1. Nemene la ka amamane laka, easa mel ngöne la “ite drai hnapin”?

MAINE hna hnaho së thupene lo macatre 1914, kolo lai a hape, easa mel ngöne la “itre drai tixenuë” ne la fene celë. (2 Tim. 3:1) Atre hë së la itre hna perofetan hnei Iesu göne la hneijine së. Kola qaja la itre isi me jiin me itre sa, me itre mec ka solesol. Ketre, kola elë la iangazo, nge kola icilekeu memine la nöje i Iehova. (Mat. 24:3, 7-9, 12; Luka 21:10-12) Itre atr a ujë tune lo hna perofetan hnei Paulo aposetolo. (Wange ju la hna eköhagen, “ Aqane Ujë Ne La Itre Atr Enehila.”) Atre hnyawa hi la Itretre Anyipici Iehova laka, easa mel ngöne la “ite drai hnapin.”—Mika 4:1.

2. Nemene la itre hnying nyine troa sa?

² Qane hë lo 1914, easa melëne la itre drai tixenuë ne la “ite drai hnapin.” Pine laka, easenyi catre hë la pun, haawe, loi e tro sa atre la itre mekun ka sa la itre hnying celë: Nemene la ka troa traqa ngöne la pune la “ite drai hnapin”? Nemene la hnei Iehova hna ajane tro sa kuca qëmekene la ijine cili?

3. Thenge la hna perofetan ngöne 1 Thesalonika 5:1-3, nemene la hna troa qaja hnene la itre nöj?

³ E jë la 1 Thesalonika 5:1-3. Paulo a qaja la “drai Iehova.” Troa nyiqane la drai cili ngöne la kola troa apatrenyi “Babulona Atraqatr,” ene la hmi ka thoi, nge troa nyipune hnei Amagedro. (Hna ama. 16:14, 16;  17:5) Ngo qëmekene troa nyiqane la “drai” cili, tro la itre nöj a pane qaja ka hape: “Tingetinge hë nge pë hë hna mecin!” Celë hi la hnei angatr hna qaja ngöne la kola imelekeu hnyawa la itre nöj. * Ngo isapengöne kö memine lo hna qaja hnei Tusi Hmitrötr. Pine nemen? Ame hë la itre mus a qaja ka hape, “Tingetinge hë nge pë hë hna mecin!” ke, tro la nöjei atr asë a mejiune kowe la hnei angatr hna qaja. Ngo kolo lai a troa nyiqane la “akötr atraqatr,” nge “tro ha aca tro traqa koi angatre la itre akötre ka tru.”—Mat. 24:21.

4. (a) Nemene la itre xaa ithuemacany hne së hna thatre göne la ijine kola troa qaja ka hape, “tingetinge hë nge pë hë hna mecin”? (b) Nemene la hne së hna atre hë?

⁴ Hetre itre ithuemacany hne së hna atre göne la ijine kola troa qaja ka hape, “tingetinge hë nge pë hë hna mecin.” Ngo, hetrenyi palakö la itre xaa ewekë hne së hna thatre. Thatre kö së la kepin memine la aqane tro la itre he ne nöj a qaja la itre trengewekë cili. Maine jë troa anyimua qaja, maine pena, tro hi a aca qaja mekötin. Ame pe, atre hi së laka, thatreine kö troa hamën hnene la itre mus, la tingeting e cailo fen. Tusi Hmitrötr a hmekë së göne la ijine cili. Celë hi ka amamane ka hape, kola troa nyiqane la “drai Iehova”!

5. Nemene la hna qaja ngöne 1 Thesalonika 5:4-6, ka xatua së troa hnëkë kowe la “drai Iehova”?

⁵ E jë la 1 Thesalonika 5:4-6. Paulo a qaja la itre nyine tro sa kuca, matre troa hnëkë kowe la “drai Iehova.” Tha tro pi kö sa “meköl tui itre xan.” Loi pe tro sa “hmek.” Tha tro kö sa lö hnine la kuci politik. Maine tro sa sine la kuci politik, tro hë sa ‘sine la fen.’ (Ioane 15:19) Atre hi së laka, Baselaia i Akötresieti hmekuje hi la ka troa hamëne la tingeting e cailo fen asë.

