1. Nemene la mekun ka sisitria ngöne la mele së?

 AME itre xaa ijin, hetre thangan kowe la itre nekönatr, la itre mekun hna axeciën hnei itre kem me thin. Maine ka ngazo la aqane axecië mekune i angatr, tro hë lai a hetre ethane kowe la itre nekönatr. Ngo maine tro angatr a axecië mekune hnyawa, tro ha hetre thangane ka loi koi nyudren. Loi e tro fe la itre nekönatr a axecië mekune hnyawa. Ame la mekun ka sisitria ngöne la mele së ke, ene la troa nyihlue i Iehova, Keme së ka tru ihnimin.—Sal. 73:28.

2. Nemene la itre mekun ka loi hna xom hnei Iesu me kem me thine i nyidrë?

² Ame la ka nyipiewekë ekö kowe la kem me thine i Iesu, tre, troa xatuane la itre nekö i nyidro troa nyihlue i Iehova. Celë hi lai ka mama ngöne la aqane axecië mekune i nyidro. (Luka 2:40, 41, 52) Hnei Iesu fe hna axecië mekune hnyawa me kuca la aja i Iehova. (Mat. 4:1-10) Ame hë e thupen, ketre atr ka loi nyidrë nge ka mele nyipici koi Akötresie. Drei la madrinene la itre kem me thin ka hnimi Iehova, e tro la itre nekö i angatr a nyitipu Iesu!

3. Nemene la itre hnying hna troa sa ngöne la tane mekun celë?

³ Tro la tane mekun celë a sa la itre hnying celë: Nemene la itre mekun ka loi hna xom hnei Iehova göi Iesu? Nemene la tulu hnei Iosefa me Maria hna hamën kowe la itre kem me thin, göne la aqane troa axecië mekun? Nge nemene la tulu hnei Iesu hna hamën kowe la itre nekönatr me itre jeune, göne la aqane troa axecië mekun?

4. Nemene la mekun hnei Iehova hna xom göi Iesu, Nekö i Nyidrë?

⁴ Hnei Iehova hna iëne hnyawa la kem me thine i Iesu.  (Mat. 1:18-23; Luka 1:26-38) Jëne la hnei Maria hna qaja, kola mama la etrune la ihnimi eahlo koi Iehova me kowe la Trengewekë i Nyidrë. (Luka 1:46-55) Nge jëne la aqane drengethenge Iehova hnei Iosefa, kola mama la xou me aja i Iosefa troa amadrinë Iehova.—Mat. 1:24.

5-6. Nemene la itre jol ka traqa koi Iesu?

⁵ Tha hnei Iehova kö hna iëne troa hetru Iesu hnene la ketre kem me thine ka trenamo. Celë hi lai ka mama ngöne la huuj hna tro fë hnei Iosefa me Maria ngöne lo kola hnaho Iesu. (Luka 2:24) Ame Iosefa ke, ka tratrau sinöe angeic e Nazareta, nge maine jë, hetre sine uma i nyidrë hnë tratrau sinöe. Eje hi, hmaloi la mele i nyidro, ngacama sevene lao nekö i nyidro.—Mat. 13:55, 56.

⁶ Nyipici laka, hnei Iehova hna thupën la mele i Iesu. Ngo tha hnei Nyidrëti kö hna apatren asë la itre jole i Iesu. (Mat. 2:13-15) Ame la itre xaa atrene la fami Iesu ke, tha ka mejiune kö angatr koi nyidrë. Hace catre koi Iesu ngöne lo xötrei ke, tha hnei angatre kö hna kepe nyidrë tune la Mesia. (Mar. 3:21; Ioane 7:5) Ketre, hace me hleuhleu la mele i Iesu, ke hna meci hnei Iosefa nge jeune palakö nyidrë. Pine laka Iesu la ka tru, matre hnëqa i nyidrëti troa huliwa thatraqane la fami nyidrë. (Mar. 6:3) Ngo hnei Iesu hna huliwa catr me nyihnyawane la mele i angatr. Eje hi, atre hnyawa hi nyidrëti la pengöne la atr ka fenes qa hna huliwa.

