TANE MEKUN 43
Tro Sa Hnimi Iehova Hmekuje Hi
‘Iehova la Akötesieti ka isaxolo.’—NEH. 1:2.
NYIMA 51 Hne Së Hna Sa Xepu Koi Akötresie!
MEKUN KA TRU *
1. Pine nemene matre Iehova hmekuje hi la nyine tro sa atrun?
IEHOVA hi la nyine tro sa atrun ke, Nyidrëti la ka xupi së me hamë mele koi së. (Hna ama. 4:11) Ngo loi e tro sa hmek. Easa hnim me metrötrë Iehova, ngo ijije hi troa thapa la ihnimi cili hnene la itre xaa ewekë, me sewe së troa atrunyi Nyidrë. Nyipiewekë tro sa trotrohnine la kepin matre traqa pi së kowe lai. Ngo tro sa pane ce wang la aliene la kola hape, troa atrunyi Iehova hmekuje hi.
2. Thenge la tusi Esodo 34:14, nemene la hne së hna troa kuca, e ka jui la ihnimi së koi Iehova?
2 Öni Tusi Hmitrötr ka hape, maine ka jui la ihnimi së koi Iehova, tro hë sa nyihlue i Nyidrëti hmekuje hi ngöne la mele së. Tha tro hë sa nue la ketre atr maine ketre ewekë pena, troa xome la göhne i Iehova e kuhu hni së.—E jë la Esodo 34:14.
3. Pine nemene matre easa hnimi Iehova?
3 Tha easë kö a hnime menu Iehova. Easa hnimi Nyidrë ke, hnene la itre ewekë hne së hna atre göi Nyidrë, tune la itre thiina i Nyidrë. Atre hi së la itre ewekë hna ajan me hna sisin hnei Iehova, nge easa nyitipu Nyidrë. Ketre, easa trotrohnin me sajuëne la aja i Nyidrëti kowe la itre atr. Tru la hni ne ole së ke, Iehova a aijijë së troa nyisinee i Nyidrë. (Sal. 25:14) Ame asë hi la itre ewekë hne së hna atre göne la Atre Xupi së, tre, kola aeasenyi së koi Nyidrë.—Iako. 4:8.
4. (a) Nemene la hnei Daibolo hna kuca matre tha tro kö a pexeje la ihnimi së koi Iehova? (b) Nemene la hne së hna troa ce wang ngöne la tane mekun celë?
4 Diabolo la ka musinëne la fen, nge jëne lai, angeic a ajojezi së, matre tro sa kei thenge la itre sipu aja së. (Efe. 2:1-3; 1 Ioane 5:19) Aja i angeic tro sa hnime la itre xaa ewekë, matre tha tro kö a pexeje la ihnimi së koi Iehova. Tro sa ce wang la lue xan. Ame la hnapan, Satana a thel tro sa hni koi manie. Ame la hnaaluen, angeic a thel tro sa iëne la itre nyine iamadrinë ka ngazo.
THA TRO KÖ SA HNI KOI MANIE
5. Pine nemene matre tha tro kö sa hni koi manie?
5 Easë asë hi a ajane troa hetre ka ijij göi xen, me nyine heetr, me uma. Ame pe, loi e tro sa thupën matre tha tro kö sa hni koi manie. Alanyimu enehila la itre atr ka “hni koi mani” me hnime la itre ewekë nyine itön. (2 Tim. 3:2) Atre hi Iesu laka, tro fe a tupathe la itretre drei nyidrë. Celë hi matre öni nyidrë, “Pëkö hlu ka atreine troa nyihluene la lue maseta ke, tro angeice lai a xelene la ketre, me hnime la ketre, maine fedre koi ketre, me methinëne la ketre. Thatreine kö nyipunie troa ce nyihlue i Akötresie me Mani.” (Mat. 6:24) Ame la hlue i Iehova ka huliwa catr matre troa trenamo, tre, angeice hi lai a nyihluene la lue maseta. Tha ka pexeje kö la ihnimi angeic koi Iehova.
