KETRE atr ka huliwa ngöne météo a goeëne la iatr ka amamane la itre hulö. Angeic a öhn laka, troa traqa la udreli ngöne la ketre götrane gaa tru atr. Pine la ihnimi angeic koi itre xan, ene pe angeic a kuca asë la hna atrein, matre troa canga thuemacanyi angatr.

Ketre tune fe, Iehova a hmekëne la itre atr göne la ketre “sa” ka tru, hna tha hane kö öhne ekö. Nemene la aqane tro Nyidrëti a kuca? Nge nemene la ka amamane laka, Nyidrëti a nue ijine kowe la itre atr troa kuca la ketre ewekë? Qëmekene troa sa la lue hnying celë, tro sa pane wang la aqane hmekëne Iehova la itre atr ekö.

Ame ekö, hnei Iehova palahi hna canga hmekëne la itre ka tha drei Nyidrëti kö, qëmekene troa traqa la “itre sa” maine itre hna amekötin hnei Nyidrë. (Ite edomë 10:25; Iere. 30:23) Hnei Nyidrëti palahi hna canga ithuemacanyine la itre atr, me amamai angatr la aqane troa saze matre troa drengethenge Nyidrë. (2 Ite jo. 17:12-15; Neh. 9:29, 30) Hnei Nyidrëti hna upe la itre hlue i Nyidrëti ka mele nyipici, matre troa xatuane la itre ka tha idrei troa saze. Jëne la itre hlue i Nyidrë, hnei Iehova hna amekötin la itre ka tha idrei me xatua angatr troa canga saze.—Amosa 3:7.

Noa la ketre atr hna upe hnei Akötresie, matre troa qaja la ketre hna amekötin hnei Akötresie. Itre macatre ne nyidrëti a hmekëne la itre atr ka ngazo me ka iakötrë laka, troa traqa la Iwë Atraqatr. (Gen. 6:9-13, 17) Hnei nyidrëti fe hna qaja koi angatr la nyine troa kuca matre troa mele pe ngöne la Iwë Atraqatr. Pine laka hnei Noa hna catre cainöj, matre hna hë nyidrëti ka hape, “atre cainöjëne la meköt.”—2 Pet. 2:5.

Ngacama hnei Noa hna nue trengecatr, ngo pëkö ka drenge la maca hnei nyidrëti hna tro fë qaathei Akötresie. Hnei angatr hna amamane laka, pëkö lapaune i angatr. Ame la pun, hnei angatr hna mec ngöne la Iwë Atraqatr a “apatrenyi angatr asë.” (Mat. 24:39; Heb. 11:7) Eje hi, hnei Akötresieti hna hmekë angatr.

Ame itre xaa ijin, Iehova a hmekëne la itre atr qëmekene troa ameköti angatr, nge Nyidrëti a nue ijine koi angatr troa saze. Drei la ketre ceitun. Qëmekene troa lep la nöj e Aigupito hnene la Treene Lao Akötr, hnei Iehova hna hmekëne la joxu ne Aigupito. Hnei Iehova hna upi Mose me Arona troa hmekë Farao me itre hlue i nyidrë göne la hnaasevenene lao akötr laka, troa mala la itre wene manie ka catr. Kola troa eatr la hna amekötin celë ngöne la drai thupen. Hapeu, hnei Akötresieti kö hna nue ijine koi angatr troa thele hnë zae? Öni Tusi Hmitrötr: “Ame la ite xa hlue i Farao itete qouene la hna ulatine hnei Iehova, hna akötene la ite hlue i angate me ite öni angate kowe la ite uma. Ngo ame angete tha nyipine la hna ulatine hnei Iehova, te, hna nue pe kö la ite hlue i angate me ite öni angate ngöne la hnehlapa.” (Eso. 9:18-21) Eje hi, Iehova a canga hmekëne la itre atr, matre nue ijine kowe la itre ka idrei troa canga thele hnë zae.

Hna hane fe hmekë Farao me itre hlue i nyidrë göne la hnaatrenene akötr. Ngo, tha hnei angatre kö hna dreng. (Eso. 4:22, 23) Ame la pune lai, tre, hna meci la itre nekö i angatr haetra. Drei la ketre ewekë ka ngazo! (Eso. 11:4-10; 12:29) Hapeu, hetre ijine i angatre kö troa drengethenge? Eje hi! Hnei Mose hna canga hmekëne la angetre Isaraela göne la hnaatrenene lao akötr, me amamai angatr  la aqane troa amelene la hnepe lapa i angatr. (Eso. 12:21-28) Ala ije la ka trongëne la itre hna amekötin hnei Mose? Thenge la itre rapor, hna sasaithe la 3 milio lao atr, ene la itre atre Isaraela me “ka ala nyimu ka isa pengöne kö” thene la angetre ethen me angetre Aigupito. Hnei angatr hna fek qa Aigupito, matre hna amele angatr ngöne la ijine iameköti Akötresie.—Eso. 12:38.

Tune la hna amaman hnene la itre ceitune celë, hnei Iehova palahi hna hmekëne la itre atr, matre hetre ijine i angatr troa saze. (Deut. 32:4) Pine nemene matre Akötresieti a ujë tune lai? Öni Peteru aposetolo ka hape, “xele kö [Iehova] troa apatrene la ketre e nyipunie, ngo loi e tro pe nyipunieti asë a ietra.” (2 Pet. 3:9) Eje hi, Akötresieti a wangatrune la itre atr. Nyidrëti a ajane tro angatr a ietra me saze qëmekene troa traqa la drai Nyidrë.—Is. 48:17, 18; Rom. 2:4.

Loi e tro fe la itre atr enehila a drengethenge la ketre hna amekötin hna tro fë e cailo fen asë. Ame lo Iesu e celë fen, hnei nyidrëti hna hmekën ka hape, troa paatre la fen celë ngöne la ijine “akötr atraqatr.” (Mat. 24:21) Hnei Iesu hna perofetane la itre ewekë ka troa traqa elany, nge hna troa melën hnene la itretre drei nyidrë, ngöne la ijine cili. Easa öhne enehila la itre ewekë cili.—Mat. 24:3-12; Luka 21:10-13.

Thenge la hna perofetane celë, Iehova a upe la nöjei atr troa nyihlue me drengethenge Nyidrëti enehila. Nyidrëti a ajane tro angatr a mele madrin enehila, me kapa la itre xaa manathith ngöne la fen ka hnyipixe elany. (2 Pet. 3:13) Iehova a ajane tro la itre atr a mejiune kowe la itre hnei Nyidrëti hna thingehnaean. Celë hi matre, Nyidrëti a hamë angatr la ketre maca ne iamele. Kola qaja la “maca ka loi ne la Baselaia,” lo hnei Iesu hna perofetan ka hape, troa “cainöjëne . . . e cailo fen nyine anyipicine kowe la nöjei nöj.” (Mat. 24:14) Hnei Akötresieti hna upe la itre hlue i Nyidrë, troa tro fë la “maca” cili ngöne la 240 lao nöj. Iehova a ajane tro la itre atr a drei Nyidrë, matre mele pe ngöne la kola troa traqa la “hnëjine” i Nyidrë.—Zef. 1:14, 15; 2:2, 3.

Qaane hë ekö, hnei Iehova palahi hna nue ijine kowe la itre atr troa saze. Ame pe la ka nyipiewekë, tre, troa hnying ka hape: Tro kö la itre atr a dreng la itre hna amekötin hnei Akötresie, e ijine palakö? Isa catre pi së, itretre tro fë la maca i Akötresie, troa xatuane la itre atr troa mele pe ngöne la ijine la pune celë.