1. Thenge la 2 Korinito 3:1-3, pine nemene matre ketre ahnahna ka tru la troa ini tus memine la itre atr uti hë la angatr a xomi bapataiso?

 NEMENE la mekuna i epun ngöne la kola xomi bapataiso hnene la ketre hnainin? Nyipici, madrine catre së! (Mat. 28:19) Ngo tru catre kö la madrine së ngöne la kola xomi bapataiso hnene la ka ini tusi me easë. (1 Thes. 2:19, 20) Ame la itre ka xötrei xomi bapataiso ke, angatr la itre ‘tus nyine qaja aloine’ la atre hamë ini me ekalesia fe.—E jë la 2 Korinito 3:1-3.

2. (a) Nemene la hnying hne së hna troa sa, nge pine nemen? (b) Nemene la aliene la troa ini tus? (Wange ju la ithuemacany.)

² Ame ngöne la foa lao macatre ka ase hë, traqa koi 10 000 000 lao atr e cailo fen ka ini tus * e nöjei treu. Drei la ketre madrin ka tru! Ketre, ame e nöjei macatre, hna sasaithe la 280 000 lao atr ka xomi bapataiso. Nemene la aqane tro sa xatuane la itre ka ini tus troa hane xomi bapataiso? Iehova palakö a aijijëne la itre atr troa xötrethenge Iesu, matre loi e tro sa xatua angatr troa canga xomi bapataiso. Eje hi, easenyi hë la pun.—1 Kor. 7:29a; 1 Pet. 4:7.

3. Nemene la hne së hna troa ce wang ngöne la tane mekun celë?

³ Nyipiewekë troa xatuane la itre atr troa xötrethenge Iesu. Celë hi matre, hnene la Lapa Ne Xomi Meköt hna  thele la aqane troa xatuane la itre ka ini tus troa xomi bapataiso. E cili, hnei angatr hna cinyanyi kowe la itre filial. Ame ngöne la tane mekun celë memine la ketre, tro sa ce wang la hna kuca hnene la itre pionie me mesinare me itre atre thupëne la sirkoskripsio. * (Ite Edomë 11:14; 15:22) Angatr a amamane la nyine tro la atre hamë ini me hnainin a kuca, matre troa kepe thangane qa ngöne la ini tus. Tro sa pane ce wang la faifi lao ewekë nyine troa kuca hnene la hnainin, matre acatrene la lapaune i angeic me xomi bapataiso.

4. Maine easa ajane troa xatuane la hnainin, nemene la nyine tro sa lapa mekun?

⁴ Alanyimu la itre trejin ka ini tus memine la itre atr ngöne la qene qënehlö. Ngacama tha qea kö nge tha hna kuca kö e nöjei wiik, ngo celë hi ka thue aja kowe la itre atr troa hane qeje Tusi Hmitrötr. Ame la itre xaa trejin, angatr a hnyingëne la numero ne telefon ne la atr matre troa hë angeic maine iupi fë xötr pena. Nge itre treu ne angatr a ithanata tune lai. Ngo tune kaa e tha hna ami ijine kö maine nue trengecatre pena hnene la hnainin? Hapeu, tro kö angeic a acatrene la lapaune i angeic me xomi bapataiso? Waea.

5. Nemene la hna qaja hnei Iesu ngöne Luka 14:27-33, nge pine nemene matre ka nyipiewekë kowe la itre ka ini tus?

⁵ Öni Iesu ka hape, hetre nyine troa pane kuca e aja së troa xötrethenge nyidrë. Hnei Iesu hna qaja la ceitune la ketre atr ka ajane troa xup la ketre uma ka draië, memine la ceitune la ketre joxu ka thele isi memine la ketre joxu. Öni Iesu, loi e tro la atr a pane ‘mekune hnyawa la thupen me wang ka hape, ijiji angeice kö troa afenesine la uma.’ Ketre, loi e tro la joxu a hnying kowe la itre atresi ka hape, ijije kö tro la itre sooc a isi. (E jë la Luka 14:27-33.) Iesu e cili a amamane laka, hetre nyine troa pane kuca qëmekene troa xötrethenge nyidrë. Celë hi matre, nyipiewekë troa ini Tusi Hmitrötr e nöjei wiik memine la itre hnainin. Tro sa tune kaa?