Aqane goeë angatre kö hnei angetre Laodikea . . . nge aqane goeë angatre hnei Iehova me Iesu (Wange ju la paragarafe 6)
6. Nemene la ini hne së hna xom qa ngöne la itre trengewekë i Iesu kowe la ekalesia ne Laodikea?
6 Ame la itre atrene la traon e Laodikea ekö, tre, hnei angatr hna pi mama me hape: “Ka trenamo ni, nge eni pala hi a kepe mo, matre pë hmaca kö ketre ewekë hnenge hna ajan.” Ngo mama hnyawa hi koi Iehova me Iesu laka, itre ka “pë ewekë [angatr], me timek, me cile xöe.” Tha hnei Iesu kö hna eamo angatr pine laka, itre ka trenamo. Ngo hnene laka, angatr a hni koi manie, matre hna thë la aqane imelekeu i angatr me Iehova. (Hna ama. 3:14-17) Maine easa öhn laka, kola cia e kuhu hni së la aja troa hni koi manie, loi e tro sa canga lepetrij me amekötine la mekuna së. (1 Tim. 6:7, 8) Loi e tro sa thupën wanga tro sa hnime la itre xaa ewekë. E cili, tha tro kö Iehova a kapa la aqane hmi së. Iehova la “Akötesie ka isaxolo.” (Deu. 4:24) Nemene la nyine tro sa kuca matre tha tro kö sa hane hni koi manie?
7-9. Nemene la ini hne së hna xom qa ngöne la tulu i David, ketre qatre thup?
7 Tro sa pane ce wang la pengöi David, ketre qatre thup e Etazini. Öni angeic ka hape, angeic a huliwa catr. Hnene la entreprise hna hamë huliwa ka tru koi angeic, nge hna nyithupene hnyawa. Ketre atr ka lolo angeic ngöne la huliwa, nge ka hlemu kowe la nöjei atr. Öni David: “Ame koi ni, manathith qaathei Iehova.” Ngo hapeu, qaathei Iehova kö lai?
8 Hnei David hna öhn laka, hetre ethane la huliwa i angeic kowe la aqane imelekeu i angeic me Iehova. Öni angeic: “Ame ngöne la hna icasikeu me ngöne la hna cainöj, eni a mekun la itre jol ngöne la hna huliwa. Eni a kepe manie atrun, ngo eni a hnehengazo, nge kola nyiqane jole la meleng me föeng.”
9 Trotrohnine hë David laka, loi e tro angeic a iëne la ka nyipiewekë. Öni angeic: “Xecie hnyawa koi ni laka, loi e tro ni a amekötine la mekunang.” Hnei David hna sipone koi maseta troa saze la itre hawa ne huliwa. Nemene hë la thangan? Hna upi David qa ngöne la hna huliwa! Nemene la hnei angeic hna kuca? Öni David: “Ame ngöne la drai thupen, hnenge hna xome la huliwa ne pionie ka ixatua.” Thupene lai, hnei nyidroti hna xome la huliwa ne pionie lapa. Hnei David me föe i angeic hna huliwa ngöne hnë nyidrawa uma, ngacama ketre huliwa hna xelen hnei itre xan. Ngo tha celë kö lai ka nyipiewekë koi nyidro. Ngacama tha tru hmaca kö la thupe i nyidro, ngo hetrenyi hi nyidroti la ka ijij. Aja i nyidroti troa amë panëne la huliwa i Iehova ngöne la mele i nyidro. Öhne hnyawa hi nyidroti laka, Iehova a nyihnyawane la mele ne la itre atr ka wangatrune la huliwa ne Baselaia.—Mat. 6:31-33.
10. Tro sa thupëne tune kaa la hni së?
10 Maine easa kepe manie atruny maine ka co, ngo loi e tro palahi sa thupëne la hni së. Tha tro kö sa piine la mele ne la itre ka trenamo. Ketre, tha tro kö sa nue la huliwa i maseta troa tro pa nge pine pëhë la huliwa i Iehova. Nemene la ka troa xatua së? Loi e tro sa isa hnying ka hape: ‘Hapeu, eni palahi a mekun la huliwang ngöne ijine icasikeu me ngöne la hna cainöj? Maine tro ni a kepe manie atrunyi elany, tro kö ni a hnehengazo? Hapeu, manie me itre mo la qaane la itre jol e hnine la faipoipong? Ijijinge kö troa xome la ketre huliwa hna xelen hnei itre xan, ngo ka aijijë ni troa huliwa i Iehova?’ (1 Tim. 6:9-12) Loi e tro sa lapa mekun la itre hnying cili. Tha tro kö sa thëthëhmine laka, Iehova a hnimi së. Öni Iehova kowe la itre ka hnimi Nyidrë: “Tha tro jë kö ni a triji eö, nge tha tro jë kö ni a nuaxöji eö.” Celë hi kepin matre hnei Paulo hna cinyihan ka hape: “Nge ngöne la aqane mele i nyipunie, the tro kö a hni koi mani.”—Heb. 13:5, 6.