7. (a) Nemene la itre hnying ka troa xatuane la lue trefën ka ajane troa hetre nekönatr? (b) Thenge la Ite Edomë 2:1-6, nemene la nyine tro la itre kem me thin a inine kowe la itre nekönatr?

⁷ Maine ka faipoipo epun nge epuni a ajane troa hetre nekönatr, isa hnyinge jë ka hape: ‘Hapeu, ka hetre hni ne ipië nge ka lolo kö la aqane imelekeu i nyio me Akötresie? Ijije kö tro Iehova a hane ië nyio matre troa kem me thine ne la ketre nekönatr hnei Nyidrëti hna hnim? (Sal. 127:3, 4) Ngo maine hetre nekö i epuni hë, isa hnyinge jë ka hape: ‘Eni kö a amamane kowe la itre neköng la enyipiewekëne troa huliwa? (Ate cai. 3:12, 13) Eni kö a thupë nyudreni hnyawa qa ngöne la itre ewekë ka ngazo ne la fene i Satana?’ (Ite edomë 22:3) Eje hi, thatreine kö së troa apatren asë la itre jol ne la itre nekö së. Ngo ijije hi tro sa hnëkë nyudren göne la itre jole cili, me  ini nyudren troa thele ixatua e hnine la Tusi Hmitrötr. (E jë la Ite Edomë 2:1-6.) Pane mekune jë laka, ketre sinee i epun a trotrije la nyipici. E cili, loi e troa xome la Tusi Hmitrötr, matre amamane kowe la itre nekö i epun la enyipiewekëne la troa mele nyipici koi Iehova. (Sal. 31:23) Nge maine hna meci la ketre sinee i epun, loi e troa amamane koi nyudren la aqane akeukawane la hni epun hnei Tusi Hmitrötr.—2 Kor. 1:3, 4; 2 Tim. 3:16.

8. Thenge la Deuteronomi 6:6, 7, nemene la hna kuca hnei Iosefa me Maria?

⁸ Hnei Iosefa me Maria hna ini Iesu hnyawa. Celë hi matre, ame hë la nyidrëti a tru, ke hna kepe nyidrëti hnei Akötresie. Hnei nyidroti hna trongëne la itre eamo hna hamën hnei Iehova, thatraqane la itre kem me thin. (E jë la Deuteronomi 6:6, 7.) Eje hi, tru la ihnimi nyidro koi Iehova, nge nyidroti fe a ajane tro la itre nekö i nyidroti a hane hnimi Nyidrë.

9. Nemene la itre mekun hna xom hnei Iosefa me Maria thatraqane la fami nyidro?

⁹ Hnei Iosefa me Maria hna catre nyihlue i Iehova memine la fami nyidro. Hnei angatr hna sine la itre icasikeu e nöjei wiik ngöne la sunago e Nazareta. Ketre, ame e nöjei macatre, hnei angatr hna sine la Paseka e Ierusalema. (Luka 2:41; 4:16) Celë hi itre ijine nyidroti a qaja koi Iesu me itre trejin me nyidrë, la itre ewekë ka traqa ekö kowe la nöje i Iehova, me hane tro kowe la itre götrane hna qaja hnei Tusi Hmitrötr. Ame pe, kola tru trootro la fami Iosefa me Maria, matre jole koi angatr troa catre nyihlue i Iehova. Ngo pane mekune jë së la itre eloine hnei nyidroti hna kapa! Hnei nyidroti palahi hna amë panëne la huliwa i Iehova ngöne la mele i nyidro, matre kola easenyi catre la fami nyidro koi Nyidrë.

10. Nemene la aqane tro la itre kem me thin a nyitipu Iosefa me Maria?

¹⁰ Maine hetre nekö i epun, nemene la aqane tro epuni a nyitipu Iosefa me Maria? Ame la hnapan ke, jëne la aqane ithanata me aqane ujë i epun, loi e troa mama kowe la itre nekönatr la ihnimi epun koi Iehova. Ame la ahnahna ka tru thatraqai nyudren ke, ene la troa ini nyudreni troa  hnimi Iehova. Nyipiewekë catre fe troa ini nyudreni troa catre ini tus me thith, me sine la itre icasikeu me cainöj. (1 Tim. 6:6) Eje hi laka, loi e troa huliwa thatraqai nyudren me thupëne la mele i nyudren. (1 Tim. 5:8) Ngo the thëthëhmine kö laka, ame la ka troa aijijëne la itre nekönatr elany troa mel ngöne la fene ka hnyipixe, * tre, tha ene kö la troa trenamo ngo aqane imelekeu i nyudren me Iehova.—Ezek. 7:19; 1 Tim. 4:8.

