1. Nemene la hna kuca hnei Iehova matre troa eatrëne la aja i Nyidrë?

ATREINE hi Iehova eatrëne la aja i Nyidrë. Iehova la Atre Ini Ka Sisitria, me Atre Akeukawan, me Atre Cainöj. Hetre itre xaa ewekë palakö hnei Nyidrëti hna kuca. (Is. 48:17; 2 Kor. 7:6; Gal. 3:8) Ngo hnei Iehova mina fe hna aijijëne la itre atr troa eatrëne la aja i Nyidrë. (Mat. 24:14; 28:19, 20; 2 Kor. 1:3, 4) Nge Nyidrëti a hamë së la inamacan me trengecatr ka ijij göne lai. Celë hi la aliene la ëje i Iehova, tune la aqane trotrohnine hnene la itre ka inamacan.

2. (a) Pine nemene matre easa luelu e itre xaa ijin? (b) Nemene la hne së hna troa ce wang?

² Easa ajane troa hane kuca la aja i Iehova, ngo maine jë tro sa luelu. Pine nemen? Pine laka, easa uti ipië trootro maine kucakuca, me itre xaa jole ju kö. Itre xan a mekun laka, tru catre hë la hnei angatr hna kuca. Ame ngöne la tane mekun celë, tro sa ce wang la aqane tro Iehova a aijijë së isa ala caas, troa eatrëne la aja i Nyidrë. Tro fe sa ce wang la aqane hamëne Iehova, la aja me trengecatr kowe la itre hlue i Nyidrëti ekö, troa eatrëne la aja i Nyidrë. Ketre, tro sa ce wang la aqane tro sa nue Iehova troa ië së kowe la huliwa i Nyidrë.

3. Thenge la tusi Filipi 2:13, nemene la aqane tro Iehova a hamë aja koi së troa kuca la mekuna i Nyidrë?

³ E jë la Filipi 2:13. * Iehova a hamë aja koi së troa kuca la mekuna i Nyidrë. Tune kaa? Maine jë, kola aja ixatua  hnene la ketre trejin, maine hetre nyine troa kuca e hnine la ekalesia. Maine pena, kola kapa la ketre tusi qaathene la Lapa Ne Xomi Meköt ka hape, kola aja ixatua ngöne la ketre götran. E cili, easa isa hnying ka hape, ‘Hapeu, ijijinge kö troa hane ixatua?’ Maine jë, kola hamë së la ketre huliwa, ngo easa mekun laka, thatreine kö së. Maine pena, hne së hna e Tusi Hmitrötr me hnying ka hape, ‘Thenge la xötre celë, nemene la aqane tro ni a xatuane la itre xan?’ Tha Iehova kö a musinë së troa kuca la ketre huliwa. Öhne hi Nyidrëti la trenge aja së troa huliwa i Nyidrë. Tro kö Nyidrëti a xatua së troa eatrëne la aja së.

4. Nemene la aqane tro Iehova a hamë së la trengecatr matre troa atreine kuca la huliwa i Nyidrë?

⁴ Iehova a hamë së la trengecatr matre troa atreine kuca la huliwa i Nyidrë. (Is. 40:29) Tro Iehova a hamë së la uati hmitrötr, matre tro sa maca ngöne la huliwa. (Eso. 35:30-35) Jëne la organizasio, Iehova a ini së la aqane troa huliwa. Maine thatreine kö së kuca la ketre huliwa, loi e tro sa sipo ixatua. Catre jë sipo Iehova Keme së, Atre hamëne la “men atraqatr.” (2 Kor. 4:7; Luka 11:13) Tusi Hmitrötr a amamane la aqane hamëne Iehova ekö, la aja me trengecatr kowe la itre hlue i Nyidrë, matre troa eatrëne la aja i Nyidrë. Tro sa ce wang la itre tulu i angatr. Pane thele jë la aqane tro sa huliwa i Iehova, tui angatr ekö.

5. Eu la ijine Iehova a ië Mose matre troa thapa la nöje i Nyidrë?

⁵ Hnei Iehova hna xatua Mose troa thapa la nöje Isaraela qa Aigupito. Ngo eu la kola ië angeic? Tha hna ië Mose kö thupene la hna ini angeic “thenge la inamacan i angetre Aigupito.” (Itre hu. 7:22-25) Hnei Iehova hna ië Mose thupene la hnei Nyidrëti hna xatua angeic troa hetre hni ne ipië me thiina ka menyik. (Itre hu. 7:30, 34-36) Hnei Iehova hna hamë Mose la trengecatre ka ijij, matre troa cil qëmekene la Joxu ne Aigupito. (Eso. 9:13-19) Nemene la ini hne së hna xom qa ngöne la aqan me ijine Iehova a ië Mose? Iehova a iëne la itre ka nyitipune la itre thiina i Nyidrë me sipo ixatua thei Nyidrë.—Fil. 4:13.