LOI E TROA IËNE HNYAWA LA NYINE IAMADRINË
11. Nemene la thangane la itre nyine iamadrinë?
11 Iehova a ajane tro sa mele madrin. Nge itre nyine iamadrinë a hamë madrine koi së. Öni Tusi Hmitrötr: “Pëkö loi ne la ate xeni me ij, me madine ngöne la hni nyëne la loi ne la ite huliwa i nyën.” (Ate cai. 2:24) Ngo nyimutre la itre nyine iamadrinë ne la fen ka hetre ethane koi së. Itre ej a troa ajojezi së, me acian e kuhu hni së la ihnim kowe la itre ewekë hna wathebon hnei Tusi Hmitrötr.
Drei la ka hnëkëne la itre nyine iamadrinë së? (Wange ju la paragarafe 11-14) *
12. Thenge la hna qaja ngöne 1 Korinito 10:21, 22, pine nemene matre loi e tro sa iëne hnyawa la itre nyine iamadrinë?
12 Easa ajane troa hnimi Iehova hnene la hni së ka pexej. Haawe, thatreine kö tro sa xen hune la “laulau i Iehova” me “laulau ne la itre dremoni.” (E jë la 1 Korinito 10:21, 22.) Ame la lue atr a ce xen, tre, kolo hi lai a amamane laka, lue treme sineene nyidro. Haawe, maine tro sa iëne la itre nyine iamadrinë ka amamane la kola isi me kuci iöni me huliwa ka sis, tre, kösë easë hi lai a xen hune la laulau hna hnëkën hnei Satana, ithupëjia me Akötresie. Tro hë lai a hetre ethane koi së me kowe la aqane imelekeu së me Iehova.
13-14. Thenge la hna qaja ngöne Iakobo 1:14, 15, pine nemene matre nyipiewekë tro sa iëne hnyawa la itre nyine iamadrinë? Qaja jë la ketre ceitun.
13 Pine nemene matre ceitune hi la nyine iamadrinë memine la xen? Ijije hi tro sa iëne la hne së hna ajane troa xen. Ngo thupene la hna ase xen, thatreine kö së troa iëne la thangane ej ngöne la ngönetrei së. Maine tro sa xom la itre xen ka lolo, tro hë sa egöcatr; ngo tro së lai a wezipo, e ka ngazo la xen. Tha ka canga mama kö la thangane la xen, ngo e thupen pë hë.
14 Ketre tune fe, ijije hi tro sa iëne la itre nyine iamadrinë. Ngo troa hetre thangan kowe la mekuna me hni së. Maine tro sa iëne la nyine iamadrinë ka lolo, tro hë sa madrin; ngo tro ha hetre ethan, e ka ngazo. (E jë la Iakobo 1:14, 15.) Tha tro kö a canga mama la ethane la itre nyine iamadrinë ka ngazo. Celë hi matre, Tusi Hmitrötr a hmekë së ka hape: “The amenu nyipunieti kö: Tha nyine elone kö lae Akötresie. Ke ame asë hi la hna tran hnei atr, celë hi hnei angeic hna troa menuën. Ame la atre tran thatraqane la ngönetrei, tro kö angeice lai a kapa la hnyiqetr qa ngöne la ngönetrei.” (Gal. 6:7, 8) Loi e tro sa thipetrije la itre nyine iamadrinë ka amamane la itre ewekë hna sisine hnei Iehova!—Sal. 97:10.