11. (a) Kola xatuane tune kaa la itre kem me thin la hna qaja ngöne 1 Timoteo 6:17-19? (b) Nemene la itre xaa nyine troa kuca hnene la fami epun, nge nemene la eloine lai? (Wange ju la hna eköhagen hna hape, “ Nemene La Itre Mekun Nyine Troa Eatrën?”)

¹¹ Easa madrin ngöne la kola axecië mekun hnyawa hnene la itre kem me thin, matre tro la fami angatr a easenyi catre koi Iehova! Angatr me itre nekö i angatr a ce nyihlue i Iehova. Angatr a sine la itre icasikeu me itre asabele. Angatr palahi a cainöje trootro. Ame la itre xaa hnepe lapa, angatr a feke kowe la ketre nöj ka aja ixatua matre troa cainöj. Ame itre xan, angatr a ihamë ngöne la Bethela maine ixatua pena troa Xupi Uma Ne Baselaia me itre xane ju kö. Tha ka hmaloi kö koi angatr ke, tru la itre jol hna cile kow tune la itre jol göi manie. Ngo Iehova a amanathithine la itre trengecatre hnei angatr hna kuca! (E jë la 1 Timoteo 6:17-19.) Ame la itre nekönatr ka tru ngöne la itre fami cili ke, tha jole kö koi nyudreni troa kuca la itre ewekë cili ka lolo, nge madrine catre nyudren! *—Ite edomë 10:22.

12. Nemene la hna kuca hnei Iesu ngöne lo nyidrëti a tru?

¹² Ka lolo palahi la itre mekun hna xom hnene la Keme i Iesu e hnengödrai, nge ketre tune fe la kem me thine i nyidrë e celë fen. Nge ame hë kola tru hnei Iesu, hnei nyidrëti fe hna ketre sipu axecië mekun. (Gal. 6:5) Tui easë enehila, hna nue Iesu ekö troa ketre sipu axecië mekun thatraqane la mele i nyidrë. Maine ju, ijije hi tro nyidrëti a kuca la sipu aja i nyidrë. Ngo tha celë kö lai hna kuca hnei Iesu. Hnei nyidrëti palahi hna amë panëne la huliwa i Iehova. (Ioane 8:29) Nemene la ini kowe la itre jeune?

13. Nemene la hnei Iesu hna kuca ngöne lo nekönatr palakö nyidrë?

¹³ Ame lo nekönatr palakö Iesu, hnei nyidrëti hna drengethenge la kem me thine i nyidrë. Tha hnei nyidrëti kö hna nuetrije la itre eamo i nyidro, maine nyi ka atre hui nyidro. ‘Hnei nyidrëti pala hi hna catre  drengethenge nyidro.’ (Luka 2:51) Ketre, hnei Iesu hna xom hnyawa la hnëqa nyidrë ngöne la fami ke, nyidrëti la ka tru. Hnei nyidrëti hna inine la huliwa i Iosefa, keme i nyidrë, matre thupëne la fami nyidrë.

14. Nemene la ka amamane laka, hnei Iesu fe hna catre inine la Itre Hna Cinyihan?

¹⁴ Maine jë, hnene la kem me thine i Iesu hna qaja koi nyidrë la aqane traqa nyidrëti e celë fen memine lo hna qaja hnene la itre qeneqaja i Akötresie göi nyidrë. (Luka 2:8-19, 25-38) Ame pe, hnei Iesu fe hna ketre sipu inine la Itre Hna Cinyihan. Nemene la ka amamane lai? Hnene la itre atre hamë ini e Ierusalema hna “haine la inamacane i nyën, me aqane sa i nyën” nge nekönatr petre kö nyidrë. (Luka 2:46, 47) Ame lo kola 12 lao macatre i Iesu ke, xecie hnyawa ha koi nyidrë laka, Iehova la Keme i nyidrë.—Luka 2:42, 43, 49.