6. Nemene la ini hne së hna xom qa ngöne la aqane ië Bazilai hnei Iehova matre troa xatua Davita?

⁶ Itre macatre thupen, hnei Iehova hna ië Bazilai matre troa xatua Davita Joxu. Davita memine la nöj a “mecijin, me kucakuca, me pi iji” ke, angatr a kötrene la nekö i Davita, ene Abasaloma. Ngacama qatre hë Bazilai ngo hnei nyidrëti hna nue mel, matre troa xatua Davita memine la itre sine ce tro i angeic. Tha hnei Bazilai kö hna mekun laka, qatre palaha nyidrëti matre troa huliwa i Iehova. Hnei Bazilai hna thele la aqane troa xatuane la itre hlue i Akötresieti ka aja ixatua. (2 Sam. 17:27-29) Nemene la ini koi së? Ame koi Iehova, tha ka nyipiewekë kö la etrune la macatre së. Tro kö Nyidrëti a ië së matre troa xatuane la itre trejin ka lapa easenyi së, me itre ka mele ngöne la itre nöj ka pë ewekë. (Ite edomë 3:27, 28; 19:17) Ngacama, thatreine kö tro sa ketre sipu xatuane la itre trejin, ngo ijije hi tro sa kuië ahnahna thatraqai angatr.—2 Kor. 8:14, 15; 9:11.

7. Nemene la aqane ië Simeona hnei Iehova, nge pine nemene matre kola ithuecatre koi së?

⁷ Simeona la ketre qatr ka mele nyipici e Ierusalema. Hnei Iehova hna  thingehnaeane koi nyidrë ka hape, tha tro kö nyidrëti a mec e tha hna pane öhne la Mesia. Hna ithuecatre koi Simeona, matre itre macatre ne treqene nyidrëti la Mesia. Hnei Iehova hna amanathithine la lapaun memine la aqane xomihni Simeona. Ame la ketre drai, “hnene la uati hmitrötr” hna upi Simeona kowe la ēnē. E cili, hnei nyidrëti hna öhne la medreng, ene Iesu. Hnei Iehova hna ië Simeona matre troa perofetan ka hape, Keriso hi la medreng. (Luka 2:25-35) Eje hi laka, meci hë Simeona qëmekene tro Iesu a nyiqane cainöj. Ngo tru la hni ne ole i Simeona kowe la huliwa hnei Iehova hna upi nyidrëti troa kuca. Drei la itre manathith hna troa kapa hnei Simeona elany! Ame ngöne la fene ka hnyipixe elany, nyidrëti a troa öhne la aqane musi Iesu. Ketre manathithi lai kowe la fen asë! (Gen. 22:18) Loi e tro fe sa olene koi Iehova ngöne la Nyidrëti a hamë hnëqa së.

8. Nemene la aqane tro Iehova a hane ië së, tui Banaba ekö?

⁸ Ame ngöne lo hneijine la itre pane Keresiano, hnei Iosefa, ketre atre ham, hna huliwa i Iehova. (Itre hu. 4:36, 37) Hnene la itre aposetolo hna ati ëje i angeic ka hape, Banaba, kola hape, “Nekö Ne La Iakeukawany.” Maine jë, hnei angeic hna akeukawane la hni ne la itre xan. Ame ngöne la ijine Saulo a Keresiano, alanyimu la itre trejin ka xoue angeic ke, hnei angeic hna qanangazone la itre ka lapaune koi Iesu. Ngo hnei Banaba hna ithuecatre koi Saulo. Maine jë tru la hni ne ole i Saulo koi Banaba. (Itre hu. 9:21, 26-28) Thupene lai, hnene la itre qatre thup ne Ierusalema hna ithuecatre kowe la itre trejin ka lapa e Anetioka (e Suria). Drei la hnei angatr hna up? Banaba! Lolo la mekuna i angatr. Eje hi, hna “thuecatre i angatr troa lapa qale koi Joxu hnene la hni angatr ka pexej.” (Itre hu. 11:22-24) Ketre tune fe enehila, ijije hi tro Iehova a upi së troa aegöcatrene la itre trejin. Maine jë, tro sa akeukawane la hni ne la itre ka meci sineen, maine wange pena la ketre trejin ka kucakuca. Hapeu, tha aja së kö troa hane upi së hnei Iehova, tui Banaba ekö?—1 Thes. 5:14.

