1. Nemene la ceitun ka canga mama koi së ngöne la easa qeje utipin?

 AME koi epun, nemene la pengöne la atr ka utipin? Maine jë, ketre atr ka loi thiina, ka menyik, ka ihnim, nge ka ham. Easa canga mekun lo tulu hna hamën hnei Iesu göne lo atre Samaria. Ngacama ketre trenyiwa angeic, ngo hnei angeic hna “utipine” me nyihnyawane la ketre atre Iudra hna lepe hnei itre atrekënö. (Luka 10:29-37) Jëne la ceitune celë, kola mama la aqane utipine i Iehova. Celë hi ketre igötranene la ihnimi Nyidrëti koi së o drai.

2. Nemene la aqane tro sa utipine la ketre atr?

² Ame la aqane tro sa utipine la ketre atr ke, tro sa nue la ngazo i angeic, ngacama meköti troa ameköti angeic. Celë hi lai hna kuca hnei Iehova. Öni Dravita: “Tha hnei nyidëti kö hna kuca koi shë cei tune memine la ite ngazo shë.” (Sal. 103:10) Ngo ame itre xaa ijin, Iehova a amekötine la itre atr ka kuca la ngazo.

3. Nemene la hne së hna troa ce wang ngöne la tane mekun celë?

³ Ame ngöne la tane mekun celë, tro sa ce ithanatane la köni hnying: Pine nemene matre Iehova a utipine la itre atr? Hapeu, hatrene utipine la kola upetröneë la ketre atr? Nemene la ka xatua së troa utipine la ketre atr? Hane hi la aqane sa hnei Tusi Hmitrötr.

4. Pine nemene matre Iehova a utipine la itre atr?

⁴ Iehova a utipi së ke, Nyidrëti a hnimi së. Ame ngöne la tusi Paulo koi angetre Efeso, hnei nyidrëti hna qaja ka  hape, “tru catre la utipin i Akötresie.” Hnei Iehova hna hëne la itre atr ka tha pexeje kö troa hane mel e hnengödrai. (Efe. 2:4-7) Ngo tha angatre hmekuje kö la hna utipin hnei Iehova. Öni Dravita: ‘Ka lolo Iehova kowe la nöjei ewekë asë, nge hune la nöjei huliwa asë i nyidë la utipine i nyidë.’ (Sal. 145:9) Eje hi, Iehova a utipi së asë ke, Nyidrëti a hnimi së.

5. Pine nemene matre atre hi Iesu laka, Akötresie ka utipine Iehova?

⁵ Atre hi Iesu laka, Iehova a utipine la itre atr. Qëmekene tro Iesu a traqa e celë fen, nyimutre la itre macatre ne ce mele nyidrëti me Iehova e hnengödrai. (Ite edomë 8:30, 31) Matre öhne hi Iesu la aqane utipine Iehova la itre atr ka ngazo. (Sal. 78:37-42) Celë hi matre, hnei Iesu hna qaja la thiina cili ne la Keme i nyidrë, ngöne la nyidrëti a hamë ini.

6. Nemene la ceitun hna hamën hnei Iesu ka amamane laka, Akötresie ka utipine Iehova?

⁶ Ame ngöne lo tane mekun hnapan, hnei Iesu hna qaja la ceitune la nekötrahmanyi ka paatr matre troa amamane la ihnim me utipine i Iehova. Hnene la nekötrahmanyi hna trotrije la hnalapa me “aluzine la edrö i angeic hnene la hna mele menu.” (Luka 15:13) Ngo eloine pe, hnei angeic hna nuetrije la itre huliwa ka sis, me ietra, me bëeke hmaca kowe la hnalapa. Nemene la hna kuca hnei kem? Öni Iesu: “Angeice pala kö e gaa nany, nge öhnyi angeice ju hi hnei kem. Ame hnei nyidrëti hna utipi angeic, me nyinyap, me haluthi angeic, me dremi angeic.” Eje hi, tha hnei keme kö hna ahmahmanyi angeic. Hnei nyidrëti pe hna hetre hni ne utipin me nue la ngazo i angeic. Ngacama tru catre la ngazo ne la nekötrahmany, ngo hnei angeic hna nyipi ietra. Ame ngöne la ceitune celë, Iehova la kem ka utipin. Iesu a amamane laka, aja i Iehova troa nue la ngazo ne la itre ka ietra.—Luka 15:17-24.