6. Nemene la nyine tro sa canga kuca enehila, nge pine nemen?

⁶ Loi e tro sa hmek me xatuane la itre xan troa atre la itre hna perofetan hnei Tusi Hmitrötr, göne la itre ewekë ka troa traqa e celë fen. Celë hi nyine tro sa canga kuca qëmekene la akötr atraqatr. Enehila hi la ijine troa catre cainöj. Ame hë e thupen, tha ijine hmaca kö troa thele troa nyihlue i Iehova. *

7. Nemene la hnei Iehova hna ajane tro sa kuca enehila?

⁷ Qëmekene troa traqa la “drai” Nyidrë, Iehova a ajane tro sa catre cainöj.  Loi e tro “pala hi a tru hnei huliwa [së] koi Joxu.” (1 Kor. 15:58) Ase hë Iesu qaja la nyine tro sa kuca. Hnei nyidrëti hna pane qaja lo itre ewekë ka troa traqa ngöne la itre drai ne la pun. Öni nyidrëti fe: “Ketre, tro fe a pane cainöjëne la maca ka loi ngöne la nöjei nöj asë.” (Mar. 13:4, 8, 10; Mat. 24:14) Pane mekune jë: Ame la easa catre cainöj enehila ke, easë hi lai a eatrëne la hna perofetan hnei Tusi Hmitrötr.

8. Nemene la ka amamane laka, hetre thangane la huliwa ne cainöj?

⁸ Hapeu, hetre thangane kö la huliwa ne cainöj? Ame e nöjei macatre, alanyimu la itre atr ka drenge la maca ka loi ne la Baselaia. Pane mekune jë la etrune la itre ka cainöj ngöne la itre drai ne la pun. Ame lo 1914, hetrenyi la 5 155 lao ka cainöj ngöne la 43 lao nöj. Ame hë enehila, traqa koi 8,5 milio lao ka cainöj ngöne la 240 lao nöj! Ngo tha fenesi palakö la huliwa. Celë hi matre, loi e tro sa catre qaja kowe la itre atr ka hape, Baselaia i Akötresieti hmekuje hi la nyin la itre jol.—Sal. 145:11-13.

9. Pine nemene matre nyipiewekë tro sa catre cainöjëne la maca ne la Baselaia?

⁹ Iehova kö la ka troa qaja ka hape, fenesi hë la huliwa ne cainöj. Utihë eu tro la itre atr a thele troa atrepengöi Iehova Akötresie me Iesu Keriso? (Ioane 17:3) Thatre kö së. Ngo atre hi së laka, utihë la kola nyiqane la akötr atraqatr, ijije hi tro la “itre ka hmalahnine troa kapa la mele ka pë pun,” a dreng la itre maca ka lolo me hane nyihlue i Iehova. (Itre hu. 13:48) Tro sa xatua angatre tune kaa?

10. Nemene la hnei Iehova hna hnëkën, matre xatua së troa inine la nyipici kowe la itre atr?

¹⁰ Jëne la organizasio i Nyidrë, Iehova a hnëkëne la itre jiane huliwa, matre xatua së troa inine la nyipici kowe la itre atr. Ame ngöne la icasikeu ne nyipine wiik, easa kepe ixatua göne la aqane troa cainöj. Kola ini së la aqane troa ithanata ngöne la easa xötrei iöhny, me iwai hmaca, me ini tus memine la itre atr. Hnene la organizasio i Iehova hna kuca la itre jiane huliwa  hna amë e hnine la Keesi Zuti Së. Kola xatua së troa . . .

• nyiqaane ithanata,

• thue aja kowe la atr troa drenge la maca,

• thue aja kowe la atr troa inine la Tusi Hmitrötr,

• inine la nyipici qa hnine la Tusi Hmitrötr,

• amamane la site së memine la Uma Ne Baselaia.