9. Nemene la ini koi së qa ngöne la aqane xatua Vasily hnei Iehova, matre troa ketre qatre thup ka lolo?

⁹ Hnei Iehova hna xatua Vasily matre troa ketre atre thup ka lolo e hnine la ekalesia. Hna acili angeic troa qatre thup ngöne lo angeic a 26 lao macatre. Angeic a xou ke, ame koi angeic, tha ijiji angeice kö troa xatuane la itre trejin ka kucakuca me ka cile kowe la itre jol. Ame pe, hna xatua angeic hnene la itre qatre thup ka maca me hnene la Ini Ne Cainöj Qaathei Akötresie. Hnei Vasily hna thele troa maca. Hnei angeic hna cinyianyine la itre ewekë ka co nyine tro angeic a kuca. Ame la angeic a eatrëne la ketre, kösë pëhë xou i angeic troa xome la hnëqa i angeic. Öni angeic: “Ame lo itre ewekë ka axouenyi ni ekö ke, kolo pena a thue madrineng enehila. Eni a madrine la Iehova a xatua ni troa öhne la xötr ka ithuecatre kowe la ketre trejin ka kucakuca.” Itre trejin trahmany, maine tro epuni a tui Vasily me xome hnyawa la huliwa qaathei Iehova, tro hë Nyidrëti a xatua epuni troa catre huliwa e hnine la ekalesia.

10. Nemene la hna kuca hnei Abigaila, nge nemene la ini koi së?

¹⁰ Hna weji Davita me itre sooce i nyidrë hnei Saulo Joxu, matre hnei angatre  hna kötr me thele ixatua. Hnene la itre sooce i Davita hna sipo xen koi Nabala, ketre atr trenamo. Meköti hi tro angatr a sipone koi Nabala ke, angatr lo ka thupëne la itre mamoe i nyidrë ngöne lo kola hnötr. Ngo hnei Nabala hna pi tru me thipëne la sipo i angatr. E cili, hnei Davita hna elëhni me thele troa humuthi Nabala me itre atrene la hnalapa i angeic. (1 Sam. 25:3-13, 22) Eloine pe, ka inamacane Abigaila, ifënekö i Nabala ka mingöming. Hnei eahlo hna catr me sipo ielene koi Davita ka hape, tha tro kö nyidrëti a humuthi Nabala me itre hlue i angeic. Hnei Abigaila hna ithuecatre koi Davita troa sipo ixatua thei Iehova. Hna ketr la hni Davita hnene la aqane ujë i Abigaila. Trotrohnine hi nyidrëti laka, Iehova la ka upi Abigaila. (1 Sam. 25:23-28, 32-34) Hnei Abigaila hna eënyine la itre thiina ka lolo, matre hnei Iehova hna ië eahlo troa kuca la aja i Nyidrë. Ketre tune fe enehila, maine tro la itre trejine föe a catr me atreine waiewekë, tro hë Iehova a ië angatr troa ithuecatre kowe la hnepe lapa i angatr me kowe la ekalesia.—Ite edomë 24:3; Tito 2:3-5.

11. Nemene la hna kuca hnene la itre nekö i Saluma jajiny, nge drei la ka nyitipu nyudreni enehila?

¹¹ Ame ekö, hna iëne la itre nekö i Saluma jajiny, matre troa xupe hmaca la itre hag e Ierusalema. (Neh. 2:20; 3:12) Ngacama ketre joxu la keme i nyudren, ngo aja i nyudreni troa kuca la huliwa ka catrehnin me ka jol. (Neh. 4:15-18) Tha ceitui nyudreni kö memine la itre trahmany ka trene hnëqa e Tekoa. Tha hnei angatre kö “hna xatuane la huliwa”! (Neh. 3:5) Pane mekune jë la madrinene la itre nekö i Saluma jajiny, ngöne lo kola afenesine la itre hag thupene hi la 52 lao drai! (Neh. 6:15) Ame enehila, tru la madrinene la itre trejine föe troa saene troa huliwa i Akötresie, tune la Huliwa Ne Xupi Uma Ne Baselaia. Ka nyipiewekë la huliwa hna kuca hnene la itre trejine föe ka maca me ka atreine waiewekë me mele nyipici.