7. Nemene la ketre kepin matre Iehova a utipine la itre atr?

⁷ Iehova a utipi së ke, Akötresieti ka inamacane Nyidrë. Iehova a huliwane hnyawa la inamacane i Nyidrë. Öni Tusi Hmitrötr: “Ame la inamacan qaa hnengödrai” ke, “ka tiqa hnei utipin me huliwa ka loi.” (Iako. 3:17) Ketre Kem ka  ihnimi Iehova, matre Nyidrëti a utipine la itre nekö i Nyidrë. Atre hi Nyidrëti la ka loi koi angatr. (Sal. 103:13; Is. 49:15) Ngacama itre atr ka tha pexeje kö angatr, ngo hetre mejiune i angatr koi elany. Celë hi lai aqane amamane Iehova la inamacane i Nyidrë. Ame pe, hetre ifegone la utipine i Iehova. Jëne la inamacan, Nyidrëti a tuluthe la aqane utipine Nyidrë la itre atr.

8. Nemene la aqane amekötine la atr ka tha ietra, nge pine nemen?

⁸ Pane mekune jë la ketre hlue i Iehova ka kuca lapane la ewekë ka ngazo. Nemene la nyine tro sa kuca? Öni Paulo jëne la uati hmitrötr: “Tha tro hmaca kö nyipunie a nyi sineene” la atr cili. (1 Kor. 5:11) Kola upetröneë la itre trejin ka tha ietra kö, wanga troa hetre ethane kowe la ekalesia. Eje hi, Iehova a ajane troa thupëne la itre trejin ka mele nyipici. Ngo ame koi itre xan, tha hatrene utipine i Akötresieti kö la hna amekötine cili. Ka nyipici kö lai?

9-10. Thenge la Heberu 12: 5, 6, pine nemene matre ketre hatrene utipine i Akötresie la kola upetröneë la ketre atr? Qaja jë la ketre ceitun.

⁹ Ame la kola thuemacanyi së laka, hna upetröneë la ketre trejin, easa hleuhleu me akötr. Maine jë, easa hnying ka hape, ‘Meköti kö troa upetröneë angeic?’ Hapeu, ketre hatrene utipine kö la kola upetröneë la ketre atr? Eje hi. Maine tha amekötine kö la itre qatre thup la ketre atr ka tria, haawe, tha ka inamacane kö angatr me utipine me ihnim. (Ite edomë 13:24) Nge hapeu, tro kö a saze la atr hna upetröneë? Eje hi. Öni itre xan ka hape, ame la kola upetröneë angatr, angatre hi lai a trotrohnine laka, ngazo catre la hnei angatr hna kuca. E cili, angatr a saze me bëeke hmaca koi Iehova.—E jë la Heberu 12:5, 6.

¹⁰ Hanawang la ketre ceitun. Hna tithi hnei meci la ketre mamoe, matre nyipiewekë troa ananyine ej qaathene la itre xaa mamoe, me pane umën. E cili, ej a nango xou. Ngo hapeu, ka ngazo la hna kuca hnene la atre thupë mamoe? Waea. Atre hi la atre thupë mamoe laka, nyipiewekë troa umëne la mamoe ka wezipo, wanga troa ixötrekeu la mec koi itre xan. Angeice hi lai a amamane laka, angeic a thupëne hnyawa la hna axö mamoe.—Wange ju fe la Levitiko 13:3, 4.

11. (a) Pine nemene matre ijije hi tro sa aceitunëne la atr hna upetröneë memine la ketre mamoe hna tithi hnei mec? (b) Nemene la ixatua thatraqane la itre hna upetröneë?

¹¹ Ijije hi tro sa aceitunëne la itre atr hna upetröneë memine la ketre mamoe hna tithi hnei mec, ke angeic a kucakuca ngöne la götrane u. (Iako. 5:14) Ijije hi troa ixötrekeu la meci angeic, matre loi e troa pane ananyi angeic qa ngöne la ekalesia. Ketre hatrene ihnimi Iehova lai kowe la itre xaa hlue i Nyidrë. Ketre, kola xatuane la trejin hna upetröneë troa trotrohnine laka, ka ngazo la hnei angeic hna kuca, nge loi e tro angeic a ietra. Ngacama hna upetröneë angeic, ngo ijije hi tro angeic a sine la itre icasikeu matre acatrene hmaca la aqane imelekeu i angeic me Iehova. Loi e tro fe angeic a e me inine la itre itusi së, me goeëne la JW Télédiffusion. Maine tro angeic a saze la aqane ujë i angeic, tro hë la itre qatre thup a hamë eamo koi angeic. E cili, tro  hë angeic a acatene la lapaune i angeic me bëeke hmaca koi Iehova. *