6. Nemene la aqane tro sa xatuane la hnainin troa acatrene la lapaune i angeic?

⁶ Loi e tro sa aqeane la porotrike së memine la hnainin ngöne la qene qëhnelö. Maine jë, tha tro hmaca kö sa xome  la caa xötr ngo lue xötr pe. Maine majemine hë angeic, sipo angeice jë troa porotrik ngöne la ketre götrane hnë troa lapa. E cili, tro ha mama laka, hetre aja i angeic troa ini tus. Thupene lai, loi e tro sa sipo angeic troa ini Tusi Hmitrötr me easë, matre xatua angeic troa acatrene la lapaune i angeic. Eje hi, maine easa ajane troa hetre thangan la ini tus, tha tro hmekuje kö sa acasi maine alua ini tusi me angeic e nöjei wiik.

7. Nemene la aqane troa hnëkë hnene la ka hamë ini?

⁷ Nyipiewekë tro la itre ka hamë ini a hnëkë hnyawa. Loi e troa pane e la paragaraf memine la itre xötr. Thupene lai, thele jë la itre mekun ka tru. me goeëne la itre tane mekun ka tru me ka co, memine la itre xötr hna hape, “e jë la.” Loi e tro fe sa goeëne la itre iatr. Nyipiewekë fe troa thel la itre video ka ihmeku memine la ini. Ketre, loi e tro sa lapa mekune la itre hna ajan hnene la hnainin, matre tro sa atreine qejepengöne koi angeic la itre mekun ka tru. E cili, tha jole hë koi angeic troa trotrohnine la itre ini me trongën itre ej.—Neh. 8:8; Ite Edomë 15:28a.

8. Thenge la itre hna qaja hnei Paulo ngöne Kolose 1:9, 10, nemene la nyine tro sa sipone koi Iehova thatraqane la hnainin?

⁸ Ame la easa hnëkëne la ini tusi së, loi e tro sa thith thatraqane la hnainin memine la itre hnei angeic hna ajan. Easë fe a sipo Iehova matre troa huliwane hnyawa la Tusi Hmitrötr, me ketr la hni angeic. (E jë la Kolose 1:9, 10.) Loi e tro sa canga hnëkë hnyawa matre troa atreine qejepengöne kowe la hnainin, la itre ini hnei angeic hna tha trotrohnin. Ngo ame la sisitria catr, ke, tro la hnainin a acatrene la lapaune i angeice koi Iehova me canga xomi bapataiso.

9. Nemene la aqane tro la ka hamë ini a xatuane la ka ini tus? Qejepengöne jë.

⁹ Maine tro palahi sa kuca la ini tus, tro hë la hnainin a wangatrune la itre hnei Iehova me Iesu hna kuca, me thele troa atre la itre xaa ithuemacany. (Mat. 5:3, 6) Ngo loi e tro angeice a lapa mekune la itre hnei angeic hna inin, matre troa kepe thangane qa ngöne la itre hnei angeic hna inin. Celë hi matre, loi e tro angeic a hnëkë hnyawa me e la ini me  lapa mekune la aqane tro angeic a trongëne la itre ini ka tru. Nemene la aqane tro sa xatua angeic? Ijije hi tro sa ce hnëkën me angeice la ketre ini. * Easa xatua angeic troa canga öhne la mekun ka sa la hnying, me itre hnaewekë nyine troa sija. Thupene lai, sipo angeice jë troa qaja thenge la aqane ewekë i angeic. E cili, tro hë sa öhne laka, trotrohnine hi angeic la itre mekun. Ngo hetre ketre nyine tro sa kuca matre troa xatuane lai hnainin.