12. Nemene la aqane tro Iehova a hane ië së troa kuca la aja i Nyidrë, tui Tabitha ekö?

¹² Hnei Iehova hna ithuecatre koi Tabitha troa hamëne la “itre ahnahna ne utipin” thatraqane la itre sine föe. (Itre hu. 9:36) Ame lo kola meci hnei Tabitha, alanyimu la itre ka treije pi angeic ke, ka ham me loi thiina angeic. Hnei angatr hna madrin ngöne lo Peteru aposetolo a amele angeice hmaca. (Itre hu. 9:39-41) Nemene la ini hne së hna xom qa ngöne la tulu i Tabitha? Ngacama easa qatr maine thöth, trahmany maine föe, ngo ijiji së asë hi troa kuca la loi me xatuane la itre trejin ka aja ixatua.—Heb. 13:16.

13. Nemene la aqane xatua Ruth hnei Iehova, nge nemene la hnei angeic hna qaja?

¹³ Ruth la ketre trejine föe ka xou troa ithanata qëmekene la nöjei atr. Ame pe, angeic a ajane troa mesinare. Ame lo angeic a thöth, hnei angeic hna tro fë tarak ngöne la itre hnalapa trootro. Öni angeic, “Madrine catre ni.” Ngo jole koi angeic troa cainöjëne la Baselaia i Akötresie. Ame lo angeic a 18 lao macatre, hnei Ruth hna xome la huliwa ne pionie ka ixatua, ngacama tru la xou i angeic. Ame ngöne lo 1946, hnei angeic hna sine la Ini Ne Gileada. Nge hnei Iehova hna ië Ruth matre troa cainöj e Hawaii me Zapo. Thupene la 80 lao macatre ngöne la huliwa ne cainöj, öni Ruth: “Hnei Iehova palahi hna aegöcatrenyi ni. Hnei Nyidrëti hna xatua ni  matre tha tro kö ni a xou troa ithanata memine la itre atr. Xecie hnyawa koi ni laka, Iehova a iëne la itre ka catre mejiune koi Nyidrë.”

14. Thenge la hna qaja ngöne Kolose 1:29, nemene la nyine tro sa kuca matre tro Iehova a hane upi së troa kuca la aja i Nyidrë?

¹⁴ Itre macatre ne Iehova a upe la itre hlue i Nyidrëti troa kuca la aja i Nyidrë. Tune kaa fe së enehila? Isa qanyi së kö amamane laka, easa ajane troa huliwa i Iehova. (E jë la Kolose 1:29.) Tro kö Iehova a xatua së troa maca ngöne la hna cainöj, me hamë ini, me akeukawane la hni ne la itre ka akötr, me catre huliwa, me ketre nyipi sinee, me itre xaa aqane aejëne la aja i Nyidrë.

15. Thenge la 1 Timoteo 4:12, 15, nemene la hna troa sipone koi Iehova hnene la itre trejin trahmany ka thöth?

¹⁵ Tune kaa fe nyipunie, itre trejine trahmany ka thöth? Nyipiewekë troa hetre trejin ka hetre trengecatr, matre troa hane ixatua e hnine la ekalesia, tune la itre drikona. Ame ngöne la itre xaa ekalesia, alanyimu kö la itre qatre thup hune la itre drikona. Hapeu itre trejin trahmany ka thöth, tha aja i epuni kö troa hane huliwa catr e hnine la ekalesia? Öni itre xan, “Eni hi a troa cainöje trootro.” Maine celë hi aqane mekuna i epun, loi e tro epuni a sipo ixatua koi Iehova ngöne la thith. Sipo Nyidrëti jë troa thue aja i epun troa hane xome la hnëqa ne drikona, me hamë epuni la atreine troa kuca la huliwa i Nyidrë. (Ate cai. 12:1) Nyipiewekë catre koi huni la ixatua i epun!—E jë la 1 Timoteo 4:12, 15.

16. Nemene la nyine tro sa sipone koi Iehova, nge pine nemen?

¹⁶ Iehova hmekuje hi la ka atreine troa hamë së la atreine troa eatrëne la aja i Nyidrë. Celë hi matre, loi e tro sa sipo Nyidrëti troa hamë së la aja me trengecatr ka ijij, matre troa kuca la huliwa i Nyidrë. Qatre ju hë së maine thöth, ngo loi e tro palahi sa nue la traeme së me trengecatre së me itre mo së me itre hne së hna atrein, matre troa atrunyi Iehova. (Ate cai. 9:10) Maine kola hamë hnëqa së ngöne la huliwa i Iehova, tha tro kö a sewe së hnene la xou. Ketre manathith ka tru la troa atrunyi Iehova, Keme së ka tru ihnimin!