12. Maine tha ietra kö la ketre atr, nemene la aqane tro la itre qatre thup a hnim me utipi angeic?

¹² Tha tro kö sa thëthëhmine laka, kola upetröneë la itre trejin ka tha ietra kö. Celë hi matre, qëmekene troa upetröneë la ketre atr, itre qatre thup a pane mekune hnyawa. Tha angatre kö a wangacone la hna amekötin cili. Atre hi angatr laka, Iehova a hajine “thenge la meköt.” (Iere. 30:11) Ketre, itre qatre thup a hnime la itre trejin. Tha aja i angatre kö tro la itre trejin a iananyi me Iehova. Ngo ame itre xaa ijin, hatrene ihnim me utipine kowe la atr ka tria, e troa pane upetröneë angeic.

13. Pine nemene matre hna upetröneë la ketre Keresiano ne Korinito?

¹³ Hanawang la hna amekötin hnei Paulo kowe la angetre Korinito, göne la ketre trejin ka xome la föe ne la keme i angeic, nge tha hnei angeice kö hna ietra. Atre hi Paulo la hna qaja hnei Iehova kowe la angetre Isaraela, ka hape: “Ame la ate ce meköle memine la ifënekö ne la keme i angeic, te, hnei angeice hna fe la gö ne la keme i angeic; tro ha ce humuthe lu’ ej’ asë.” (Lev. 20:11) Nyipici, tha hnei Paulo kö hna amekötin troa humuthe lai Keresiano. Hnei nyidrëti pe hna qaja kowe la angetre Korinito troa upetröneë angeic ke, kolo ha kapa la ngazo i angeic hnene la itre xaa trejin!—1 Kor. 5:1, 2, 13.

14. Thenge la 2 Korinito 2:5-8, 11, tune kaa la aqane utipine Paulo la Keresiano ne Korinito hna upetröneë, nge pine nemen?

¹⁴ Thupene lai, hnei Paulo hna dreng ka hape, hnene lo Keresiano hna upetröneë hna ietra qa ngöne la huliwa i angeic ka sis. Ngacama ka hetre ethane la aqane ujë i angeic kowe la ekalesia, ngo hnei Paulo hna qaja kowe la itre qatre thup ka hape, tha tro kö a “hamëne la itre ithanata ka catr.” Öni nyidrëti pe: “Nue hnyawane pi la ngazo i angeic, nge akeukawanyi angeice jë.” Pine nemen? Öni nyidrëti hmaca: “Wanga heti angeice jë hnei hleuhleu.” Eje hi, hnei Paulo hna  utipine lai Keresiano ka ietra. Tha aja i nyidrëti kö tro angeic a hleuhleu, me sewe angeic troa bëeke koi Akötresie.—E jë la 2 Korinito 2:5-8, 11.

15. Tune kaa la aqane tro la itre qatre thup a hajine me utipine la ketre trejin?

¹⁵ Tui Iehova, itre qatre thup a hnim me utipine la itre trejin. Ngo maine ka nyipiewekë, angatr a hajin. Nge maine ijij, angatr a utipin. Celë hi matre, ame la itre qatre thup a amekötin la ketre trejin, loi e tro angatr a tuluth la aqane troa utipi angeic. Tha tro kö a wangacone la ngazo hna kuca. Hapeu, itre qatre thup hmekuje hi la ka troa utipine la itre xan?

16. Thenge la Ite Edomë 21:13, nemene la hna troa kuca hnei Iehova kowe la itre ka pë hni ne utipin?

¹⁶ Tui Iehova, itre Keresiano a ajane troa utipine la itre xan. Pine nemen? Pine laka, tha Iehova kö a wangatrune la itre ka pë hni ne utipin. (E jë la Ite Edomë 21:13.) Tha tro kö Nyidrëti a drenge la itre thithi angatr. Celë hi matre, tha tro kö sa calogitr me pë hni ne utipin. Tha tro kö sa wangacone la itre trejin ka akötr. Ngo loi e tro pe sa drenge “la aqane teije ne la ate pë ewekë.” Ketre, Tusi Hmitrötr a hmekë së ka hape: “Ame la atre tha majemine iutipi, tha tro kö a utipi angeic ngöne la ijine iameköti.” (Iako. 2:13) Maine easa ajane troa hane utipi së, loi e tro sa pane amamane la thiina cili koi itre xan, tune la itre ka ietra me bëeke koi Iehova.

