.
^ par. 16 Ame la taane la asabele katru 2019, tre, “Tha Tro Kö a Ase La Ihnim!” Kola ithuecatre koi së ka hape, tha tro kö sa hnengazo menu. Ce easë me Iehova, Keme së ka tru ihnimin.—1 Kor. 13:8.