Loi e tro sa xom me catre huliwane la itre jiane huliwa cili. * Maine hne së hna porotrike hnyawa memine la ketre atr, loi e tro sa nue la ketre tarak maine ketre zonal, matre tro angeic a e utihë la easë hmaca a wai angeic. Hnëqa së, isa ala caas, troa catre cainöj e nöjei treu.

11. Pine nemene matre hna kuca la itre cours bibliques en ligne ngöne site së?

¹¹ Iehova a xatuane la itre atr troa atre la nyipici, jëne la itre cours bibliques en ligne ngöne jw.org^®. Pine nemene matre hna eköthe la itre ini cili? Ame e nöjei treu, alanyimu la itre atr e cailo fen ka thel troa inine la Tusi Hmitrötr. Jëne Ëternet, kola aijijë angatr troa nyiqaane inine la Wesi Ula i Akötresie. Ketre, ame la easa cainöj, tha ajane kö itre xan troa kapa la itre ini. Ngo loi e tro sa amamane koi angatr la götrane cili ngöne la site së, maine iupi fë pena la itre tane mekun ngöne la qene lapa i angatr. *

12. Nemene la hna troa atre hnene la itre atr, jëne la itre ini qa hnine la Tusi Hmitrötr?

¹² Ame la itre cours bibliques en ligne,  tre, kola qaja la itre mekun celë: “Tusi Hmitrötr Memine La Atrekë Ewekëne Lai,” “Itre Tulu e Hnine La Tusi Hmitrötr,” memine la “Maca Ne Mejiun Qa Hnine La Tusi Hmitrötr.” Jëne la itre ini cili, tro la itre atr a atre la:

• Aqane troa xatua angatr hnene la Tusi Hmitrötr

• Pengöi Iehova me Iesu memine la itre angela

• Kepin matre hnei Akötresieti hna xupe la itre atr

• Qane la ngazo me kepin matre easa akötr

Ketre, tro fe angatr a atre la aqane tro Iehova elanyi a . . .

• apatrene la akötr me mec,

• amelene hmaca la itre ka mec, me

• nyihnane la itre musi ne la fen hnene la Baselaia i Nyidrë.

13. Hapeu, kolo kö a nyihnane la ini tus hnene la itre ini ngöne Ëternet? Qejepengöne jë.

¹³ Tha kolo kö a nyihnane la ini tus hnene la itre ini ngöne Ëternet. Hnei Iesu hna upi së troa inine la itre atr. Hna kuca la itre ini cili, matre tro la itre ka ajan a atre la itre xaa ithuemacany, me ajane troa ini Tusi Hmitrötr. E cili, tro hë angatr a inine la Tusi Hmitrötr. Ame ngöne la pune la itre ini ngöne Ëternet, ijije hi tro la atr a sipone troa ini tus memine la ketre trejin. Ame e nöjei drai, traqa koi 230 lao atr ka sipone troa inine la Tusi Hmitrötr! Eje hi, hetre thangane catre la itre ini cili, nge jëne mele lai!

14. Thenge la hna qaja hnei Iesu ngöne Mataio 28:19, 20, nemene la huliwa hne së hna troa kuca hnyawa, nge pine nemen?

¹⁴ E jë la Mataio 28:19, 20. Loi e tro sa kuca asë la hne së hna atrein, matre troa “inine la nöjei atr . . . , troa trongëne la nöjei ewekë asëjëihë lo [hnei Iesu] hna ahnith.” Loi e tro sa xatuane la itre atr troa trotrohnine la enyipiewekëne tro angatr a nyihlue i Iehova, me sajuëne la Baselaia i Nyidrë. Nyipiewekë tro sa xatua angatr troa trongëne la itre hnei angatr hna inin, me nue la mele i angatr koi Iehova me xomi bapataiso. Celë hi ka troa amele angatr ngöne la drai Iehova.—1 Pet. 3:21.

15. Pine nemene matre tha easë hmaca kö a ini tus memine la ketre atr?

¹⁵ Tune lo hna qaja e caha hun, easenyi hë la pune la fene celë. Celë hi kepin matre, tha tro kö sa ini tusi aqeany memine la itre atr ka tha saze kö, nge pëkö aja i angatr troa nyihlue i Iehova. (1 Kor. 9:26) Ka nyipiewekë catre la huliwa së! Nyimutre palakö la itre atr ka ajane troa dreng la itre maca ka lolo ne la Baselaia, qëmekene troa nyipune la huliwa.