15. Nemene la ka amamane laka, hnei Iesu hna iën troa kuca la aja i Iehova?

¹⁵ Ame lo Iesu a trotrohnine la aja i Akötresie göi nyidrë, hnei nyidrëti hna kapa la hnëqa i nyidrë. (Ioane 6:38) Atre hi nyidrë laka, alanyimu la itre ka troa methinë nyidrë, matre hnei nyidrëti hna pane mekune hnyawa qëmekene troa axecië mekun. Ngo hnei nyidrëti hna iën troa drengethenge Iehova. Qaane lo kola bapataiso nyidrë lo macatre 29, aja i Iesu troa eatrëne la aja i Iehova. (Heb. 10:5-7) Ame fe lo kola axösisi nyidrëti hune la sinöe, hnei Iesu hna catre kuca la aja ne la Keme i nyidrë.—Ioane 19:30.

16. Nemene la ini nyine tro la itre jeune a xom qa ngöne la tulu i Iesu?

¹⁶ Troa drengethenge kaka me nenë. Tui Iosefa me Maria, tha ka pexeje kö kaka me nenë. Ame pe, hnëqa i nyidroti qaathei Iehova troa thupë eö, me ini eö me eatrongë eö. Maine tro eö a dreng la itre eamo i nyidro me drengethenge nyidro ke, ‘manathithi lai koi eö.’—Efe. 6:1-4.

17. Thenge la Iosua 24:15, nemene la nyine tro la itre jeune a iën?

¹⁷ Troa iëne la hnei eö hna troa nyihluen. Loi e troa isa hnying ka hape: ‘Drei lae Iehova? Nemene la aja i Nyidrë? Nge nemene la aja i Nyidrëti koi eö?’ (Rom. 12:2) Celë hi ka troa xatua eö troa axecië mekune hnyawa me nyihlue i Iehova. (E jë la Iosua 24:15; Ate cai. 12:1) Maine tro eö a catre e me inine la Tusi Hmitrötr, tro ha  kökötre la ihnimi eö koi Akötresie, nge tro ha catrecatre la lapaune i eö.

18. Nemene la nyine tro la itre jeune a iën, nge nemene la thangane lai?

¹⁸ Troa pane kuca la aja i Iehova ngöne la mele i eö. Ame ngöne la fene i Satana, tro sa madrin e hne së hna kuca la hne së hna atreine thatraqai së hi. Ngo ame la itre ka pi aja mo, tre, “angatr a sipu jaqa angatr hnei itre akötr.” (1 Tim. 6:9, 10) Maine tro sa drengethenge Iehova me amë panëne la aja i Nyidrë ngöne la mele së, tro hë sa ‘loi xölene ngöne la jë së, me manathith.’—Ios. 1:8.

19. Nemene la nyine tro la itre kem me thin a mekun?

¹⁹ Itre kem me thine fe, kuca asë jë la hnei epuni hna atre matre tro la itre nekö i epun a nyihlue i Iehova. Mejiune jë koi Nyidrë, tro kö Nyidrëti a xatua epuni troa axecië mekune hnyawa. (Ite edomë 3:5, 6) Tha tro hmekuje kö a qaja koi nyudren la nyine kuca. The thëthëhmine kö laka, ka hetre thangane catr kowe la itre nekönatr la itre hnei epuni hna kuca. Haawe, loi e troa axecië mekune hnyawa, matre hane kepe la itre nekönatr hnei Iehova.

20. Nemene la itre manathith hna troa kapa hnene la itre jeune ka nyihlue i Iehova?

²⁰ Itre jeune fe, ijije hi tro la itre kem me thin a xatua epun troa axecië mekun hnyawa. Ngo isa qanyi epuni pë hë kuca la ka ijij matre troa hane kepe epuni hnei Akötresie. Haawe, nyitipu Iesu jë nge nyihluene jë la Keme i epun ka tru ihnimin. Tro hë epuni a mele madrin me mele ka loi. (1 Tim. 4:16) Nge the qaja palaha la mele i epun elany!