17. Tune kaa la aqane amamane Dravita joxu la hni ne utipine i nyidrë?

¹⁷ Tusi Hmitrötr a qaja la tulu ne la itre hlue i Iehova ekö ka hetre utipin, tui Dravita joxu. Ngacama hnei Saulo hna thele troa humuthi Dravita, ngo hnei Dravita palahi hna utipi nyidrë ke, nyidrëti la siana i Iehova. Ketre, tha hnei Dravita kö hna thele troa akötrë Saulo me të la ngazo hna kuca koi angeic.—1 Sam. 24:9-12, 18, 19.

18-19. Eu la ijine Dravita a pë hni ne utipin?

¹⁸ Ame la ketre ijin, hnei Nabala hna ithanata akökötrenyi koi Dravita. Nge tha hnei angeice kö hna hamë xen koi Dravita me itre sooce i nyidrë. E cili, hnei Dravita hna elëhni me thele troa humuthi Nabala me itre hlue i angeic. Eloine pe, hnei Abigaila, föe i Nabala, hna sewe Dravita troa humuthi angeic.—1 Sam. 25:9-22, 32-35.

¹⁹ Ame pena la ketre ijin, hnei Nathana perofeta hna qaja koi Dravita ka hape, hnene la ketre atr ka trenamo hna atrekënö la neköi mamoe ne la ketre atr ka pë ewekë. E cili, hnei Dravita hna elëhni me hape: “Loine Iehova, a ijije troa meci la ate kuca lai!” (2 Sam. 12:1-6) Atre hnyawa hi Dravita la Wathebo i Mose. Maine tro la ketre atr a atrekënö la mamoe i ketre, tro angeic a nyihnan ej hnei  4 lao xaa mamoe. Ngo tha tro kö a humuthi angeic. (Eso. 22:1) Hnei Nathana perofeta hna qaja la ceitune celë, matre amamane koi Dravita laka, tru catre la ngazo i angeic! Eje hi, hnei Iehova hna utipi Dravita, ngo tha hnei angeice kö hna utipine lo ka atrekënö mamoe!—2 Sam. 12:7-13.

20. Nemene la ini hne së hna xom qa ngöne la tulu i Dravita?

²⁰ Hnei Dravita hna elëhni me mekun troa humuthi Nabala me itre hlue i angeic. Hnei angeice fe hna mekun troa humuthe lo atr ka atrekënö mamoe. Ame pe, ketre atr ka loi thiina Dravita. Ngo hnauëne laka, catr la aqane amekötine nyidrë lo ka atrekënö mamoe? Ke ame lo ijine cili, kola huliwa la mekuthetheu i Dravita. Eje hi, maine tro palahi sa waigele itre xan me qaja angazo angatr ke, kolo lai a hape, ka nanazije la lapaune së. Öni Iesu kowe la itretre drei nyidrë: “Ea loi ju hë hna iwaigele, matre tha tro kö Akötresieti a hane waigele nyipunie. Ke ame la aqane iwaigele i nyipunie, tre tro ha waigele nyipunieti tun.” (Mat. 7:1, 2) Haawe, loi e tro sa thupën matre tha tro kö a catr la aqane amekötine së la itre xan. Ngo nyipiewekë troa hetre hni ne utipin tui Akötresie.

21-22. Tune kaa la aqane tro sa amamane la hni ne utipine së?

²¹ Ame la troa utipin ke, tha tro hmekuje kö a qaja, ngo loi e tro fe a amamane ngöne la aqane ujë. Haawe, catre jë së utipine la itre ka aja ixatua e hnine la ekalesia me ngöne la fami së. Maine jë, tro sa kuci xen, maine xomi ijine troa ithuecatr kowe la ketre trejin ka bëeke koi Iehova. Ketre, ijije fe tro sa akeukawane la hni ne la itre atr jëne la maca ka loi. Celë hi aqane tro sa utipine la itre xan.—Iobu 29:12, 13; Rom. 10:14, 15; Iako. 1:27.

²² Eje hi, nyimutre la itre aqane tro sa utipine la itre xan. Ame la easa amamane la thiina cili, easë lai a amadrinë Iehova Keme së, Atre utipine la nöjei atr asë!