15. Nemene la ahnahna hnei Iehova hna hnëkëne koi së?
15 Alanyimu la itre hlue i Iehova ka goeëne la JW Télédiffusion ngöne Ëternet. Öni Marilyn, ketre trejine föe: “Eni a madrine troa goeëne la JW Télédiffusion. Eni a goeën asë pine laka, nyine loi koi ni. Ame la eni caas nge eni a kucakuca, kola aegöcatrenyi ni hnene la ketre cainöj maine ketre Topik Ne La Drai hna amë ngöne JW Télédiffusion. Kola acatrene la aqane imelekeung me Iehova memine la organizasio i Nyidrë. Hna saze la meleng hnene la porogarame cili.” Hapeu, hetre eloine kö koi së la itre ahnahna cili qaathei Iehova? Ame e nöjei treu, kola mama la ketre emisio ka hnyipixe ngöne JW Télédiffusion. Ketre, ijije hi tro sa goeëne la itre video me miuzik me nyima ka hamë ithuecatre koi së.
16-17. Pine nemene matre loi e tro sa tuluthe la hawa hne së hna xom kowe la itre nyine iamadrinë, nge tro sa tune kaa?
16 Loi e tro sa iëne hnyawa la pengöne la itre nyine iamadrinë. Nge loi e tro fe sa thupëne la etrune la traem hna nue koi itre ej. Maine tha hmeke kö së, tro ha xome la traeme së me sewe së troa nyihlue Iehova hnyawa. Öni Abigail, ka 18 lao macatre: “Eni a madrine troa goeë tele thupene la hna huliwa. Ngo loi e tro ni a hmek, wanga sasaithe tulu pi ni la aqane goeë tele.” Öni Samuel, ka 21 lao macatre: “Ame itre xaa ijin, eni a goeë video ngöne Ëternet. Sesëkötre ju hi ni laka, foa ha lao hawa ne eni a goeë video.”
17 Nemene la ka troa xatua së troa tuluthe la ijine hne së hna nue kowe la itre nyine iamadrinë? Loi e tro sa pane axeciëne la hawa hne së hna troa xom, maine jë koi caa wiik. Loi e tro fe sa cinyanyin ngöne la idrai, la etrune la hawa hne së hna goeë tele, maine tro koi Ëternet, maine elo mobilis. Maine tru palaha la hawa hne së hna xom, loi e tro sa eköth la ketre porogaram. Loi e tro sa pane kuca la itre ka nyipiewekë, nge pine pë hë la itre nyine iamadrinë. Loi e tro fe sa sipo Iehova troa xatua së troa eatrëne la mekuna së. E cili, tro hë sa hetre traem me trengecatr, matre troa ini tusi caas, me kuca la hmi ne hnepe lapa, me hnëkëne la itre icasikeu, me cainöj. Ketre, tro hë sa madrine troa kuci nyine imadrinë ke, hne së hna amë panë Iehova.
TRO SA HNIMI IEHOVA HMEKUJE HI
18-19. Tro sa amamane tune kaa ka hape, easa hnimi Iehova hmekuj?
18 Hnei Peteru aposetolo hna qaja la pune la fene i Satana me qejepengöne la fene ka hnyipixe. Öni angeic: “Ange hnimina, pine laka nyipunie a lapa treqene la itre ewekë cili, isine jë matre tro Akötresie a öhne ka hape, nyipunieti pala hi a pë ethan, me wië, me tingeting.” (2 Pet. 3:14) Easa hnimi Iehova hnene la hni së ka pexej, ngöne la easa drengethenge la eamo celë me kuca la aja i Nyidrë.
19 Satana palahi a tupathi së jëne la fene i angeic, matre tro sa amë panëne la itre xaa ewekë nge pi Iehova pë hë. (Luka 4:13) Ngo tha tro pi kö sa nue la ketre atr maine ketre ewekë, troa thapa la göhne i Iehova e kuhu hni së. Easa atrun me hnimi Iehova hmekuje hi!
NYIMA 30 Tretretrong, Akötresingö Nge Enehmung
^ par. 5 Easa madrine troa nyihlue i Iehova. Ngo hapeu, Nyidrëti hmekuje kö la hne së hna wangatrun? Kola troa sa la hnying celë, hnene la aqane axecië mekune së. Troa mama la ihnimi së koi Iehova, qa ngöne la aqane tro sa axecië mekun göne la manie me nyine iamadrinë.
^ par. 53 ITRE IATR: Tha aja së kö troa xen la hna hnëkën ngöne la kecen ka dro. Ketre tune fe, tha tro kö sa goeëne la itre emisio ka amamane la kola isi me kuci ngazo me kuci iöni!