10. Pine nemene matre nyipiewekë troa e Tusi Hmitrötr e nöjei drai, nge nemene la thangane lai?

¹⁰ Nyipiewekë tro la hnainin a eatrën la ini tus e nöjei drai. Ngo hetre itre xaa nyine tro angeic a kuca. Loi e tro palahi angeic a ithanata me Iehova ngöne la thith me drei Nyidrë ngöne la angeic a e Tusi Hmitrötr e nöjei drai. (Ios. 1:8; Sal. 1:1-3) Ketre, nyipiewekë tro sa amamai angeic la aqane troa huliwane la “Programme de lecture de la Bible” ngöne la site jw.org^® me fejan ej. * Loi e tro sa ithuecatre kowe la hnainin troa lapa mekun la itre hnei angeic hna e, matre tro angeic a kepe thangane qa ngön. Nyipiewekë tro angeic a xomi ini göi Iehova me trongëne la itre ini ngöne la mele i angeic.—Itre hu. 17:11; Iako. 1:25.

11. Nemene la aqane tro sa inine la hnainin troa thith, nge pine nemene matre nyipiewekë tro angeic a thithi e nöjei drai?

¹¹ Nyipiewekë tro sa ithuecatre kowe la hnainin troa ithanata koi Iehova e nöjei drai ngöne la thith. Ame la easa nyiqaane me nyipun la ini tusi së, loi e troa thithi qa kuhu hni së me qaja la ëjene la hnainin. E cili, tro hë angeice a thith qa kuhu hni angeic me thith jëne Iesu. (Mat. 6:9; Ioane 15:16) Eje hi, maine tro la hnainin a e Tusi Hmitrötr e nöjei drai, tro hë angeic a drei Iehova. Nge maine tro angeic a thith, tro hë angeic a ithanata me Nyidrë! Celë hi lai aqane tro angeice a easenyi catre koi Iehova! (Iako. 4:8) E cili, tro hë la hnainin a acatrene la lapaune i angeic, me nue la mele i angeic koi Akötresie uti hë la troa xomi bapataiso. Nemene la aliene lai?

12. Nemene la aqane tro la ka hamë ini a xatuane la hnainin troa easenyi koi Iehova?

¹² Ame la kola ini tus, loi e troa ketr la hni ne la hnainin, ngo tha tro hmekuje kö a lapa ngöne la mekuna i angeic. Pine nemen? Pine laka, ame la hni së, ene la itre aja së me itre aliene hni së, tre, celë hi ka upi së troa kuca la ketre ewekë. Eje hi, hetre thangan ekö la itre ini Iesu, nge tru la madrine la itre atr troa drei nyidrë. Angatr a xötrethenge nyidrë ke, nyidrëti a ketr la hni angatr. (Luka 24:15, 27, 32) Nyipiewekë tro la hnainin a trotrohnine laka, ka mele Iehova nge ijije hi troa easenyi koi Nyidrë. Loi e tro angeic a goeë Iehova ceitu me ketre Kem me Akötresie me Sinee. (Sal. 25:4, 5) Celë hi matre, loi e tro sa qaja amamane la itre thiina i Akötresie. (Eso. 34:5, 6; 1 Pet. 5:6, 7) Loi e tro palahi sa qaja la ihnimi Iehova me thiina ka loi Nyidrë me utipin. Öni Iesu ka hape, ame la “wathebo ka tru nge ka sisitria” tre, “Qa i eö troa hnimi Iehova Akötresi eö.” (Mat. 22:37, 38) Nyipiewekë tro sa akökötrene la ihnimi ne la hnainin koi Iehova.