16. Thenge la tusi Hna Amamane 18:2, 4, 5, 8, nemene la nyine tro sa kuca? (Wange ju la ithuemacany.)

¹⁶ E jë la Hna Amaman 18:2, 4, 5, 8. Itre xötre celë a amamane la aja i Iehova kowe la itre hlue i Nyidrë. Tha tro pi kö la itre nyipi Keresiano a sine la hmi ka thoi. Maine jë, hnene la ketre ka ini Tusi Hmitrötr hna hane sine la hmi ka thoi ekö. Hnei angeic hna hane kuca la itre huliwa i hmi me kuië manie. Qëmekene tro la ketre hnainin a nyiqane cainöj, nyipiewekë tro angeic a pane nuetrije la hmi ka thoi. Loi e tro angeic a cinyianyi tus kowe la hene ne hmi me qaja ka hape, troa köletrije la ëje i angeic. *

17. Nemene la itre huliwa hna troa thipetrij hnene la Keresiano, nge pine nemen?

¹⁷ Tha tro kö la nyipi Keresiano a xome la ketre huliwa ka sajuëne la hmi ka thoi. (2 Kor. 6:14-17) Tha tro kö sa huliwa ngöne la ketre uma hmitrötr. Ketre, maine kola hëne la entreprise i easë, loi e tro sa thupën, matre tha tro kö sa huliwa ngöne la hnë hmi. Nge maine easa ketre sipu huliwa i easë kö,  tha tro kö sa sipon maine kapa la huliwa qaathene la hmi ka thoi. Pine nemen? Pine laka tha aja së kö troa lö hnine la itre huliwa me itre tria ne la hmi ka thoi, hna sisine hnei Akötresie.—Is. 52:11. *

18. Nemene la aqane ujë ne la ketre trejin ngöne la hna huliwa?

¹⁸ Ame ekö, hnene la ketre atr ka xupi uma hna sipone kowe la ketre qatre thup, troa kuca la ihene uma ne la ketre uma hmitrötr. Atre hi nyidrëti laka, tha ajane kö la trejine troa huliwa ngöne la itre uma hmitrötr. Ngo, pëkö ketre atr hnei nyidrëti hna öhn göne la huliwa cili. Ame pe, hnene la trejin hna trongëne la itre trepene meköt me thipëne la huliwa. Ame lo wiik thupen, kola mama ngöne nuvel laka, hna acile la kuluse ngöne la uma hmitrötr. Maine tha trongëne ju la itre trepene meköt hnene la trejin, nyidrëti hi la ka troa mama ngöne nuvel. Pane mekune jë la ethane lai kowe la itre trejin me koi Iehova!

19-20. (a) Nemene la hne së hna inin? (b) Nemene la itre xaa nyine tro sa atre?

¹⁹ Tune la hna perofetan hnei Tusi Hmitrötr, easenyi hë matre tro la itre nöj a qaja ka hape, “tingetinge hë nge pë hë hna mecin.” Jëne la hna ini së hnei Iehova, atre hi së laka, thatreine kö la itre nöj troa hamë tingeting e celë fen. Nemene la nyine tro sa kuca qëmekene troa traqa la ijine cili? Iehova a ajane tro sa catre cainöjëne la maca ne la Baselaia, me inine la itre atr. Ketre, loi e tro fe sa lapa ananyine la hmi ka thoi. Tha tro kö sa hane sine la Babulona Atraqatr, me xome la itre huliwa ka sajuëne la hmi ka thoi.

²⁰ Hetre itre xaa ewekë ka troa traqa ngöne “la itre drai hnapin.” Nge hetre itre xaa ewekë hnei Iehova hna ajane tro sa kuca. Nemene la itre ewekë cili, nge nemene la aqane tro sa isa hnëkë koi elany? Celë hi hne së hna troa ce wang ngöne la ketre tane mekun.