13. Tune kaa la aqane tro la hnainin a atrepengöne hnyawa la itre thiina i Iehova?

¹³ Ame la easa ini tus, loi e tro sa qaja kowe la hnainin la kepin matre easa hnimi Iehova. Tro hë angeic a trotrohnine laka, nyipiewekë troa acatrene la aqane imelekeu i angeic me Iehova. (Sal. 73:28) Hapeu, hetrenyi kö ngöne la ketre xötr maine ketre itus, la ketre mekun ka amamane la thiina i Iehova, tune la ihnim me inamacan me thiina ka meköt me men? Hapeu, hna ketri epuni kö hnene la mekun cili? Loi e tro sa hane qaja kowe la hnainin la itre thiina i Iehova ka ketri së. Ngo hetre ketre ewekë nyine tro angeic a kuca matre xomi bapataiso.

14. Nemene la aqane troa xatuane la hnainin hnene la hna qaja ngöne Heberu 10:24, 25?

¹⁴ Easë asë hi a ajane tro la itre ka ini tusi a xomi bapataiso. Celë hi matre loi e tro sa ithuecatre koi angatr troa hane sine la itre icasikeu. Önine la itre xaa trejin ka macaj ka hape, ame la itre hnainin ka canga sine la itre icasikeu ke, angatre hi la ka canga kökötre ngöne la nyipici. (Sal. 111:1) Nge hnei itre xaa trejin hna  amamane kowe la itre ka ini tus laka, ka ce tro la ini tus memine la itre icasikeu. Pine laka, hetre itre xaa ini hnei angatr hna troa kapa ngöne la itre icasikeu. Ketre, loi e troa ce e me angatr la Heberu 10:24, 25, me amamane la itre eloine la itre icasikeu. Amamane jë fe la video hna hape, Ka Tune Kaa La Itre Icasikeu Hun? * me xatua angeice troa sine la itre icasikeu e nöjei wiik.

15. Nemene la aqane tro sa xatuane la hnainin troa majemine sine la itre icasikeu?

¹⁵ Maine tha hna majemine kö maine tha sine pena kö la itre icasikeu hnene la hnainin, nemene la nyine tro sa kuca? Qaja jë koi angeic la ketre ini hna hamën ngöne la icasikeu. Tro hë lai a thue aja koi angeic troa sine la itre icasikeu. Loi e tro sa hamë angeic la Ita Ne Thup me Pepa Nyine Huliwan göne la treu me amamane koi angeic la hna troa ce wang ngöne la hna icasikeu. Loi e tro fe sa hnyingë angeic la tane mekun hnei angeic hna ajan troa atre. Ame la angeic a xötrei sine la icasikeu, tro hë angeic a öhn laka, ka isapengöne memine la itre xaa hmi! E cili, tro ha hetre thangane koi angeic. (1 Kor. 14:24, 25) Ketre, ame ngöne la itre icasikeu, angatr a nyisineene la itre xaa trejin ka amamai tulu ka loi, nge ka troa xatua angatr troa kökötre ngöne la nyipici me xomi bapataiso.

16. Nemene la nyine tro sa kuca matre xatuane la hnainin troa xomi bapataiso, nge nemene la hne së hna troa ce wang?

¹⁶ Nemene la nyine tro sa kuca matre xatuane la hnainin troa xomi bapataiso? Loi e tro sa ithuecatre koi angeic troa wangatrune la ini tus, me hnëkëne hnyawa, me eatrën e nöjei wiik. Loi e tro fe sa xatua angeic troa easenyi catr koi Iehova o drai me acatrene la aqane imelekeu angeic me Nyidrë. Ketre, loi e troa thue aja kowe la hnainin troa hane sine la itre icasikeu. (Wange ju la hna eköhagen ngöne la götrane 12, “ Nyine Troa Kuca Hnene La Ka Ini Tus.”) Tune la hne së hna troa ce wang ngöne la ketre tane mekun, hetrenyi la faifi lao ewekë nyine tro la ka hamë ini a kuca, matre xatuane la hnainin troa xomi bapataiso.